Ghazal

"sone chaandi ke taar silte hain un ke juute sunaar silte hain jurm ke taar-taar daaman ko munsif-e-baa-vaqaar silte hain apne mehmaan ke liye ghunche teri khush-bu se haar silte hain shahr-e-ghurbat ke naamvar darzi mere kapDe udhaar silte hain mere dushman ki aahani poshaak mere derina yaar silte hain ghuus ki suui se kai afsar mercedes aur thar silte hain fikr ki zul-fiqaar se 'hasrat' ham ghazal kaa vaqaar silte hain"

"du'aa ki narm panaahon mein jaa ke leT gayaa main bhiik maangte shaahon mein jaa ke leT gayaa guzishta raat zamaane ki aankh lagte hi main ek chaand ki baahon mein jaa ke leT gayaa har ik zabaan pe ghibat ke phunsi phoDe the so kaar-e-khair gunaahon mein jaa ke leT gayaa kisi bhi zakhm ne bai'at na ki shahaadat se miraa jihaad karaahon mein jaa ke leT gayaa kuchh aise jhuuT ko pahnaayaa us ne sach kaa libaas yaqin vahm ki baahon mein jaa ke leT gayaa"

"taasir-e-mukhtalif ki ravaani se jal gae suraj ke honTh barf ke paani se jal gae lafzon ki siDhiyon se utarte hue khayaal kaaghaz pe aa ke soz-e-maaani se jal gae ab subh shaam kijiye paani ki paTTiyaan sahraa hamaari tishna-dahaani se jal gae us sher ke thaa misraa-e-avval mein zikr-e-aab naqqaad jis ke misra-e-saani se jal gae kuchh log khaak ho gae hijrat ki aag se kuchh log shauq-e-naql-e-makaani se jal gae aavaaz ke darakht kaa meaar kyaa giraa honTon ke phuul talkh-bayaani se jal gae"

"markaz-e-nur pe kaajal kaa andheraa kar le apni palkon ko zaraa aur ghaneraa kar le ye zamin chaand ki raa'naai se naa-vaaqif hai dil ke aangan mein kabhi paanv kaa pheraa kar le ham alag tarh ki rakhte hain tavaqqo' tujh se apni zulfon ko bikher aur saveraa kar le main tiri baahein jhaTak kar na chalaa jaaun kahin aur mazbut is aaghosh kaa gheraa kar le mere siine mein koi sham'-e-havas raushan hai is ujaale ke tavassul se andheraa kar le mom ki an-chhui chiDiyaa ko yahi khauf hai bas barf ke peD pe suraj na baseraa kar le"

"joban ki garm shawl se aage na baDh saki khvaahish tire visaal se aage na baDh saki misre' agarche karte rahe zehn kaa tavaaf lekin ghazal khayaal se aage na baDh saki jab jab mubaahise hue husn-o-jamaal par duniyaa tiri misaal se aage na baDh saki ki koshishein to laakh magar aansuon ki fauj cotton ke ik rumaal se aage na baDh saki kuchh main bhi kar sakaa na mohabbat kaa e'tiraaf kuchh vo bhi bol-chaal se aage na baDh saki haalaanki phuul aur bhi gulshan mein the magar titli tumhaare gaal se aage na baDh saki"

"na qumqume na sitaare na sang chaahti hai ghazal ki maang takhayyul kaa rang chaahti hai hain andhi qabr ki gum-naamiyaan ta'aaqub mein magar ye khaak-e-badan naam-o-nang chaahti hai kisi faqir kaa hujra hai zindagi shaayad ye qaa'eda na saliqa na Dhang chaahti hai ba-naam-e-amn banaai gai thi ye duniyaa magar ye khalq-e-khudaa sirf jang chaahti hai mohaqqiqin kaa kyaa kaam is kharaabe mein khanDar mein unghti vahshat malang chaahti hai"

"naaz-o-adaa ghurur hayaa husn mastiyaan ye sab milaa ke banti hain college ki laDkiyaan joban ki jaise 'mir' ke aangan kaa piilaa phuul allaah-re ye gaanv ki alhaD rubaaiyaan lazzat ab un labon ki samajhiye kuchh is tarah chuse kaa zaaiqa hain dasahri ki guThliyaan honTon pe likh ke pakki siyaahi se uns ki gaalon pe bhej di hain mohabbat ki 'arziyaan chehre ke taansen ki viinaa ki miThi dhun us par tumhaari bolti aankhon ki murkiyaan hansti hain haanpte hue ThanDe charaagh par bistar mein baiThe chaand ki mushkil chaDhaaiyaan"

