khud ko nashtar aap chubhonaa paDtaa hai — Faisal Tufail

"ye koi baagh nahin phuul khilaae jaaein dasht mein aae hain to khaak uDaae jaaein sab biThaate hain hamein mansab-o-masnad pe magar ham ye chaahein ki tire saath biThaae jaaein ungliyaan kaan mein Thunse hue phirte hain sabhi aap aavaaz lagaate hain lagaae jaaein bas isi shart pe aankhein tumhein de saktaa huun in ko dekhe hue manzar na dikhaae jaaein inhin yaadon ke sahaare hi tiraa hijr kaTe ye parinde miri chhat se na uDaae jaaein aasmaan chhune kaa haq aap kaa taslim hamein kuchh ta'alluq to zamin se bhi nibhaae jaaein"

"zabaan se kuchh na kahaa an-kahi ne saath diyaa kali se milte hue bekali ne saath diyaa ye baat sunte hi aansu nikal paDe the mire mileinge phir se agar zindagi ne saath diyaa udaas shaam akele main jheltaa kaise tumhaari yaad thi aur baansuri ne saath diyaa guzarnaa jaan se aasaan to nahin thaa magar bhalaa ho yaar jo is be-dili ne saath diyaa safar to khair safar thaa guzar hi jaanaa thaa jo tum na aae to ik ajnabi ne saath diyaa vo mujh ko chhoD ke jaataa to mar na jaataa main chalaa gayaa hai magar phir usi ne saath diyaa tumhein ye kis ne kahaa hai diyaa diye se jale main jal rahaa thaa to meraa kisi ne saath diyaa main nasl-e-tirgi ke vaar sah rahaa thaa bahut phir ik charaagh jani raushni ne saath diyaa"

"ik baar jo milaa thaa to khoyaa nahin gayaa is tarh vo gayaa hai ki goyaa nahin gayaa kal raat teri yaad thi kamre mein yaa ki tu is darja raushni thi ki soyaa nahin gayaa mujh ko ye e'tiraaf hai ki naa-tavaan huun main mujh se miraa vujud bhi Dhoyaa nahin gayaa aansu Thahar gae hain mire us ke gaal par shabnam se is gulaab ko dhoyaa nahin gayaa phir main ne qahqahe kaa sahaaraa liyaa hai aaj dukh is qadar ziyaada thaa royaa nahin gayaa vo lutf-e-'ishq ho ki sitam-haa-e-rozgaar mujh ko kisi laDi mein piroyaa nahin gayaa phir kis samar ki tum ho tamanna liye hue gar khud ko bhi zamin mein boyaa nahin gayaa"

"vaqt ki rau ko ravaani se nikaalaa jaae chand lamhon ko giraani se nikaalaa jaae mujh ko to khinch liyaa dast-e-junun ne lekin ab miraa 'aks bhi paani se nikaalaa jaae muddaton us ki raqaabat ko sahaa hai ham ne ab ye kirdaar kahaani se nikaalaa jaae zahr-aalud hui jaati hai khushbu is se saanp ko raat ki raani se nikaalaa jaae phir huaa lashkar-e-fir'aun muqaabil 'faisal' raasta phir koi paani se nikaalaa jaae"

"khaamoshi tiri chikh se ye bhed khulaa hai sannaaTe se bhi lipTi hui koi sadaa hai ai zauq-e-nazar dekh tire saamne kyaa hai kohna hi sahi aankh pe manzar to nayaa hai vo chaand na niklaa to sitaare bhi the gum-sum suraj bhi bahut der se bedaar huaa hai chal tujh ko liye jaataa huun dikhlaane samundar dariyaa miri kashti mein jo tu baiTh gayaa hai vaajib hai ise chuum ke aankhon se lagaaun ik harf jo tasbih-e-mohabbat se giraa hai manzil se kabhi meri shanaasaai nahin thi rasta hi miraa yaar thaa jo ruuTh gayaa hai charchaa hai bahut shahr mein jis mauj-e-numu kaa vo khvaab miri aankh se hi Tapkaa huaa hai ai surat-e-mahtaab tiraa haath bhi aakhir lahron ki ravaani mein kahin chhuT gayaa hai"

"kaise kaise kamaal kartaa huun sang ko ham-khayaal kartaa huun khvaab khud ro hain saare aankhon mein main faqat dekh-bhaal kartaa huun ek hi kaam thaa mohabbat kaa vo bhi ab khaal-khaal kartaa huun kyaa mujhe raaegaan hi jaanaa hai khud se aksar savaal kartaa huun sab manaazir se bach nikalne ko ik takhayyul ko Dhaal kartaa huun meraa ronaa misaal hai lekin raqs bhi be-misaal kartaa huun raushni bhar gai hai yuun mujh mein chaand ko dil khayaal kartaa huun"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"