Ghazal

"'jamil' ko gumrahi mubaarak ki ab to saamaan bhi vahi hai jo dil ki vahshat kaa thaa taqaaza khirad kaa mailaan bhi vahi hai khudi mohabbat ke falsafe mein hai us ke jazbon ki maut lekin kuchh aur dil mein utar ke dekho to ishq ki jaan bhi vahi hai bani thi hamdard ishq ki jab to aql ko ye bhi dekhnaa thaa ki jis ko vo faaeda samajhti hai us kaa nuqsaan bhi vahi hai hamaari mizaan-e-aagahi mein yaqin kyaa hai gumaan ki shiddat jo shak ki aaghosh mein palaa ho usulan imaan bhi vahi hai 'jamil' kaisi khudaa-parasti vahi ghuTi khvaahishon ki masti Duboi jis ne hamaari kashti tumhaaraa tufaan bhi vahi hai"

"bahut mushkil hai paas-e-lazzat-e-dard-e-jigar karnaa kisi se ishq karnaa aur vo bhi umar bhar karnaa sar-e-mahfil tiraa vo pursish-e-zakhm-e-jigar karnaa miri jaanib ba-mushkil ik nazar karnaa magar karnaa musallam ho gai hai be-ikhtiyaari jazb-e-baatin ki mohabbat us se karnaa jis se nafrat is qadar karnaa yahaan baal-o-pari bhi ek surat hai asiri ki asir-e-baal-o-par ho kar ghurur-e-baal-o-par karnaa tujhe haq hai ki tu parda uThaae ru-e-raushan se ki tere husn ko aataa hai tahzib-e-nazar karnaa baDhaa kar haath taare aasmaan se kaun toDegaa 'jamil' ik kaar-e-naa-mumkin hai taqlid-e-qamar karnaa"

"main kyaa bataaun ki tu kyaa hai aur kyaa huun main hujum-e-lafz-o-maaani mein kho gayaa huun main pinhaa de koi mohabbat ki ek kaDi zanjir ki qaid-e-farz se baahar nikal gayaa huun main savaab ko nai shaklein jo de rahaa hai tu gunaah ke nae saanche banaa rahaa huun main junun miraa khirad-aasuda-e-nataaej hai khud apne paanv ki zanjir Dhaaltaa huun main miri nazar mein tajalli ki kyaa haqiqat hai tajalliyon ki haqiqat ko dekhtaa huun main giraa chukaa thaa jise kal nazar se apni 'jamil' ghurur ab usi pasti pe kar rahaa huun main"

"kaho na ye ki mohabbat hai tirgi se mujhe Daraa diyaa hai patangon ne raushni se mujhe safina shauq kaa ab ke jo Duub kar ubhraa nikaal le gayaa dariyaa-e-be-khudi se mujhe hai meri aankh mein ab tak vahi safar kaa ghubaar milaa jo raah mein sahraa-e-aagahi se mujhe khirad inhi se banaati hai rahbari kaa mizaaj ye tajrabe jo mayassar hain gumrahi se mujhe abhi to paanv se kaanTe nikaaltaa huun main abhi nikaal na gulzaar-e-zindagi se mujhe zabaan-e-haal se kahtaa hai naaz-e-ishva-gari hayaa chhupaa na saki chashm-e-mazhari se mujhe baraae daad-e-sukhan kaasa-e-savaal ho dil khudaa bachaae 'jamil' is gadaagari se mujhe"

"parda haail jo thaa kahaan hai ab teraa jalva hi darmiyaan hai ab shama kahti rahi jise shab bhar khaatme par vo daastaan hai ab meri nazron ki ik thakan ke sivaa aur kyaa chiiz aasmaan hai ab sabr kaa mere imtihaan to huaa teri rahmat kaa imtihaan hai ab tu bhi meri tarah na ho naakaam fikr ye rab-e-do-jahaan hai ab kaamyaabi ke gur bataane lagi ishq par aql mehrbaan hai ab 'mazhari' pesh-e-kaarvaan thaa kabhi 'mazhari' gard-e-kaarvaan hai ab"

