Ghazal

"tere maikhaane kaa ye bhi ajab dastur hai saaqi koi tishna-dahan masti mein koi chuur hai saaqi dilon ke rabt-e-paiham ko khudaa qaaem rakhe hamdam na main huun duur saaqi se na mujh se duur hai saaqi bahal jaae jahaan dil hai vahi jannat haqiqat mein jo dil insaan kaa le le vo insaan huur hai saaqi na le mukhtaariyon se kaam tu us ke muqaabil mein tere mai-kash ke siine mein dil-e-majbur hai saaqi miri khuddaariyaan bad-kaifiyon se dab nahin saktin agarche shisha-e-dil apnaa chaknaa-chur hai saaqi tiri jaadu bhari aankhon ne aisi mai pilaai hai hamaari zindagi ki zindagi makhmur hai saaqi Thikaana hi nahin koi mire armaan-e-masti kaa na ye mahdud hai saaqi na vo mahsur hai saaqi jahaan haajat na mai ki hai na shishe ki na saaghar ki abhi vo manzil-e-hasti nihaayat duur hai saaqi inaayat se pilaa de rind-e-khud-atvaar 'akmal' ko tiri dariyaa-dili kaunain mein mashhur hai saaqi"

"zamaane mein gham-e-ulfat ke divaane bahut se hain sharaab-e-aish-o-ishrat ke bhi mastaane bahut se hain hamaare gham se naa-vaaqif kai ahbaab hain ab tak hai ye hairat ki khud apnon mein begaane bahut se hain miri divaangi ne mujh ko pahunchaayaa vahaan aakhir jahaan divaane kam hain aur farzaane bahut se hain mohabbat kaa bhi kyaa iqbaal hai vahshat ki duniyaa mein hai aabaadi bahut kam aur viraane bahut se hain zaraa baDh kar to dekh aakhir ye dastak dar pe di kis ne dil-e-majbur tere jaane pahchaane bahut se hain hai khud-bini ki hasrat to chale aao mire dil mein ye vo gosha hai jis mein aaina-khaane bahut se hain piye jaataa huun saaqi teri kaif-aavar nigaahon se agarche mai-kade mein tere paimaane bahut se hain hazaaron laakhon nazraanon kaa nazraana hai sirf ik dil tujhe dene ke qaabil yuun to nazraane bahut se hain tire kucha mein jiinaa hai tire kucha mein marnaa hai uDaani hi agar ho khaak viraane bahut se hain charaagh-e-maarifat ko ab na karnaa chaahiye raushan bahut kam khaas hain aur aam parvaane bahut se hain haram jaane se pahle hai buton kaa toDnaa laazim tumhaare dil mein bhi 'akmal' sanam-khaane bahut se hain"

"be-talab ziist agarche koi dushvaar nahin kaun aisaa hai jo duniyaa kaa talabgaar nahin mahfil-e-ghair mein kar haal-e-dil un se na bayaan mauqa-e-zabt hai ye mauqa-e-izhaar nahin dost ahbaab kaa kyaa zikr bure vaqton mein maut bhi to kisi be-kas ki taraf-daar nahin vaqt ke saath badaltaa hai azaaem apne yaani insaan khud apnaa hi vafaadaar nahin had se zaaid kabhi baDhtaa hai kabhi hotaa hai kam dil hai khuddaar magar dard hi khuddaar nahin kal to TuuTe hue dil bech liye yaaron ne aaj kaa vaqt to yusuf kaa kharidaar nahin khaar-o-gul hasb-e-zarurat hain chaman mein 'akmal' fitraton se mujhe kuchh un ki sarokaar nahin"

"kab tire zikr se dil shaad nahin kab mire lab pe tiri yaad nahin puchhiye mujh se na haal-e-maazi kyaa sunaaun mujhe kuchh yaad nahin vo nigaahon kaa tasaadum sar-e-raah mujh ko hai yaad tujhe yaad nahin ishq aur husn hadon mein apne donon paaband hain aazaad nahin jis se zaahir na hon jazbaat-e-dil sher vo mustahiq-e-daad nahin istaqaamat nahin jis ko haasil vo to dhoka hai tiri yaad nahin gulshan-e-ilm-o-adab mein 'akmal' hazrat-e-‘qadr’ saa ustaad nahin"

"maqaam-e-aadmiyyat imtihaan ki manzil hai kisi ke vaaste aasaan kisi ko mushkil hai nahin fareb-e-khulus aur khulus mein koi farq ba-yak nigaah karein imtiyaaz mushkil hai yahin se raaste imkaan ke nikalte hain hamaaraa qalb-e-musaffaa ik aisi manzil hai miraa rafiq talavvun-mizaaj hai apnaa kabhi hai barq taDapti hui kabhi dil hai yahi vo dil hai jo be-maut maartaa hai hamein hamaare siine ke andar hamaaraa qaatil hai hamaare 'azm pe mauquf hai qiyaam-e-safar chalein to raasta hai ruk gae to manzil hai zabaan se kyon kahe vo baat dil ki tu jo sune khamosh is liye har vaqt teraa saail hai charaagh kaun jalaataa hai chaudhvin shab mein hamaari bazm ki qindil maah-e-kaamil hai sukun nasib ba-zaahir mujhe magar 'akmal' vatan ke vaaste siine mein dil to bismil hai"

