Ghazal

"machhliyaan jaal machhere dariyaa ye mire khvaab ye bahte dariyaa barf pighli tiri aahaT paa kar teri aavaaz pe jaage dariyaa ye ravaani nahin dekhi hogi tu ne dekhe hain bahut se dariyaa jis ne dekhi nahin aankhein teri vo kabhi shaam ko dekhe dariyaa kis ko kis paar utarnaa hai bataa is kahaani mein hain kitne dariyaa kashti-e-nuh mein baiThaa huun main kyaa pichhe tufaan hai aur aage dariyaa Dubne vaale bataate hi nahin kis qadar hote hain gahre dariyaa bastiyaan un ko bhi aati hain nazar itne andhe nahin hote dariyaa tu ne paayaab kiyaa hai mujh ko main huaa kartaa thaa pahle dariyaa tu nahin jaantaa paani ki kashish tu ne dekhe nahin aise dariyaa"

"is zaat ke hisaar se niklungaa ek roz patthar haTaa ke ghaar se niklungaa ek roz andar ki ik sadaa kaa mujhe intizaar hai baahar ke intishaar se niklungaa ek roz shaakhon ke phailne se miraa qad nahin baDhaa malbus-e-barg-o-baar se niklungaa ek roz main bel ban ke tere dariche tak aaungaa peDon ki is qataar se niklungaa ek roz ye faasle to teri kashish kam na kar sake ab to tire madaar se niklungaa ek roz ik aks huun aur aansuon ke darmiyaan huun shoala huun aabshaar se niklungaa ek roz is sang-o-khisht se meri paivastagi hai aur niklaa bhi to vaqaar se niklungaa ek roz ik raushni kaa takht mujhe lene aaegaa zindaan-e-tang-o-taar se niklungaa ek roz"

"taalluqaat mein yakh-bastagi paDi rahegi kahin ghubaar kahin dhund si paDi rahegi vo aaegaa use dekheinge dekhte raheinge kitaab aise khuli ki khuli paDi rahegi paDaa rahegaa koi khvaab ek phuul ke saath aur is ke saath ik tasvir bhi paDi rahegi kuchh ehtiyaat-e-taalluq ab is maqaam pe hai ki dil mein jo bhi girah paD gai paDi rahegi ye barf ab ke baras bhi agar nahin pighli hamaare biich paDi khaamushi paDi rahegi darun-e-zaat pe uDti rahegi gard-e-malaal dilon ki Dor yuun uljhi hui paDi rahegi shikan paDi hai jabin par to noch Daal ise vagarna der talak ye paDi paDi rahegi hamin na honge agar kal to husn-e-daad-talab chamak-damak ye tiri dilkashi paDi rahegi chalaa bhi jaaegaa uTh kar tu mere bistar par shikan shikan miri afsurdagi paDi rahegi paDe raheinge tire dar pe khasta-jaan tere hamaare baad bhi darmaandagi paDi rahegi"

"chhan ke aati hai jo ye raushni darvaaze se kyaa mujhe dekh rahaa hai koi darvaaze se ghar ki takhti se milaa aaj mujhe apnaa pata apne hone ki gavaahi mili darvaaze se main ne dahliz se jaane ki ijaazat le li phir miri baat na tai ho saki darvaaze se ek rauzan mein paDi aankh se khulne lage hain ek divaar ke andar kai darvaaze se main ne is khvaab ko andar kahin mismaar kiyaa meri aavaaz na baahar gai darvaaze se raat bhar siskiyaan letaa hai koi shakhs yahaan kabhi divaar se lag kar kabhi darvaaze se khaali kamra miraa kis chaap se bhar jaataa hai aataa jaataa hi nahin jab koi darvaaze se ek khushbu ne qadam bhuul ke baahar rakkhaa phir gali aankh milaane lagi darvaaze se roz ik shahr-e-pur-asraar mein kho jaataa huun vahi galiyaan vahi raste vahi darvaaze se tu ne mahtaab nikalte hue dekhaa hai kabhi aur mahtaab bhi aise kisi darvaaze se"

"ziist ke tajrabe ki baatein hain 'ishq mein sab pate ki baatein hain meri barbaadiyon ke hain qisse aur tire sochne ki baatein hain jaane kyaa kyaa utartaa hai dil par jaane kis kis samay ki baatein hain khaal-o-khad saaraa kuchh nahin kahte is mein kuchh aaine ki baatein hain tum chaloge to main bataaungaa ek do raaste ki baatein hain meraa nuqsaan hai saraasar dekh aur tire faaede ki baatein hain kyaa kabhi lauT kar bhi aae log ye tire bachpane ki baatein hain ham ne kaise kiyaa tujhe rukhsat ye baDe hausle ki baatein hain 'yusufi' se kabhi mile ho tum us ki baatein maze ki baatein hain"

"diye ki aankh se jab guftugu nahin hoti vo meri raat kabhi surkh-ru nahin hoti havaa ke lams mein us ki mahak bhi hoti hai vo shaakh-e-gul jo kahin ru-ba-ru nahin hoti kise nasib ye shirini-e-lab-o-lahja har ek dasht mein ye aab-e-ju nahin hoti main harf harf mein paikar tiraa samotaa huun ghazal to hoti hai par hu-ba-hu nahin hoti kabhi kabhi to main khud se kalaam kartaa huun kabhi kabhi to ye lagtaa hai tu nahin hoti"

