Ghazal

"yuun zindagi ke marhale dushvaar ho gae gulshan ke phuul mere liye khaar ho gae suraj mire uruuj kaa jab Dubne lagaa apne tamaam log hi be-zaar ho gae vaaraftagi-e-shauq kaa eajaaz dekhiye shoale hamaare haq mein bhi gulzaar ho gae maidaan-e-kaar-zaar mein jo kuchh na kar sake mahfil mein vo bhi ghaazi-e-guftaar ho gae chaahaa thaa rasm-o-raah baDhe un se par 'majid' haalaat apne biich ki divaar ho gae"

"shisha-e-dil ko fazaa mein na uchhaalo yaaro TuuT kar is ko bikharne se bachaa lo yaaro jism ke zakhm to bhar jaaeinge vaqt aane par ruuh zakhmi hai ilaaj is kaa nikaalo yaaro ku-e-qaatil mein bulaavaa hai ba-sad-shaan chalo aaj zakhmon se badan apnaa sajaa lo yaaro ziist ki talkh-navaai hai mire sheron mein be-tuki kah ke miri baat na Taalo yaaro kulfat-e-zist se mil jaaegi fursat tum ko mere ashaar ko honTon se lagaa lo yaaro"

"rah-e-vafaa mein ba-sad-shauq jab bhi ham nikle qadam qadam pe sabhi maail-e-sitam nikle nahin ye gesu-e-jaanaan ye zulf-e-giti hai har ek biich mein pinhaan hazaaron kham nikle anaa-pasandi-e-fitrat ko ab qaraar kahaan bahisht chhoD ke mushkil safar pe ham nikle mili na manzil-e-jaanaan rakhe na paa-e-talab qadam qadam pe muqaddar ke pech-o-kham nikle junun-e-shauq mein jin ko samajh rahaa thaa khudaa paDaa jo vaqt to miTTi ke vo sanam nikle tamaam umr chale saath phir bhi saath the kab 'majid' khuub tumhaare ye ham-qadam nikle"

"ji mein aataa hai aaina dekhun haal-e-dil us mein khushnumaa dekhun jab haqiqat ho saamne mere kyaa muqaddar kaa main likhaa dekhun vaqt ke be-karaan samundar mein khud ko har lamha Dubtaa dekhun aaj apnon ke biich rishton mein har ghaDi baDhtaa faasla dekhun raah chalte jo mil gayaa thaa 'majid' umr-bhar us kaa raasta dekhun"

"hamein kyaa khabar hai kahaan chhoD aae bahut pichhe ham kaarvaan chhoD aae hamein tu ne bakhshe the gham ke andhere andheron mein ham kahkashaan chhoD aae azal se tabiat thi aavaara apni zamin ke liye aasmaan chhoD aae zamaana hamein bhuul paaegaa kaise har ik dil mein dard-e-nihaan chhoD aae bulaayaa hai tum ne to izzat bhi rakhnaa pas-e-pusht saaraa jahaan chhoD aae 'majid' apne daaman mein kaanTe sajaa kar tumhaare liye gulsitaan chhoD aae"

"jin ke liye zamaane kaa ham zahr pi chale ho kar vo bad-gumaan ba-sad-be-rukhi chale kuchh der Thahriye ki zaraa dil ki baat ho aae abhi abhi hain janaab aur abhi chale ghar se nikal ke ham to sar-e-dasht aa gae dekhein kahaan talak ye gham-e-aashiqi chale jaise kabhi bhi ham se koi vaasta na ho vo chal rahe hain jaise koi ajnabi chale ham rah-ravaan-e-shauq ko manzil se kyaa gharaz ham ko jidhar tumhaari Dagar le chali chale apne lahu se khuub hue surkh-ru 'majid' ham par hazaar sang-e-sitam aaj bhi chale"

