Ghazal

"kahaa kisi ne ki hai chhalaavaa kisi ne tashbih di pari se vo aaj mahfil mein jalva-aaraa hue hain is shaan-e-dilbari se koi ishaara na kuchh kinaaya kahi hai ik baat saadgi se abhi ho naadaan nasib-e-aa’daa kahin uThaao na zak kisi se nahin ki dil aashnaa nahin hai rumuz-o-aadaab-e-'aashiqi se kuchh is mein tark-e-vafaa nahin hai uThaaein gar haath zindagi se liyaa kaf-e-paa kaa main ne bosa kuchh is mein tark-e-adab nahin thaa chalo haTaao qusur meraa khataa bhi hoti hai aadmi se mariz kaa ab labon pe dam hai shifaa ki ummid is ki kam hai jo ab bhi aao baDaa karam hai ki saans hain chand aakhiri se nahin bhale un ke taur ye bhi koi balaa hogi aur ye bhi na ho koi tarz-e-jaur ye bhi ki aa gae baaz kajravi se baDaa hi pur-lutf hogaa manzar kareinge us dam salaam jhuk kar ki dekhte hoge pesh-e-daavar hamein pashemaan se multaji se milegaa aghyaar ko bahaana uThaaegaa ungliyaan zamaana jinhein hai paas-e-vafaa ye maanaa vo munh na moDeinge bandagi se savaal saail kaa yuun na moDo javaab se us kaa dil na toDo dil-e-shikasta ko balki joDo tum apne altaaf-e-khusravi se sunaaein kyaa maajraa-e-ulfat hai ek 'aalam mein us ki shohrat tumhaare jalve hamaari vahshat hain didani se shanidani se 'ajib hai rog 'aashiqi kaa kare bhi koi to kyaa mudaavaa na 'khaar' aisaa mariz dekhaa taDap uThe dard ki kami se"

"bahar-surat hain ham shirini-e-guftaar ke sadqe tire iqraar ke sadqe tire inkaar ke sadqe khushaa zauq-e-talab is hasrat-e-didaar ke sadqe hue hain baam-o-dar ke rauzan o divaar ke sadqe navaazish ho navaaze gar nigaah-e-lutf se us ko tiraa bimaar teri nargis-e-bimaar ke sadqe qadam le kar kaleje se lagaate hain kabhi us ko kabhi hote hain ham chashm o lab o rukhsaar ke sadqe jahaan-e-aarzu mein husn kaa bhi naam ho jaae maza aa jaae vo gul bhi agar ho 'khaar' ke sadqe"

"vahi hai nafs-e-mazmun sirf tadbirein badalti hain huzur-e-dost kyaa kyaa apni taqrirein badalti hain ye nagri husn vaalon ki ajab nagri hai ai hamdam ki is nagri mein aahon ki bhi taasirein badalti hain na itraa ai dil-e-naadaan kisi ke ahd-o-paimaan par ki qaul o fel kyaa logon ki tahrirein badalti hain khudaai kaa agar karte hain daavaa but nahin bejaa nigaah-e-lutf se dekhein to taqdirein badalti hain koi saffaak jab didon mein diide Daal detaa hai to dil se dil nahin ulfat ki jaagirein badalti hain kisi kaafir ke yaad aate hain andaaz-o-adaa jis dam nazar ke saamne kitni hi tasvirein badalti hain kisi par barq girti hai koi chaDhtaa hai suuli par ba-qadar-e-zauq-e-mujrim 'khaar' taazirein badalti hain"

"duniyaa ke hain na diin ke dilbar ke ho gae ham dil se kalma-go kisi kaafir ke ho gae uTThe na baiTh kar kabhi ku-e-habib se us dar pe kyaa gae ki usi dar ke ho gae ai chashm-e-yaar maan gae tere sehr ko dil de ke mo'taqid tire mantar ke ho gae ham arz-e-haal kar na sake uf-re roab-e-husn jaate hi un ke saamne patthar ke ho gae ai 'khaar' dil jigar pe hi qaabu nahin rahaa ham se khilaaf ghair to kyaa ghar ke ho gae"

