Ghazal

"yaar is chiiz kaa baazaar nahin hogaa kyaa khvaab kaa koi kharidaar nahin hogaa kyaa haath kaa lams haraarat to nahin de paayaa is kaa matlab hai use pyaar nahin hogaa kyaa main ne dariyaa ke kinaaron ko milaanaa chaahaa meri mehnat se to inkaar nahin hogaa kyaa mustaqil khvaab kaa hissa hi banaa phirtaa hai tu kabhi niind se bedaar nahin hogaa kyaa is kinaare se agar saaf nazar aataa hai phir safar paar kaa bekaar nahin hogaa kyaa"

"ek hi hal shadid vahshat mein aur cigarette mazid vahshat mein thak gae chikh chikh dasht mein ham kartaa kyaa thaa farid vahshat mein kuchh bharosa nahin divaane kaa kyaa kare kyaa baiid vahshat mein aam se din nahin guzarte hain kaise guzregi iid vahshat mein chaand ki chaandni se aangan mein hote hain mustafid vahshat mein putliyaan phailti hi jaati hain ghaTti jaati hai diid vahshat mein"

"miri du'aa mein asar hotaa to main rotaa kyaa ki tere pahlu mein sar hotaa to main rotaa kyaa na-jaane kaun se raston se zindagi guzri tiri gali se guzar hotaa to main rotaa kyaa mire to jism kaa hissa rahi hain divaarein agar kahin koi dar hotaa to main rotaa kyaa kahaan main hijr ko chup-chaap kaaT saktaa thaa miraa jo itnaa jigar hotaa to main rotaa kyaa vo us kinaare rahaa 'umr bhar idhar main rahaa agar ki main bhi udhar hotaa to main rotaa kyaa jise bhi ghaur se dekhaa mujhe paraayaa lagaa miraa koi bhi agar hotaa to main rotaa kyaa"

"ham se logon kaa jahaan bhar mein Thikaanaa kyaa hai tum to sab jaante ho tum ko bataanaa kyaa hai jo diyaa dekh ke binaai se mahrum huaa aise kam-zarf ko suraj kaa dikhaanaa kyaa hai teri qismat jo ravaan zindagi haasil hai tujhe tu nahin jaantaa dhakke se chalaanaa kyaa hai hoti duuri to tire gham ko manaate ham bhi kaun saa hijr tiraa khvaab mein aanaa kyaa hai main jo andaaze lagaane mein lagaa huun kab se kyaa koi mujh ko bataaegaa zamaana kyaa hai dasht mein ret thi yaa ishq ki daulat ‘saahib’ ghar se nikle to samajh aai kamaanaa kyaa hai"

"mazaa na puchh jo khud-saakhta fusun mein hai tu mere paas nahin aur dil sukun mein hai usi ne khuun nichoDaa bahut rag-o-pai se jise pataa thaa mohabbat hamaare khuun mein hai tabhi to aai nahin aaj tak qayaamat bhi vo jaantaa hai abhi aadmi junun mein hai jo be-khayaali mein kahte ho baat karte hue main sach kahun miri duniyaa us ek huun mein hai fasil-e-jism salaamat hai siina chaak nahin dikhaaein kaise tumhein dard jo darun mein hai"

"kyon ye andesha jaane vaalaa nahin lauT kar tu bhi aane vaalaa nahin ham ne paale hain aise saare gham jin kaa koi kamaane vaalaa nahin saamne jaao jis ne jaanaa hai main diye ko bujhaane vaalaa nahin gidh ne is baat par kiye sajde koi laasha uThaane vaalaa nahin main buraa hi sahi magar vaa'iz teri baaton mein aane vaalaa nahin jaa kisi aur ko du'aa de de main muraadon ko paane vaalaa nahin"

