Ghazal

"aankhon kaa puuraa shahr hi sailaab kar gayaa ye kaun mujh mein nazm ki surat utar gayaa jangal mein teri yaad ke jugnun chamak uThe maidaan siyaah-shab kaa ujaalon se bhar gayaa varna siyaah raat mein jhulsaa huaa thaa main ye to tumhaari dhuup mein kuchh kuchh nikhar gayaa jhumaa thirakte naachte joDon mein kuchh ghaDi dil phir na jaane kaisi udaasi se bhar gayaa donon anaa mein chuur the an-ban si ho gai rishta nayaa nayaa saa thaa kuchh din mein mar gayaa pahle kuchh ek din to kaTi mushkilon mein raat phir teraa hijr meri ragon mein utar gayaa haathon se apne khud hi nasheman ujaaD kar dekho udaas ho ke parinda kidhar gayaa ik chikh aasmaan ke daaman mein so gai dil ki zamin pe dard har ik su bikhar gayaa"

"dhuup ab sar pe aa gai hogi kuchh nami dasht mein bachi hogi dil musalsal hi zakhm khaataa hai is ki miTTi mein kuchh kami hogi tu bhi kuchh bad-havaas lauTaa hai saans ruk ruk ke TuTti hogi chaand shab bhar dahak rahaa hogaa niind shab bhar pighal rahi hogi ghar ki divaar thi hi bosida ab ki baarish mein gir gai hogi"

"chikh ki or main khinchaa jaaun ghup andheron mein Dubtaa jaaun kab se phirtaa huun is tavaqqoa par khud ko shaayad kahin main paa jaaun ruuh tak bujh chuki hai muddat se tu jo chhu le to jagmagaa jaaun lamha lamha ye chhaanv ghaTti hai patta patta main TuTtaa jaaun dhuup pi kar tamaam sahraa ki abr ban kar main khud pe chhaa jaaun dukh se kaisaa bharaa huaa hai dil us ko sochun to sochtaa jaaun ek patta huun shaakh se bichhDaa jaane bah kar main kis dishaa jaaun ji mein aataa hai chhoD duun ye zamin aasmaanon mein jaa samaa jaaun"

"saans lete hue Dar lagtaa hai zahr-aalud dhuaan phailaa hai kis ne sahraa mein miri aankhon ke ek dariyaa ko ravaan rakkhaa hai koi aavaaz na jumbish koi meraa honaa bhi koi honaa hai baat kuchh bhi na karungaa ab ke ru-ba-ru us ke faqat ronaa hai zakhm dhoe hain yahaan par kis ne saare dariyaa mein lahu phailaa hai itnaa gahraa hai andheraa mujh mein paanv rakhte hue Dar lagtaa hai shakhs hanstaa hai jo aaine mein yaad paDtaa hai kahin dekhaa hai chaaT jaae na mujhe dimak saa gham jo siine se mire lipTaa hai jaane kyaa khonaa hai ab bhi mujh ko phir se kyuun ji ko vahi khadsha hai"

"dil par kisi ki baat kaa aisaa asar na thaa pahle main is tarah se kabhi dar-ba-dar na thaa chaaron taraf the dhuup ke jangal hare-bhare sahraa mein koi mere alaava shajar na thaa taare bhi shab ki jhiil mein gharqaab ho gae meri udaasiyon kaa koi ham-safar na thaa furqat ki aanch thi na tiri yaad ki tapish dil sard paD rahaa thaa kahin ik sharar na thaa kal shab na jaane kaun se gham the ufaan par ashkon se is qadar main kabhi tar-ba-tar na thaa"

"khaak ho kar bhi kab miTungaa main phuul ban kar yahin khilungaa main tujh ko aavaaz bhi main kyuun dungaa teraa rasta bhi kyuun takungaa main ik puraane se zakhm par ab ke koi marham nayaa rakhungaa main gher leingi ye titliyaan mujh ko khushbuein jiyun rihaa karungaa main khud se baahar to kam nikaltaa huun ji mein aayaa to phir milungaa main varna jiinaa muhaal kar degaa dard ko ab ghazal karungaa main dhukdhuki si lagi hai kyuun ji ko itni jaldi kahaan marungaa main saansein deti rahin jo chingaari ek jangal saa jal uThungaa main thak gayaa huun main is jazire par phir samundar kaa rukh karungaa main ruuh kaa ye libaas badlungaa bhes duujaa koi dharungaa main"