"kaun kahtaa hai baDhaa shauq idhar se pahle kis ne dekhaa thaa kise tirchhi nazar se pahle mutmain ho le zaraa ahl-e-nazar se pahle parde aankhon ke uThaa parda-e-dar se pahle abhi taalim-e-vafaa yaani jafaa kaa nahin vaqt tarbiyat shauq ki ho lutf-e-nazar se pahle haan mohabbat mein maza hai mujhe inkaar nahin magar ai zauq-e-khalish dard-e-jigar se pahle saalik-e-raah-e-vafaa hai dil-e-aashufta-mizaaj muzhda-e-gumrahi-e-shauq-e-safar se pahle jurat-e-arz-e-tamannaa pe khafaa ho lenaa muskuraao to zaraa nichi nazar se pahle mausam-e-kaif mein be-kaifi-e-jazbaat na puchh dil-e-bulbul hai fasurda gul-e-tar se pahle jumbish-e-muztarib-e-parda-e-ismat ki qasam jalve betaab hue zauq-e-nazar se pahle jin se badnaam hue ishq ke jazbaat-e-latif vo ishaare the idhar se ki udhar se pahle do iraadon mein jo haail the hayaa ke parde kis ne sarkaae ishaaraat-e-nazar se pahle kyuun koi pahlu-e-jaanaan mein jagah paae 'jamil' aaj ham bazm mein pahuncheinge qamar se pahle"

"ik infiaal ko taaqat samajh rahe ho tum savaal ye hai ki kis tarah sochte ho tum bahaar aag na degi tumhaare chulhon ko ye aur baat ki is se bahal gae ho tum dayaar-e-vaham-o-gumaan mein na ab haram hai na dair ujDi chuki hai vo basti jidhar chale ho tum diyaa na ishq ne jab kuchh to aql kyaa degi ab is se maangte ho chain baavle ho tum jabin-e-shauq ko apni kahaan jhukaanaa thaa kahaan jhuki hai zarurat kahaan jhuke ho tum pasand aaegi kyuun apne des ki koi chiiz bidesiyon ke nivaale pe ji rahe ho tum na mil sakaa jise indhan jalegi aag vo kyaa dil-e-'jamil' ko naahaq kuredte ho tum"

"taalluqaat to mafruze zindagi ke hain yahaan na koi hai apnaa na ham kisi ke hain na ishq hi ke asar hain na dushmani ke hain ki saare zakhm mire dil pe dosti ke hain charaagh agarche numaainde raushni ke hain magar ye hai ki ye aasaar tirgi ke hain tumhaari tez-ravi degi kyaa sivaa-e-ghubaar ki naqsh-e-paa bhi natije subuk-ravi ke hain shokuk kyaa hain mire dost aagahi kaa bulugh yaqin kyaa hai gharaunde kuchh aagahi ke hain 'jamil' apnaa sukhan in pe raaegaan na karo ye maulvi ki suneinge ye maulvi ke hain"

"har taraf parda-daar-e-zulmat hai ik tabassum ki phir zarurat hai Thahri Thahri hai vaqt ki raftaar aalam-e-ghaur mein mashiyyat hai hai gumaan kyaa yaqin kaa saaya aur yaqin vaahime ki shiddat hai ishq bhi zindagi ki laanat thaa aql bhi zindagi ki laanat hai khud-numaai mein jo hijaab rahe tirgi us ki ik alaamat hai shor-e-tahsin-e-naaravaa se 'jamil' ye khamoshi basaa-ghanimat hai"

"jab paanv milaa thaa to raste bhi nazar aate tum tak na sahi lekin taa-hadd-e-nazar jaate tum aankh nahin rakhte aur dekhte ho sab kuchh ham aankh bhi rakhte hain aur dekh nahin paate har raah to manzil tak le jaati nahin sab ko kuchh der idhar chalte kuchh der udhar jaate parda vo uThaayaa to parda hi nazar aayaa jab kuchh na nazar aayaa to kyuun na Thahar jaate ye ishq nahin ye hai kam-bini o kam-aqali ik lutf-e-tabassum par itnaa nahin itraate jo ho na 'jamil' apnaa auron kaa vo kyaa hogaa kyaa khaaoge gham meraa tum apnaa hi gham khaate"

"kab tak nibaahein aise ghalat aadmi se ham duniyaa hai 'mazhari' se khafaa 'mazhari' se ham bhaage zarur arsa-e-tang-e-khudi se ham nikle magar na daaira-e-aagahi se ham is zindagi ne aap se rakkhaa hai mujh ko duur kis tarah intiqaam na lein zindagi se ham har jaama-e-sifaat mein kyuun kar na jhol ho hai ye ki naapte hain khudaa ko khudi se ham tulte hain jis taraazu mein sim-o-zar o guhar kyaa zulm hai dilon ko bhi taulein usi se ham sairaabiyaan 'jamil' ko itnaa na de sakin jitnaa ki faizyaab hue tishnagi se ham"