"chaahe kaandhon pe aasmaan rakh do mujh pe koi bhi imtihaan rakh do kaun kahtaa hai hijr kaa qissa vasl ke ain darmiyaan rakh do mere khvaabon ki kirchiyaan chhoDo aaina saamne vahaan rakh do zindagi aur kuchh nikal aai tum rivaayaat-e-raftagaan rakh do khvaab mein bhi faraar mumkin hai mere bistar pe beDiyaan rakh do"

"ham ye kirdaar kar chuke pahle khud ko divaar kar chuke pahle ab tiraa ehtiraam karte hain ham tujhe pyaar kar chuke pahle tum se munkir to ab hue hain ham apnaa inkaar kar chuke pahle maut aasaan maangte hain ham jiinaa dushvaar kar chuke pahle naam badnaam kar ke dushman kaa vaar to yaar kar chuke pahle ishq kaa ain aag kaa dariyaa baarhaa paar kar chuke pahle khud-kushi vajh-e-kaif hai hi nahin kitne bimaar kar chuke pahle aakhiri intizaar saaraa din ham kai baar kar chuke pahle"

"karne vaale ne hi ki dekh inaayat kaisi teraa phir mujh se gila kaisaa shikaayat kaisi ab hamein duur se pahchaan liyaa jaataa hai ishq mein ham bhi banaa baiThe hain surat kaisi kyon khaDe munh ko take jaate ho main haaraa huun meraa sar kaaT ke le jaao ijaazat kaisi kitni aasaani se main khulne lagaa huun sab par khud pareshaan huun ki bigDi hai ye aadat kaisi aakhiri vaqt mein ye apnaa pataa detaa hai ishq hai ishq miyaan is ki alaamat kaisi to mohabbat mein zaruri thaa hamein har lamha tujh se ab ishq hai so ishq mein haajat kaisi chain se jiine kahaan dete tire baa'd hamein ham ne khud hosh ganvaae hain himaaqat kaisi roz-e-mahshar main bataaungaa tu kyaa puchhegaa ek muhtaaj pe guzri hai qayaamat kaisi"

"dil tamaasha hai tamaashaa-gar nahin hai yaar ji so zabaan bhi chup rahe behtar nahin hai yaar ji ham jahaan jis baat par majbur hain aamin hai aap ko apne khudaa kaa Dar nahin hai yaar ji dastakon ke khauf tak to baat aaegi nahin ham hain vo divaar jis kaa dar nahin hai yaar ji ek markaz aap hain jis kaa bane ham daaera apnaa koi dusraa mehvar nahin hai yaar ji raaste be-samt hain so manzilon ki fikr kar kaarvaan kaa koi bhi rahbar nahin hai yaar ji muflisi mein khvaab hon to khaak achchhi baat hai dekh kar hai faisla sun kar nahin hai haar ji ik zamaana do farishte laakh 'saahib' saath hon kam lagegi kul khudaai gar nahin hai yaar ji"

"jagah jagah pe khushi ko shahid karne lagaa main apne haq mein tiraa gham mufid karne lagaa tire firaaq mein aankhon ko vaarne ke baa'd tamaam dard miraa dil kashid karne lagaa tumhein to bhiiD mein ehsaas hi nahin is kaa tumhaare baa'd akele jo iid karne lagaa tumhaare jaisaa jo baazaar se gayaa to phir hamaare jaisaa khasaare kharid karne lagaa ye tere hijr mein dekhaa hai dil kaa paagal-pan bichhaD ke tujh se mohabbat mazid karne lagaa"

"ek hi vaqt mein banda bhi khudaa bhi main thaa so diyaa bhi main mire dost havaa bhi main thaa mere haathon ki lakirein to bahut chhoTi thiin aur sitam ye ki gharaane kaa baDaa bhi main thaa main jise DhunD rahaa thaa vo koi hai hi nahin phir ye dhokaa hai agar mere sivaa bhi main thaa haadisa qaafile mein ye bhi mire saath huaa sab se kam thaa miraa saamaan luTaa bhi main thaa mere aansu hi gavaahi mein bache hain saahib teri badli hui aankhon ko jachaa bhi main thaa"