"ye safed safhon ke hans hain inhein raushnaai pe chhoD luun main khayaal-o-fikr ki jhiil se koi rabt-e-baahami joD luun ho siyaah shab tiraa izn gar to nashile honTon ki nok se main gulaabi chaand ki marmarin se pahaaDiyon ko jhinjhoD luun ye inaayaton ke babul kaa haraa kaanTaa meri talab nahin mire aable baDe narm hain inhein sukhi ghaas pe phoD luun miri tishnagi ko nasib ho tiri qurbaton ki sharaab gar main badan ke khaali gilaas mein tiraa rang-rup nichoD luun zaraa baaghbaan ki nazar haTe to main ungliyon se visaal ki tire tan ki saanvli bel se kai phuul bose ke toD luun"

"ba-qadr-e-fikr sujhaae hue usi ke hain ye saare lafz bataae hue usi ke hain har ek shaakh pe min-fazl-e-rabbi likkhaa hai tamaam phuul khilaae hue usi ke hain ye mominin hain shahkaar us ki qudrat kaa ye mushrikin banaae hue usi ke hain usi ne 'arsh pe Taankaa hai chaand-taaron ko zamin pe peD lagaae hue usi ke hain vagarna aankh mein qabza thaa gham ki faujon kaa ham aise log hansaae hue usi ke hain ye qaum-e-lut ki bad-kaariyon ke chehre par 'azaab-o-qahr sajaae hue usi ke hain usi ke hukm kaa paaband hai qalam meraa ye saare she'r likhaae hue usi ke hain"

"khauf ki aakhiri manzil se banaa kar rakhiye is kaa matlab hai ki qaatil se banaa kar rakhiye baahami rabt mein hoti nahin gunjaaish-e-tark aap dariyaa hain to saahil se banaa kar rakhiye aql kahti hai mohabbat se na rakkho nisbat dil ye kahtaa hai masaail se banaa kar rakhiye qaidi-e-zulf ki qismat mein kahaan aazaadi jaaiye tauq-e-salaasil se banaa kar rakhiye ab duaaon ki zarurat hai to yaad aai zakaat main na kahtaa thaa ki saail se banaa kar rakhiye"

"na urdu aur na hindi bolti hai ghazal chaahat ki boli bolti hai ham us tahzib ke qaail nahin hain jo dehaati ko jangli bolti hai jali roTi kaa dukh shauhar ke taa'ne kabhi sunnaa changeri bolti hai khaDe hain lafz naa-zebaa safon mein ye kis lahje mein vardi bolti hai ham ahl-e-fan ki fikri ishtihaa se umuman chaae-maTThi bolti hai vagarna boriyat se mar hi jaate ghanimat hai khamoshi bolti hai musalsal ghar ke khaali bartanon se hamaari tang-dasti bolti hai milan ke vaqt itnaa dhyaan rakhnaa bahut unchaa masahri bolti hai shabaab aataa hai jab kaliyon ke uupar to phir sinon se imli bolti hai"

"saaz rotaa hai chikh gaati hai meraa naghma tasavvuraati hai ek andhe se ghusl-khaane mein chaandni dhuup se nahaati hai sun ke taabir ke kharaaTon ko khvaab ki niind TuuT jaati hai hijr ko god mein liTaa kar shab vasl ki loriyaan sunaati hai meraa lahja hai misl-e-saudaai aur andaaz nafsiyaati hai siDhiyaan chaDhte chaDhte jivan ki saans ki saans phuul jaati hai vaadi-e-gul ki shaahzaadi ab khuun ke lothaDe uThaati hai shaairi ret ki salaai se paaniyon mein girah lagaati hai"

