Ghazal

"barbaadi-e-sarmaaya-e-jaan dekh rahaa huun ulfat ki navaazish kaa samaan dekh rahaa huun kis shokh ke shaanon pe hain bikhre hue gesu barham jo nizaam-e-do-jahaan dekh rahaa huun dekhaa na jise hazrat-e-musaa ne sar-e-tur main us ko qarib-e-rag-e-jaan dekh rahaa huun betaab jo hai apni jabin sajdon ki khaatir jhuk kar tire qadmon ke nishaan dekh rahaa huun allaah re jazb-o-kashish-e-ishrat-e-hasti hasrat se su-e-umr-e-ravaan dekh rahaa huun"

"meri vahshat kaa kyaa zamaana hai har zabaan par miraa fasaana hai dil hai aur ishq kaa fasaana hai uf javaani bhi kyaa zamaana hai zulf jab tak rahin-e-shaana hai dil ki uljhan kaa ik bahaana hai kis taraf ko jhuke jabin-e-sujud har taraf teraa aastaana hai dekhein kis kis se zulf ulajhti hai saamne aaina na shaana hai tausan-e-shauq kyon ruke meraa har-nafas dil ko taaziyaana hai ghaur se dekhiye agar to 'hasan' zindagi maut kaa fasaana hai"

"aariz-o-zulf-e-yaar ki baatein jaise lail-o-nahaar ki baatein husn se tazkira mohabbat kaa aaine se ghubaar ki baatein kitni rangin hai apni shaam-e-firaaq pahron dil se hain yaar ki baatein kab na daar-o-rasan ne chheDi hain jurat-e-paaedaar ki baatein tum ho aur be-niyaazi-e-paiham ham hain aur eatibaar ki baatein miT chuke valvale bahaaron ke ab kahaan laala-zaar ki baatein dil pe ab shaaq hain bahut hamdam mausam-e-khush-gavaar ki baatein sun sako to zabaan-e-gul se suno daaman-e-taar-taar ki baatein haasil-e-umr ban gai hain 'hasan' husn-e-imaan-shikaar ki baatein"

"saaz-e-dil par gungunaane kaa zamaana aa gayaa aa gayaa piine pilaane kaa zamaana aa gayaa pai-ba-pai saaghar lunDhaane kaa zamaana aa gayaa har qadam par laDkhaDaane kaa zamaana aa gayaa phir kisi ki yaad dil mein chuTkiyaan lene lagi phir taDapne tilmilaane kaa zamaana aa gayaa phir kisi ke aastaan par le chalaa zauq-e-sujud har qadam par sar jhukaane kaa zamaana aa gayaa miT gayaa shauq-e-talab mein sar-basar ehsaas-e-gham mushkilon par muskuraane kaa zamaana aa gayaa hai pas-e-parda jamaal-e-dil-nashin jalva-fagan dida-o-dil aazmaane kaa zamaana aa gayaa mil gai 'arz-e-tamannaa ki ijaazat mil gai harf-e-matlab bhuul jaane kaa zamaana aa gayaa"

"shab-e-gham hujum-e-alam tauba tauba aur aansu bhi aankhon mein kam tauba tauba shab-o-roz sahbaa-e-ulfat ki masti haram mein bhi yaad-e-sanam tauba tauba junun be-niyaaz-e-makaan hai to phir kyon ye takhsis-e-dair-o-haram tauba tauba bhalaa kyaa ye raanaai-e-dahr hoti na hote jahaan mein jo ham tauba tauba do-aalam ki daulat mire dil ki qimat kahaan ye kahaan jaam-e-jam tauba tauba nigaahein bachaa kar vo un kaa tabassum karam-koshiyon mein sitam tauba tauba"

"hujum-e-shauq ne rusvaa kiyaa kyaa main kyaa kahne ko thaa aur kah gayaa kyaa gulon kaa khuun gulistaan ki tabaahi manaazir saamne aae hain kyaa kyaa junun-e-rah-ravi apnaa salaamat kareinge rahnumaai rahnumaa kyaa kanval ke phuul par shabnam ke qatre ghurur-e-husn ko aakhir huaa kyaa nazar mein thaa jamaal-e-sad-bahaaraan main su-e-gul palaT kar dekhtaa kyaa tumhaari be-rukhi allaah rakkhe miri betaabiyon kaa tazkira kyaa jise raushan kiyaa thaa khun-e-dil se 'hasan' bujhne lagaa vo bhi diyaa kyaa"

