Sabir Zafar

دن کو مسمار ہوئے رات کو تعمیر ہوئے خواب ہی خواب فقط روح کی جاگیر ہوئے عمر بھر لکھتے رہے پھر بھی ورق سادہ رہا جانے کیا لفظ تھے جو ہم سے نہ تحریر ہوئے یہ الگ دکھ ہے کہ ہیں تیرے دکھوں سے آزاد یہ الگ قید ہے ہم کیوں نہیں زنجیر ہوئے دیدہ و دل میں ترے عکس کی تشکیل سے ہم دھول سے پھول ہوئے رنگ سے تصویر ہوئے کچھ نہیں یاد کہ شب رقص کی محفل میں ظفرؔ ہم جدا کس سے ہوئے کس سے بغل گیر ہوئے

din ko mismaar hue raat ko taamir hue

کوئی تو ترک مراسم پہ واسطہ رہ جائے وہ ہم نوا نہ رہے صورت آشنا رہ جائے عجب نہیں کہ مرا بوجھ بھی نہ مجھ سے اٹھے جہاں پڑا ہے زر جاں وہیں پڑا رہ جائے میں سوچتا ہوں مجھے انتظار کس کا ہے کواڑ رات کو گھر کا اگر کھلا رہ جائے کسے خبر کہ اسی فرش سنگ پر سو جاؤں مرے مکان میں بستر مرا بچھا رہ جائے ظفرؔ ہے بہتری اس میں کہ میں خموش رہوں کھلے زبان تو عزت کسی کی کیا رہ جائے

koi to tark-e-maraasim pe vaasta rah jaae

میں ایک ہاتھ تری موت سے ملا آیا ترے سرہانے اگربتیاں جلا آیا مہکتے باغ سا اک خاندان اجاڑ دیا اجل کے ہاتھ میں کیا پھول کے سوا آیا ترا خیال نہ آیا سو تیری فرقت میں میں رو چکا تو مرے دل کو صبر سا آیا مثال کنج قفس کچھ جگہ تھی تیرے قریب میں اپنے نام کی تختی وہاں لگا آیا مکان اپنی جگہ سے ہٹا ہوا تھا ظفرؔ نہ جانے کون سا لمحہ گریز پا آیا

main ek haath tiri maut se milaa aayaa

کام اتنی ہی فقط راہ گزر آئے گی ہم سفر جائے گا اور یاد سفر آئے گی دور تک ایک خلا ہے سو خلا کے اندر صرف تنہائی کی صورت ہی نظر آئے گی میں نے سوچا تھا مگر یہ تو نہیں سوچا تھا تیرگی روح کے آنگن میں اتر آئے گی جاگنے والا کوئی سویا ہمیشہ کے لیے اب تو ماتم ہی کرے گی جو سحر آئے گی اک عجب بوئے نفس آتی ہے دیواروں سے اور کچھ روز میں یہ بھی نہ ادھر آئے گی ہائے کیا لوگ تھے زنداں میں بھی ہم سے پہلے اک دن اس یاد کی صورت بھی بکھر آئے گی پڑھ رہا ہوں میں ظفرؔ اس کے بچھڑنے کی خبر اور کچھ روز میں اپنی بھی خبر آئے گی

kaam itni hi faqat raahguzar aaegi

قسمت میں اگر جدائیاں ہیں پھر کیوں تری یادیں آئیاں ہیں یاں جینے کی صورتیں ہیں جتنی وہ صورتیں سب پرائیاں ہیں فریاد کناں نہیں بس اک میں چاروں ہی طرف دہائیاں ہیں ہر درجے پہ عشق کر کے دیکھا ہر درجے میں بے وفائیاں ہیں اک تیرا برا کبھی نہ چاہا گو ہم میں بہت برائیاں ہیں تقریب وصال یار ہے کیا کوچے میں ترے صفائیاں ہیں اس نے بھی کسر کوئی کوئی چھوڑی ہم نے بھی بہت سنائیاں ہیں اب اور کہیں کا رخ کریں آپ اس جگ میں تو جگ ہنسائیاں ہیں کیسے کریں بندگی ظفرؔ واں بندوں کی جہاں خدائیاں ہیں

qismat mein agar judaaiyaan hain

واقف خود اپنی چشم گریزاں سے کون ہے مانوس اب مرے دل ویراں سے کون ہے کس کو خبر ہے کس گھڑی آنکھیں چھلک پڑیں اب آشنا تہیۂ طوفاں سے کون ہے دیکھیں جسے خلل ہے اسی کے دماغ میں سرشار اب تصور جاناں سے کون ہے وہ ظلم شہر میں ہے کہ اندھیر ہے کوئی وابستہ رسم جشن چراغاں سے کون ہے دیکھو جسے وہی ہے گرفتار آرزو اب دور اس نواح میں زنداں سے کون ہے مقتل میں جس کو اپنے لہو سے جلایا تھا پر نور اس ایک شمع فروزاں سے کون ہے چہروں کی زردیوں سے ظفرؔ ہو موازنہ نزدیک رنگ دشت و بیاباں سے کون ہے

vaaqif khud apni chashm-e-gurezaan se kaun hai