Ghazal

"is qadar ab gham-e-dauraan ki faraavaani hai tu bhi minjumla-e-asbaab-e-pareshaani hai mujh ko is shahr se kuchh duur Thahar jaane do mere ham-raah miri be-sar-o-saamaani hai aankh jhuk jaati hai jab band-e-qabaa khulte hain tujh mein uThte hue khurshid ki uryaani hai ik tiraa lamha-e-iqraar nahin mar sakta aur har lamha zamaane ki tarah faani hai kucha-e-dost se aage hai bahut dasht-e-junun ishq vaalon ne abhi khaak kahaan chhaani hai is tarah hosh ganvaanaa bhi koi baat nahin aur yuun hosh se rahne mein bhi naadaani hai"

"sahar jitegi yaa shaam-e-gharibaan dekhte rahnaa ye sar jhukte hain yaa divaar-e-zindaan dekhte rahnaa har ik ahl-e-lahu ne baazi-e-imaan lagaa di hai jo ab ki baar hogaa vo charaaghaan dekhte rahnaa idhar se muddai guzreinge iqaan-e-shariat ke nazar aa jaae shaayad koi insaan dekhte rahnaa use tum log kyaa samjhoge jaisaa ham samajhte hain magar phir bhi kareinge us se paimaan dekhte rahnaa samajh mein aa gayaa teri nigaahon ke ulajhne par bhari mahfil mein sab kaa ham ko hairaan dekhte rahnaa hazaaron mehrbaan is raaste par saath aaeinge miyaan ye dil hai ye jeb o garebaan dekhte rahnaa dabaa rakkho ye lahrein ek din aahista aahista yahi ban jaaeingi tamhid-e-tufaan dekhte rahnaa"

"roktaa hai gham-e-izhaar se pindaar mujhe mere ashkon se chhupaa le mire rukhsaar mujhe dekh ai dasht-e-junun bhed na khulne paae DhunDne aae hain ghar ke dar-o-divaar mujhe si diye honT usi shakhs ki majburi ne jis ki qurbat ne kiyaa mahram-e-asraar mujhe meri aankhon ki taraf dekh rahe hain anjum jaise pahchaan gai ruh-e-shab-taar mujhe jins-e-viraani-e-sahraa meri dukaan mein hai kyaa kharidegaa tire shahr kaa baazaar mujhe jaras-e-gul ne kai baar pukaaraa lekin le gai raah se zanjir ki jhankaar mujhe naavak-e-zulm uThaa dashna-e-andoh sanbhaal lutf ke khanjar-e-be-naam se mat maar mujhe saari duniyaa mein ghani raat kaa sannaaTaa thaa sehn-e-zindaan mein mile subh ke aasaar mujhe"

"hui ijaad nai tarz-e-khushaamad ki nahin kal kaa aaiin hai ab tak sar-e-masnad ki nahin aa gai ai mire saae se bhi bachne vaali rafta rafta tire iqraar ki sarhad ki nahin nahr-e-khun ho chuki, farhaad ki mazduri ko ab ke teshe se mili qimat-e-saaad ki nahin naasehaa is liye main gosh-bar-aavaaz na thaa tiri aavaaz se chhoTaa hai tiraa qad ki nahin"

"jab havaa shab ko badalti hui pahlu aai muddaton apne badan se tiri khushbu aai mere naghmaat ki taqdir na pahunche tujh tak meri fariyaad ki qismat ki tujhe chhu aai apni aankhon se lagaati hain zamaane ke qadam shahr ki raah-guzaaron mein miri khu aai haan namaazon kaa asar dekh liyaa pichhli raat main idhar ghar se gayaa thaa ki udhar tu aai muzhda ai dil kisi pahlu to qaraar aa hi gayaa manzil-e-daar kaTi saa'at-e-gesu aai"

"vo ahd ahd hi kyaa hai jise nibhaao bhi hamaare vaada-e-ulfat ko bhuul jaao bhi bhalaa kahaan ke ham aise gumaan vaale hain hazaar baar ham aaein hamein bulaao bhi bigaD chalaa hai bahut rasm-e-khud-kushi kaa chalan Daraane vaalo kisi roz kar dikhaao bhi nahin ki arz-e-tamannaa pe maan hi jaao hamein is ahd-e-tamannaa mein aazmaao bhi fughaan ki qissa-e-dil sun ke log kahte hain ye kaun si nai uftaad hai haTaao bhi tumhaari niind mein Duubi hui nazar ki qasam hamein ye zid hai ki jaago bhi aur jagaao bhi"

