Ghazal

"tamaasha ahl-e-mohabbat ye chaar-su karte dil-o-dimaagh aur aankhein lahu lahu karte vo raushni se bhari jhiil ke kinaare par shikasta-ruh, darida-badan rafu karte hamaare baare mein taftish karnaa chaahte the to jaan-e-jaan parindon se guftugu karte jamaal-o-husn se labrez jab zamaana hai tiri bisaat hi kyaa teri aarzu karte zamin pe chaand sitaare bichhaa ke ai 'haashim' falak pe phuul sajaane ki aarzu karte"

"haadisa ishq mein darpesh huaa chaahtaa hai dil shahanshaah se darvesh huaa chaahtaa hai ishq ko zid hai ki taamir kare shahr-e-umid husn kam-bakht bad-andesh huaa chaahtaa hai is ilaaqe se miraa koi taalluq bhi nahin ye ilaaqa ki miraa desh huaa chaahtaa hai mere ashaar mein ghazlon main mire giton mein ek kaa zikr kam-o-besh huaa chaahtaa hai jaah ki chaah nahin khvaahish-e-mansab bhi nahin mere andar koi darvesh huaa chaahtaa hai maalik-e-saut-o-sadaa shaaer-e-gumnaam razaa teri dahliz pe ab pesh huaa chaahtaa hai"

"visaal-o-hijr ke janjaal mein paDaa huaa huun mein arsh-e-rau kahaan paataal mein paDaa huaa huun vahi ghuTan, vahi maamul zindagi, vahi gham kahaan main jashn nae saal mein paDaa huaa huun yahaan se niklun kisi aur kaa shikaar banun isi liye to tire jaal mein paDaa huaa huun garebaan chaak, dhuaan, jaam, haath mein cigarette shab-e-firaaq, ajab haal mein paDaa huaa huun pahunch chukaa hai zamaana zamin se chaand tilak kahaan main zulf, nazar, gaal mein paDaa huaa huun"

"har makaan aabaad thaa yaan har makin dil-shaad thaa is nagar kaa naam yaaro pahle faizaabad thaa kyaa balaa thaa vo musavvir jis ki har tasvir mein bulbulein aazaad thiin aur qaid mein sayyaad thaa hazrat-e-aadam ne bhi jaanaa gunaahon ke tufail ye jahaan barbaad hai ki vo jahaan barbaad thaa marne vaale ko miyaan pahli mohabbat ki tarah nursery schōl kaa pahlaa sabaq bhi yaad thaa 'ishq-zaadon mein protocol kaa jhagDaa nahin qais jis jangal mein thaa aakhir vahin farhaad thaa jis ko diction kah rahe hain muftiyaan-e-rekhta ye nayaa lahja gharib-e-shahr ki ijaad thaa mahfil-e-sher-o-sukhan mein kal ki shab 'haashim' razaa kyaa kahun mere 'alaava har koi ustaad thaa"

"badan se ruuh ham-aaghosh hone vaali thi phir is ke baad subuk-dosh hone vaali thi nasib paDh ke miraa ilm-e-ghaib ki devi yaqin jaaniye behosh hone vaali thi na sirf tegh ki pi kar mire lahu ki sharaab zamin-e-dasht bhi madhosh hone vaali thi nigaar-khaana-e-dil mein ye dhaDkanon ki ghaDi tire na aane se khaamosh hone vaali thi main ek laDkaa vafaa-daariyon kaa parcham-daar vo ek laDki jafaa kosh hone vaali thi miri javaani talaash-e-maaash mein 'haashim' vatan se duur faraamosh hone vaali thi"

"amir-e-shahr tujhe kab dhiyaan meraa hai nai saDak pe puraanaa makaan meraa hai zamin ke chaand-numaaon ki haisiyat kyaa hai ki chaand hai jo sar-e-aasmaan meraa hai ab intizaar hai kis kaa uchhaaliye sikka yaqin aap kaa hai aur gumaan meraa hai tiri kitaab-e-badan kaa main pahlaa qaari huun jahaan jahaan bhi lagaa hai nishaan meraa hai main apne naam se pahchaanaa jaataa huun 'haashim' koi qabila hai na khaandaan meraa hai"

