Ghazal

"yuun to iqraar kaa pahlu bhi hai inkaar ke saath phir bhi dhaDkaa saa lagaa rahtaa hai izhaar ke saath ye alag baat ki ham dekh nahin paate hain lag ke baiThaa hai koi aaj bhi divaar ke saath raasta khaana-badoshon kaa koi to nikle baat uljhi hui rahti hai zamin-daar ke saath faisla vaqt kaa jaataa hai kidhar dekheinge jang jaari hai abhi mauj ki patvaar ke saath us ki gardan ki hifaazat ki zamaanat kyaa hai kheltaa hai jo sadaa khanjar-o-talvaar ke saath varna behtar hai abhi khatm kahaani ho jaae zinda rahnaa hai to phir 'azmat-o-kirdaar ke saath"

"har phuul pe maali kaa ijaara nahin hotaa har shaakh pe chiDiyon kaa baseraa nahin hotaa aa jaate the pahle jo madaari nahin aate ab gaanv ki galiyon mein tamaashaa nahin hotaa ab taaza gulaabon se bhi khushbu nahin aati mausam bhi bahaaron kaa suhaanaa nahin hotaa muflis pe amiron ki 'inaayat nahin hoti majlis mein gharibon kaa Thikaanaa nahin hotaa mil baiTh ke huqqe ki rivaayat nahin baaqi ab gaanv mein dukh-dard pe charchaa nahin hotaa har baar mayassar ho suhulat nahin mumkin aasaani se har kaam hamesha nahin hotaa"

"us shahr se aisaa koi rishta bhi nahin hai fursat bhi nahin hai mujhe jaanaa bhi nahin hai piinaa hai to ham jaam-e-shahaadat hi piyeinge ab is ke sivaa dusraa chaara bhi nahin hai aainda kabhi baiTh ke kuchh baat kareinge mausam bhi nahin hai abhi mauqa' bhi nahin hai miltaa thaa baDe shauq se pahle vo sar-e-shaam ab dekh ke kaT jaataa hai aataa bhi nahin hai is mulk mein mujrim hai vahi haath mein jis ke hathiyaar baDi chiiz hai tesha bhi nahin hai ye gardish-e-ayyaam ki vahshat hai ki 'daanish' bachcha koi ab shahr mein rotaa bhi nahin hai"

"achaanak raah mein chalte hue patthar nikal aae khayaal-o-khvaab ki duniyaa se ham baahar nikal aae musibat mein rahein ham saabir-o-shaakir to mumkin hai khudaa ke hukm se surat koi behtar nikal aae pas-e-parda bahut se log aise hain zamaane mein agar chhu dein vo miTTi ko to phir gauhar nikal aae bahut muhtaat rahne ki zarurat hai yahaan 'daanish' na jaane kab kahaan kis moD par khanjar nikal aae"

"dil ke aangan mein be-qaraari hai ye sharaarat to bas tumhaari hai tum samajhte ho buzdili lekin dar-haqiqat ye khaaksaari hai ik nazar jab se tum ko dekhaa hai zehn-o-dil par surur taari hai vaqt aaegaa ham bhi dekheinge hijr ki raat kitni bhaari hai daam se us ke bachnaa mushkil hai shahr mein vo baDaa shikaari hai ye ujaalaa to kuchh nahin 'daanish' chaand mein chaandni tumhaari hai"

"'ibaadat kam riyaa-kaari bahut hai zamaane mein adaakaari bahut hai mohabbat mein zaraa chalnaa sanbhal ke pas-e-parda khataa-kaari bahut hai vasaail ki kami hai zindagi mein zarurat ki hinaa-kaari bahut hai vahaan kaa naam hi shahr-e-vafaa hai jahaan 'daanish' jafaakaari bahut hai"

"ham apne charaaghon ki hifaazat nahin karte yaa'ni ki ujaalon ki himaayat nahin karte karte hain vahi kaam jo karnaa hi nahin hai karnaa hai jise karne ki himmat nahin karte ghar-baar mein barkat ki 'alaamat hain ye bahnein bahnon mein hi taqsim viraasat nahin karte is 'ahd ke bachchon mein hai tahzib kaa fuqdaan mahfil mein buzurgon ki ri'aayat nahin karte is daur-e-taraqqi kaa asar dekhiye ham log masjid to banaate hain 'ibaadat nahin karte"

"dhire dhire bol rahaa hai zahr fazaa mein ghol rahaa hai aaj nahin hai qimat us ki kal tak jo anmol rahaa hai baat hai us ki jhuTi lekin zor se kitnaa bol rahaa hai miTTi miTTi karne vaalaa sonaa chaandi tol rahaa hai bech diyaa hai desh ko us ne bachcha bachcha bol rahaa hai"