"qadam qadam pe tamannaa-e-iltifaat to dekh zavaal-e-ishq mein saudaagaron kaa haat to dekh bas ek ham the jo thoDaa saa sar uThaa ke chale isi ravish pe raqibon ke vaaqiaat to dekh gham-e-hayaat mein haazir huun lekin ek zaraa nigaar-e-shahr se mere taalluqaat to dekh khud apni aanch mein jaltaa hai chaandni kaa badan kisi ke narm khunuk gesuon ki raat to dekh ataa kyaa dil-e-muztar to si diye mere honT khudaa-e-kaun-o-makaan ke tavahhumaat to dekh gunaah mein bhi baDe maarifat ke mauqe hain kabhi kabhi use be-khadsha-e-najaat to dekh"

"kisi to kaam zamaane ke sogvaar aae tujhe jo paa na sake ziist ko sanvaar aae thaa jis pe vaada-e-firdaus-o-aaqibat kaa madaar vo raat ham sar-e-ku-e-butaan guzaar aae tire khayaal pe shab-khun to khair kyaa karte bahut huaa to ik ochhaa saa haat maar aae mataa-e-dil hi bachi thi bas ik zamaane se so ham ise bhi tiri anjuman mein haar aae baDe khulus se ahvaal puchhne ke liye guzar gai shab-e-furqat to mere yaar aae kisi ko haal bataanaa zarur hi kyaa thaa us anjuman se ham apne qusur-vaar aae nigaah-e-naaz mire dil ke ghaav par mat jaa khudaa kare ki tujhe apnaa kaarobaar aae ye aur baat ki saaqi se qarz mil na saki huzur-e-hazrat-e-yazdaan to baa-vaqaar aae"

"kyaa kyaa nazar ko shauq-e-havas dekhne mein thaa dekhaa to har jamaal isi aaine mein thaa qulzum ne baDh ke chuum liye phuul se qadam dariyaa-e-rang-o-nur abhi raaste mein thaa ik mauj-e-khun-e-khalq thi kis ki jabin pe thi ik tauq-e-fard-e-jurm thaa kis ke gale mein thaa ik rishta-e-vafaa thaa so kis naa-shanaas se ik dard hirz-e-jaan thaa so kis ke sile mein thaa sahbaa-e-tund-o-tez ki hiddat ko kyaa khabar shishe se puchhiye jo mazaa TuTne mein thaa kyaa kyaa rahe hain harf o hikaayat ke silsile vo kam-sukhan nahin thaa magar dekhne mein thaa taaib the ehtisaab se jab saare baada-kash mujh ko ye iftikhaar ki main mai-kade mein thaa"

"bujh gai sham-e-haram baab-e-kalisaa na khulaa khul gae zakhm ke lab teraa daricha na khulaa dar-e-tauba se bagulon ki tarah guzre log abr ki tarah umaD aae jo mai-khaana khulaa shahr-dar-shahr phiri meri gunaahon ki bayaaz baa'z nazron pe miraa soz-e-hakimaana khulaa naazninon mein rasaai kaa ye 'aalam thaa kabhi laakh pahron mein bhi darvaaze pe darvaaza khulaa ham pari-zaadon mein khele shab-e-afsun mein pale ham se bhi tere tilismaat kaa 'uqda na khulaa ek ik shakl ko dekhaa hai baDi hasrat se ajnabi kaun hai aur kaun shanaasaa na khulaa ret par pheink gai 'aql ki gustaakh-labi phir kabhi kashf-o-karaamaat kaa dariyaa na khulaa"

"siine mein khizaan aankhon mein barsaat rahi hai is ishq mein har fasl ki saughaat rahi hai kis tarah khud apne ko yaqin aae ki us se ham khaak-nashinon ki mulaaqaat rahi hai suufi kaa khudaa aur thaa shaaer kaa khudaa aur tum saath rahe ho to karaamaat rahi hai itnaa to samajh roz ke baDhte hue fitne ham kuchh nahin bole to tiri baat rahi hai ham mein to ye hairaani-o-shoridgi-e-ishq bachpan hi se minjumla-e-aadaat rahi hai is se bhi to kuchh rabt jhalaktaa hai ki vo aankh bas ham pe inaayaat mein mohtaat rahi hai ilzaam kise dein ki tire pyaar mein ham par jo kuchh bhi rahi hasb-e-rivaayaat rahi hai kuchh 'mir' ke haalaat se haasil karo ibrat le de ke ab ik izzat-e-saadaat rahi hai"

"jis din se apnaa tarz-e-faqiraana chhuT gayaa shaahi to mil gai dil-e-shaahaana chhuT gayaa koi to gham-gusaar thaa koi to dost thaa ab kis ke paas jaaein ki viraana chhuT gayaa duniyaa tamaam chhuT gai paimaane ke liye vo mai-kade mein aae to paimaana chhuT gayaa kyaa tez-paa the din ki tamaazat ke qaafile haathon se rishta-e-shab-e-afsaana chhuT gayaa ik din hisaab hogaa ki duniyaa ke vaaste kin saahibon kaa maslak-e-rindaana chhuT gayaa"

