ghar lauT ke roeinge maan baap akele mein — Qaisarul Jafri

zindagi bhar ke liye ruuTh ke jaane vaale
main abhi tak tiri tasvir liye baiThaa huun

havaa khafaa thi magar itni sang-dil bhi na thi
hamin ko shama jalaane kaa hausla na huaa

divaaron se mil kar ronaa achchhaa lagtaa hai
ham bhi paagal ho jaaeinge aisaa lagtaa hai

kitne dinon ke pyaase honge yaaro socho to
shabnam kaa qatra bhi jin ko dariyaa lagtaa hai

tu is tarah se mire saath bevafaai kar
ki tere baa'd mujhe koi bevafaa na lage

tumhaare shahr kaa mausam baDaa suhaanaa lage
main ek shaam churaa luun agar buraa na lage

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi