Ghazal

"ye aur baat ki taakhir se alag karungaa magar tujhe tiri tasvir se alag karungaa musaafirat se jo fursat hui nasib to phir thakan ko paanv ki zanjir se alag karungaa jo mere daaimi ehsaas se juDaa hai sabaq main kis tarah use tahrir se alag karungaa kunvaare khvaab hue jaa rahe hain aavaara unhein main lazzat-e-taabir se alag karungaa utaarnaa hai mujhe ab anaa ko maut ke ghaaT so us ko lahja-e-shamshir se alag karungaa mire badan mein lagi hai jo hijr ki dimak main us ko vasl ki tadbir se alag karungaa rivaayaton se rakhungaa main 'faiz' rishta magar sukhan zaraa saa taqi-'mir' se alag karungaa"

"sulagti dhuup mein har saaebaan de chukaa huun main is zamin ko kai aasmaan de chukaa huun vo tere ishq kaa ho yaa tiri judaai kaa isi hayaat mein sab imtihaan de chukaa huun tu dil-nashin hai vafaadaar hai zahin bhi hai magar main aur kisi ko zabaan de chukaa huun miri zabaan pe taalaa lagaane vaale sunein main apni aankhon se apnaa bayaan de chukaa huun vo aadmi mujhe bechainiyaan pilaa rahaa hai jise sukhon kaa main saaraa jahaan de chukaa huun mire vajud ko miTTi ki shakl di jis ne ye miTTi main usi miTTi ko daan de chukaa huun mujhe bhulaaeinge vo 'faiz' kis tarah aakhir vo jin labon ko main apne nishaan de chukaa huun"

"log kahte hain bahut ham ne kamaai duniyaa aaj tak meri samajh mein nahin aai duniyaa jab nazar naama-e-aamaal ke daftar pe paDi nekiyon par mujhe ubhri nazar aai duniyaa zaahiri aankhon se dekho to dikhaai de pahaaD baatini aankhon se dekho to hai raai duniyaa ye qadam tere taaaqub mein chale hain kitnaa ye bataaegi miri aabla-paai duniyaa jitne dukh-dard tahaaif mein diye hai tu ne le ke aaegi azal sab ki davaai duniyaa 'faiz' jo phirti hai khud khaana-ba-doshon ki tarah kyaa karegi vo meri raah-numaai duniyaa"

"yuun pahunchnaa hai mujhe ruuh ki tughyaani tak jis tarah rassi se jaataa hai ghaDaa paani tak kaaTni paDti hai naakhun se takan ki zanjir yuun hi aati nahin mushkil koi aasaani tak zindagi tujh se banaae hue rishte ki havas mujh ko le aai hai duniyaa ki pareshaani tak aise jarraahon kaa qabza hai sukhan par afsos kar nahin sakte jo lafzon ki musalmaani tak apne andar main kiyaa kartaa huun raajaa ki talaash is vasile se pahunchnaa hai mujhe raani tak aise lafzon ko bhi be-aib banaayaa ham ne jin ki jaaez hi nahin hoti thi qurbaani tak husn kaa paanv dabaati hai jahaan shokh havaa ishq le aayaa hai mujh ko isi viraani tak 'faiz' ham log hain ik aisi kachehri ke vakil faujdaari se pahunchte hain jo divaani tak"

"tamaam-duniyaa kaa lakht-e-jigar banaa huaa thaa vo aadmi jo miraa dard-e-sar banaa huaa thaa use talaash rahi hain miri udaas aankhein jo khvaab raat ke pichhle pahar banaa huaa thaa pahunch ke kucha-e-jaanaan mein aa gayaa baahar mire vajud ke andar jo Dar banaa huaa thaa kamaal-e-ishq ne mere kiyaa hai zer use kisi kaa husn jo kal tak zabar banaa huaa thaa utarti kaise sukun ki vahaan koi chiDiyaa mahal jo hirs ki buniyaad par banaa huaa thaa banaa diyaa use insaan teri qurbat ne tire firaaq mein jo jaanvar banaa huaa thaa ye us kaa shauq nahin us ki inkisaari thi vasia ho ke bhi jo mukhtasar banaa huaa thaa pahunch gayaa hai javaani se ab buDhaape tak vo ek dukh jo sharik-e-safar banaa huaa thaa havas ke chaak ki miTTi javaan thi jab tak tamaam-shahr yahaan kuza-gar banaa huaa thaa vo jaantaa thaa mire an-kahe dukhon kaa ilaaj magar vo 'faiz'-miyaan be-khabar banaa huaa thaa"