"ek nai ziist liye aaj ajal aai hai qaid se ham ne rihaai hi kahaan paai hai us se milne ke liye is qadar ai dil na taDap meraa izhaar-e-mohabbat miri rusvaai hai inqilaabaat-e-zamaana ko zamaana samjhe ham to kahte hain ki vo bhi tiri angDaai hai jis ke shoalon se hui husn ki rangat raushan aag aisi mire jazbaat ne sulgaai hai ham ne armaanon ki mayyat ko diyaa hai kaandhaa ai gham-e-dil ye tiri hausla-afzaai hai hai ye Dar nuuh kaa tufaan na samajh le duniyaa chaadar-e-ashk-e-vafaa ham ne jo phailaai hai aaina-khaana-e-dil mein vo zarur aaeinge un ke dil mein bhi tamanna-e-khud-aaraai hai haath se saaqi ke piinaa hi paDegaa mujhe ab meri tauba-shikani ban ke ghaTaa chhaai hai 'akmal' insaan vo akmal hai ba-faiz-e-fitrat dard-e-insaan se jis insaan ki shanaasaai hai"

"bharosa phulon kaa kaanTon kaa eatibaar nahin taayyunaat ke khaake hain ye bahaar nahin main kaise aap ke vaade kaa eatibaar karun huzur jab mujhe khud apnaa eatibaar nahin mire shuur-e-mohabbat ki jis se zillat ho khudaa ke fazl se aisaa miraa shiaar nahin vo but-kada ho ki kaaba ho yaa ki mai-khaana kisi jagah bhi mohabbat se mujh ko aar nahin uThaani paDti hai zillat qadam qadam pe use jahaan mein jis kaa sadaaqat agar shiaar nahin vo phuul khaar hai jo gir gayaa nazar se tiri vo khaar gul hai jo nazron mein teri khaar nahin kisi ki saaqi ke qadmon pe hai jabin-e-niyaaz kisi ko saaqi pe khud apne eatibaar nahin tu apni aankhon se saaqi pilaa ke be-khud kar piyun main jaam se aisaa to baada-khvaar nahin gunaahgaaron pe hai jab ki rahmaton kaa nuzul kahun main kaise phir 'akmal' gunaahgaar nahin"

"naqaab-e-fitrat uThaa rahaa huun vafaa kaa chehra dikhaa rahaa huun kabhi jo apnaa na ho sakaa thaa usi ko apnaa banaa rahaa huun jo sust baiThi hain aarzuein main un ke shaane hilaa rahaa huun jo thak ke jazbaat so rahe hain unhein main phir se jagaa rahaa huun havaaein ho jaaeingi mukhaalif nahin mujhe is ki koi parvaa lahu ki bundein giraa giraa kar main apnaa gulshan sajaa rahaa huun main dushmani ke qarib jaa kar talaash kartaa huun dosti ko jo mujh se nafrat barat rahe hain unhein main apnaa banaa rahaa huun sitam tumhaaraa jafaa tumhaari jo yaad aane lage hain mujh ko gumaan kuchh aisaa ho rahaa hai tumhein bhi main yaad aa rahaa huun nahin hai hairat ki baat koi ye zarf meraa hai meri jurat hai jis jagah bijliyon ki kasrat vahin nasheman banaa rahaa huun main jaantaa huun vajud phulon kaa aur kaanTon kaa hai chaman mein main phuul bhi chun rahaa huun aur khaar se bhi daaman bachaa rahaa huun tumhaare kaam aaegaa hamesha ye tohfa-e-dil qubul kar lo tumhaaraa chehra dikhaane tum ko ik aaina saath laa rahaa huun jo meraa andaaz-e-guftugu hai vahi hai ijz-e-mohabbat 'akmal' ghazal ke parde mein aaj afsaana apnaa un ko sunaa rahaa huun"

"fitratan husn khubsurat hai siratan ishq mahv-e-hairat hai khuub mashhur ye kahaavat hai har musibat ke baad raahat hai jitni shaaista hain tamannaaein utni ikhlaas-e-dil ki haajat hai hashr barpaa hai zindagaani mein dil kaa aanaa bhi kyaa qayaamat hai sar jhukaane se sarfaraazi hai aajizi laa-zavaal neamat hai hai ye irshaad haq-taaala kaa khidmat-e-khalq hi ibaadat hai kah rahaa hai mutaala 'akmal' ilm sau daulaton ki daulat hai"

"tavajjoh kaun kartaa aur mohabbat kaun kartaa hai na ho taufiq gar teri ibaadat kaun kartaa hai lahu se qalb ke palkon ki zinat kaun kartaa hai numaaish gham ki ham-rang-e-masarrat kaun kartaa hai ba-juz aashiq ke akkaasi-e-fitrat kaun kartaa hai ayaan lab se mohabbat ki haqiqat kaun kartaa hai dil-e-sad-chaak ke aaine mein duniyaa nazar aae kushaada is qadar aaghosh-e-fitrat kaun kartaa hai agar vo pher lein munh jin se ummidein hain vaabasta hamaare haal par chashm-e-inaayat kaun kartaa hai na jaane kis jagah is vaqt hai gum-gashta-e-manzil hamaare qaafile ki ab qayaadat kaun kartaa hai vafur-e-kaif-e-gham mein ashk bahnaa baat hai fitri khud apne khun-e-dil se aap nafrat kaun kartaa hai hamaare dil ko dard-e-ishq ne masnad banaa Daalaa ki dil ke maa-sivaa ab is ki izzat kaun kartaa hai"

"baada-e-ishq kaa hai jaam ghazal husn kaa dusraa hai naam ghazal dil ki aavaaz kaa hai naam ghazal hai mohabbat bharaa payaam ghazal ahl-e-dil ke labon pe rahti hai tujh ko haasil hai vo maqaam ghazal dard vaale baDe khulus ke saath gungunaate hain subh shaam ghazal kitni maqbuliyat hui haasil ho gai hai qubul-e-aam ghazal jahaan logon ke badle rujhaanaat tu ne badlaa vahin nizaam ghazal dil ki dil hi mein rah gai 'akmal' kyaa sunaaun main naa-tamaam ghazal"