"tu nahin hai to tire hamnaam se rishta rakkhaa ham ne yuun bhi dil-e-naakaam ko zinda rakkhaa vo mari jaan kaa dushman ki sar-e-nahr-e-visaal sab ko sairaab kiyaa bas mujhe pyaasaa rakkhaa mere maulaa tiri mantiq bhi ajab mantiq hai honT pe pyaas rakhi aankh mein dariyaa rakkhaa sab ke haathon ki lakiron mein muqaddar rakh ke rakhne vaale ne mire haath pe sahraa rakkhaa sab ke sab luuT rahe the tiri daulat raani main ne to sirf tire shahr kaa naqsha rakkhaa jis bulandi pe 'razaa' main ne sajaae tamghe us bulandi pe hi TuuTaa huaa kaasa rakkhaa"

"faisla hijr kaa manzur bhi ho saktaa hai aadmi ishq mein majbur bhi ho saktaa hai vaqt ke paas nahin zakhm-e-mohabbat kaa ilaaj vaqt ke saath ye naasur bhi ho saktaa hai ji mein aataa hai use haath lagaa kar dekhun nuur saa lagtaa hai, vo nuur bhi ho saktaa hai apne kaandhon pe salibon ko uThaae hue hain ishq-zaadon kaa ye dastur bhi ho saktaa hai zehn kaa kyaa hai ki bachne ke bahaane DhunDe dil to jaanbaaz hai, mansur bhi ho saktaa hai sher kahne kaa saliqa nahin 'haashim' ko magar teri tanqid se mashhur bhi ho saktaa hai"

"dasht mein khaak uDaate hain duaa karte hain ham qalandar jahaan jaate hain duaa karte hain yaar to yaar hain dushman bhi sadaa duur rahein ishq se jaan chhuDaate hain duaa karte hain ye saliqa ki mohabbat ne sikhaayaa hai hamein zakhm hanste hue khaate hain duaa karte hain teraa dil shaad rahe aur tu aabaad rahe ham tujhe chhoD ke jaate hain duaa karte hain ham kabhi daar-o-rasan par kabhi zindaanon mein jaan ki baazi lagaate hain duaa karte hain ghaalib-o-mir se nisbat kaa sharaf haasil ho aao ab haath uThaate hain duaa karte hain"

"vo mire shahr mein aataa hai chalaa jaataa hai sab ko divaana banaataa hai chalaa jaataa hai zindagi jis ki ujaD jaati hai is se puchho zalzala shahr mein aataa hai chalaa jaataa hai ek do buund baras kar ye garajtaa baadal dasht ki pyaas baDhaataa hai chalaa jaataa hai naakhudaa hi nahin maujon kaa thapeDaa aksar kashtiyaan paar lagaataa hai chalaa jaataa hai kaun vo kursi-nashin hai ki har aane vaalaa sar-e-taslim jhukaataa hai chalaa jaataa hai jaane kab se vo sar-e-shaam mazaar-e-dil par sham-e-ummid jalaataa hai chalaa jaataa hai"

"tire khayaal tiri aarzu se duur rahe navaab ho ke bhi ham lucknow se duur rahe badan ke zakhm to chaaragaron ne si Daale magar ye ruuh ke chhaale rafu se duur rahe zamin pe Tapkaa to ye inqalaab laaegaa use bataa do, vo mere lahu se duur rahe kiyaa hai ham ne tayammum bhi khaak-e-maqtal par namaaz-e-ishq paDhi aur vuzu se duur rahe miri zabaan kaa charchaa thaa aasmaanon par zamin vaale miri guftugu se duur rahe"

"mazhab-e-ishq mein shajara nahin dekhaa jaataa ham parindon mein qabila nahin dekhaa jaataa lashkar-e-khvaab kisi taur utar aankhon mein raat bhar niind kaa rasta nahin dekhaa jaataa surmaa baap ne talvaar bhi girvi rakh di haath mein bachchon ke kaasa nahin dekhaa jaataa tum mire yaar ho kaise main haraa duun tum ko mujh se dushman ko bhi paspaa nahin dekhaa jaataa is zamaane ko faqat maut nazar aati hai Dubne vaale kaa jazba nahin dekhaa jaataa ai azizo! mujhe miTTi ke havaale kar do mujh se ab jism kaa malba nahin dekhaa jaataa jab se dariyaa pe huaa pyaas kaa qabza 'haashim' lab-e-dariyaa koi pyaasaa nahin dekhaa jaataa"