"aap shishe kaa gar makaan rakhiye kuchh to mazbut saaebaan rakhiye tinkaa tinkaa bikhar na jaae kahin aandhiyon mein na aashiyaan rakhiye lamha lamha azaab-e-jaan hogaa dard dil mein na yuun nihaan rakhiye sirf apnaa hi gham nahin sab kuchh kuchh khayaal-e-gham-e-jahaan rakhiye haq adaa kijiye sadaaqat kaa aap munh mein agar zabaan rakhiye log barson kareinge yaad 'majid' lafz mein dard-e-be-karaan rakhiye"

"ham Thahre barbaad-e-mohabbat aalam saaraa jaane hai dil pe hamaare kyaa guzre hai dil hi hamaaraa jaane hai ai saahil se dekhne vaalo tum ko ye maalum nahin Dubne vaalaa kyon tinke ko apnaa sahaaraa jaane hai tum kyaa jaano ishq-e-butaan ko tum ne ishq kiyaa kab hai un ki adaa-e-jaur-o-sitam ko dard kaa maaraa jaane hai ham bhi haqiqat jaan rahe hain baiThe baiThe khvaabon ki vo hai nazar kaa dhokaa jis ko dil ye nazaaraa jaane hai galiyon galiyon phirtaa hai jo dil mein tumhaari yaad liye duniyaa us ko paagal samjhe aur bechaara jaane hai aap ise samjhein na samjhein ham ko hai maalum 'majid' koi to hai jo ham ko abhi tak aankh kaa taaraa jaane hai"

"ab charaaghon mein zindagi kam hai dil jalaao ki raushni kam hai taab-e-nazzaara hai vahi lekin un ke jalvon mein dilkashi kam hai badlaa badlaa mizaaj hai us kaa us ki baaton mein chaashni kam hai kaif-o-masti surur kyaa maani zindagi mein bhi ab khushi kam hai vaqt ne bhar diye hain zakhm 'majid' apni aankhon mein ab nami kam hai"

"tapte hue sahraa mein shajar DhunD rahaa huun koi to mile ahl-e-nazar DhunD rahaa huun kyaa baat hai jo baat hi banti nahin apni main apni duaaon mein asar DhunD rahaa huun vo ek nazar chiir ke rakh de jo jigar ko mahfil mein vahi tir-e-nazar DhunD rahaa huun soi soi maujon mein jo halchal si machaa de tufaanon mein vo zer-o-zabar DhunD rahaa huun haalaat ne har chiiz ki pahchaan miTaa di main gaanv mein ab apnaa hi ghar DhunD rahaa huun elaan-e-sadaaqat kaa amiin ban ke uThe jo neze pe 'majid' aaj vo sar DhunD rahaa huun"

"dil ko tiraa khayaal tiri justuju rahe maqsad miri hayaat kaa bas tu hi tu rahe aae kabhi na dil mein kisi ghair kaa khayaal honTon pe subh-o-shaam tiri guftugu rahe meri nigaah-e-shauq tujhe DhunDhti rahi vaise to aas-paas kai maah-ru rahe ik din zarur aaeinge vo mere khvaab mein is intizaar-e-yaar mein ham baa-vazu rahe duniyaa ki ranjishon ki shikaayat karein to kyaa khud apne hi nasib se ham du-badu rahe de kar gai hai baad-e-sabaa ye duaa 'majid' sher-o-sukhan ki bazm ki tu aabru rahe"

"ik aag si siine mein din raat sulagti hai aa jaae koi saavan khvaahish ye machalti hai shabnam ki haqiqat kyaa shab bhar ki kahaani hai uD jaate hain pal-bhar mein jab dhuup nikalti hai us buund ki azmat ko kyaa ahl-e-sitam jaanein ik buund jo aansu ki aankhon se Tapakti hai jal jaate hain parvaane maasum si chaahat mein ye dekh ke shama bhi chup-chaap sisakti hai munh-zor havaaein bhi kyaa us kaa bigaaDeingi rahti hai salaamat vo jo shaakh lachakti hai"

