Ghazal

"kuchh naqsh tiri yaad ke baaqi hain abhi tak dil be-sar-o-saamaan sahi viraan to nahin hai ham dard ke maare hi giraan-jaan hain vagarna jiinaa tiri furqat mein kuchh aasaan to nahin hai TuuTaa to aziiz aur huaa ahl-e-vafaa ko dil bhi kahin us shokh kaa paimaan to nahin hai"

"tiraa khayaal bhi hai vaz-e-gham kaa paas bhi hai magar ye baat ki duniyaa nazar-shanaas bhi hai bahaar-e-subh-e-azal phir gai nigaahon mein vahi fazaa tire kuche ke aas paas bhi hai jo ho sake to chale aao aaj meri taraf mile bhi der hui aur ji udaas bhi hai khulus-e-niyyat-e-rah-rau pe munhasir hai 'azim' maqaam-e-ishq bahut duur bhi hai paas bhi hai"

"jab se hai vo raunaq-e-mahfil aankhon mein jaan labon par rahti hai dil aankhon mein suukh rahi hai ju-e-girya-e-gard-nishaan chubhne lagi hai ab khaak-e-dil aankhon mein hijr ki raatein arsa-e-be-khvaabi kaa safar kaaT rahaa huun manzil manzil aankhon mein khuun ki lahrein moti moti palkon par niklaa dil-dariyaa kaa saahil aankhon mein dekh rahaa huun guzre vaqt ki tasvirein utre hain yaadon ke mahmil aankhon mein"

"nim-shab aatish-e-fariyaad-e-asiraan raushan dhuup si phail rahi hai sar-e-divaar-e-chaman yaa tire qurb ki ye saaat-e-afsurda hai yaa kabhi tere tasavvur se sulagtaa thaa badan dil-jale roe hain shaayad kahin phir aakhir-e-shab bhigaa bhigaa hai nasim-e-sahari kaa daaman aaj tak yaad hai vo shaam-e-judaai kaa samaan teri aavaaz ki larzish tire lahje ki thakan dil ke zakhmon se mahak aati hai phulon ki 'azim' sina-e-chaak hai yaa rakhna-e-divaar-e-chaman"

"ye aur baat hai ki madavaa-e-gham na thaa lekin tiraa khulus tavaqqo se kam na thaa kyaa kyaa faraaghatein thiin mayassar hayaat ko vo din bhi the ki tere sivaa koi gham na thaa kuchh ham girift-e-gardish-e-dauraan mein aa gae kuchh dil bhi tere ishq mein saabit-qadam na thaa aae hain yaad tujh se bichhaD kar vo log bhi jin se taalluqaat bigaDne kaa gham na thaa vo daur-e-ishq mahz bhi kiyaa vaqt thaa 'azim' jab dil pe naqsh mohr-o-nishaan-e-sitam na thaa"

"mahrumi ke dukh aur tanhaai ke ranj uThaae lekin ham ko aaj bhi jhuTaa pyaar na karnaa aae sail-e-gham-e-duniyaa ne dil se kyaa kyaa naqsh miTaae hijr ki raaton mein ab teri shakl bhi yaad na aae tanhaai kaa sannaaTaa aur aati jaati raatein teri yaad na aur koi gham phir bhi niind na aae tere maasumaana pyaar ki daulat paa kar ham ne aksar naaz kiyaa hai lekin kabhi kabhi pachhtaae pyaasi kaliyaan paani ke qatre qatre ko tarsein aur karam kaa baadal dariyaaon pe barastaa jaae"

"afsaana-e-hayaat-e-pareshaan ke saath saath duniyaa badal gai gham-e-pinhaan ke saath saath betaabi-e-hayaat mein aasudgi bhi thi kuchh teraa gham bhi thaa gham-e-dauraan ke saath saath ab mere saath un ki nazar bhi hai be-qaraar nashtar taDap rahe hain rag-e-jaan ke saath saath ab imtiyaaz-e-zaahir-o-baatin bhi miT gayaa dil chaak ho rahaa hai garebaan ke saath saath nairangi-e-jahaan-e-talab dekhnaa 'azim' baDhtaa hai shauq tangi-e-daamaan ke saath saath"