"haijaan mein talaash-e-sukun kar rahaa huun main yuun apne gham ko aur fuzun kar rahaa huun main vo sun rahe hain aur tabassum hai zer-e-lab un se bayaan haal-e-zabun kar rahaa huun main ab is se baDh ke aur ho vahshat kaa kyaa subut taalif nuskha-haa-e-junun kar rahaa huun main ik dushman-e-vafaa se baDhaai hai rasm-o-raah khud apni aarzuon kaa khuun kar rahaa huun main ab vaadi-e-junun mein qadam rakh chukaa hai ishq tashhir-e-daagh-haa-e-darun kar rahaa huun main mashur ho rahe hain vo sun kar miraa kalaam dam un pe jaise koi fusun kar rahaa huun main maabud hai vo bas miraa matlub hi nahin sajda us aastaane pe yuun kar rahaa huun main shaayad ki aab-e-tegh hi aab-e-hayaat ho hadd-e-adab se khud ko barun kar rahaa huun main siina bhi meraa haath bhi mere tumhein gharaz zad-kub apne siina ko kyuun kar rahaa huun main chupke se sah rahaa huun sitam tere bevafaa meri khataa to jab ho ki chuun kar rahaa huun main zoam-e-khudi mein jis pe na jaane kaa ahd thaa us dar pe 'khaar' sar ko nigun kar rahaa huun main"

"sozish-e-gham ba-ru-e-kaar aai aah bhi lab pe shoala-baar aai chashm-e-giryaan ki aabyaari se dil ke daaghon pe phir bahaar aai dast-e-vahshat ki kaar-farmaai taa-ba-daamaan-e-taar-taar aai tere divaane kyaa bhalaa jaanein kab khizaan aai kab bahaar aai kasmapursi kaa uf-re ye aalam yaad ham ko jafaa-e-yaar aai dekho vo chhaai uudi uudi ghaTaa mai-gusaaron ki gham-gusaar aai su-e-gulshan jo aaj aa nikle yaar ki yaad baar baar aai bhini bhini kisi badan ki mahak bu-e-gesu-e-mushk-baar aai ghuncha o gul kaa dekh kar jauban yaad-e-mahbub-e-gul-azaar aai hai javaani khud apni mashshaata husn ko kis qadar nikhaar aai 'khaar' ulfat ki baat jaane do zindagi kis ko saazgaar aai"

"ham ko mahrum-e-karam us ki jafaa ne rakkhaa ziist se tang kisi tang qabaa ne rakkhaa sach to ye hai ki duaa ne na davaa ne rakkhaa ham ko zinda tire daaman ki havaa ne rakkhaa husn vaale to bahut aur hain duniyaa mein magar un ko yakta-e-zamaan un ki adaa ne rakkhaa hasrat-e-did na sharminda-e-takmil hui tere jalvaon ne kahaan hosh Thikaane rakkhaa zulm chup ho ke sahein aise to majbur na the ham ko laachaar magar teri razaa ne rakkhaa raah-e-ulfat mein bahut aae maqaam-e-laghzish shukr-sad-shukr bharam meraa vafaa ne rakkhaa bas hamin tak rahein mahdud jafaaein un ki lutf itnaa to ravaa ahl-e-jafaa ne rakkhaa raasta rok liyaa fart-e-nazaakat ne kabhi paas aae to unhein duur hayaa ne rakkhaa kabhi daamaan-o-girebaan se ulajhte rahe haath dard-e-dil ne kabhi masruf duaa ne rakkhaa yaad aate rahe be-tarah moattar gesu aaj bechain bahut baad-e-sabaa ne rakkhaa 'khaar' dushman ne to ilzaam taraashe kyaa kyaa surkh-ru mujh ko magar meri vafaa ne rakkhaa"

