Ghazal

"harim-e-dil se yaa arsh-e-barin se tumhein ham DhunD laaeinge kahin se huaa marne pe aaghaaz-e-mohabbat shurua hotaa hai ye qissa yahin se bujhe dil kaa charaagh ai shama-ru aaj jalaa de apne ru-e-aatishin se jo us ki justuju mein ghar se nikle to khud khoe gae duniyaa-o-din se miri taqdir aisi chaandni mein jo chamkegi to tum si mah-jabin se sadaa us baam tak ab bhi na pahunchi pukaar aae use arsh-e-barin se falak se pahle hi kuche mein un ke nipaT lenaa paDaa ham ko zamin se chhupe chori jo kuchh kartaa hai zaahid khulaa raaz us kaa us parda-nashin se tiri angDaaiyaan kahti hain mujh se tujhe kuchh milne vaalaa hai kahin se"

"ghubaar-e-maasiyat ki is tarah ki shust-o-shu barson mai-e-saaqi se ai zaahid kiyaa main ne vuzu barson zabaan-e-be-zabaani ham se baDh kar kaun samjhegaa tiri tasvir se furqat mein ki hai guftugu barson na pyaas apni bujhegi baada-e-kausar se jannat mein rahegi ruuh meri kushta-e-jaam-o-subu barson"

"nashshe mein hain kabhi to kabhi hain khumaar mein achchhi guzar rahi hai tire intizaar mein guzregaa roz-e-hashr bhi ab intizaar mein shaamil hai ye bhi vaada-e-fardaa-e-yaar mein chup-chaap bhi na baiTh sake bazm-e-yaar mein majburiyaan bhi ghair ke thiin ikhtiyaar mein taare bhi jhilmilaa ke ba-hasrat hue ghurub kyaa kyaa bujhe charaagh shab-e-intizaar mein toDe subu ko khaak ki ab mohtasib ko bhi khud lutf aa rahaa hai shikast-e-khumaar mein ai chashm-e-shauq jalva-e-mahbub ke sivaa kyaa kyaa na dekhnaa hai tujhe intizaar mein laakhon qafas hain laaegi kis kis mein bu-e-gul chaDhne lagegi saans sabaa ki bahaar mein"

"mire dil se aakhir vo baahar kahaan hain raqib apne apne hi vahm-o-gumaan hain paDin bhi to kyaa mujh pe sharmaai nazrein na ye jaan-fazaa hain na ye jaan-sitaan hain milegaa vo kucha to aavaargi se miri rahnumaa meri gumraahiyaan hain"

"chehre tak un ke mast gai be-khabar gai jab jab gai nigaah ba-nau-e-digar gai dushvaar ho gae hain ishaare bhi zo'f mein is kaam se bhi ab to hamaari nazar gai saamaan-e-gham bhi hijr ki shab muntashir huaa taDpe to aansuon ki laDi bhi bikhar gai go jis ki justuju thi vo yusuf nahin milaa lekin miri nigaah se duniyaa guzar gai yusuf ko saste daam zulekhaa ne le liyaa taqdir thi ki husn ki qimat Thahar gai"

"kar de be-khud sunghaa ke zulf ki bu chhin le aaj mujh ko tu mujh se yaad us chashm-e-mast ki aai chhin lo saaghar-o-subu mujh se hain ishaare ye mauj-e-mai ke 'shamim' kar bhi lo aaj tum vuzu mujh se"

"rindon mein yuun hi bakhshish-e-pir-e-mughaan rahe ho laakh qaht phir bhi ye dariyaa ravaan rahe rukhsat hon vo to ashk musalsal ravaan rahe yusuf ke saath saath lagaa kaarvaan rahe bijli bhi is ke Dar se giregi na baaghbaan haan haan tiri nazar mein miraa aashiyaan rahe"

"pi ke chullu mein to maikhaane se ham uThte nahin le na lein saaqi se jab tak jaam-e-jam uThte nahin rahnumaa is had se aage tu hi khud ai shauq ho thak gae hain khizr ab un ke qadam uThte nahin raah-e-be-paayaan thi vajh-e-garm-raftaari 'shamim' qurb-e-manzil ne thakaayaa ab qadam uThte nahin"

"yuun aashiyaan ko dekh rahe hain qafas se ham goyaa ye koi phuul hai fasl-e-bahaar kaa masti mein khinch lete hain zindaan-e-mai-parast daaman pakaD ke rahmat-e-parvardigaar kaa laakhon musibatein hain magar phir bhi roz-e-hashr mahbub hai ki din hai tire intizaar kaa ai be-khudi bhaTak ke chale aae khuld mein ham raasta hi bhuul gae ku-e-yaar kaa sab kuchh ise mile jo ye ho jaae naa-umid bas aasraa hai ye tire umid-vaar kaa"

"leinge uchak ke baada-e-kausar kaa jaam bhi pahunchaa jo haath daaman-e-abr-e-bahaar tak rindo bharaa hai jaam ye jam tak ke haath mein miT miT gae hain is ke to naqsh-o-nigaar tak allaah re ghurur pahante nahin kabhi gardan jhukaa ke aap to phulon kaa haar tak"

"nasha aataa hai to phir vaaz bhi kah lete hain pi ke ham aur bhi hushiyaar hue jaate hain tegh ki un ko pae-qatl zarurat kyaa hai khud hi khinch khinch ke vo talvaar hue jaate hain mast aankhon ke ishaare mujhe dete hain ye tanz be-piye aap to sarshaar hue jaate hain misl-e-mansur jinhein haq ne kiyaa hai haq-go aur bebaak sar-e-daar hue jaate hain"

"jahaan dekhte hain jidhar dekhte hain faqat ik fareb-e-nazar dekhte hain ye sayyaad ko kyon pasand aae itnaa mire ham-navaa mere par dekhte hain ishaara jo paaein to tum ko bhi dekhein abhi to tumhaari nazar dekhte hain nazar-baaz ban kar shamim us gali mein tamaashaa-e-ahl-e-nazar dekhte hain"

"jinhein tere haaron mein gundhaa gayaa hai bhalaa kab hain vo phuul murjhaane vaale tum apnaa unhein kushta-e-naaz samjho abhi ji uTheinge ye mar jaane vaale mataa-e-dil-o-jaan karein nazr pahle kuchh apnaa bhi khoein unhein paane vaale"