Ghazal

"hijr mein ashk bahaane se bhalaa kyaa hogaa ai mire dil ye bataa tujh se nayaa kyaa hogaa main ne ik 'umr isi Dar mein guzaari hai ki vo gar miraa ho nahin paayaa to miraa kyaa hogaa aise chehre hain ki main hosh ganvaa detaa huun bande aise hain to phir soch khudaa kyaa hogaa mujh ko duniyaa na mili tu na milaa kuchh na milaa ab mire saath bataa aur buraa kyaa hogaa"

"achchhaa kiyaa thaa tum ne jhaTak kar hamaaraa haath varna pakaDtaa kaun lapak kar hamaaraa haath us ne zaraa saa haath pe kyaa haath rakh diyaa siine mein aa gayaa thaa dhaDak kar hamaaraa haath mahfil mein aur bhi the kai aashnaa magar pakDaa thaa aap hi ne sisak kar hamaaraa haath jis haath ko hamaari hi qimat nahin pataa us haath mein gayaa hai bhaTak kar hamaaraa haath us gul-badan ke lams kaa hai ye kamaal ki guldaan ho gayaa hai mahak kar hamaaraa haath"

"manzilein chhin liin anjaan saa rasta de kar ham ko jannat se nikaalaa gayaa duniyaa de kar jaane vaale kaa janaaza thaa janaaza meraa khud ko dafnaa diyaa main ne use kaandhaa de kar ab ye batlaao ki nakhre bhi uThaa paaoge ghar to le aae use 'ishq kaa jhaansa de kar main ne afvaaj ki nindon mein khalal Daalaa hai apni shamshir ko maidaan mein bosa de kar aaj vo log mire sar pe khaDe hain jin ko main ne paalaa thaa kabhi dhuup mein saaya de kar"

"gar tire ghar Thahar gae hote phir kabhi ham na ghar gae hote vo agar khud sameTne aataa ham ziyaada bikhar gae hote dasht mein bhi agar na milti jagah sochiye phir kidhar gae hote chaar kaandhe nahin mile ham ko varna ham log mar gae hote is judaai se laakh behtar thaa tum mujhe maar kar gae hote"

"de rihaai mujhe is haalat-e-yaktaai se thak chukaa huun main shab-o-roz ki tanhaai se tum bhi kahte ho miraa zakhm davaa vaalaa hai tum to vaaqif ho mire zakhm ki gahraai se main mohabbat mein dikhaavaa nahin karne vaalaa jitnaa hai mujhe us shakhs ko sachchaai se is maraasim ko khad-o-khaal zaruri to nahin ham shanaasaa hain miri jaan shanaasaai se vo hai duniyaa kaa talabgaar tum us ke 'shahroz' dil lagaayaa to lagaayaa kisi harjaai se"

"mujh ko maa'lum na the pyaas ke maa'ni pahle chal ke aataa thaa mire paas mein paani pahle ab ye 'aalam ke 'adaalat mein chale jaate hain baanTi jaati thi viraasat bhi zabaani pahle ab to bachchon ko bhi dekhun to javaan lagte hain baa'd ik 'umr ke aati thi javaani pahle kucha-e-yaar se sahraa mein chale aae hain ham ko aati na thi ye naql-e-makaani pahle"

"patte gire hain shaakh se is e'tibaar mein phir se nikal hi aaeinge agli bahaar mein dariyaa tire shabaab-e-talaatum ki khair ho vo vasvase uThe hain dil-e-din-daar mein vo intihaai 'ishq se mahrum rah gae dauDaa rahe the 'aql ke ghoDe jo pyaar mein tujh se bichhaD ke khuub ujaagar huaa huun main ubhre hain naqsh-e-she'r-o-sukhan khaaksaar mein muD kar class mein use chhup-chhup ke dekhnaa kitni nazaakatein thi vo bachpan ke pyaar mein"

"bechainiyon ke shor kaa ambaar dekh kar ghar-baar yaad aa gayaa baazaar dekh kar shohrat mili to dost bhi aghyaar ban gae patthar taDap uThe mujhe phaldaar dekh kar ik gaam par hai zindagi ik gaam par hai maut main Dar gayaa huun ziist ki raftaar dekh kar saare sukhanvaron se alag hai miraa mizaaj 'shahroz' she'r kahtaa hai me'yaar dekh kar"