"na to ham bahr se vaaqif na sukhan jaante hain kaise dein lafzon ko tartib ye fan jaante hain vo kisi taur bhi tujh ko na lagaaeinge gale ai khushi jo bhi tiraa chaal-chalan jaante hain dil ke mandir mein hain do ek pujaari aise jo na puujaa na ibaadat na bhajan jaante hain is liye thaam ke rakkhaa hai junun kaa daaman ai khirad ham tiraa divaaliya-pan jaante hain jo mohabbat ke hain alfaaz mire honTon par vo taassub kaa tire chir-haran jaante hain paanv phailaate hain itnaa ki hai jitni chaadar apni auqaat hai kyaa khuub apan jaante hain"

"baat ban jaae jo tafsil se baatein kar le tishnagi meri agar jhiil se baatein kar le jahaan ke gaanv se taariki nikal sakti hai dil agar fikr ki qindil se baatein kar le tu kharidaar mire dil ki zamin kaa hai Thahar pahle dil ruuh ki tahsil se baatein kar le kaaba-e-dil tujhe mahfuz agar rakhnaa hai jaa ke ulfat ki abaabil se baatein kar le sirf quraan ke alaava hai bhalaa kis ki majaal jo ki tauraat se injil se baatein kar le vo suhulat hamein goggle ne faraaham ki hai pal mein insaan brazil se baatein kar le aaqibat apni banaani hai agar 'faiz' tujhe nafs ki uDti hui chiil se baatein kar le"

"kisi kaa saayaa na aanchal hamaare saath huaa tumhaare baad bahut chhal hamaare saath huaa hamaare saae se jis ko shadid nafrat thi vo shakhs aa ke mukammal hamaare saath huaa hamesha apni mohabbat ke haathon qatl hue ye haadisa bhi musalsal hamaare saath huaa nikal na paae mohabbat tire hisaar se ham hamaaraa ishq bhi paidal hamaare saath huaa use bhi dekh liyaa thaa havaa-e-vahshat ne vo ik charaagh jo paagal hamaare saath huaa dobaara tark-e-taalluq pe mashvara kareinge jo pahlaa ishq kisi pal hamaare saath huaa"

"le ke is ghaaT se us ghaaT gai meraa vujud fikr dimak ki tarah chaaT gai meraa vujud meri barbaadi mein ik shaakh bhi shaamil thi miri khud kulhaaDi to nahin kaaT gai meraa vujud apne me'yaar kaa bhi daam na mil paayaa mujhe zindagi le ke kai haaT gai meraa vujud main sikandar thaa magar aakhiri manzil ki taraf le ke ik TuuTi hui khaaT gai meraa vujud 'faiz' jis miTTi ne tartib diyaa thaa mujh ko ek din miTTi vahi paaT gai meraa vujud"

"din utarte hi nai shaam pahan letaa huun main tiri yaadon kaa ehraam pahan letaa huun mere ghar vaale bhi taklif mein aa jaate hain main jo kuchh der ko aaraam pahan letaa huun raat ko oDh ke so jaataa huun din-bhar ki thakan subh ko phir se kai kaam pahan letaa huun jab bhi pardes mein yaad aataa hai ghar kaa naqsha main tasavvur mein dar-o-baam pahan letaa huun ek chaandi ki anguThi ke havaale se faqat apni ungli mein tiraa naam pahan letaa huun 'faiz' yuun rakhtaa huun main us ki mohabbat kaa bharam us ke hisse ke bhi ilzaam pahan letaa huun"

"tamaam husn-o-maaani kaa rang uDne lagaa khili jo dhuup to paani kaa rang uDne lagaa ishaaraa karti hain chehre ki jhurriyaan chup-chaap to kyaa badan se javaani kaa rang uDne lagaa jadid rang mein aayaa jo misra-e-ulaa hasad se misra-e-saani kaa rang uDne lagaa kitaab-e-zist ke mafhum ko samajhte hi yahaan baDe baDe gyaani kaa rang uDne lagaa jo daaimi thaa vahi rah gayaa hai zehnon mein jo aarzi thaa kahaani kaa rang uDne lagaa miri nazar se mili 'faiz' jab nazar us ki to mere dushman-e-jaani kaa rang uDne lagaa"