"yahaan jo bhi thaa tanhaa thaa yahaan jo bhi hai tanhaa hai ye duniyaa hai ye duniyaa hai isi kaa naam duniyaa hai na bolaa un se jaataa hai na dekhaa un se jaataa hai yahaan gungon ki basti hai yahaan andhon kaa pahraa hai vo manzil thi tahayyur ki ye manzil hai tafakkur ki vahaan parda bhi jalva thaa yahaan jalva bhi pardaa hai vo aalam thaa taayyun kaa vahaan parda hi parda thaa ye aalam hai tayaqqun kaa yahaan jalva hi jalva hai sabhi majruh hain is said-gaah-e-aish-o-hirmaan mein kisi kaa zakhm ochhaa hai kisi kaa zakhm gahraa hai jo vo ik khush-khayaali thi to ye ik kam-nigaahi hai na vo phulon kaa gulshan thaa na ye kaanTon kaa sahraa hai vo ahl-e-qaal ki majlis ye ahl-e-haal ki majlis vahaan jo kuchh thaa maazi thaa yahaan jo kuchh hai fardaa hai ye naddi to nahin jo aab-e-shirin de sake tum ko hai paani utnaa hi namkin samundar jitnaa gahraa hai yahaan tarshe hue lafzon kaa sikka chal nahin saktaa ye baazaar-e-maaani hai yahaan moti bhi qatra hai 'jamil' aankhon ke paT kholo ise bhi ik nazar tolo vo nairang-e-tasavvur thaa ye nairang-e-tamaashaa hai"

"bakhshish hai teri haath mein duniyaa liye hue main chup khaDaa huun dida-e-binaa liye hue sahraa ko kyaa khabar ki hai har zarra-e-haqir muTThi mein apni qismat-e-sahraa liye hue us shaam se Daro jo sitaaron ki chhaanv mein aati ho ik hasin andheraa liye hue ai vaqt ik nigaah ki kab se khaDe hain ham aaina-e-tasavvur-e-fardaa liye hue guzraa thaa is dayaar se suraj kaa ik safir har naqsh-e-paa mein ik yad-e-baizaa liye hue aayaa ye kaun saaya-e-zulf-e-daraaz mein peshaani-e-sahar kaa ujaalaa liye hue laai thi be-khudi jise is dar pe vo 'jamil' jaataa hai ab khudi kaa janaazaa liye hue"

"subh khud bataaegi tirgi kahaan jaae ye charaagh ki jhuTi raushni kahaan jaae jo nasheb aaegaa raasta dikhaaegaa moD khud bataaegaa aadmi kahaan jaae baDh ke do qadam tu hi us ki piiTh halki kar ye thakaa musaafir ai rahzani kahaan jaae haa-o-hu ki duniyaa mein maa-o-tu ki duniyaa mein rang o bu ki duniyaa mein saadgi kahaan jaae be-taalluqi maslak ho chukaa hai duniyaa kaa dosti kahaan jaae dushmani kahaan jaae ab to dhuup aa pahunchi jhaaDiyon ke andar bhi ab panaah lene ko tirgi kahaan jaae kaarvaan ne chulhon mein jhonk di ghani shaakhein ab kahin nahin saaya khastagi kahaan jaae zakhm-e-dil to kyaa doge daagh-e-sajda hi de do ab tumhaari chaukhaT se 'mazhari' kahaan jaae"

"dariyaa kaa chaDhaav dekhtaa huun tinkon kaa bahaav dekhtaa huun tum dekho bulandi aasmaan ki main us kaa jhukaav dekhtaa huun kal pesh-e-nazar thi tegh-e-abru ab siine kaa ghaav dekhtaa huun vo aaein na aaein kaun jaane aai hui naav dekhtaa huun santaa huun karaah lakDiyon ki jalte hain alaav dekhtaa huun aasaan nahin hai dil ki chori tum aankh churaao dekhtaa huun manjdhaar mein hogi koi kashti saahil pe jamaav dekhtaa huun tum aag mein meri jal rahi ho main duur se taao dekhtaa huun apne ko 'jamil' bechnaa hai baazaar kaa bhaav dekhtaa huun"