"is qadar us ki mudaaraat hai viraane mein koi to baat hai aakhir tire divaane mein faiz-e-saaqi se jo mahrum hain mai-khaane mein jaane kyaa ham se khataa ho gai anjaane mein vaqt ki baat hai ab us ke taraste hain lab ''jitni ham chhoD diyaa karte the paimaane mein'' main ne maanaa ki adu bhi tiraa shaidaai hai farq hotaa hai fidaa hone mein mar jaane mein dilrubaai ke jise ham ne sikhaae andaaz jaan-e-mahfil hai vahi ghair ke kaashaane mein har adaa dil ke liye dashna-o-khanjar hai magar aur hi baat hai zaalim tire sharmaane mein na tasalli na tashaffi na koi pyaar ki baat tujh ko kyaa miltaa hai kaafir hamein taDpaane mein saaqiyaa mai jo nahin baaqi to talchhaT hi sahi Daal de naam-e-khudaa thoDi si paimaane mein meri jaanib se tire dil mein ghubaar aa hi gayaa aakhirash aa hi gayaa ghair ke bhaDkaane mein ishq ki aag sivaa kis mein hai ye kaun kahe shama ke sina-e-sozaan mein ki parvaane mein 'khaar' hai jalva-e-asnaam se dil khuld-e-barin yaa pari-zaadon kaa majmaa hai pari-khaane mein"

"dekhtaa rahtaa huun main teri ghazaali aankhein dekh to tu bhi zaraa meri savaali aankhein chashm-e-aahu se na nargis se hai tashbih durust hain misaal aap hi vo apni niraali aankhein barhami husn ko kuchh aur jilaa deti hai vo jamaali teraa chehra vo jalaali aankhein aa ke har roz tasavvur mein banaa jaati hai ek rangin si tasvir khayaali aankhein khat paDhe yaa na paDhe aae na aae vo shokh 'khaar' kyuun bhej na dein dekhne vaali aankhein"

"dam dilaason mein rakhaa dam bhi nikalne na diyaa kushta-e-naaz jo sanbhlaa to sanbhalne na diyaa uf taghaaful ki tasavvur mein bhi aane se gurez do ghaDi yuun bhi mire ji ko bahalne na diyaa kyaa 'ajab koi sukun kaa bhi nikaltaa pahlu kyaa karein dard ne pahlu hi badalne na diyaa zer-e-divaar paDe the jo uThaayaa us ne zo'f ne chaar qadam bhi hamein chalne na diyaa bazm mein darpae-tashhir thi shokhi un ki vo to kahiye dil-e-naadaan ko machalne na diyaa sang-e-tiflaan bhi sahe minnat-e-darbaan bhi ki havas-e-did ne dar se tire Talne na diyaa 'khaar' kyaa jaaniye kyaa bair hai is duniyaa ko gulban-e-'ishq kabhi phulne phalne na diyaa"

"vo jafaa-ju ki nazar us se milaa bhi na sakun vaae re paas-e-vafaa aankh churaa bhi na sakun yaar khvaabida hai yuun fitna-e-mahshar ki tarah aap so bhi na sakun us ko jagaa bhi na sakun tere didaar ki gar mujh ko sa'aadat ho nasib hosh daulat nahin aisi ki luTaa bhi na sakun jab kiyaa pesh navishta to vo hans kar bole kyaa ye qismat kaa likhaa hai ki miTaa bhi na sakun haae re husn-e-jahaan-soz ki vo aafat-e-jaan saamne aae to phir saamne aa bhi na sakun manzil-e-'ishq mein ye hosh-o-khirad kyaa honge ki agar vaqt paDe kaam mein laa bhi na sakun baaryaabi dar-e-jaanaan pe alag baat hai 'khaar' kyaa qayaamat hai ki us kuche mein jaa bhi na sakun"

"mohabbat mein luTaa kar din-o-dil ye aabru paai koi kahtaa hai divaana koi kahtaa hai saudaai ye farzaanon ki duniyaa ek divaanon ki duniyaa hai jo pukhta-kaar-e-ulfat hain unhein kahte hain saudaai 'ayaan har barg-o-gul se hai vahi jaan-e-bahaar apnaa ye rang-o-bu ki duniyaa hai usi ki bazm-aaraai agar un ki ghalat-andaaz nazrein mujh pe paD jaaein to meraa bakht-e-khufta jaag uTThe le ke angDaai huaa khalvat-saraa-e-dil mein ik hangaama kyon barpaa hamein baiThe-biThaae aaj phir ye kis ki yaad aai muraadein jin ki bar aati hain aise bhi hain duniyaa mein yahaan to aarzu-e-marg bhi apni na bar aai na jaane kyaa kahein ai 'khaar' aah-e-sard ko meri mire naale ko jo be-vaqt ki kahte hain shahnaai"