"talkh-saazi ne hamein gham ke sivaa kuchh na diyaa be-niyaazi ne hamein gham ke sivaa kuchh na diyaa ham koi krishn nahin the ki thirakti raadhaa nai-navaazi ne hamein gham ke sivaa kuchh na diyaa ye kaTe haath ye naasur-e-badan shaahid hain tegh-baazi ne hamein gham ke sivaa kuchh na diyaa us ke honTon mein kai rang the rusvaai ke bosa-baazi ne hamein gham ke sivaa kuchh na diyaa har tabassum ke taaaqub mein kai aansu hain dil-navaazi ne hamein gham ke sivaa kuchh na diyaa jism parhez ki tashhir banaa baiThaa hai chaarasaazi ne hamein gham ke sivaa kuchh na diyaa koi mohra na zafar-yaab huaa chaahat kaa dil ki baazi ne hamein gham ke sivaa kuchh na diyaa dil ki masjid mein tiri yaad hai paaband-e-salaat is namaazi ne hamein gham ke sivaa kuchh na diyaa"

"mire kamre ko sahraa kar rahaa hai tumhaaraa gham karishma kar rahaa hai miri aankhon ki masjid kaa muazzin tire chehre pe sajda kar rahaa hai kai bimaar aise bhi hain jin ko tumhaaraa zikr achchhaa kar rahaa hai gahan dhabbaa nahin hai bad-duaa kaa khudaa suraj pe saaya kar rahaa hai tabib-e-khush-navaa kaa vaqti marham mire zakhmon ko gungaa kar rahaa hai taaffun uTh rahaa hai shaairi se koi to hai jo charba kar rahaa hai na jaane kyaa huaa hai naa-khudaa ko kinaare se kinaaraa kar rahaa hai hazaaron log jis se mar gae hain hamein vo zahr achchhaa kar rahaa hai"

"du’aa-e-khair ki phir kyaa kami hai du’aa-go jab husain ibn-e-‘ali hai jise kahti hai ye duniyaa qanaa'at vo ham faaqa-kashon ki dastari hai hai ThanDi raakh kaa chulhaa re'aayaa hukumat kaaTh ki ik degchi hai hai kuchh meri tabi'at bhi shagufta vo laDki bhi zaraa si chulbuli hai hain raqsaan Tokri ko dekh lahrein ye Thaakur ji ki pahli aarti hai kai netaaon se chakkar hai us kaa sahaafat bad-chalan aurat hai ji hai miraa pardes jaanaa tai hai yaaro gharibi daur-e-nau ki kaikai hai na in honTon mein ras hai pahle jaisaa na baakhar-khaaniyon mein chaashni hai miri aankhon ke kaan uktaa gae hain tiri tasvir kitnaa bolti hai"

"jigar kaa khuun pilaao to she'r hotaa hai qalam ke naaz uThaao to she'r hotaa hai siyaah zehn ki shaakhon se koi nuraani khayaal toD ke laao to she'r hotaa hai tasavvuraat ki palkon se ek 'umr talak ghazal ke paaon dabaao to she'r hotaa hai khayaal khaak-nashin ho to she'r kyaa hogaa havaa mein takht bichhaao to she'r hotaa hai siyaah shab kaa badan oDh kar tasavvur mein diye ki lau se nahaao to she'r hotaa hai"

"lahu kaa raqs thaa saanson kaa irti’aashaa thaa mire badan mein koi aur be-tahaasha thaa hayaa ke chhilke utaare to subh hone tak har ek ang kisi raushni kaa qaashaa thaa hain dafn haal ki miTTi mein dard maazi ke ye zinda shahr kabhi muflisi kaa laasha thaa use bhi mashq ke marham ne Thiik kar Daalaa mire khayaal ke chehre pe jo kharaashaa thaa tanaab-e-jism pe honTon kaa raqs-kun kartab guzashta shab kaa tamaashaa bhi kyaa tamaashaa thaa"

"chiiz rakhte hi dham se girti hai 'ishq ki mez aaDi-tirchhi hai mere nazdik maan ki DaanT-DapaT garm roTi pe ghi ke jaisi hai jis ko palkon pe honaa chaahiye thaa phunkni aur tave mein uljhi hai maut dhobi hai aur umiid hayaat maile kapDon ki ek gaThri hai khel jaari hai sard raaton kaa main huun jalve hain aur angiThi hai haath beTi kaa kis ko saunpe maan kai maTke hain ik ghaDau۔nchi hai chakh ke donon ko ye huaa maa'lum honT miThe hain chaae phiki hai pas-e-parda hain laDkiyaan saari ek copy binaa cover ki hai"