"hosh-mandon ko bhi madhosh banaa detaa hai 'ishq bistar ko bhi aaghosh banaa detaa hai apni raftaar-o-zehaanat kaa takabbur aksar dauDne vaalon ko khargosh banaa detaa hai tum ko maa'lum hai us shakhs ki aankhon kaa tilism pir-zaadon ko bhi mai-nosh banaa detaa hai mujh se khuddaar se hogi na ghulaami teri kaam kirdaar ko paa-posh banaa detaa hai daur-e-tanhaai mein dil khol ke rone kaa 'amal khaana-e-dil ko subuk-dosh banaa detaa hai haarne lagtaa huun main 'ishq ke aazaar se jab dard-e-hijraan mujhe pur-josh banaa detaa hai"

"un se tufaan pareshaan huaa karte hain hausle jin ki bhi chaTTaan huaa karte hain zakhm un ke liye mehmaan huaa karte hain muflisi jo tire darbaan huaa karte hain vo amiron ke liye 'aam si baatein hongi ham gharibon ke jo armaan huaa karte hain aise kaandhe jo javaan khuun ko dafnaa aae jaan hote hue be-jaan huaa karte hain 'ain mumkin ye miri maan ki du'aa hai shaayad masale jo mire aasaan huaa karte hain kis tarah phuul churaate hain churaane vaale jin pe har vaqt nigahbaan huaa karte hain maal-o-daulat to viraasat mein milaa karti hai achchhe akhlaaq hi pahchaan huaa karte hain"

"zindagi zindagi nahin lagti ab koi shai bhali nahin lagti jis ko paane ki justuju hai mujhe haath bas ik vahi nahin lagti us ko afsar pasand aate hain aur miri naukri nahin lagti kitni kaliyaan havas ke naam huiin aag lekin bujhi nahin lagti 'ishq lagtaa hai khel bachchon kaa dil-lagi dil-lagi nahin lagti qahqahon kaa sabab udaasi hai tu mujhe maskhari nahin lagti pahle lagti thi kuchh kami mujh ko ab kisi ki kami nahin lagti"

"detaa hai hijr mujh ko ye mohlat kabhi kabhi hoti hai saans lene ki fursat kabhi kabhi vahshat mein TuuT jaate hain aaine zabt ke rone ki aa hi jaati hai naubat kabhi kabhi main chikhtaa huun raat mein aaseb ki tarah khud bhi main khud se khaataa huun haibat kabhi kabhi mujh ko tumhaare 'ishq ne barbaad kar diyaa tamgha lage hai mujh ko ye tohmat kabhi kabhi dil mein utartaa jaataa hai tanhaaiyon kaa khauf aankhon main khuun bharti hai vahshat kabhi kabhi ham ko kisi ne pyaar se dekhaa nahin kabhi aaina dekh letaa hai surat kabhi kabhi tum sun rahe ho ‘mujtabaa-shahroz' ki ghazal bad-qismaton ki khulti hai qismat kabhi kabhi"

"masjid ke manaaron se vo detaa hai pukaaraa mere sivaa koi nahin duniyaa mein tumhaaraa chehre pe utartaa nahin jazbon kaa talaatum baahar se nahin hotaa hai andar kaa nazaara jis ke binaa ik saans bhi dushvaar hai 'shahroz' bin us ke tujhe karnaa hai taa-'umr guzaaraa"

"chingaariyon ko khuun se ThanDaa kiyaa gayaa mat puchh tere 'ishq mein kyaa kyaa kiyaa gayaa rone lagin to haathon mein aaina de diyaa ham ko hamaare saamne rusvaa kiyaa gayaa palkein ragaD ke aankhon se nahrein nikaal diin is tarh regzaaron ko dariyaa kiyaa gayaa jis ne banaayaa ghar vo hai mehmaan ki tarah ghar laa ke ik paraae ko ghar kaa kiyaa gayaa"

"mom thaa jism pighalne ke liye aayaa thaa khaak thaa khaak mein Dhalne ke liye aayaa thaa log mai-khaane mein aate hain bahakne ke liye main ki mai-khaane sanbhalne ke liye aayaa thaa main ne tiryaaq banaa kar use lauTaayaa hai jo yahaan zahr ugalne ke liye aayaa thaa jo na uThtaa thaa bulaane pe kisi ke vo bhi meri aavaaz pe chalne ke liye aayaa thaa main ne palkon se dabaa kar use mismaar kiyaa zabt ko girya kuchalne ke liye aayaa thaa guzri shab dast-e-hinaai tiraa jaanaan ik pal mere siine pe Tahalne ke liye aayaa thaa har koi aataa hai kuchh kaar-e-muqarrar le kar vo jalaae to main jalne ke liye aayaa thaa"

"roTi kapDe makaan kaa chakkar chhoD de is jahaan kaa chakkar dekh uupar se apni duniyaa ko jaa lagaa aasmaan kaa chakkar 'ishq kar ke ye sochtaa huun main jaan le le na jaan kaa chakkar har mohabbat ke biich aataa hai ye nasab khaandaan kaa chakkar"