"jis samt nazar jaae melaa nazar aataa hai har aadmi is par bhi tanhaa nazar aataa hai saudaa-e-dil-o-din yaa saudaa-e-dil-o-duniyaa aashiq ko to donon mein ghaaTaa nazar aataa hai andhon ko tire ai husn ab mil gai binaai ab ishq kaa har jazba nangaa nazar aataa hai pasti se agar dekho nichaa bhi hai kuchh unchaa unchaa bhi bulandi se nichaa nazar aataa hai kyaa shikva taaqqul ke khaamosh tahayyur se jab apnaa tasavvur bhi gungaa nazar aataa hai ai naaz-e-khud-aaraai de zarf ko pahnaai ghuTtaa huaa qatre mein dariyaa nazar aataa hai rahmat bhi tiri shaayad kuchh kaan ki unchi hai insaaf bhi teraa kuchh andhaa nazar aataa hai naalaan hain 'jamil' apni aankhon se ki ab un ko suraj kaa pujaari bhi andhaa nazar aataa hai"

"tiraa husn bhi bahaana miraa ishq bhi bahaana ye latif istiaare na samajh sakaa zamaana main nisaar-e-dast-e-naazuk jo uThaae naazishaana ki sanvar gaiin ye zulfein to sanvar gayaa zamaana tiri zindagi tabassum miri zindagi talaatum miri zindagi haqiqat tiri zindagi fasaana tiri zulf-e-kham-ba-kham ne nae silsile nikaale miri sina-chaakiyon se jo banaa mizaaj-e-shaana tiraa naaz-e-kibriyaai bhi maqaam-e-ghaur mein hai ki ghaTaa diyaa hai sajdon ne vaqaar-e-aastaana main darun-e-khaana aa kar bhi liye huun daagh-e-sajda hai abhi miri jabin par asar-e-barun-e-khaana kabhi raah main ne badli to zamin kaa raqs badlaa kabhi saans li Thahar kar to Thahar gayaa zamaana"

"hamaaraa to koi sahaaraa nahin hai khudaa hai to lekin hamaaraa nahin hai mohabbat ki talkhi gavaaraa hai lekin haqiqat ki talkhi gavaaraa nahin hai miri zindagi vo khalaa hai ki jis mein kahin duur tak koi taaraa nahin hai khudaa kyaa khudi ko bhi aavaaz di hai musibat mein kis ko pukaaraa nahin hai saraab ik haqiqat hai aab ik tasavvur yahi zindagi hai to chaaraa nahin hai ham apni hi aankhon kaa parda ulaT dein haqiqat ko ye bhi gavaaraa nahin hai vo kyaa un ke gesu sanvaaregaa jis ne garebaan bhi apnaa sanvaaraa nahin hai khudaa us se nipTe to nipTe ki ye dil hamaaraa nahin hai tumhaaraa nahin hai nazar un ki gosha-nashin hai hayaa se ishaaraa nahin ye ishaaraa nahin hai hamaaraa hai kyaa jab hamaaraa iraada hamaaraa hai lekin hamaaraa nahin hai garebaan bahut se hue paara paara naqaab ek bhi paara paaraa nahin hai kisi ke liye dil ko sulgaa ke dekho jahannam koi istiaaraa nahin hai ba-juz 'mazhari' ke sabhi bazm mein hain vahi tere vaadon kaa maaraa nahin hai"

"main sadqe tujh pe adaa tere muskuraane ki sameTe leti hai ranginiyaan zamaane ki jo zabt-e-shauq ne baandhaa tilism-e-khuddaari shikaayat aap ki ruThi hui adaa ne ki kuchh aur jurat-e-dast-e-havas baDhaati hai vo barhami jo ho tamhid muskuraane ki kuchh aisaa rang miri zindagi ne pakDaa thaa ki ibtidaa hi se tarkib thi fasaane ki jalaane vaale jalaate hi hain charaagh aakhir ye kyaa kahaa ki havaa tez hai zamaane ki havaaein tund hain aur kis qadar hain tund 'jamil' ajab nahin ki badal jaae rut zamaane ki"