"jiine kaa aadmi ke tariqa badal gayaa duniyaa samajh rahi hai zamaana badal gayaa phulon kaa rang baagh kaa naqsha badal gayaa maahaul gird-o-pesh kaa kitnaa badal gayaa surat badal gai miraa chehra badal gayaa 'umr-e-ravaan ke saath main kitnaa badal gayaa faaqa-kashi kaa daur thaa to khaaksaar thaa daulat hui nasib to lahja badal gayaa vo shakhs ajnabi thaa abhi kal ki baat hai aankhein huiin jo chaar to rishta badal gayaa"

"abhi to vaqt baaqi hai ishaara ho bhi saktaa hai tumhaare paas jo kuchh hai hamaaraa ho bhi saktaa hai amir-e-shahr se achchhaa hai thoDaa faasla varna ba-naam-e-dosti dushman hamaaraa ho bhi saktaa hai na jaane kaun saa lamha kisi ki yaad aa jaae ye aisaa haadisa hai jo dubaara ho bhi saktaa hai kisi lamhe bharosa TuuT saktaa hai mohabbat se kisi lamhe haqiqat aashkaara ho bhi saktaa hai na jaane kab dayaar-e-shauq kaa mausam badal jaae jo ik mauhum nuqta hai sitaara ho bhi saktaa hai mukhaatab ki adaa-e-naaz qaatil ho bhi sakti hai mohabbat ki tijaarat mein khasaara ho bhi saktaa hai nujumi ki kahi har baat sachchi ho nahin sakti magar kuchh baat ki jaanib ishaara ho bhi saktaa hai"

"chaahat agar hai aap ki ho jaan-nisaar dost honaa paDegaa aap ko bhi gham-gusaar dost tu bhi fareb-o-makr kaa hogaa shikaar dost varna riyaa kaa jism se cholaa utaar dost milte hain is jahaan mein yuun to hazaar dost hotaa nahin hai sab pe magar e'tibaar dost makr-o-fareb kizb-o-riyaa kaa ye daur hai kaise kisi pe koi kare e'tibaar dost chaahe Dubo de ziist ki kashti yaa paar kar ham ne to de diyaa hai tujhe ikhtiyaar dost is daur-e-pur-fareb mein 'daanish' muhaal hai kar lenaa e'tibaar ke qaabil shumaar dost"

"log kahte hain ki mahfuz davaa ne rakkhaa dil ki dhaDkan mein tasalsul to khudaa ne rakkhaa har ghaDi yaad mein masruf rahaa karti thi naam pagli usi 'aurat kaa piyaa ne rakkhaa un charaaghon ko havaa ne hi bujhaayaa aakhir jin charaaghon ko munavvar bhi havaa ne rakkhaa apni dahliz pe har lamha tamaashaa ke liye haakim-e-vaqt ko ham jaise gadaa ne rakkhaa us ne rakkhaa hi nahin meri vafaa ko malhuz ham ko paaband magar us ki jafaa ne rakkhaa ham ko taslim hai allaah ki 'azmat lekin ham ko masruf 'ibaadat mein jazaa ne rakkhaa maut aai to ye 'uqda bhi khulaa hai 'daanish' 'umr ko baandh ke jiine ki sazaa ne rakkhaa"

"parvaaz ki khvaahish ne zamin kaa nahin rakkhaa ik shakhs ko daulat ne kahin kaa nahin rakkhaa ghar-baar bhi us kaa to yahin thaa magar afsos andaaz-e-takallum ne yahin kaa nahin rakkhaa palkon pe hai rakkhaa jise ik 'umr sajaa kar ham logon ko us ne hi kahin kaa nahin rakkhaa jis khaak se uTThaa thaa dhuaan tez-ravi se us khaak ne us ko to vahin kaa nahin rakkhaa rakhnaa thaa jise saint ke rakkhaa nahin ham ne 'aadat ne na rakhne ki kahin kaa nahin rakkhaa ye khaak-nashini bhi 'ajab chiiz hai 'daanish' arbaab-e-hukumat ko kahin kaa nahin rakkhaa"

"vahi 'izzat vahi zillat vahi tauqir detaa hai usi se maangiye saahab vahi tashhir detaa hai shu’ur-o-aagahi baalidgi detaa hai zehnon ko zamaane mein qalam ko quvvat-e-tahrir detaa hai vahi khaaliq vahi maalik vahi qaadir hai duniyaa par tamaazat shams ko jo chaand ko tanvir detaa hai vahi bimaar kartaa hai jahaan-e-zist mein sab ko mu'aalij ki davaaon mein vahi taasir detaa hai bahut pahle vahi taqdir likhtaa hai ham insaan ki phir us ke baa'd ham ko nuskha-e-tadbir detaa hai"