"yaas ko tegh-e-mashq se kaaTe koi is naam ko likhe kaaTe meri aankhon ke saamne kaaTe jab tiraa aks aaine kaaTe zindagi ki zamin mein ham ne ashk boe the qahqahe kaaTe kuchh to raftaar bhi miri kam thi kuchh duaaon ne haadse kaaTe meri aavaaz ki rasaai ne khaamushi ke mughaalate kaaTe saare chaalaan husn vaalon ne ishq ke barrier tale kaaTe mere buDhe badan pe tanz na kar jab javaan thaa baDe maze kaaTe koi naqqaad hai yahaan varna kaT gae kaise harf be-kaaTe ham ne kaaghaz ke khet mein 'hasrat' fikr boi thi qaafiye kaaTe"

"sochon ki paalki mein biThaa kar sutur ko kaaghaz pe khinch laayaa huun jannat ki huur ko sar par chaDhaa ke rakhtaa huun masti ke jaam se ik saanvle badan ke gulaabi surur ko ik chikh maajre ki haqiqat bataa gai ghota lagaa ke aanaa thaa kichaD mein nuur ko milti hain subh-o-shaam tashaddud ki roTiyaan ghurbat ki tang jail mein bhuke ghurur ko aise ghazal ke chehre pe raunaq na aaegi lafzon ke reg-maal se ghisiye shu'ur ko"

"raah-e-duniyaa ke liye baad-e-bahaari le jaa paanv thak jaaeinge phulon ki savaari le jaa mujh pe chaltaa nahin ab teri nigaahon kaa fusun mere aage se ye jaadu ki piTaari le jaa muflisi khaa chuki ashkon mein bhigo kar faaqe takht-e-ummid se vaa'don ki taghaari le jaa raah mein barf ke peDon ki faraavaani hai garm kapDon ke 'evaz dhuup ki aari le jaa tujh ko siinaa hai mire khvaab ki dulhan kaa libaas chaand kaa goTaa sitaaron ki kanaari le jaa"

"kaj-kulaahon ne bahut shor machaa rakkhaa hai chor-uchakkon ne bahut shor machaa rakkhaa hai apni aankhon se kaho bolein magar aahista in charaaghon ne bahut shor machaa rakkhaa hai vajh-e-tohmat hain mire jism pe boson ke nishaan kuchh gunaahon ne bahut shor machaa rakkhaa hai abu-ishaaq tiri phir se zarurat hai hamein shimr-zaadon ne bahut shor machaa rakkhaa hai malak-ul-maut tiri sust-khiraami ke sabab chand saanson ne bahut shor machaa rakkhaa hai ik rubber band lo aur baandh do zulfein apni in ghaTaaon ne bahut shor machaa rakkhaa hai"

"dariyaa-e-fikr-e-nau ki ravaani mein gir gayaa suraj phisal ke barf ke paani mein gir gayaa jis ne chhuaa thaa misraa-e-avval mein aasmaan vo sher aa ke misra-e-saani mein gir gayaa gangaa mein bahti raakh hai is baat ki gavaah bargad kaa peD TuuT ke paani mein gir gayaa rahzan ne kuchh to luuT liyaa rakht-e-zindagi jo kuchh bachaa thaa naql-e-makaani mein gir gayaa na zalzala koi na koi aur saaneha aivaan-e-rabt talkh-bayaani mein gir gayaa jis aaine mein dekh ke sajti thiin titliyaan vo aaina bhi baad-e-khizaani mein gir gayaa"

"'ishq taaron se na mahtaab se dildaari ki raat ne dhuup ke bistar pe siyah-kaari ki main vo dahqaan-e-junun-khez huun jis ne apne jism ke khet mein zakhmon ki shajar-kaari ki muddaton laTki rahi mom ki zanjir se laash barf ke sukhe hue peD pe chingaari ki chand saanson ke liye apnaa mudaavaa kar ke tu ne amraaz-e-khudaa-daad se ghaddaari ki kuchh taghayyur ki ye raatein bhi bahut lambi hain kuchh miri qaum ko 'aadat nahin bedaari ki sui ke chhed se haathi kaa guzar mumkin hai ise kahte hain takhayyul ki bahut baariki tum ne lafzon ki numaaish pe faqat dhyaan diyaa main ne kaaghaz ke hasin jism pe gul-kaari ki ruuh par itr lagaa ke mire paas aayaa kar tere kirdaar se bu aati hai makkaari ki bazm-e-daanish mein na munh kholnaa apnaa 'hasrat' tujh se ummid nahin mujh ko samajhdaari ki"