"isi liye hamein ehsaas-e-bevafaai nahin hamaare paas hain kangan koi kalaai nahin yahi sabab hai ki be-rang ho gae sab khvaab hamaari aankhon mein kaajal thaa raushnaai nahin mohabbaton ke safar mein mohabbaton ke sivaa hamaare paas koi dusri kamaai nahin us ik nigaah kaa tarz-e-bayaan aisaa thaa kisi ki baat hamaari samajh mein aai nahin chamak hai us ke har ik misra-e-badan pe magar miri ghazal ko koi detaa munh-dikhaai nahin ham apne ahd ke suqraat hain hamaare yahaan koi bhi guftugu hogi havaa-havaai nahin vahaan pahunch ke bhi haasil huaa hai 'faiz' mujhe jahaan kisi se miri koi aashnaai nahin"

"nayaa sukhan nae tarz-e-sukhan mein rakh diyaa hai jo be-vatan the unhein bhi vatan mein rakh diyaa hai hamaari aankhon ki lazzat kaa dhyaan rakhte hue kisi kaa aks kisi ke badan mein rakh diyaa hai main jis khushi ke taaaqub mein thaa usi ne mujhe udaasiyon ke nae pairahan mein rakh diyaa hai vo rang jis pe chhiDakti hai jaan har titli mire khudaa ne mire aacharan mein rakh diyaa hai sabhi ne apni siyaasat ke khvaab kaa malba hamaari aankhon ke sansad bhavan mein rakh diyaa hai labon se apne tabassum nichoD kar us ne kai gulon ko alag baankpan mein rakh diyaa hai"

"na jaane kis ke sahaare badan se lag gayaa hai tumhaaraa rog hamaare badan se lag gayaa hai udaasiyon kaa jo kiiDaa thaa zehn tak mahdud zaraa si chuuk se saare badan se lag gayaa hai hamein bhi milne lagi ehtiyaat ki khuraak maraz miThaas kaa saare badan se lag gayaa hai jagah jagah pe kharaashon ki fasl ug aai dukhon kaa dev bechaare badan se lag gayaa hai vo khvaab jis ki hui parvarish mire haathon vo dusron ke kunvaare badan se lag gayaa hai pahan ke ghuum rahe ho udaasiyon kaa libaas ye kaun hai jo tumhaare badan se lag gayaa hai"

"jatan se rakh hamein jab tak ki baa-hayaat hain ham tire badan ki riyaasat ke kaaghzaat hain ham hamein kharidaa thaa sone ke bhaav mein jis ne ab us ki nazron mein pital ke zevaraat hain ham ta'alluqaat kaa nashsha utar chukaa hai magar abhi bhi lagtaa hai ham ko tumhaare saath hain ham jise samajh ke tujhe ishq kaa hunar aaya usi kitaab-e-mohabbat ki lafziyaat hain ham usi ne rakkhaa hai be-lutf haashiye pe hamein vo jis qabile ki asli zaruriyaat hain ham hamein fuzul idaaron pe kharch mat karnaa mohabbaton ke safar se mili zakaat hain ham"

"vaadi-e-jism mein bikhraav nahin chaahte hain ham tire haathon koi ghaav nahin chaahte hain qais saahib ki rivaayat se mohabbat hai magar apne uupar koi pathraav nahin chaahte hain ham musaafir hain mohabbat hai hamaari manzil is safar mein koi Thahraav nahin chaahte hain isi lahje se hai pahchaan adab mein apni is liye ham koi badlaav nahin chaahte hain guftugu kaa hamein bharpur hunar hai maalum phir bhi khaamoshi se algaav nahin chaahte hain zindagi phuul se naazuk hai yahi soch ke ham is ke andar koi uljhaav nahin chaahte hain is liye rahte hain do-rangi usulon ke khilaaf ek baazaar mein do bhaav nahin chaahte hain"