"mustaqil haath milaate hue thak jaataa huun mein nae dost banaate hue thak jaataa huun abr aavaara huun main koi samundar to nahin pyaas sahraa ki bujhaate hue thak jaataa huun maalik kaun-o-makaan ab to rihaai de de jism kaa bojh uThaate hue thak jaataa huun to mire raaz bataate hue thaktaa hi nahin mein tire raaz chhupaate hue thak jaataa huun mere qadmon se lipaT jaati hai maan ki mamtaa main kahin gaanv se jaate hue thak jaataa huun jaane kab jaa ke miraa ishq mukammal hogaa raqs karte hue gaate hue thak jaataa huun"

"ye nisaabon mein likhi aur likhaai na gai zindagi ham ko kitaabon mein paDhaai na gai ek-tarfa bhi nibhaate hain nibhaane vaale tujh se do-tarfa mohabbat bhi nibhaai na gai yuun miraa haafiza kamzor bahut hai mujh se ek laDki hai jo dilli ki bhulaai na gai us ke chehre pe numaayaan hain mire hijr ke daagh allaah rakhe use kaise sar-e-aaina gai jism ki pyaas kisi taur bujhaa lete hain ruuh ki pyaas magar ham se bujhaai na gai bhuuk ugne lagi gandum ki jagah kheton mein haakim-e-vaqt tiri harza-saraai na gai naqsha-e-dahr mein do mulk hain aise jin mein muddaton baad bhi sarhad ki laDaai na gai baanu-e-shahar-e-sukhan 'mir' kaa boyaa kaaTaa tere 'haashim' se nai fasl ugaai na gai"

"parinda qaid mein kul aasmaan bhuul gayaa rihaa to ho gayaa lekin uDaan bhuul gayaa mire shikaar ko tarkash mein tiir laayaa magar vo meri jaan kaa dushman kamaan bhuul gayaa use to yaad hai saaraa jahaan mere sivaa main us ki yaad mein saaraa jahaan bhuul gayaa vo shakhs zindagi bhar kaa thakaa huaa thaa magar jo paanv qabr mein rakkhe thakaan bhuul gayaa gharib-e-shahr ne rakkhi hai aabru varna amir-e-shahr to urdu zabaan bhuul gayaa tamaam shahr kaa naqsha banaane vaalaa 'razaa' junun-e-shauq mein apnaa makaan bhuul gayaa"

"naa yuun bhi jhaankiye sarkaar ik samundar hai ki meri aankhon ke us paar ik samundar hai hamaari tishna-dahaani bujhi hai khanjar se vo aur hain jinhein darkaar ik samundar hai safina-haa-e-mohabbat ko gharq kar degi ye jo hai biich mein divaar ik samundar hai tum aao lauT ke tum ko gale lagaa lungaa ki meraa dil bhi mire yaar ik samundar hai nizaam-e-shahar-e-bahaaraan hai kis ke haathon mein jahaan bhi dekhiye khun-baar ik samundar hai ghazal sunaai jo sarvat ko main ne ai 'haashim' vo bole sun ke sukhan-kaar ik samundar hai"

"khudaayaa bhej de koi davaa udaasi ki jahaan mein phail rahi hai vabaa udaasi ki mujhe shadid udaasi kaa saamnaa hogaa so meri maan ne sikhaa di duaa udaasi ki ik aisi shaam-e-sitam aai thi sitaaron ne saron pe oDhi thi kaali ridaa udaasi ki na-jaane kaun saa gham hai miyaan-e-dida-o-dil barasti rahti hai paiham ghaTaa udaasi ki namaaz-e-ishq musalle pe kab adaa hui hai azaa kaa farsh yaa karb-o-balaa udaasi ki miri panaah mein aao ai dard ke maaro tamaam dahr mein gunji sadaa udaasi ki udaasiyon ki inaayat hai kaar-haa-e-sukhan mire liye to jazaa hai sazaa udaasi ki ghamon ki dhuup se saae mein aa gae 'haashim' magar kisi ne na puchhi 'razaa' udaasi ki"

"chamakte bujhte sitaaron ke saath kaaTte hain is ehtimaam se ham apni raat kaaTte hain miri zabaan ki qimat lagaane vaale log mujhe kharid na paae to baat kaaTte hain hazaaron saal se zulm-o-sitam ke parvarda mosaafiraan-e-mohabbat ke haath kaaTte hain savaal bai'at-e-aab-e-furaat uThte hi asaa-e-tishna-labi se furaat kaaTte hain usi kaa naam sahaaraa hai dukh ke maaron kaa usi ke naam se ham haadsaat kaaTte hain hamaari qadr karo ham hain shaairaan-e-junun qalam ki nok se fasl-e-hayaat kaaTte hain"

