Ghazal

"rahe asir-e-qafas aashiyaan na dekh sake bhari bahaar mein ham gulsitaan na dekh sake bas ik jhalak hi ne behosh kar diyaa ham ko tire jamaal ki raanaaiyaan na dekh sake dil-o-jigar tap-e-furqat mein jal rahe hain magar kabhi nikaltaa huaa ham dhuaan na dekh sake hamein to jab se ye zulmat-kada nasib huaa kabhi ham apni bhi parchhaaiyaan na dekh sake hazaar tarah se tadbir ki dil-e-naashaad magar kabhi tujhe ham shaadmaan na dekh sake rah-e-talab mein rakhe paanv jab se ai 'fayyaaz' junun-e-shauq mein sud-o-ziyaan na dekh sake"

"aap ki barhami ko aag lage yaa miri bebasi ko aag lage mujh se daaman chhuDaa ke jaate hain un ki is be-rukhi ko aag lage zindagi aur vo bhi tere baghair phir to is zindagi ko aag lage un ke aage zabaan khuli na kabhi meri is khaamushi ko aag lage dil-e-bulbul kaa khuun kar Daalaa phuul ki pankhuDi ko aag lage mujh ko 'fayyaaz' kar diyaa barbaad is gham-e-aashiqi ko aag lage"

"husn jab khugar-e-jafaa na rahaa phir mohabbat mein kuchh mazaa na rahaa mujh ko jab teraa aasraa na rahaa dil mein phir koi muddaaa na rahaa kaisi be-dard ho gai duniyaa ek bhi dard-aashnaa na rahaa khaak un se rakhun umid-e-karam jab sitam kaa bhi aasraa na rahaa apne haal-e-tabaah ke sadqe aashnaa bhi to aashnaa na rahaa saari duniyaa hai be-vafaa 'fayyaaz' ab yahaan koi baa-vafaa na rahaa"

"main jo ruThaa to manaane aae shaayad ab hosh Thikaane aae ho ke majbur aaj tere huzur gham ki rudaad sunaane aae ho tumhin darpae-aazaar to phir kaun taskin dilaane aae jab main jaanun ki miri tarah koi yuun tire naaz uThaane aae doston ne bhi churaa liin nazrein mujh pe aise bhi zamaane aae yaad-e-maazi hai ghanimat 'fayyaaz' lauT kar kis ke zamaane aae"

"vo mujh pe taras khaaein ye qismat hi nahin hai main shikva karun ye miri fitrat hi nahin hai anjaan bane baiThe hain vo bazm mein aise jaise ki kisi se unhein nisbat hi nahin hai niklaa bhi qafas se to na pahunchungaa chaman tak majbur huun parvaaz ki taaqat hi nahin hai ai kaash tiraa qurb jo ho jaae mayassar phir mujh ko kisi shai ki zarurat hi nahin hai 'fayyaaz' faqat apne muqaddar se gila hai un se to mujhe koi shikaayat hi nahin hai"

"ye tere husn ki jo shohrat hai sab mire ishq ki badaulat hai un se ulfat to dar-haqiqat hai ab ye kahne ki kis ko jurat hai shaadmaan koi aur koi naashaad dekhiye apni apni qismat hai yaad rakhnaa hamaaraa sheva hai bhuul jaanaa tumhaari aadat hai kyaa bataaun ki haal kaisaa hai tum ne puchhaa yahi ghanimat hai sabr se kaam lo zaraa 'fayyaaz' har musibat ke baad raahat hai"

"meri maayus nazron ko tiraa didaar ho jaae to ye soi hui taqdir phir bedaar ho jaae qayaamat ki kashish hai tujh mein jo bhi ik nazar dekhe vo tujh par jaan dene ke liye tayyaar ho jaae tiraa gham hai mataa-e-zist ye main bhi samajhtaa huun magar vo kyaa kare jo ziist se bezaar ho jaae tumhaare dar pe main kab se lagaae aas baiThaa huun idhar bhi ik nigaah-e-lutf ai sarkaar ho jaae uDaate ho hansi 'fayyaaz' tum meri mohabbat ki miri surat tumhein bhi ishq kaa aazaar ho jaae"

"jab vafaa hi nahin zamaane mein phir mazaa kyaa hai dil lagaane mein aatish-e-gham ne dil jalaa Daalaa lag gai aag aashiyaane mein jaane kyon dil dhaDakne lagtaa hai ab kisi se nazar milaane mein teri surat kaa vaah kyaa kahnaa koi saani nahin zamaane mein ishq kaa raaz haae mat puchho aur khultaa gayaa chhupaane mein kis ko 'fayyaaz' ham kahein apnaa koi apnaa nahin zamaane mein"

"teri furqat mein mujhe niind kahaan aati hai aankhon aankhon mein har ik raat guzar jaati hai ab to is taur se zaalim tiri yaad aati hai ki mujhe hosh se begaana banaa jaati hai main to har vaqt tujhe yaad kiyaa kartaa huun tujh ko bhule se kabhi yaad miri aati hai teraa har zulm-o-sitam mujh ko gavaaraa hai magar teri ghaflat se miri jaan pe ban aati hai ab ye aalam hai ki bedard zamaane ke saath apni haalat pe mujhe khud bhi hansi aati hai khatm hoti hai shab-e-gham ki kahaani 'fayyaaz' shama bujhti hai bas ab subh hui jaati hai"

"zindagi aur bhi dushvaar hui jaati hai ab to har saans ik aazaar hui jaati hai bin kahe raaz-e-mohabbat hai zamaane pe ayaan khaamushi bhi miri guftaar hui jaati hai saaf inkaar kiyaa vasl se tu ne lekin muskuraahaT tiri iqraar hui jaati hai kabhi Dartaa huun giraan guzre na un ko miri baat aur kabhi jurat-e-izhaar hui jaati hai un ke aane ki khabar sun ke na jaane us dam tez kuchh qalb ki raftaar hui jaati hai zabt ki had se guzarte hi mohabbat apni khuub rusvaa sar-e-baazaar hui jaati hai un ki maasum nazar thi kabhi 'fayyaaz' magar ab to aalam se khabar-daar hui jaati hai"