"jaanaa kahaan hai aur kahaan jaa rahe hain ham apnon ki rahnumaai se ghabraa rahe hain ham tum ne to ik nigaah uThaai hai is taraf sau sau umidein baandh ke itraa rahe hain ham naakaam ho ke apni sadaa lauT aaegi ye jaan kar bhi dasht mein chillaa rahe hain ham sab apni apni raah par aage nikal gae ab kis kaa intizaar kiye jaa rahe hain ham na jaane kis ki yaad ne li dil mein gudgudi aaina dekh dekh ke sharmaa rahe hain ham duniyaa ke kaarobaar se matlab nahin 'majid' dil ko khayaal-e-yaar se bahlaa rahe hain ham"

"kahaan shikva zamaane kaa pas-e-divaar karte hain hamein karnaa hai jo bhi ham sar-e-baazaar karte hain zamaane se ravaadaari kaa rishta ab bhi baaqi hai magar saudaa kisi se dil kaa ham ik baar karte hain mahaaz-e-jang par sina-sipar ho kar main chaltaa huun magar buzdil hamesha pusht par hi vaar karte hain nahin milti unhein manzil jinhein khauf-e-havaadis hai jo maujon se nahin Darte nadi ko paar karte hain 'majid' achchhaa nahin hotaa kisi se bhi judaa honaa magar ye rasm-e-duniyaa ham adaa sau baar karte hain"

"dildaar mileinge yahaan gham-khvaar mileinge sachchaai ke lekin na taraf-daar mileinge armaan-bhare dil ko kharidegaa yahaan kaun kahne ko to duniyaa mein kharidaar mileinge paaband-e-vafaa dost to mushkil se milegaa yuun chaahne vaale sar-e-baazaar mileinge ai urdu zabaan aah tiri kaun sunegaa yuun to sabhi ghazlon ke parastaar mileinge is shahr-e-sitam mein agar DhunDeinge 'majid' aap mushkil se kahin saahab-e-kirdaar mileinge"

"mai-kasho mai-kashi ki baat karo ranj-o-gham mein khushi ki baat karo saaraa aalam hi raqs mein gum hai tum bhi kuchh be-khudi ki baat karo kyon udaasi hai aaj mahfil mein ham-nashin dil-lagi ki baat karo jo luTaa baiThe jaan ulfat mein aise ik aadmi ki baat karo chand lamha sukun-e-dil to mile amn aur aashti ki baat karo bhuul jaao tamaam shikve-gile dosto dosti ki baat karo talkhi-e-zist ko bhulaa ke 'majid' husn aur aashiqi ki baat karo"

"kaun kahtaa hai ki haalaat se be-zaar hain ham ai vatan tere liye barsar-e-paikaar hain ham ham se maange na sanad koi vafaadaari ki aazmaaish ke liye har ghaDi tayyaar hain ham ham se baaqi hai abhi rang-e-vafaa phulon mein kaise kahte ho chaman ke liye bekaar hain ham ham ne kab daulat-e-duniyaa ki tamanna ki hai tujh se bas pyaar mohabbat ke talabgaar hain ham ab nahin jaaeinge hijrat ki ridaa oDhe kahin apne aanchal mein chhupaa le ki tiraa pyaar hain ham"

"gharaz-parast rahe jo vo aadmi kyaa hai kisi ke kaam na aae to zindagi kyaa hai hazaar chaand sitaare sajaa do mahfil mein nazar na ho to nazaaron mein dilkashi kyaa hai fareb milte hain aksar vafaa ki raahon mein nibhaa sake na agar koi dosti kyaa hai isi andhere se phuTegi raushni ki kiran charaagh dil kaa jalaao ye tirgi kyaa hai zavaal se na bachaa aaj tak uruuj koi ajal ke saamne insaan ki bartari kyaa hai miTaayaa khud ko to ye raaz jaan paayaa 'majid' ye sher chiiz hai kyaa aur shaaeri kyaa hai"

