Ghazal

"dil ki taskin ki davaa kyaa hai doston se bhalaa chhupaa kyaa hai is zamaane ko kyaa pata kyaa hai mere kamre kaa aaina kiyaa hai ye lahu to nahin mire mahbub teri rag rag mein dauDtaa kyaa hai hijr ke din visaal ki raatein chaahne vaale chaahtaa kyaa hai ishq tanhaai shaaeri cigarette aur is ke sivaa bachaa kyaa hai un ke dar se uThaa to bhuul gayaa ghar ko jaane kaa raasta kyaa hai sar ko sajde mein rakh diyaa jaae ishq kaa aur tarjuma kyaa hai vo jo mashhur kar rahaa hai mujhe mere baare mein jaantaa kyaa hai raasta jab na rok paayaa sitam phir ye talvon kaa aabla kyaa hai jism do ek ho gae kah kar aashiqi mein tiraa miraa kyaa hai ruk gae kahte kahte is dil mein us ne jis vaqt ye kahaa kyaa hai khair achchhaa huaa ke ai 'haani' vo na samjhe ke maajraa kyaa hai"

"jab jhuuT mujh se barsar-e-paikaar ho gayaa lahja jo meraa phuul thaa talvaar ho gayaa haq baat bolne ki qasam jab se khaai hai jiinaa hamaaraa shahr mein dushvaar ho gayaa dhoka fareb jhuTe dilaase tasalliyaan phir aaj us ke naam ye akhbaar ho gayaa kirdaar apne ghar mein hi mashkuk jis kaa thaa vo shakhs hi qabile kaa sardaar ho gayaa vo kah rahaa thaa teri vafaa aazmaaungaa main us ke aage aahani divaar ho gayaa bai'at ki baat ho gai rusvaa jahaan mein mashhur kaaenaat mein inkaar ho gayaa 'haani' ne baat apne buzurgon ki maan li vo baa-shuur saahib-e-kirdaar ho gayaa"

"hasin raat kaa manzar dikhaai detaa hai har ik charaagh sukhanvar dikhaai detaa hai ye TimTimaate hue jugnuon kaa ik halqa kai sitaaron se behtar dikhaai detaa hai ye kis ke lams ne madhosh kar diyaa us ko surur-yaafta saaghar dikhaai detaa hai jahaan se zarra baraabar bhi kuchh nahin dikhtaa vahaan se saaf tiraa ghar dikhaai detaa hai usi ko der talak dekhne ki hasrat hai vo ek chehra jo pal bhar dikhaai detaa hai hamaaraa ishq hai maqbuliyat ki manzil par kisi ke haath mein patthar dikhaai detaa hai ye kis maqaam pe le aaya ulfaton kaa junun shikasta dil bhi subuk-sar dikhaai detaa hai ik intizaar mein gharqaab ho chukaa 'haani' zamaane bhar ko shanaavar dikhaai detaa hai"

"der tak ungliyaan nihaarun main teri zulfon ko jab sanvaarun main apne sar ko badan se duur karo teraa sadqa agar utaarun main aisaa manzar kabhi na aaegaa faasle se tujhe pukaaron main ishq ke bhi usuul hote hain ye miri jiit hai ki haarun main main kisi ko buraa kahun kaise pahle khud ko zaraa sudhaarun main dil mein 'haani' kisi ke basnaa hai pahle apni anaa ko maarun main"

"vo jis kitaab mein chaahat kaa silsila niklaa varaq usi mein ek aansu bharaa huaa niklaa talaash main ne kiyaa thaa sukun-e-dil ke liye magar ye kaar-e-mohabbat baDaa judaa niklaa khushi to aai thi mehmaan ki tarah lekin ghamon ke saath hamesha kaa raabta niklaa vo duur thaa to ye lagtaa thaa hai bahut nazdik magar qarib se dekhaa to faasla niklaa bataa rahaa thaa jo phulon kaa raasta mujh ko usi ke paanv mein kaanTaa chubhaa huaa niklaa hazaaron dard tabibon ne Thiik kar Daale magar ye dard-e-mohabbat hi laa-davaa niklaa ujaale dekh ke hairaan hain meri qismat jo mere ghar se andheron kaa qaafila niklaa chale gae bhi to kyaa qahqahon ki mahfil mein mizaaj apnaa vahaan bhi bujhaa huaa niklaa vo ji rahaa hai zamaane mein shaan se 'haani' vo jis ke nafs kaa daaman jalaa huaa niklaa"

