Ghazal

"nahin misaal koi aisaa be-misaal badan hai khud javaab vo apnaa hai khud savaal badan mahaaz-e-jang-e-vafaa pe shikast-e-ishq ke baad paDaa hai dasht mein ab tak vo paaemaal badan tilism-e-kun-fayakun kis ne paDh ke phunk diyaa zaraa si khaak hui kaisaa baa-kamaal badan tire badan ki masaafat ko tai kiyaa to magar paDaa huaa hai abhi tak miraa niDhaal badan shuur-o-fikr pe ghaalib hai jism kaa mausam har ek khvaab badan hai har ik khayaal badan"

"apni masarraton ke nae baab DhunDne aankhein nikal paDi hain nae khvaab DhunDne vo dekho aasmaan mein baadal ki kashtiyaan jaati hain koi paikar-e-mahtaab DhunDne maazi ki samt jaate hain ham apne haal se raahon mein kho gayaa hai jo asbaab DhunDne hairat hai in dinon to tumhaare khayaal bhi aate hain meri aankhon mein sailaab DhunDne"

"taarikiyon mein jal ke vo qindil ki tarah sahraa-badan se guzri hai ik jhiil ki tarah kal raat mere jism ne mahsus ki thakan do-gaam ke safar mein kai mel ki tarah be-taal kaa ilaaqa hai chalnaa sambhaal kar ulTe laTak na jaao abaabil ki tarah kal raat mujh pe hamla kiyaa ek khvaab ne murda badan pe bhuki kisi chiil ki tarah main thaa nashe mein raat koi ru-ba-ru to thaa lagtaa thaa khadd-o-khaal se jibril ki tarah"

"bas gayaa jab se aa ke tu mujh mein ek khushbu hai chaar su mujh mein aaina dekh ke main chaunk paDaa koi mujh saa hai hu-bahu mujh mein khud mein khud ko kahaan talaash karun bas tu hi tu hai chaar-su mujh mein khud ko taaraaj kar ke baiThaa hai ek vahshi lahu lahu mujh mein ho ke khaamosh us ko suntaa huun hai koi mahv-e-guftugu mujh mein sach kahun aaj tak bhi zinda hai tujh ko paane ki aarzu mujh mein"

"ye bichhaDnaa to miri jaan bichhaDnaa na huaa mil ke roe bhi nahin hashr bhi barpaa na huaa ek vahshat si rahi tujh se bichhaD kar dil mein lab-e-saakit se magar koi bhi shikva na huaa tujh ko paa kar bhi mukammal nahin ho paayaa kabhi aur main tujh se bichhaD ke bhi adhuraa na huaa vahshat-e-ishq ne masruf rakhaa tujh mein sadaa aur tujh ko kabhi mujh par hi bharosa na huaa jaaiye ham bhi ye taslim kiye lete hain ham ne dekhaa thaa koi khvaab jo puuraa na huaa"

"teri yaadon ke ke hasin pal ke sivaa kuchh bhi nahin mere kashkol mein is kal ke sivaa kuchh bhi nahin main hi paagal thaa vafaa DhunD rahaa thaa in mein teri aankhon mein to kaajal ke sivaa kuchh bhi nahin kitne hi khvaab-e-masarrat kaa nagar thiin pahle ab to aankhein miri baadal ke sivaa kuchh bhi nahin ban ke suqraat jiyo tajraba apnaa hai yahi zindagi zahr-e-halaahal ke sivaa kuchh bhi nahin baDhti jaati hain miri vahshatein har din 'meraaj' aisaa lagtaa hai main paagal ke sivaa kuchh bhi nahin"

"bas ek bhuul ki bharpaaiyon se laDtaa rahaa tamaam umr main rusvaaiyon se laDtaa rahaa tamaam umr ujaalon ke misl meraa uruuj mire zavaal ki gahraaiyon se laDtaa rahaa mire vajud pe ghaalib thaa raat ek badan tamaam raat main angDaaiyon se laDtaa rahaa hisaar-e-shab mein vo tanhaa kisi mujaahid saa koi badan thaa jo parchhaaiyon se laDtaa rahaa hasin yaadon ki ik anjuman sajaataa rahaa main tere baad yuun tanhaaiyon se laDtaa rahaa"

"kisi bhi lamha ghamon se najaat hai hi nahin hayaat kahte hain jis ko hayaat hai hi nahin talaash kijiye apnon mein kaun qaatil hai hamaare qatl mein ghairon kaa haath hai hi nahin na chaand taare na jugnu na chaandni ki qabaa main raat kahtaa huun jis ko vo raat hai hi nahin mujhe to zahr hi piinaa hai har zamaane mein mire nasib mein aab-e-hayaat hai hi nahin sar-e-salib jo main hans rahaa huun kyon na hansun khushi kaa lamha hai ye gham ki baat hai hi nahin har ek samt tiraa nuur hai jidhar dekhun mire vajud mein meri to zaat hai hi nahin hazaaron log mile pyaar karne vaale hamein magar kisi mein tumhaari si baat hai hi nahin vo mere paas hai phir bhi bahut akelaa huun main us ke saath huun vo mere saath hai hi nahin main kyon udaas huun mat puchiyegaa is kaa sabab ajiib baat hai ki koi baat hai hi nahin hamaare ishq mein shaamil havas kahaan thi miyaan hamaare ishq ki ye vaardaat hai hi nahin"

"vo duur ho gai ab tak jo mere paas mein thi vo jis ke jism ki khushbu mire libaas mein thi lipaT gai mire siine se ghar mein aate hi vo miThe zahr ki naagin jo meri aas mein thi miri ragon mein utar kar fasaad karne lagi vahi sharaab jo ab tak mire gilaas mein thi na jaane kis liye ab roz yaad aati hai vo ek laDki jo paDhti mire class mein thi jo kal talak baDaa Darti thi cockroachon se vo aaj chhipkali pakDe hue pilaas mein thi"

