havas ham paar hoein kyunki dariyaa-e-mohabbat se — Mirza Mohammad Taqi Hawas

talaash is tarah bazm-e-aish mein hai be-nishaanon ki
koi kapDe mein jaise zakhm-e-sozan kaa nishaan DhunDhe

aashnaa koi nazar aataa nahin yaan ai 'havas'
kis ko main apnaa anis-e-kunj-e-tanhaai karun

sab ham-safir chhoD ke tanhaa chale gae
kunj-e-qafas mein mujh ko giraftaar dekh kar

dekhein kyaa ab ke asiri hamein dikhlaati hai
log kahte hain ki phir fasl-e-bahaar aati hai

dil mein ik iztiraab baaqi hai
ye nishaan-e-shabaab baaqi hai

sahraa mein 'havas' khaar-e-mughilaan ki madad se
baare miraa khuun har khas-o-khaashaak ko pahunchaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

donon aankhein dil jigar hain ishq hone mein sharik
ye to sab achchhe raheinge mujh par ilzaam aaegaa

kaar-e-duniyaa ko bhi kaar-e-ishq mein shaamil samajh
is liye ai zindagi teri pata rakhtaa huun main

ki mohabbat to siyaasat kaa chalan chhoD diyaa
ham agar ishq na karte to hukumat karte

sakht jaan-levaa hai saadgi mohabbat ki
zahr ki kasauTi par zindagi ko kasti hai