"jo vahshaton ke safar se niDhaal ho gae hain vo saare log mire ham-khayaal ho gae hain vo jis gali se hamein mustarad kiyaa gayaa thaa ham us gali mein dobaara bahaal ho gae hain hamaare dast-e-hunar ki riyaazaton ke tufail bahut se log yahaan baa-kamaal ho gae hain javaab dene ki jin mein salaahiyat hi nahin unhin se log saraapaa savaal ho gae hain usi ki aaj bhi rahti hain muntazir aankhein jise judaa hue pachchis saal ho gae hain mohabbaton ki lughat ke vo lafz hain ham log jo nafraton ke liye ik vabaal ho gae hain"

"nayaa adab nae aadaab kaun dekhegaa hamaaraa halqa-e-ahbaab kaun dekhegaa main is khayaal se do-chaar huun kai din se tumhaare baad mire khvaab kaun dekhegaa tumhaare haathon parosaa gayaa mohabbat se vo jaam-e-jam hai ki tezaab kaun dekhegaa tumhaare banne ki sab log daad deinge magar mire bigaDne ke asbaab kaun dekhegaa yahaan sabhi hain tire jhiil se badan ke murid hamaari ruuh kaa taalaab kaun dekhegaa masarraton ke charaaghon mein nuur hai jab tak kisi udaasi kaa mehraab kaun dekhegaa"

"jo fan se fikr ki tadbir guftugu karegi to gungi bahri bhi tasvir guftugu karegi main jite-ji use aisaa hunar sikhaa dungaa ki mere baa'd ye tahrir guftugu karegi 'adaalaton mein gavaahi hamein mile na mile hamaare paanv ki zanjir guftugu karegi isi umiid pe aankhon ke khvaab zinda hain ki ek din kavi taa'bir guftugu karegi pighal hi jaaegaa vo sang-dil kisi din jab mire zabaan ki taasir guftugu karegi badan se kar ke badan ki samaa'aton ko duur ye saans ruuh se aakhir guftugu karegi"

"lagaa ki jaise kisi kaanpte hiran ko chhuaa hamaare haathon ne jab phuul se badan ko chhuaa tamaam jism mein aasudgi si phail gai tire dahan ne kabhi jab mire dahan ko chhuaa simaT ke aa gai kaaghaz pe surat-e-ashaar hamaari fikr ne jab bhi kisi ghuTan ko chhuaa kai maqaam pe donon mile zarur magar kishan ne raadhaa ko raadhaa ne kab kishan ko chhuaa lipaT ke pahunchaa main jab nekiyon ki khushbu mein lahad ki miTTi ne Darte hue kafan ko chhuaa kabhi na ho saki izhaar-e-ishq ki jurat ye aur baat kai suraton ne man ko chhuaa ham apni jaan bhi kar deinge 'faiz' us pe nisaar agar kisi ne kabhi azmat-e-vatan ko chhuaa"

"bhang khaate hain na gaanjaa na charas piite hain ham vo bhanvare hain jo ehsaas kaa ras piite hain aap is Dhang se amrit bhi nahin pi sakte jis hunar-mandi se ham ashk-e-nafas piite hain sab yahin chhoD ke jaanaa hai khabar hai lekin phir ye ham kis liye duniyaa ki havas piite hain jo tiri yaad ke kiiDe hain badan ke andar vo miri ruuh ko khaate hain plus piite hain tab kahin hotaa hai ik shahd kaa chhattaa tayyaar an-ginat phulon kaa khuun jab ye magas piite hain aap ik buund bhi pi lein to ghashi aa jaae gham ke aansu jo asiraan-e-qafas piite hain 'faiz' ki fikr ki botal mein hai jo zahr-e-sukhan dekhnaa hai ki abhi kitne baras piite hain"

"suraahi muzmahil hai mai kaa pyaala thak chukaa hai dar-e-saaqi pe har ik aane vaalaa thak chukaa hai andhero aao aa kar tum hi kuchh aaraam de do ki chalte chalte bechaara ujaalaa thak chukaa hai 'adaavat ki daraarein vaisi ki vaisi hain ab tak vo bharte bharte ulfat kaa masaala thak chukaa hai mujhe luuTaa zarurat ki yahaan har company ne musalsal karte karte dil kifaalat thak chukaa hai sukhan mein kuchh nae majmu'a le kar aaiye aap puraani shaa'iri se har risaala thak chukaa hai bataa ai 'faiz' aakhir gaanv jaa kar kyaa karegaa tu jis ke naam ki japtaa thaa maalaa thak chukaa hai"