"apni miTTi ko nam karungaa main roungaa teraa gham karungaa main pahle dariyaa karungaa aankhon ko phir samundar mein zam karungaa main khatm hote hi aakhiri cigarette teri yaadon pe dam karungaa main haath talvaar kar ke tum dekho ungliyon ko qalam karungaa main tars khaaeinge tere baa'd sabhi khud pe itnaa sitam karungaa main dekhnaa aur baat hai 'saahib' dekhnaa baat kam karungaa main"

"khvaah-makhvaah be-sabab luTaai hui 'umr bhi baap ki kamaai hui hijr mein vasl ki talaash mein the vaqt se is liye laDaai hui tujh ko lag jaae zindagi meri mujh ko aae kisi ki aai hui teri yaadon ke naam hoti hai chaae aksar miri banaai hui yaadon ki gaThDi mein bachaa kyaa hai ik qasam yaad hai uThaai hui le ke phirte hain raat bhar ham log subh mein shaam-e-gham manaai hui dasht se chhaale the chhupaae hue pyaas dariyaa se thi chhupaai hui ham ne hans kar dikhaa diyaa 'saahib' rok li baat munh mein aai hui"

"bahut ziyaada jo marti thi aap par laDki utar gai hai vo pichhle stop par laDki sharif-zaadon ke bigDe hue se kuchh laDke nachaate rah gae table ki thaap par laDki tumhaare ghar mein baDe bhaai hain so kyaa maa'lum nikal ke aai hai kyon workshop par laDki idhar udhar ke sabhi e'tibaar jhuTe hain ziyaada maan to rakhti hai baap par laDki 'ajib shai hai so andaaza hi nahin koi pighalne aae pighal jaae bhaap par laDki"

"ham jo pakDein bhi to kyaa haath mein aa jaaeinge khvaab jugnu ki tarah raat mein aa jaaeinge raat bhar chaand sitaaron se miri baat hui aisaa lagtaa thaa kisi baat mein aa jaaeinge ham se darvesh rahein gosha-nashin behtar hai khud se nikle to tiri zaat mein aa jaaeinge vaqt ko haath mein mahsus kareinge pahle aur phir aap bhi auqaat mein aa jaaeinge jaaein duniyaa ke kisi kone kisi mausam mein ham se vaa'da karein barsaat mein aa jaaeinge"

"chhoD de zid ki istikhaara kar 'ishq naakaam hai dubaara kar tujh ko to raat ki suhulat hai ik diyaa khud jalaa sitaara kar main bhi zinda huun is kahaani mein tu bhi kirdaar ko gavaara kar dekh kitne hain dekhne vaale roz apni nazar utaaraa kar kuchh bhanvar the 'ajib paanv mein dasht ne kah diyaa kinaara kar vaqt ab kun kaa bhi nahin 'saahib' jumbish-e-lab na de ishaara kar"

"kuchh bhi ho mujh ko haar gavaara kabhi nahin vo kyaa hai koi khel mein haaraa kabhi nahin darpesh zindagi ko kai haadse rahe lekin kisi madad ko pukaaraa kabhi nahin ye iztiraab-e-ruh hai yaa jism kaa sukun dariyaa ko sochtaa huun kinaaraa kabhi nahin jaisaa kisi ne mujh ko pukaaraa main ban gayaa kirdaar apnaa koi bhi maaraa kabhi nahin meri to aise 'ishq se tauba qubul kar har saans kah rahi hai dobaaraa kabhi nahin"

"yaqin lafz ki tasvir bante jaa rahe hain gumaan gunge ki taqrir bante jaa rahe hain hamein na dekh ki ham log phoD kar aankhein kisi ke khvaab ki taa'bir bante jaa rahe hain jinhein ragon mein utaaraa thaa ehtimaam ke saath vo log zahr ki taasir bante jaa rahe hain radif qaafiya bahrein samajh mein aati nahin ye kal ke launDe miyaan 'mir' bante jaa rahe hain use khudaa na kahein aur kyaa kahein 'saahib' ki jis ke faisle taqdir bante jaa rahe hain"