"vo be-asar thaa musalsal dalil karte hue main mutmain thaa ghazal ko vakil karte hue vo mere zakhm ko naasur kar gae aakhir main pur-umid thaa jin se appeal karte hue ajiib khvaab thaa aankhon mein khuun chhoD gayaa ki niind guzri hai mujh ko zalil karte hue sabab hai kyaa ki main sairaab huun sar-e-sahraa judaa huaa thaa vo aankhon ko jhiil karte hue maraa huaa main vo kirdaar huun kahaani kaa jo ji rahaa hai kahaani tavil karte hue"

"labaalab dukh se thaa qissa hamaaraa magar chhalkaa nahin dariyaa hamaaraa asar us par to kab honaa thaa lekin tamaashaa ban gayaa ronaa hamaaraa magar aane se pahle soch lo tum bahut viraan hai rasta hamaaraa ajab tapti hui miTTi hai apni ubaltaa rahtaa hai dariyaa hamaaraa tumhaare haq mein bhi achchhaa nahin hai tumhaare gham mein yuun jiinaa hamaaraa usi ko dukh kaa andaaza thaa apne vahi tanhaa sahaaraa thaa hamaaraa"

"zaraa bhi kaam na aaegaa muskuraanaa kyaa tanaa rahegaa udaasi kaa shaamiyaana kyaa main chaahtaa huun takalluf bhi tark kar do tum nahin hain ab vo maraasim to aanaa-jaanaa kyaa tamaam tir-o-tabar kyaa mire liye hi hain mujhi pe lagnaa hai duniyaa kaa har nishaana kyaa unhin ko chiir ke baDhnaa hai ab kinaare par utar gae hain to lahron se khauf khaanaa kyaa yuun apni zaat ke dar par khaDe ho kab se tum ki apne ghar bhi hai aavaaz de ke jaanaa kyaa"

"tumhaare saae se uktaa gayaa huun main apni dhuup vaapas chaahtaa huun kaho kuchh to zabaan se baat kyaa hai main kyaa phir se akelaa ho gayaa huun magar ye sab mujhe kahnaa nahin thaa na jaane kyon main ye sab kah rahaa huun sabab kuchh bhi nahin afsurdagi kaa main bas khush rahte rahte thak gayaa huun gila kartaa nahin ab mausamon se main in peDon ke jaisaa ho gayaa huun"

"us taraf bhi vahi siyaah ghubaar ham ne dekhaa hai jaa ke niind ke paar kitnaa kuchh bolnaa paDaa tum ko ek chhoTaa saa lafz thaa inkaar khushk aankhon ki chup Daraane lagi dil madad kar miri kisi ko pukaar tujh ko ai shakhs kuchh khabar bhi hai kis kharaabe mein hai tiraa bimaar phir ye dukh bhi to aasmaani hai kyaa khafaa honaa is zamin se yaar"

"lutf aane lagaa bikharne mein ek gham ko hazaar karne mein bas zaraa saa phisal gae the ham ik bagule pe paanv dharne mein kitni aankhon se bhar gai aankhein tere khvaabon se phir guzarne mein main ne sochaa madad karoge tum kam-nasibi ke ghaav bharne mein bujhte jaate hain mere log yahaan raushni ko bahaal karne mein kis qadar haath ho gayaa zakhmi khud-kushi tere par katarne mein"

"to kyaa huaa jo tamaashaai ho gayaa huun main tire hi haq mein to sab jhuuT boltaa huun main nahin ye dukh to kisi aur ke sabab hai sab tumhein to dil se rihaai bhi de chukaa huun main Darun na kyon main bhalaa teri gham-gusaari se ki is ke baad ke sab moD jaantaa huun main ye puchhnaa thaa ki meri bhi kuchh jagah hai kahin tumhaare dar pe khaDaa sard paD rahaa huun main mujhe pata hai ki rone se kuchh nahin hotaa nayaa saa dukh hai to thoDaa chhalak gayaa huun main"

