das biis har mahine mein abru nazar paDe — Muneer Shikohabadi

khuub taazir-e-gunaah-e-ishq hai
naqd-e-jaan lenaa yahaan jurmaana hai

sunti hai roz naghma-e-zanjir-e-aashiqaan
vo zulf bhi hai silsila-e-ahl-e-chisht mein

jis roz main gintaa huun tire aane ki ghaDiyaan
suraj ko banaa deti hai sone ki ghaDi baat

haath milvaate ho tarsaae gilauri ke liye
kaf-e-afsos na mal jaae kahin paanv mein

jab kabhi maski kaTori kyaa sadaa paidaa hui
karti hai angiyaa ki chiDiyaa chahchahaane ki havas

ho gayaa maamur aalam jab kiyaa darbaar-e-aam
takhliya chaahaa to duniyaa saaf khaali ho gai

pyaaso raho na dasht mein baarish ke muntazir
maaro zamin pe paanv ki paani nikal paDe

jo meri chashm ke parde sharik ho jaate
kamaal-e-daaman-e-abr-e-bahaar baDh jaataa

baadal ke ek TukDe mein kyon dab gai tapish
suraj hazaar darja jalaali banaa rahaa

baraabar khafaa hon baraabar manaaein
na tum baaz aao na ham baaz aaein

sardi bhi khatm ho gai barsaat bhi gai
aur is ke saath garmi-e-jazbaat bhi gai

kyaa hamsari ki ham se tamannaa kare koi
ham khud bhi apne qad ke baraabar na ho sake