"kaDi hai dhuup magar saaya-e-shajar hi nahin safar hai saamne aur koi ham-safar hi nahin tabaahiyon kaa to saamaan kar liyaa sab ne tabaahiyon ki magar koi bhi khabar hi nahin jise bhi dekhiye mast-o-alast hai khud mein koi bhi rahmat-e-yazdaan kaa muntazir hi nahin tamaam log khudaa-aashnaa to hain lekin ye aur baat hai sajdon mein ab asar hi nahin main chaahtaa huun fazaaon mein kar sakun parvaaz magar ai dost mire baazuon mein par hi nahin"

"khaamosh ho gai thi zabaan dekhte rahe har samt aag aur dhuaan dekhte rahe dekhaa jidhar jidhar mujhe manzar vahi milaa gardan ko zer-e-nok-e-sinaan dekhte rahe Dhote rahe hain laasha-e-fasl-e-bahaar ko gulshan mein daur-e-baad-e-khizaan dekhte rahe qiston mein toDti rahi dam lashkari zabaan ahl-e-qalam sab ahl-e-zabaan dekhte rahe mahfuz kab rahe vo zamaane ki chaal se har moD par jo sud-o-ziyaan dekhte rahe pahunche 'vali' ke shahr mein ik roz ham 'majid' barpaa thaa hashr aah-o-fughaan dekhte rahe"

"miTaa ke mujh ko use ashk-baar honaa thaa ye saaneha bhi ajab mere yaar honaa thaa vo haar kar bhi mire dil ko jiit letaa magar use to apni anaa kaa shikaar honaa thaa ajab junun thaa tesha uThaa liyaa ham ne ye kaam ishq mein be-ikhtiyaar honaa thaa nadi ne ki thi Dubone ki saazishein kyaa kyaa kabhi bhanvar to kabhi tez dhaar honaa thaa tamaam umr sataayaa usi ne ham ko 'majid' jise hamaare liye gham-gusaar honaa thaa"

"dil mein jo basaai thi vo tasvir nahin hai ye husn mire khvaabon ki taabir nahin hai suntaa hi nahin vo miri kyaa mujh se khafaa hai yaa meri duaa mein abhi taasir nahin hai mahfil mein kai husn ke paikar to hain lekin koi bhi mire vaaste dil-gir nahin hai khilne ko to khilte hain kai phuul chaman mein har phuul ki haan ek si taqdir nahin hai mahfuz rahe gardish-e-dauraan se hamesha duniyaa mein koi aisi bhi taamir nahin hai is dil pe kare kaun 'majid' aa ke hukumat dil ki hai ye duniyaa koi jaagir nahin hai"

"tiri yaadon ke saae mein hamaare din guzarte hain tujhe ham chaahte the kal tujhi pe aaj marte hain mohabbat kaa ye rishta toDnaa aasaan nahin hargiz magar haalaat ki baazigari se ham bhi Darte hain ye baadal bhi guzar jaate hain sahraaon se bin barse magar sarsabz vaadi mein ye be-mausam baraste hain hamaare vaaste baad-e-sabaa ban kar vo aaegaa yahi armaan liye gin gin ke taare subh karte hain isi ummid par har mausam-e-gul ko sadaaein diin na-jaane kab hamaari zindagi ke din sanvarte hain 'majid' aasaan nahin hai un ke vaadon kaa vafaa honaa jo khushbu ki tarah uD kar fazaaon mein bikharte hain"

"bevafaa kahiye baa-vafaa kahiye dil mein aae jo barmalaa kahiye un ke zulm-o-sitam kaa kyaa shikva husn ki shokhi-e-adaa kahiye de diyaa dil kisi sitamgar ko aap chaahe use khataa kahiye har khushi kaa nikhaar hai us mein lazzat-e-gham ko aur kyaa kahiye dil kabhi us ko maantaa hi nahin aap khud ko na bevafaa kahiye apne daaman ki kuchh khabar hai 'majid' soch kar khud ko paarsaa kahiye"