"phuul se zakhmon kaa ambaar sanbhaale hue hain gham ki punji mire ash’aar sanbhaale hue hain ham se puchho na shab-o-roz kaa 'aalam socho kaise dhaDkan ki ye raftaar sanbhaale hue hain ghar bhi baazaar ki maanind rakhe hain apne vo jo baazaar kaa me'yaar sanbhaale hue hain ek novel hain kabhi paDh tu hamein fursat mein tan-e-tanhaa kai kirdaar sanbhaale hue hain ham mohabbat ke tale kaanp rahe hain aise jaise darki hui divaar sanbhaale hue hain zakhm le kar ye sabhi apne main jaataa bhi kahaan yuun bhi ijlaas gunahgaar sanbhaale hue hain"

"un ki aamad hai gul-fishaani hai rang-e-khushbu ki mezbaani hai kaisi hogi na jaane shaam-e-umr subh jab aisi sar-giraani hai maut kaa kuchh pata nahin lekin zindagi sirf nauha-khvaani hai marne vaalaa hai markazi kirdaar aakhiri moD par kahaani hai khud-kushi jaisi koi baat nahin ik zaraa mujh ko bad-gumaani hai ye jo baarud hai havaaon mein aag thoDi si bas lagaani hai us kaa likkhaa hi ji rahaa huun main us ki baabat hi ye kahaani hai"

"chalte hain ki ab sabr bhi itnaa nahin rakhte ik aur nae dukh kaa iraada nahin rakhte bas ret si uDti hai ab us raahguzar par jo peD bhi milte hain vo saaya nahin karte kis taur se aakhir unhein tasvir karein ham jo khvaab azal se koi chehra nahin rakhte ik baar bichhaD jaaein to DhunDhe na mileinge ham rah mein kahin naqsh-e-kaf-e-paa nahin rakhte phir sulh bhi tum bin to kahaan honi thi khud se so rabt bhi ab khud se ziyaada nahin rakhte us moD pe ruThe ho tum ai dost ki jis par dushman bhi koi ranj puraanaa nahin rakhte kyaa soch ke zinda hain tire dasht mein ye log aankhon mein jo ik khvaab kaa TukDaa nahin rakhte"

"jazb kuchh titliyon ke par mein hai kaisi khushbu si us color mein hai aane vaalaa hai koi sahraa kyaa gard hi gard rahguzar mein hai jab se dekhaa hai khvaab mein us ko dil musalsal kisi safar mein hai chhu ke gaaDi baghal se kyaa guzri be-khayaali si ik nazar mein hai main bhi bikhraa huaa huun apnon mein vo bhi tanhaa saa apne ghar mein hai raat tum yaad bhi nahin aae phir udaasi si kyuun sahar mein hai us ki khaamoshi gunjti hogi shor barpaa jo dil-khanDar mein hai haath sar par vo shaakhein rakhti hain koi apnaa saa us shajar mein hai"

"nahin is chup ke pichhe kuchh nahin aisaa bas ik shubhaa saa hai tum se bhi vaabasta use to khair itnaa bhi nahin ab yaad ki pahlaa jaal us ne kis pe pheinkaa thaa ajab sukh thaa kisi kaa dukh baTaane mein main apni maut bhi zaahir na kartaa thaa ham aison ki jagah banti hi kitni hai ham aison kaa Thaharnaa kyaa bichhaDnaa kyaa mujhe darkaar hai phir bhigi si aankhein vagarna agli rut mein suukh jaaungaa yahi ik dukh to siine mein sabhi ke hai koi sach-much mein apne saath thaa bhi yaa"

"phir tiri yaadon ki phunkaaron ke biich nim-jaan hai raat yalghaaron ke biich unghtaa rahtaa hai aksar maahtaab raat bhar ham chand be-daaron ke biich gunjti rahti hai mujh mein dam-ba-dam chikh jo ubhri na kohsaaron ke biich dekhtaa aakhir main us ko kis tarah raushni ki tez bauchhaaron ke biich kho hi jaataa huun tire qisse mein main baarhaa gumnaam kirdaaron ke biich ek adnaa saa diyaa hai aaftaab mere man ke gahre andhiyaaron ke biich qaid se apni nikalte kyuun nahin zakhm kab bharte hain divaaron ke biich saanehe chhapne lage hain aankhon mein nabz tham jaae na akhbaaron ke biich thaa mahaavaT aur phir juDvaan bahaav bah gayaa main gungune dhaaron ke biich"