"thi abhi subh abhi shaam hui jaati hai zindagi gardish-e-ayyaam hui jaati hai zindagi mohlat-e-taufiq-e-khum-aashaami thi zindagi fursat-e-yak-jaam hui jaati hai zindagi taair-e-sahraa thi ba-shauq-e-parvaaz zindagi said-e-tah-e-daam hui jaati hai zindagi Daal rahi thi jo sitaaron pe kamand ab tamaashaa-e-lab-e-baam hui jaati hai zindagi ye hai ki baa-in-hama-saudaa-e-safar zindagi hasrat-e-yak-gaam hui jaati hai zindagi ye hai ki jis ret pe jalte the qadam ab vahi bistar-e-aaraam hui jaati hai zindagi ye hai ki soyaa thaa musaafir thak kar so ke uTThaa hai to ab shaam hui jaati hai 'mazhari' fan kaa taqaazaa hai ki likhiye kuchh aur ye ghazal koshish-e-naakaam hui jaati hai"

"hai dil mein ehsaas-e-dard ab tak agarche divaana ho gayaa huun jahaan khudi hai na be-khudi hai ik aisi duniyaa mein kho gayaa huun havaa muaafiq bhi ho azizo to us kinaare se duur rahnaa main baarhaa aa ke us kinaare pe apni kashti Dubo gayaa huun yahi to anjaam-e-justuju hai ki Thokarein khaa ke but-kadon ki jabin-e-rusvaa ko rakh ke apni haram ki chaukhaT pe so gayaa huun ye naaz-parvardagaan-e-fitrat miri asiri ko khaak samjhein milaa hai kuchh ikhtiyaar jab se main aur majbur ho gayaa huun jo qaafila is taraf se guzre vo ek Thokar mujhe lagaa de 'jamil' main biich raaste mein isi bharose pa so gayaa huun"

"diye bhi hon to pujaari suraj ke saans kyaa leinge tirgi mein kaho patangon se raqs kar lein charaagh ki dhimi raushni mein muaaf ai naaz-e-rahnumaai pahunch ke manzil pe bhi na paai vo lazzat-e-khvaab jo mayassar hui sar-e-raah-e-khastagi mein vafaa ko thoDi si be-niyaazi kam-iltifaati ne teri de di ab aur kyaa chaahiye khudi ko tiri mohabbat ki be-khudi mein chhupi na jab khaak-e-aastaan se chhupegi kyaa chashm-e-nukta-daan se vo ik shikan jo zaraa si ubhri jabin-e-majbur-e-bandagi se idhar andhere ki laantein hain udhar ujaale ki zahmatein hain tire musaafir lagaaein bistar kahaan pe sahraa-e-zindagi mein 'jamil' ham uTh ke gir paDe aur guzar gayaa kaarvaan hamaaraa ghubaar ki baat tak na puchhi musaafiron ne ravaa-ravi mein"

"koi savaal-e-khudaa-o-sanam nahin ai dost main kyaa karun miri gardan mein kham nahin ai dost hamein yahi hai munaasib ki ek su ho lein jagah miyaan-e-vajud-o-adam nahin ai dost khushaamadon se nikaltaa nahin hai kaam yahaan moaamla hai khudaa se sanam nahin ai dost agarche sard andhere hain baais-e-taklif magar ye garm ujaale bhi kam nahin ai dost ajab mizaaj hai in mai-kada nashinon kaa ki qadr-e-jaam to hai qadr-e-jam nahin ai dost khulaa hai aur khulegaa 'jamil' sab ke liye ye mai-kada hai kunisht-o-haram nahin ai dost"

"miri bandagi tujhe de sakegi bajaae maa'ni-o-lafz kyaa hai mire shu'ur ki jholiyon mein sivaae maa'ni-o-lafz kyaa jo nazar kaa bojh na sah sakin vo zabaan kaa bojh saheingi kyaa subuk-o-latif ishaaraton pe jafaa-e-maa'ni-o-lafz kyaa mujhe Dar hai ai sukhan-aafrin ye libaas un pe giraan na ho jo haqiqatein na pahan sakin vo qabaa-e-maa'ni-o-lafz kyaa na vo shams mein na qamar mein hai vo hijaab-e-fikr-o-nazar mein hai jo hijaab-e-fikr-o-nazar uThaa to ghizaa-e-maa'ni-o-lafz kyaa miri ruuh agarche hai gurasna miraa shauq agarche hai jaan-ba-lab magar ai jamil-e-ghazal-saraa ye ridaa-e-maa'ni-o-lafz kyaa"