tiri gali ke jo phir aas-paas rahne lagaa — Mudassir Naqvi

kisi ke saath ki koi zarurat ab nahin hoti
tumhaari yaad ke mausam sadaa aabaad rahte hain

ye aur baat ki tujh ko bataa na paae ham
magar zabaan pe bahut baar teraa naam aayaa

achchhaa hai zindagi kisi dar par to aa gai
apnaa nahin to koi paraayaa hi mil gayaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

meri aaankhon mein kisi ne nahin dekhe aansu
phir bhi ye sach hai ki giryaan huun hamesha ki tarah

gham-e-dauraan gham-e-jaanaan kaa nishaan hai ki jo thaa
vasf-e-khubaan ba-hadis-e-digraan hai ki jo thaa

gham ko ehsaas ki miTTi mein khudaa ne gundhaa
aur kuchh ashk milaae to phir insaan kiyaa