ishq tu bhi zaraa Tikaa le kamar — Naeem Zarrar Ahmad

ishq vo chaar su safar hai jahaan
koi bhi raasta nahin ruktaa

maan TuuTe to phir nahin juDtaa
bad-gumaani kabhi na aa ke gai

main vo mahrum-e-inaayat huun ki jis ne tujh se
milnaa chaahaa to bichhaDne ki vabaa phuuT paDi

jitni aankhein thiin saari meri thiin
jitne manzar the sab tumhaare the

main khud ko saamne tere biThaa kar
khud apne se gila kartaa rahaa huun

yaa husn hai naa-vaaqif-e-pindaar-e-mohabbat
yaa ishq hi aasaani-e-atvaar mein gum hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

gilaa bhi tujh se bahut hai magar mohabbat bhi
vo baat apni jagah hai ye baat apni jagah

ye taasir mohabbat hai ki Tapkaa
hamaaraa khuun tumhaari guftugu se

'ishq ki ibtidaa bhi tum husn ki intihaa bhi tum
rahne do raaz khul gayaa bande bhi tum khudaa bhi tum

ishq-vishiq ye chaahat-vaahat man kaa bhulaavaa phir man bhi apnaa kyaa
yaar ye kaisaa rishta jo apnon ko ghair kare maulaa khair kare