"zaminon mein sitaare bo rahaa huun mujhe hargiz na kahnaa ro rahaa huun gavaahi dein samundar chaand saahil akelaa huun kabhi main do rahaa huun use lauTaa diyaa main ne ye kah kar abhi jaao abhi main so rahaa huun mohabbat ki kahaani bhi ajab hai jise paayaa nahin thaa kho rahaa huun puraane par nae kuchh zakhm khaa kar lahu se main lahu ko dho rahaa huun duaaon ke vasile se main 'haashim' yahaan kaa thaa vahaan kaa ho rahaa huun"

"gham-e-firaaq ragon mein utar gayaa hotaa agar main tujh se bichhaDtaa to mar gayaa hotaa kabhi libaas ki khushbu kabhi zabaan kaa lams main jaane kitni hadon se guzar gayaa hotaa do aankhein kab se tiraa intizaar karti hain to mai-kade se kabhi apne ghar gayaa hotaa husul-e-ilm ne masruf rakhaa varna main kisi ko ishq mein barbaad kar gayaa hotaa mujhe hai tum se mohabbat ye us ne bolaa thaa vo kaash apne kahe se mukar gayaa hotaa bichhaDne vaalaa faqat ek bose se 'haashim' miri jabin pe ehsaan dhar gayaa hotaa"

"ye us ki marzi ki main us kaa intikhaab na thaa vagarna mere muqaddar mein kyaa janaab na thaa kuchh is liye tire gulshan se main palaT aayaa tamaam phuul vahaan the magar gulaab na thaa bichhaDte vaqt hamaare labon mein chubhne lage savaal aise ki jin kaa koi javaab na thaa jise bhi chaahaa use be-hisaab chaahaa ki hamaare dil mein miyaan shoaba-e-hisaab na thaa gulu-e-khushk se tir-e-sitam ko toD diyaa ye bachpane kaa thaa aalam abhi shabaab na thaa main ik zamaane mein 'haashim-razaa' payambar thaa mohabbaton kaa magar saahib-e-kitaab na thaa"

"zindagi kyaa yunhi naashaad karegi mujh ko yaa kisi moD pe aabaad karegi mujh ko yahi duniyaa ki jise qadr nahin hai meri yahi duniyaa ki bahut yaad karegi mujh ko main ne kal raat use apnaa badan saunp diyaa vo jo kahti thi ki barbaad karegi mujh ko us kaa dil misl-e-qafas aur vo sayyaad-sifat jaane kab qaid se aazaad karegi mujh ko mar bhi jaaun to mohabbat ki kahaani 'haashim' phir nae naam se ijaad karegi mujh ko"

"saari rusvaai zamaane ki gavaaraa kar ke zindagi jiite hain kuchh log khasaaraa kar ke apne is kaam pe vo raaton ko rotaa hogaa bech detaa hai jo zarre ko sitaara kar ke gham ke maare hue ham log magar collage mein dil bahal jaataa hai pariyon kaa nazaara kar ke phir vahi josh vahi jazba ataa hotaa hai tum ne dekhaa hi nahin pyaar dobaara kar ke apne kirdaar se duniyaa ko hilaa kar rakh de varna kyaa faaeda is tarah guzaara kar ke ham se aabaad hai ye sher-o-sukhan ki mahfil ham to mar jaaeinge lafzon se kinaara kar ke"

"na koi aabla-paai na ghaav chaahti hai hamaari khaana-badoshi paDaav chaahti hai sukut-e-dahr ragon mein utar na jaae kahin ye Thahri Thahri tabiat bahaav chaahti hai main ik faqir use de chukaa huun kab kaa talaaq magar ye duniyaa ki mujh se lagaao chaahti hai havaa-e-bahr havas mein ThiThurne vaali ruuh labon ki aag badan kaa alaav chaahti hai koi bhi shakhs pahunchtaa nahin kinaare par ye naakhudaa ki hai saazish yaa naav chaahti hai nai naveli dulhan ki hatheliyon ki tarah miri ghazal bhi hamesha rachaao chaahti hai"