"bik chukaa to khayaal aayaa mujhe biich baazaar kaun laayaa mujhe main kinaaraa banaa huaa thaa aur mere dariyaa ne kaaT khaayaa mujhe baarhaa dekhaa hai ki dekhtaa hai raushni se nikal ke saaya mujhe 'ishq ki ik zaraa si Thokar ne jism se ruuh tak hilaayaa mujhe ye fazaa rang-o-bu na tere log teri duniyaa mein kuchh na bhaayaa mujhe donon haathon se thaam kar 'saahib' maan ne pahlaa qadam chalaayaa mujhe"

"aag hote hain kabhi log dhuaan hote hain ek jaise to miyaan ham bhi kahaan hote hain koi tahlil bhi kar degaa nahin sochaa thaa soch aati hi nahin thi ki ziyaan hote hain main gavaahi mein tumhein khvaab sunaaun apnaa bhed mujh par to khudaa ke bhi 'ayaan hote hain jin ki aavaaz qadam tez kiye deti hai hote hain pyaar mein kuchh log azaan hote hain khvaahishein vaqt ki Tahni se nahin jhaDti hain khvaab pachpan mein bhi dekhe hain javaan hote hain zindagi rail ki paTri pe le jaane vaale pyaar ko pyaar samajh sud-o-ziyaan hote hain main ne ik 'umr usi shakhs ko DhunDaa 'saahib' vo jo kahtaa thaa ki zakhmon ke nishaan hote hain"

"ho pareshaan na koi kashT uThaa mere liye ye hi behtar hai ki tu duur ho jaa mere liye haae is baar bhi dhoka hi rahaa mere liye vo jo palTaa to mujhe aisaa lagaa mere liye main ne is baat pe aakhir ko baghaavat kar di kitni aa sakti hai pinjre mein havaa mere liye saare pyaase the mire khuun ke lekin pahle aap andaaza karein yaar uThaa mere liye main ghulaamon ki tarah aur hai shahzaadi tu apne har khvaab ki qimat na ghaTaa mere liye maut se baDh ke tiraa hijr mujhe kyaa degaa aur tajviz karo koi sazaa mere liye vo to achchhaa huaa tab hosh nahin thaa 'saahib' varna main kahtaa ki duniyaa na banaa mere liye"

"zer-e-paa thaa falak zamin nahin ye huaa hai tumhein yaqin nahin hijr donon qubul kar ke jiye film mein aisaa koi scene nahin kaise saare zamaane kaa hotaa tere jitnaa to main zahin nahin ham munaafiq hon gar kahin kah dein daaein baaein munaafiqin nahin ye tamaasha hai aur tamaashe mein jhumtaa saanp dekh biin nahin khaamushi hai miyaan udaasi hai shahr-e-dil mein koi makin nahin aa ginein kitne logon ki saahib shakl achchhi hai dil hasin nahin"

"mujh se divaane ki kyaa koi mohabbat samjhe dekhnaa yaar kaa chehra jo ibaadat samjhe mujh mein ab aur sakat baaqi nahin baTne ki main mayassar huun jise jitnaa ghanimat samjhe vo to yuun ham ne jahaan chhoD diyaa tere baa'd ham tire baa'd yahaan jiinaa aziyyat samjhe tum ne kyaa kyaa na kiyaa khauf se aari ho kar ham hi paagal the jo duniyaa ko adaalat samjhe saari mushkil mein guzaari to suhulat samjhe tum suhulat se suhulat ko suhulat samjhe jo uDaanon ki thakan dekh ke aaya hi nahin vo parinda bhi bhalaa khaak masaafat samjhe ham ne inkaar mein iqraar ke pahlu DhunDe chhup ke milne ko bhi qudrat ki ijaazat samjhe"