"himmat tamaam pesh-e-safar khatm ho gai manzil hai duur aur Dagar khatm ho gai kaise kaTegi raat tire intizaar mein cigarette jo aakhiri hai agar khatm ho gai phaili fazaa mein kyaa tire anfaas ki tapish phir sard raat kho ke asar khatm ho gai roz-e-azal se thi jo mire dil mein aarzu dekhaa jo us ko ek nazar khatm ho gai haathon mein apne aab udhar us ne kyaa liyaa sukhe labon ki pyaas idhar khatm ho gai 'haani' vo meraa saath nibhaane to aa gae tanhaai ki hayaat magar khatm ho gai"

"maut aae to is tarah aae zindagi ko khabar na ho paae ham na badleinge raasta apnaa jaan jaati hai gar chali jaae maut bar-haq hai aaegi lekin chaaraagar kaun tujh ko samjhaae sar salaamat jahaan nahin rahte sar uThaa kar vahaan se ham aae dar pe chhoD aae un ke ruuh apni sirf ham jism ko uThaa laae jab rahaa hi nahin koi apnaa kaun ghamgin dil ko bahlaae apne hi dil pe ab nahin qaabu khush kabhi ho kabhi ye uktaae apni likkhi hui ghazal paDhnaa dil jo 'haani' tumhaaraa ghabraae"

"rukh se parda jo haTaa do to mazaa aa jaae apnaa chehra jo dikhaa do to mazaa aa jaae duriyaan Dasti hain har shab mujhe saanpon ki tarah faasle aa ke miTaa do to mazaa aa jaae meri aavaaz akeli bhi hai maddham bhi hai tum jo aavaaz milaa do to mazaa aa jaae chaand ke misl nigaahon mein hasin chehra hai gham ke baadal ko havaa do to mazaa aa jaae jang kartaa hai zamaane se akelaa 'haani' tum agar saath nibhaa do to mazaa aa jaae"

"yaqinan raasta haq par nahi hai koi patthar koi Thokar nahi hai mohabbat kaa safar behtar nahi hai agar aashiq chalaa din bhar nahi hai ta'alluq TuuT jaane kaa hai khatra magar divaar mein ik dar nahi hai kise rudaad apni ham sunaaein kisi kaa haal ab behtar nahi hai mohabbat ne ise parvaaz di hai hamaari shaairi be-par nahi hai kahaan rakkhun shikasta dil ke TukDe bareilly mein ajaaib-ghar nahi hai sabhi dushman bhale hain doston se kisi ke haath mein nashtar nahi hai saDak par aa gae hain saare aashiq nagar mein baadshaah akbar nahi hai"

"sulagti ret pe khema lagaa ke dekhaa hai hamin ne dasht ko maskan banaa ke dekhaa hai hamaare sher tumhein kis tarah samajh aaein hamaaraa haal kahaan tum ne aa ke dekhaa hai kuchh is tarah se bitaai hain hijr ki raatein ke jaise mausam-e-garmaa bitaa ke dekhaa hai vahi bataaegaa umr-e-hayaat kitni hai vo jis ne ret pe chehra banaa ke dekhaa hai unhein thaa shauq-e-masihaai ham bhi aashiq the so ham ne apnaa galaa bhi kaTaa ke dekhaa hai sunaa thaa ishq mein hai sabr laazim-o-malzum to intizaar bhi palkein bichhaa ke dekhaa hai hamaari aankhein kaheingi na jaane kab ham se kisi ne aaj hamein muskuraa ke dekhaa hai hamaare sar pe thaa ilzaam be-vafaai kaa so apne aap ko apnaa banaa ke dekhaa hai ta'alluqaat mein aane lagi kami 'haani' taassubaat ne kyaa sar uThaa ke dekhaa hai"