"aaina dida-e-hairaan nazar aataa hai mujhe yaani zarra bhi bayaabaan nazar aataa hai mujhe apni hasti kaa ye unvaan nazar aataa hai mujhe jaise ik khvaab-e-pareshaan nazar aataa hai mujhe dasht-e-vahshat ki faraavaani-e-vahshat tauba ab to daaman bhi garebaan nazar aataa hai mujhe phir qadam uThte hain rah rah ke bayaabaan ki taraf phir junun silsila-jumbaan nazar aataa hai mujhe phir baDhi jaati hai har zakhm-e-jigar ki shorish phir miri ziist kaa saamaan nazar aataa hai mujhe aaj saaqi ne pilaai hai mujhe vo sahbaa jis ke har ghunT mein imaan nazar aataa hai mujhe is qadar ishrat-e-hasti ne kiyaa girvida har nafas shauq-badaamaan nazar aataa hai mujhe sai-e-naakaam pe be-saakhta hans detaa huun jab koi taalib-e-armaan nazar aataa hai mujhe mil gai mujh ko 'hasan' zauq-e-nazar si daulat ab to har phuul gulistaan nazar aataa hai mujhe"

"kitni be-kaif zindagi hogi gham na hogaa to kyaa khushi hogi jab kabhi dard mein kami hogi chashm-e-ehsaas shabnami hogi main na kahtaa thaa jazba-e-betaab dosti teri dushmani hogi jhilmilaai kisi ki sham-e-khayaal ab andhere mein raushni hogi 'ishq se husn kaa baDhegaa vaqaar maut buniyaad-e-zindagi hogi kasrat-e-gham kaa kyaa karun shikva ye to tauhin-e-zindagi hogi aastaan baDh rahaa hai su-e-jabin aaj meraaj-e-bandagi hogi jab 'hasan' rahm aaegaa un ko dil ki duniyaa badal chuki hogi"

"gudaaz-e-qalb na soz-e-davaam hai saaqi saron mein mahshar-e-saudaa-e-khaam hai saaqi har ek rind yahaan tishna-kaam hai saaqi ye mai-kade kaa tire ehtimaam hai saaqi pilaa pilaa ki nizaam-e-kohan badal Daalun samand-e-umr bahut tez-gaam hai saaqi chalaa huun aaj liye azm-e-rah-navardi-e-shauq khayaal-e-ishrat-e-manzil haraam hai saaqi nazar nazar se numaayaan qiyaadaton kaa fusun qadam qadam pe siyaasat kaa daam hai saaqi vo dil jo thaa kabhi kaun-o-makaan se be-parvaa shikaar-e-kashmakash-e-subh-o-shaam hai saaqi hudud-e-aalam-e-imkaan se dam ulajhtaa hai yahaan to saans bhi lenaa haraam hai saaqi farogh-e-hasrat-e-parvaaz-o-justuju ki qasam junun khirad kaa abhi tak ghulaam hai saaqi bashart-e-izn sunaaungaa khalvaton mein tujhe abhi fasaana-e-gham naa-tamaam hai saaqi"

"fikr-e-manzil hai na naam-e-rahnumaa lete hain ham apnaa zauq-e-rah-ravi khud aazmaa lete hain ham kasrat-e-gham mein bhi aksar muskuraa lete hain ham zulmat-e-hasti mein yuun shamein jalaa lete hain ham kuchh na puchho himmaton se kaam kyaa lete hain ham gham ko baada dil ko paimaana banaa lete hain ham muntashir hone ko aati hai jo bazm-e-aarzu hauslon ki phir nai mahfil sajaa lete hain ham qaafila aa kar sar-e-manzil bhi ho jaataa hai gum raahzan ko jab kabhi rahbar banaa lete hain ham zulm-e-dauraan ko 'ataa karnaa hai taaza hausla tiir jo aataa hai siine se lagaa lete hain ham kyuun mizaaj-e-husn mein paidaa karein ik barhami apne dil ko apnaa afsaana sunaa lete hain ham is qadar charke lage hain dahr mein ai ham-nashin khaar kyaa phulon se bhi daaman bachaa lete hain ham multafit hotaa nahin jab saaqi-e-dauraan 'hasan' mai-kade mein baDh ke khud saaghar uThaa lete hain ham"

"koi kyaa samjhe koi kyaa jaane ik mohabbat hazaar afsaane hai idhar aql mahv-e-bakhiya-gari aur udhar hans rahe hain divaane vahshat-e-dil tujhe khudaa rakkhe raas aane lage hain viraane mai-kada hai vahi vahi mai hai sirf badle hue hain paimaane mauj-e-tufaan mein daaman-e-saahil kab nazar aaegaa khudaa jaane subh-e-ummid muskuraai 'hasan' gham-kade ban gae tarab-khaane"