"raat aankhon mein guzri sapne bhiig gae baarish se khiDki ke shishe bhiig gae baarish ki bochhaaD to andar tak aai khushk tanon ke sab andaaze bhiig gae bhiig gae sab apni apni yaadon mein kuchh rote kuchh hanste hanste bhiig gae bhiig gae sab khat rakkhe almaari mein aur un mein sab likkhe vaade bhiig gae dekh diye ki lau tu ne to dekhe hain kitni aankhein kitne takiye bhiig gae baadal ke hamraah schōl se nikle the ghar tak aate aate baste bhiig gae uDte panchhi teri manzil duur hai kyaa dekh musaafir tere kapDe bhiig gae raat sitaare aangan aur udaas aankhein teri baatein karte karte bhiig gae baahar aa kar dekh ye manzar shahzaadi ham teri dahliz pe baiThe bhiig gae jaane kaise mausam ki ye baarish thi meri aankhein tere sapne bhiig gae jis basti mein dhuup saa ruup chamaktaa thaa us basti ke saare raste bhiig gae"

"kis liye chup huun vazaahat bhi nahin kar saktaa main mohabbat mein shikaayat bhi nahin kar saktaa ek ik kar ke parindon ne to hijrat kar li peD huun peD to hijrat bhi nahin kar saktaa kyaa mujhe saans bhi lene ki ijaazat nahin hai kyaa main ik aur mohabbat bhi nahin kar saktaa kyaa zamaana hai ki is ahd-e-ziyaan mein koi shakhs apne bachchon ko nasihat bhi nahin kar saktaa kaun saa khauf rag-o-pai mein samaayaa hai ki ab main buraai ki mazammat bhi nahin kar saktaa ab kisi ashk ko kyaa aankh mein rakkhaa jaae ashk jo gham ki hifaazat bhi nahin kar saktaa saamnaa ho to zabaan dil kaa nahin deti saath kuchh bataane ki main himmat bhi nahin kar saktaa saaneha ye hai use mujh se judaa honaa hai aur sitam ye ki main rukhsat bhi nahin kar saktaa"

"kaise kaTaa ye shab kaa safar dekhnaa bhi hai bujhte diye ne vaqt-e-sahar dekhnaa bhi hai be-naam chaahaton kaa asar dekhnaa bhi hai shaakh-e-nazar pe husn-e-samar dekhnaa bhi hai ab ke use qarib se chhunaa bhi hai zarur patthar hai aaina ki guhar dekhnaa bhi hai ye shahr chhoDnaa hai magar us se peshtar us bevafaa ko ek nazar dekhnaa bhi hai in aansuon ke saath basaarat hi bah na jaae itnaa na ro ai dida-e-tar dekhnaa bhi hai mumkin nahin hai us ko lagaataar dekhnaa ruk ruk ke us ko dekh agar dekhnaa bhi hai manzar hai dil-kharaash magar dil kaa kyaa karein go dekhnaa nahin hai magar dekhnaa bhi hai is aas par khaDe hain ki ik baar 'yusufi' us ne zaraa palaT ke idhar dekhnaa bhi hai"

"bahisht-zaar hasin gul-kade mein rahte the ham ek saath kisi mintaqe mein rahte the na jaane kaun se pal kaa thaa intizaar hamein na jaane kab se ham ik dusre mein rahte the yahin kahin the pareshaan khvaab ki surat kabhi to niind kabhi ratjage mein rahte the bahut si jhilein tire chashm-o-lab se milti thiin bahut se peD mire raaste mein rahte the zamaanon baa'd kahin saamnaa huaa apnaa safar mein the magar ik daaere mein rahte the kahin jagah hi nahin thi hamein samaane ko ham apni zaat ke hairat-kade mein rahte the hamaari raushni to ek thi vajud alag ki do charaagh the ik taaqche mein rahte the yaqin jaan ki ik dusre kaa aks the ham aur ek saath kisi aaine mein rahte the ajiib gosha-e-tanhaai mein paDaa huaa huun tamaam log kabhi raabte mein rahte the"

"aankh jab aaine mein paDti hai zindagi dekhne mein paDti hai roz kaTti hai fasl khushbu ki aur tire tauliye mein paDti hai din kisi maarke mein kaTtaa hai shab kisi morche mein paDti hai chhoD duniyaa ki baat dil ki sun chhoD kis vasvase mein paDti hai tu nahin hai to raat bhar baarish jaane kis silsile mein paDti hai paanv ko laakh khinchtaa huun magar vo gali raaste mein paDti hai gardish-e-vaqt teri aankh ke is pur-kashish daaere mein paDti hai ishq ke aur hain makaan-o-zamaan umr ik saaniye mein paDti hai zindagi to vahaan bhi hai 'ashraf' barf jis mintaqe mein paDti hai"

"tere aane kaa gumaan hotaa hai kis zamaane kaa gumaan hotaa hai sang-rezon pe bhi ab chiDiyon ko daane daane kaa gumaan hotaa hai main khanDar huun to jahaan ko mujh mein ik khazaane kaa gumaan hotaa hai ek tasvir huun gham ki jis par muskuraane kaa gumaan hotaa hai peD kaTte hain to har tinke par aashiyaane kaa gumaan hotaa hai dil kahaan ab to kisi taair ke phaDphaDaane kaa gumaan hotaa hai us zamaane mein nahin hain ham tum jis zamaane kaa gumaan hotaa hai mai larazti hai to duniyaa tujh par Dagmagaane kaa gumaan hotaa hai"