Ghazal

"kabhi gunaahon ki mutlaq kafan utaar ke aa tu ujli ruuh se mailaa badan utaar ke aa jo mere vasl kaa ehsaas tujh pe taari hai kisi ke lams ki saari chhuvan utaar ke aa nai hayaat ke kapDe liye hai maut khaDi puraanaa zindagi kaa pairahan utaar ke aa nazar mein sharm hayaa kaa bhi paas baaqi rahe nazar ki shokhiyon ko gul-badan utaar ke aa nai bahaar ne paighaam ye havaa ko diyaa gulon ke tan se khizaan kaa kafan utaar ke aa hamesha uDte hain taair tire tasavvur ke kabhi to zehn se fikr-e-sukhan utaar ke aa"

"javaab chikh uThe hain savaal chikh uThe kahin pe lafz kahin par khayaal chikh uThe dikhaa ye khvaab ki kal raat mar gayaa huun main gunaah jitne the sab hasb-e-haal chikh uThe kahin imaam kahin muqtadi mile jaahil azaanein sun ke hamaari bilaal chikh uThe phisal gai miri muTThi se zindagi ki ret ghaDi se haare jo lamhe to saal chikh uThe banaa ke apni hi tasvir khud pashemaan huun jo rang main ne bhare sabz laal chikh uThe"

"jo thi ilaaqe mein sab se hasin bech aae ham apne purkhon ki saari zamin bech aae puraane logon ne ganjon ko kanghiyaan bechin nae jo log hain saanpon ko biin bech aae bharam thaa dil mein jo mahfil kaa vo bhi dil se gayaa sukhan to biktaa thaa tum saamain bech aae nahin ye gham ki amaanat mein kyuun khayaanat ki mujhe ye dukh hai vo apnaa yaqin beach aae jo log khaate hain urdu ke naam ki roTi labon pe un ke hai bas siin shiin bech aae pakaD li zang mein lipTi hoi nai tahzib milaa thaa ham ko jo sone saa diin bech aae"

"saraab-e-sahraa mein paani talaash kartaa hai vo daldalon mein ravaani talaash kartaa hai har ek zarre se pahchaan rab ki hoti hai vo phir bhi us ki nishaani talaash kartaa hai use yaqin hai apne khudaa ki rahmat par jo tapte sahraa mein paani talaash kartaa hai kitaab-e-dil ko samajhnaa muhaal hai us kaa vo chehraa chehraa maaani talaash kartaa hai nae ghamon ke andheron se jang hai us ki bujhe diyon ki javaani talaash kartaa hai hon raaja raani, hon lashkar, hon haathi ghoDe sab vo har kahaani mein naani talaash kartaa hai bahut sharif hai to 'chaand' jaa ke sansad mein 'kabir-das' ki vaani talaash kartaa hai"

"ik havaa aisi chali bagule bhi kaale ho gae chaand ko sardi lagi suraj ko chhaale ho gae mazhabi aatish ne bachpan ki jalaa di dosti ham bhi kaaba ban gae tum bhi shivaale ho gae hausla chhune kaa thaa bachpan mein tujh ko aasmaan barson teri samt ik patthar uchhaale ho gae hijr ki daulat ne maalaa-maal mujh ko kar diyaa baal chaandi ke hue sone ke chhaale ho gae aire-ghaire natthu-khaire paDh rahe hain chehre ab chehre chehre na hue goyaa risaale ho gae daagh suraj ki hukumat par bhi kuchh to lag gayaa kuchh ujaale jab andheron ke nivaale ho gae aainon par pattharon ke qatl kaa ilzaam kyuun aaine aaine na hon jaise bhaale ho gae dekh lete tum bhi apne is zamin ke 'chaand' ko itni jaldi aasmaan ke kyuun havaale ho gae"

"khasta shikasta jism mein dhaDkan liye hue phirtaa huun apni ruuh ki katran liye hue ummid haare raat mein mazdur so gae jaage zaruraton ki vo uljhan liye hue gulshan talak mein zahr taassub kaa ghul gayaa kal phuul bhi milaa thaa mujhe gun liye hue utraa jo mere dil se nazar se utar gayaa miltaa hai mujh se ab bhi vo utran liye hue aai hai raqs karti havaa mere dvaar par saavan ke giit ghunghru ki chhan-chhan liye hue"

"ghalatiyaan apni na hon phir bhi manaane kaa hunar itnaa aasaan nahin khud ko miTaane kaa hunar yaadon ke saanpon ko qaabu mein karun kaise main main ne sikhaa hi nahin biin bajaane kaa hunar mere chehre ki hansi mein pataa khushiyon kaa na DhunDh muddaton baa'd milaa dard chhupaane kaa hunar mere apnon ne taraashi meri 'izzat ki qamis sab ko aataa hai yahaan qainchi chalaane kaa hunar aag chingaari dhuaan kuchh na thaa dil phir bhi jalaa kis ne sikhlaayaa tumhein aise jalaane kaa hunar itne sapne na dikhaa jhuTi adaakaari chhoD pattharon ko na sikhaa ghaas ugaane kaa hunar aankhein chehra zabaan sab be-zabaan ho jaate hain jaan le legaa tiri raaz chhupaane kaa hunar qatl karnaa hai agar jalte hue suraj ko siikh lo barf ki shamshir banaane kaa hunar"