"is siyah raat mein koi to sahaaraa mil jaae apne andar hi koi saaya chamaktaa mil jaae us ko ik dukh se bachaanaa bhi zaruri hai bahut bas kisi tarah vo ik baar dobaara mil jaae sochtaa huun ki ab is ghar mein miraa hai hi kyaa haan agar rone ki khaatir koi konaa mil jaae shahr kaa shahr hi viraan paDaa hai kaisaa koi bachcha hi kahin shor machaataa mil jaae jaante hain ki vahaan lauT ke bhi kyaa hogaa ek koshish koi jiine kaa bahaanaa mil jaae"

"ham musalsal ik bayaan dete hue thak chuke hain imtihaan dete hue be-zabaan alfaaz kaaghaz par yahaan gungi yaadon ko zabaan dete hue ho gae gharqaab us ki aankh mein khvaahishon ko ham makaan dete hue phir ubhar aayaa tiri yaadon kaa chaand ujlaa ujlaa saa dhuaan dete hue lutf jalne kaa alag hai hijr mein zakhm mere imtihaan dete hue laa rahe hain niind ke aaghosh mein ashk mujh ko thapkiyaan dete hue ro paDaa thaa jaane kyuun vo Daakiya aaj mujh ko chiTThiyaan dete hue ik balaa kaa shor thaa aankhon mein par kah na paayaa kuchh vo jaan dete hue faasla itnaa na rakhnaa thaa khudaa is zamin ko aasmaan dete hue"

"bujhe labon pe tabassum ke gul sajaataa huaa mahak uThaa huun main tujh ko ghazal mein laataa huaa ujaaD dasht se ye kaun aaj guzraa hai gai ruton ki vahi khushbuein luTaataa huaa tumhaare haathon se chhuT kar na jaane kab se main bhaTak rahaa huun khalaaon mein TimTimaataa huaa nigal na jaae kahin be-rukhi mujhe teri ki ro paDaa huun main ab ke tujhe hansaataa huaa tu shaahzaadi mahakte hue ujaalon ki main ek khvaab andheron ki choT khaataa huaa miraa badan ye kisi barf ke badan saa hai pighal na jaaun main tujh ko gale lagaataa huaa tumhaari aankhon kaa paani kahin na ban jaaun main Dar rahaa huun bahut daastaan sunaataa huaa"

"har ik shajar pe parinde simaT ke baiThe hain havaa-e-sard ke jhonke bahut nukile hain kahaan sanbhaltaa hai jaldi kisi ki maut se dil haan Thik-Thaak hain pahle se thoDe achchhe hain dhuaan dhuaan si hai fihrist-e-raftagaan lekin do ek chehre hain vaise hi jagmagaate hain tujhe khabar bhi hai ai dost tere marham se kuchh ek zakhm jo andar nae se bante hain qadam qadam pe nae moD muDne vaale log na jaane kyon mujhe ab Thiik jaan paDte hain judaa hue to bahut din guzar gae lekin havaa-e-taaza ke jhonkon se ab bhi Darte hain kabhi to khuub sisakte hain be-tarah aur phir khayaal-e-marg se yak-dam chahakne lagte hain"

"junun kaa raqs bhi kab tak karungaa kahin main bhi Thikaane jaa lagungaa huaa jaataa hai tan ye bojh mujh par magar ye dukh bhi ab kis se kahungaa bhulaa duun kyon na main is chup ko aakhir zaraa se zakhm ko kitnaa karungaa khudaa ke rang bhi sab khul gae hain gunaah apne bhi main kyunkar ginungaa tiri khaamoshiyon ki dhuup mein bhi tiri aavaaz mein bhigaa rahungaa abhi be-baat kitnaa hans rahaa huun nikal kar bazm se girya karungaa nahin vaada nahin hogaa koi ab bahut hogaa to bas zinda rahungaa"