"kiye hain 'uzr bahaane banaae hain kyaa kyaa savaal-e-vasl pe vo kasmasaae hain kyaa kyaa vo dil pe chhaae nazar mein samaae hain kyaa kyaa ki tark-e-'ishq pe bhi yaad aae hain kyaa kyaa na puchh lutf-e-charaaghaan uThaae hain kyaa kyaa hamaare daagh-e-darun jagmagaae hain kyaa kyaa qatil-e-khanjar-e-abru shahid-e-naaz tire nahaa ke khuun mein gangaa nahaae hain kyaa kyaa ham us ki yaad se dam-bhar agar hue ghaafil khayaal-e-yaar ne shaane hilaae hain kyaa kyaa kisi ke 'ishq mein daamaan-e-zist tang huaa junun ne chaak-e-garebaan dikhaae hain kyaa kyaa huzur-e-gul kiyaa tark-e-adab jo bulbul ne sabaa ne munh pe tamaanche lagaae hain kyaa kyaa sitam-shi’aar isi chashm-e-surma-saa ne tiri na puchh khaak mein armaan milaae hain kyaa kyaa hamaari aabla-paai ki aabru ke liye junun ne raah mein kaanTe bichhaae hain kyaa kyaa thi aashnaa kabhi saaqi ki chashm-e-baada-farosh piye hain saaghar-e-gulgun pilaae hain kyaa kyaa mizaaj-e-vaqt bhi badlaa nigaah-e-dost ke saath harif 'khaar' sab apne paraae hain kyaa kyaa"

"sunaa hai ki tum chaahte ho kisi ko kuchh ahvaal apni zabaani kaho to ye kyaa ukhDi ukhDi si baatein hain saahib ye dubhar hai kyon zindagaani kaho to sunein ham bhi hai kaun vo maah-paara ki is ghaaT jis ne tumhein hai utaaraa ye kis ke liye is qadar muztarib ho miTaae ho apni javaani kaho to masihaa-e-dauraan ho tum main ne jaanaa karo chaarasaazi to ehsaan maanun karoge koi dard kaa mere darmaan dikhaaun main daagh-e-nihaani kaho to bataataa to huun baat main apne dil ki magar baat phir meri heTi na karnaa main khuddaar huun zabt hai meraa sheva sunaaun main apni kahaani kaho to lo aao isi baat par 'ahd kar lein hamaare hue tum tumhaare hue ham nahin tum zabaan se agar apni phirte to phir kyon hai ye aanaa-kaani kaho to kahaan aashiyaana vo apnaa chaman mein yaa ab band huun tiliyon mein qafas ki asiri pe apni mujhe hai ta'ajjub magar maan luun daana paani kaho to bataao to ai 'khaar' kyaa tum pe guzri vo aaghaaz-e-ulfat ki baatein huiin kyaa nahin hai vo andaaz ab guftugu kaa hui kyaa vo sho'la-bayaani kaho to"

"usi ki daastaanein hain usi ki qissa-khvaani hai vo lutf-e-khaas jo mujh par tiraa ai yaar-e-jaani hai na jaa zaalim abhi to tishna-e-didaar hain aankhein zaraa dam le abhi to daastaan-e-gham sunaani hai mohabbat zulf kaa aaseb jaadu hai nigaahon kaa mohabbat fitna-e-mahshar balaa-e-naa-gahaani hai bujhi hasrat kaa nauha hai dil-e-marhum kaa maatam ba-alfaaz-e-digar ye sher-khvaani soz-khvaani hai gharaanaa hai hamaaraa 'daagh' kaa ham dilli vaale hain zamaane mein musallam 'khaar' apni khush-bayaani hai"