"baazaar tire shahr ke badnaam bahut hain chhoTi si khushi ke bhi yahaan daam bahut hain main kaise chalun hausle kaa haath pakaD kar is zindagi mein gardish-e-ayyaam bahut hain honTon se baghaavat ki sadaa kaise ho jaari vaaiz ko hukumat se abhi kaam bahut hain is daur mein ummid karun adl ki kaise munsif pe hi jab qatl ke ilzaam bahut hain aaghosh mein aur vaqt ke baaqi hain sukhanvar 'ghaalib' bhi kai 'mir' bhi 'khayyaam' bahut hain ye shahr bhi mahfuz nahin qahr-e-khudaa se saaqi bhi hain mai-khaane bhi hain jaam bahut hain vo zaat hai vaahid vo hi khaaliq vo hi raaziq makhluq ne par us ko diye naam bahut hain imdaad-o-ibaadat mein riyaa-kaari na ho 'chaand' ikhlaas-e-amal par vahaan inaam bahut hain"

"na puchh ham se hamaari uDaan chhoD na yaar baDi tavil hai ye daastaan chhoD na yaar nikal paDe jo safar mein to sochnaa kaisaa kahaan hai dhuup kahaan saaebaan chhoD na yaar dabi hai aag jo dil mein use kuredo mat yahin kahin thaa hamaaraa makaan chhoD na yaar ye soch ham ko pahunchnaa hai apni manzil tak na gin kisi ke qadam ke nishaan chhoD na yaar khushi thi muul to gham thaa byaaj ke jaisaa tamaam umr bharaa hai lagaan chhoD na yaar huaa hai zindagi bhar ki jugaaD roTi kaa biki hai qiston mein apni dukaan chhoD na yaar libaas sunnati hai ummati mohammadi huun na puchh ab ye nasab khaandaan chhoD na yaar ye sab bulandiyaan allaah ke liye hain 'chaand' maqaam martaba rutba ye shaan chhoD na yaar"

"ye tasavvur kaa vaar jhuTaa hai khvaab jhuTe hain saar jhuTaa hai phuul tum toD laae shaakhon se kyaa bahaaron se pyaar jhuTaa hai aankhon mein kuchh zabaan par kuchh hai teraa kirdaar yaar jhuTaa hai saari gustaakhiyaan rahin qaaem us pe rutba vaqaar jhuTaa hai laapata huun main ghar nahin koi chiTThi jhuTi hai taar jhuTaa hai maut se tez dauD kis ki hai umr par shahsavaar jhuTaa hai dhuup ke shuul bikhre hain har suun chaandni kaa khumaar jhuTaa hai aankhon mein rakh hunar takallum kaa lafzon par e'tibaar jhuTaa hai baar-e-khaatir hai ham ko fikr-e-zist hasraton kaa mazaar jhuTaa hai TuTnaa aaine ki fitrat hai pattharon se qaraar jhuTaa hai 'chaand' kab tak karoge dil kaa yaqin aap kaa intizaar jhuTaa hai"

"tabib ho ke bhi dil ki davaa nahin karte ham apne zakhmon se koi daghaa nahin karte parinde uDne lage hain ghurur ke tere havaa mein kaaghzi par se uDaa nahin karte nakel Daalni hai nafs ke iraadon par binaa lagaam ke ghoDe thamaa nahin karte duaa ko haath uThaate nahin har ik ke liye to ye bhi sach hai ki ham bad-duaa nahin karte ye surkh aandhiyaan kyaa 'chaand' kaa bigaaDeingi buland peD havaa se giraa nahin karte"

"tu kaash mile mujh ko akeli to bataaun suljhe miri qismat ki paheli to bataaun aane se tire pahle khabar de di havaa ne aankhon pe mire rakh tu hatheli to bataaun mahke hain tire jism ki khushbu se fazaaein naaraaz na hon champaa chameli to bataaun kyon tere muqaddar mein nahin meri mohabbat dikhlaae tu be-rang hatheli to bataaun viraaniyaan tanhaaiyaan mausam hai khizaan kaa anvaar karo dil ki haveli to bataaun chehre pe mire raaz TaTolaa na karo tum hamraaz bane aankh nashili to bataaun izhaar-e-mohabbat ki talab dil mein liye huun tanhaa jo mile teri saheli to bataaun aankhon mein tiri yaad kahin zakhm na kar de nikle ye agar phaans nukili to bataaun"