"fitnaa-saamaan hi nahin fitna-e-saamaan nikle aap to khaana-bar-andaaz-e-dil-o-jaan nikle be-khudi mein jise ham samjhe hain teraa daaman ain mumkin hai ki apnaa hi garebaan nikle dil pe dhundle se nishaan the jo gham-e-duniyaa ke vo bhi dar-parda nuqush-e-gham-e-jaanaan nikle phir vahi ham vahi be-raunaqi-e-dida-o-dil husn ke shoabde ik khvaab-e-gurezaan nikle dard-e-mahrumi-e-jaaved bhi ik daulat hai ahl-e-gham bhi tire sharminda-e-ehsaan nikle jin se aaraaish-e-imaan ki tavaqqo thi 'azim' haadisa hai ki vo ghaarat-gar-e-imaan nikle"

"gham kaa ye saliqa bhi rah gayaa hai ab ham tak zaar zaar rote hain aankh mein nahin nam tak yaad jaane vaalon ki raushni khayaalon ki dil kaa saath deti hai ek manzil-e-gham tak tujh se mil ke bhi teraa intizaar rahtaa hai subh ru-e-khandaan se shaam zulf-e-barham tak ab nishaan mile shaayad manzil-e-tamannaa kaa tere hijr ke gham se aa gae tire gham tak ek dard-e-hasti ne umr bhar rifaaqat ki varna saath detaa hai kaun aakhiri dam tak"

"laai na sabaa bu-e-chaman ab ke baras bhi kuchh soch ke khaamosh hain yaaraan-e-qafas bhi dastur-e-mohabbat hi nahin jaan se guzarnaa kar lete hain ye kaam kabhi ahl-e-havas bhi naazuk hain maraahil safar-e-manzil-e-gham ke is raah mein kho jaati hai aavaaz-e-jaras bhi aazaad bhi ho jaaeinge aakhir tire qaidi ik roz bikhar jaaegi zanjir-e-nafas bhi angusht-numaa shaikh-o-barahman ke chalan par masjid ke manaare bhi hain mandir ke kalas bhi divaana abhi tak hai usi dushman-e-jaan kaa aataa hai dil-e-zaar pe ghussa bhi taras bhi kuchh aap kaa gham kuchh gham-e-jaan kuchh gham-e-duniyaa daaman mein mire phuul bhi hain khaar bhi khas bhi chup rah ke bhi mumkin na rahaa dard chhupaanaa ik shoala-e-aavaaz hai ab mauj-e-nafas bhi"

"kuchh bhi ho miraa haal numaayaan to nahin hai dil chaak sahi khair garebaan to nahin hai husn-e-talab-e-barq hai taamir-e-nasheman varna havas-e-sair-e-gulistaan to nahin hai kuchh naqsh tiri yaad ke baaqi hain abhi tak dil be-sar-o-saamaan sahi viraan to nahin hai ham dard ke maare hi garaan-jaan hain vagarna jiinaa tiri furqat mein kuchh aasaan to nahin hai TuuTaa to aziiz aur huaa ahl-e-vafaa ko dil bhi kahin us shokh kaa paimaan to nahin hai"

"vahi yaksaaniyat-e-shaam-o-sahar hai ki jo thi zindagi dast-ba-dil khaak-basar hai ki jo thi dekh kar bhi tire jalve nahin dekhe jaate vahi paabandi-e-aadaab-e-nazar hai ki jo thi tujh se mil kar bhi gham-e-hijr ki talkhi na miTi ek hasrat si ye andaaz-e-digar hai ki jo thi shoala-e-dard bujhe der hui hai lekin vahi taabindagi-e-dida-e-tar hai ki jo thi tu miri jaan nahin ab magar ai jaan-e-'azim' zindagi ab bhi tiri dast-nigar hai ki jo thi"