"gham uThaane ki zid mein zinda huun zakhm khaane ki zid mein zinda huun bhuul paaun tujhe to mar jaaun bhuul jaane ki zid mein zinda huun mere ahbaab hain khafaa mujh se bas manaane ki zid mein zinda huun koi to mujh ko bhi manaa le kabhi ruuTh jaane ki zid mein zinda huun vo jo meraa kabhi nahin hogaa us ko paane ki zid mein zinda huun mujh ko sab ne bhulaa diyaa yaani yaad aane ki zid mein zinda huun jiit jaise miraa muqaddar ho haar jaane ki zid mein zinda huun"

"agarche ranj baDaa dil dukhaane vaalaa thaa magar main hansne se kab baaz aane vaalaa thaa bachaa liyaa miyaan light ne vaqt pe aa kar andheraa varna mujhe noch khaane vaalaa thaa tiraa hi jism koi moajiza na kar paayaa main tere husn pe imaan laane vaalaa thaa main pahle aisaa nahin thaa udaas gum-sum saa baDaa sharir baDaa muskuraane vaalaa thaa"

"main ne tujh ko chaahaa bahut thaa par kahne se Dartaa bahut thaa chaand nagar ab yaad nahin hai jab dekhaa thaa bachcha bahut thaa guDiyaa guDDe khel khilaune bachpan meraa achchhaa bahut thaa tujh se bichhaD kar dil divaana yaad hai mujh ko royaa bahut thaa haath baDhaa kar chhunaa chaahaa nil-gagan to unchaa bahut thaa"

"ibn-e-aadam tiri tauqir mein rakkhaa gayaa huun huun vahi zakhm jo shamshir mein rakkhaa gayaa huun meraa kirdaar ayaan honaa hai duniyaa pe abhi main abhi khvaab huun taabir mein rakkhaa gayaa huun meri vahshat se zamaane ko baDaa khatra hai is liye qaid mein zanjir mein rakkhaa gayaa huun tujh se sharminda huun tu ne hai bahut jhelaa mujhe gham ki surat tiri taqdir mein rakkhaa gayaa huun khatm honi hai mohabbat ki risaalat mujh par main ki taqdim huun taakhir mein rakkhaa gayaa huun chashm-e-maadar hai koi girya-kunaan mere liye vo galaa huun jo kisi tiir mein rakkhaa gayaa huun"

"phuul zakhmi hain khaar zakhmi hai ab ke saari bahaar zakhmi hai meri aankhon se khuun bahtaa hai kis qadar intizaar zakhmi hai meri gardan to kaaT di hai magar khud bhi vo zul-fiqaar zakhmi hai teri haivaaniyat pe a insaan nazm-e-lail-o-nahaar zakhmi hai husn ne aisi zarb maari hai ab talak meraa pyaar zakhmi hai teri nusrat ko aa nahin saktaa teraa ye jaan-nisaar zakhmi hai ab kisi par yaqin nahin hai mujhe is qadar eatibaar zakhmi hai"

"kis qayaamat kaa adaakaar chhupaa hai mujh mein meraa hi haashiya-bardaar chhupaa hai mujh mein meri taaid ke asbaab banaane vaalo khud miri zaat kaa inkaar chhupaa hai mujh mein bas tire gham ko samajhtaa hai ibaadat apni vo jo ik teraa azaadaar chhupaa hai mujh mein be-niyaazi miri duniyaa se bataati hai mujhe ho na ho koi samajhdaar chhupaa hai mujh mein aa zulekhaa miri aankhon se mire dil mein utar dekh ik misr kaa baazaar chhupaa hai mujh mein meri fitrat hai zamaane se mohabbat karnaa log kahte hain ki makkaar chhupaa hai mujh mein jis ne aadam ko nikalvaayaa thaa jannat se kabhi bas vahi ek gunahgaar chhupaa hai mujh mein tujh se jhagDun to muqaabil mire aa jaataa hai aisaa ik teraa taraf-daar chhupaa hai mujh mein ye alag baat ki zaahir nahin hotaa hai kabhi vaise ik shakhs mazedaar chhupaa hai mujh mein mere baatin mein jo har samt hai khushbu mearaaj ye sabab hai ki miraa yaar chhupaa hai mujh mein"

"pahle to majburi paidaa hoti hai phir rishton mein duuri paidaa hoti hai gham se aksar dil murda ho jaate hain chehre pe be-nuri paidaa hoti hai vahshat se insaan mein shiddat baDhti hai aahu mein kasturi paidaa hoti hai meri kaavish us ko puuraa karti hai varna ghazal adhuri paidaa hoti hai 'aql ki har dam sunne se 'mearaaj'-miyaan jazbon mein maazuri paidaa hoti hai"

"ashkon kaa ambaar chhupaa hai aankhon mein yaar bahut aazaar chhupaa hai aankhon mein phuul sitaare jugnu titli aur dhanak yaani ik sansaar chhupaa hai aankhon mein jhaank ke tu khud ik din in mein dekh zaraa kitnaa teraa pyaar chhupaa hai aankhon mein meri aankhein sab se ziyaada hain anmol kyon ki meraa yaar chhupaa hai aankhon mein ek zulekhaa is mein yusuf DhunDhti hai misr kaa jo baazaar chhupaa hai aankhon mein aksar aataa rahtaa hai sailaab yahaan tu aa ke bekaar chhupaa hai aankhon mein ham donon ne mil ke jis ke khvaab bune yaar vahi ghar-baar chhupaa hai aankhon mein"