Ghazal

"yaas-o-gham ranj-o-alam tanhaaiyaan ab ke baras meri qismat mein rahein naakaamiyaan ab ke baras raushni suraj ki aankhon par hai manzar dhuup hain lag rahi hain suratein parchhaaiyaan ab ke baras aaine mein dekh kar khud ko na tum honaa udaas aainon mein paD gaiin hain jhaaiyaan ab ke baras dekhnaa hogaa sitam ye bhi zabaan-bandi ke baa'd kaaT li jaaeingi sab ki ungliyaan ab ke baras khushk-saali to nahin hai shahr mein 'mahvar' magar abr kab barsaaeinge allaah-miyaan ab ke baras"

"na ham ko yaad karo aur na yaad aao hamein ajiib hukm hai kahte hain bhuul jaao hamein tumhaare chehre to kuchh raushni mein aa jaao jo ho sake to zaraa der tak jalaao hamein hamein aziiz ho kitne ye jaanne ke liye hamaari jaan bhi haazir hai aazmaao hamein khuleinge kitne hi asraar-e-lafz lafz magar kabhi to tum bhi akele mein gungunaao hamein zaruraton ke sabab ham bhi bik gae 'mahvar' nazar se apni gire hain zaraa uThaao hamein"

"tu baahon mein dekhaa khvaab sasti aankhein mahngaa khvaab dariyaa dariyaa teraa khvaab ret pe utraa Duubaa khvaab tum ko apnaa dekhaa hai meri marzi meraa khvaab koThi kaarein naukar sab ho saktaa hai ulTaa khvaab mailaa mailaa guzraa din jab bhi dekhaa ujlaa khvaab"

"chup rahne se aisaa hogaa tum ko dab ke rahnaa hogaa bekaari ki dhuup mein aksar ek parinda uDtaa hogaa khaali baiThe kahte rahiye jo bhi hogaa achchhaa hogaa aankhon ke mashkize kholo dariyaa par to pahraa hogaa dukhne lageingi aankhein 'mahvar' itni duur sitaaraa hogaa"

"dhuup jami hai raston par chalte hain angaaron par ab ke rakkhaa sahraa ne ret kaa marham chhaalon par phuul ki qurbat mil jaae niind aa jaae kaanTon par phuul samajh kar baiTh gai titli tere honTon par ab koi bhi mausam ho barf jami hai rishton par"

"sar pe dhuup kaa neza utraa raat kaa jaise nashsha utraa patte TuuTe shaakhon se shaayad ek parinda utraa surkh lahu ne gardish paai suraj qatra qatra utraa mahngi paDegi ye zid us ko vo lashkar mein tanhaa utraa bojh thaa kaisaa divaaron par bosida thaa chhajjaa utraa"

"katraa ke guzartaa hai to dekhaa nahin jaataa basti mein gharibon ki ujaalaa nahin jaataa daulat se kahaan juDte hain TuuTe hue rishte shishe ko kabhi gond se joDaa nahin jaataa is jhuuT ke baazaar mein sach DhunDne vaale sukhe hue kapDe ko nichoDaa nahin jaataa pariyon ki hasin baanhon mein vo jhuul rahaa hai sote hue bachche ko jhinjhoDaa nahin jaataa ye chaand sitaare bhi hain suraj bhi hai raushan phailaa hai jo duniyaa mein andheraa nahin jaataa sohbat mein buron ki vo rahaa kartaa hai 'mahvar' is baat pe beTe ko nikaalaa nahin jaataa"

"har kisi se ho dosti saahib aisi kyaa be-takallufi saahib shauq thaa din mein khvaab dekheinge uD gai shab ki niind bhi saahib dhundle paD jaaeinge hasin chehre na ho itni bhi raushni saahib shaam se hi charaagh jalne lage hai tabi'at bujhi bujhi saahib khaa gai zindagi parinde ki ek bachche ki kankari saahib main ne hi raat ke andhere mein neki dariyaa mein Daal di saahib rusvaa karti hai jaa-ba-jaa ab to naa-muraad apni saadgi saahib ik farishte ko dekh kar ghar mein bachchi chhoTi thi Dar gai saahib karb sadiyon ke chhoD jaati hai ek lamhe ki dosti saahib roz ham ko bhi hai kahaan fursat milte rahiye kabhi kabhi saahib"

"na un kaa tarz na meraa shiaar khatm huaa na aae vo na miraa intizaar khatm huaa hai tishnagi ko abhi ju-e-baar ki ummid agarche silsila-e-kohsaar khatm huaa ab aashkaar hui hai haqiqat-e-duniyaa khud apne aap pe jab ikhtiyaar khatm huaa na thaa bharosa to rakhte hi kaise ummidein suluk-e-vaqt se har eatibaar khatm huaa har ek shakl nazar aa rahi hai aaina tilism-e-ishq kaa gard-o-ghubaar khatm huaa"

"dil mein umang aankhon mein hasrat liye phirun main shahr shahr teri mohabbat liye phirun rusvaaiyon ke khauf se khaamoshiyon ke saath main dil mein tere pyaar ki lazzat liye phirun jachtaa nahin hai koi nigaahon mein in dinon har-pal tire khayaal ki nudrat liye phirun ubhregaa tere lab se kabhi harf-e-dosti dil mein is intizaar ki hasrat liye phirun 'mahvar' samaaaton ke mile band dar mujhe honTon pe apne harf-e-shikaayat liye phirun"

"jab tavaqqo kaa silsila TuuTaa khush-gumaani kaa daaera TuuTaa niind TuuTi to khvaab TuuT gae aks bikhraa jab aaina TuuTaa aaj phir justuju ki maut hui aaj phir meraa hausla TuuTaa tabsira zindagi pe kyaa kiije jaise paani kaa bulbula TuuTaa aaj 'mahvar' hai is qadar tanhaa jaise khud se bhi raabta TuuTaa"

"madhosh kahin gham ki sharaabon mein mileinge fankaar hain ham khaana-kharaabon mein mileinge naa-qadri-e-arbaab-e-hunar aaj hai lekin kal ban ke sanad saari kitaabon mein mileinge Takraa ke pahaaDon se palaT aaegi aavaaz khud mere savaalaat javaabon mein mileinge jo log hain derina rivaayaat ke qaatil tajdid-e-taalluq ke azaabon mein mileinge nafrat ke bhanvar ne jo Duboyaa hamein 'mahvar' ab ham bhi mohabbat ke saraabon mein mileinge"

"apni misaal aap hai vo be-misaal hai ye dekhnaa hai kaun miraa ham-khayaal hai har qahqahe mein dard ke saagar hain tah-nashin divaana dekhne mein to aasuda haal hai kab sabza-e-nishaat hai aasuda-e-nazar har samt surkh surkh salibon kaa jaal hai patthar ba-dast miltaa hai har shakhs shahr mein aaina ban gae hain to bachnaa muhaal hai barbaadi-e-hayaat pe 'mahvar' huun khush bahut barbaadiyon kaa meri unhein bhi khayaal hai"

"vo nazar mujh se khafaa ho jaise jism se ruuh judaa ho jaise yuun uThaa mere nasheman se dhuaan dard pahlu se uThaa ho jaise zindagi apne hi zakhmon ke sabab kisi muflis ki qabaa ho jaise intizaar us kaa miraa taar-e-nafas yak-ba-yak TuuT gayaa ho jaise saanehe karte hain 'mahvar' ko talaash markaz-e-karb-o-balaa ho jaise"