ai gham-e-duniyaa tujhe kyaa ilm tere vaaste — Sahir Ludhianvi

le de ke apne paas faqat ik nazar to hai
kyuun dekhein zindagi ko kisi ki nazar se ham

ham jurm-e-mohabbat ki sazaa paaeinge tanhaa
jo tujh se hui ho vo khataa saath liye jaa

ham amn chaahte hain magar zulm ke khilaaf
gar jang laazmi hai to phir jang hi sahi

hazaar barq gire laakh aandhiyaan uTThein
vo phuul khil ke raheinge jo khilne vaale hain

kaun rotaa hai kisi aur ki khaatir ai dost
sab ko apni hi kisi baat pe ronaa aayaa

milti hai zindagi mein mohabbat kabhi kabhi
hoti hai dilbaron ki inaayat kabhi kabhi

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ashk-e-gham le ke aakhir kidhar jaaein ham aansuon ki yahaan koi qimat nahin
aap hi apnaa daaman baDhaa dijiye varna moti zamin par bikhar jaaeinge

hai duaa yaad magar harf-e-duaa yaad nahin
mere naghmaat ko andaaz-e-navaa yaad nahin

main talkhi-e-hayaat se ghabraa ke pi gayaa
gham ki siyaah raat se ghabraa ke pi gayaa