"ab ji hudud-e-sud-o-ziyaan se guzar gayaa achchhaa vahi rahaa jo javaani mein mar gayaa palkon pe aa ke ruk si gai thi har ek mauj kal ro liye to aankh se dariyaa utar gayaa tujh se to dil ke paas mulaaqaat ho gai main khud ko DhunDne ke liye dar-ba-dar gayaa shaam-e-vatan kuchh apne shahidon kaa zikr kar jin ke lahu se subh kaa chehra nikhar gayaa aakhir bahaar ko to jo karnaa thaa kar gai ilzaam-e-ehtiyaat girebaan ke sar gayaa zanjir maatami hai tum ai aaqilaan-e-shahr ab kis ko puchhte ho divaana to mar gayaa"

"kabhi jhiDki se kabhi pyaar se samjhaate rahe ham gai raat pe dil ko liye bahlaate rahe apne akhlaaq ki shohrat ne ajab din dikhlaae vo bhi aate rahe ahbaab bhi saath aate rahe ham ne to luT ke mohabbat ki rivaayat rakh li un se to pochhiye vo kis liye pachhtaate rahe us ke to naam se vaabasta hai kaliyon kaa gudaaz aansuo tum se to patthar bhi pighal jaate rahe yuun to naa-ahlon ke piine pe jigar kaTtaa thaa ham bhi paimaane ko paimaane se Takraate rahe un ki ye vaz-e-qadimaana bhi allaah allaah! pahle ehsaan kiyaa baad ko sharmaate rahe yuun kise milti hai maamul se fursat lekin ham to is lutf-e-gham-e-yaar se bhi jaate rahe"

"tire karam ne mujhe kar liyaa qubul magar mire junun se mohabbat kaa haq adaa na huaa tire ghamon ne mire har nashaat ko samjhaa miraa nashaat tire gham se aashnaa na huaa kahaan kahaan na mire paanv laDkhaDaae magar tiraa sabaat 'ajab thaa ki haadisa na huaa tire dukhon ne pukaaraa to main qarib na thaa mire ghamon ne sadaa di to faasla na huaa hazaar dashna-o-khanjar the mere lahje mein tiri zabaan pe kabhi harf-e-naa-ravaa na huaa hazaar sham'on kaa bantaa rahaa main parvaana kisi kaa ghar tire dil mein mire sivaa na huaa miri siyaahi-e-daaman ko dekhne par bhi tire safed dupaTTon kaa dil buraa na havaa"

"girya to aksar rahaa paiham rahaa phir bhi dil ke bojh se kuchh kam rahaa qumqume jalte rahe bujhte rahe raat-bhar siine mein ik aalam rahaa us vafaa-dushman se chhuT jaane ke baad khud ko paa lene kaa kitnaa gham rahaa apni haalat par hansi bhi aai thi is hansi kaa bhi baDaa maatam rahaa itne rabt itni shanaasaai ke baad kaun kis ke haal kaa mahram rahaa pattharon se bhi nikal aayaa jo tiir vo mire pahlu mein aa kar jam rahaa zehn ne kyaa kuchh na koshish ki magar dil ki gahraai mein ik aadam rahaa"

"buzurgo, naaseho, farmaan-ravaao hamein to mai-kade tak chhoD aao amiraana bhi is kuche mein aao lab-o-rukhsaar-o-mizhgaan ke gadaao ubharti jaa rahi hai shama ki lau baDi naadaan ho ThanDi havaao hazaaron raaz uryaan ho rahe hain giraao aankh par chilman giraao vo mujh se aur main un se khafaa huun nadimo aa ke donon ko manaao na jaane ham kahaan gum ho chuke hain jo mumkin ho to ham ko DhunD laao"

"logon ki malaamat bhi hai khud dard-sari bhi kis kaam ki ye apni vasia-un-nazari bhi kyaa jaaniye kyuun sust thi kal zehan ki raftaar mumkin hui taaron se miri ham-safari bhi raaton ko kali ban ke chaTaktaa thaa tiraa jism dhoke mein chali aai nasim-e-sahari bhi khud apne shab-o-roz guzar jaaeinge lekin shaamil hai mire gham mein tiri dar-ba-dari bhi furqat ke shab-o-roz mein kyaa kuchh nahin hotaa qudarat pe malaamat bhi duaa-e-sahari bhi ik fard ki ulfat to baDi kam-nazari hai hai kis mein magar ahliyat-e-kam-nazari bhi"

"baiThaa huun siyah-bakht o mukaddar isi ghar mein utraa thaa miraa maah-e-munavvar isi ghar mein ai saans ki khushbu lab-o-aariz ke pasine kholaa thaa mire dost ne bistar isi ghar mein chaTki thiin isi kunj mein us honT ki kaliyaan mahke the vo auqaat-e-mayassar isi ghar mein afsaana-dar-afsaana thi muDti hui siDhi ashaar-dar-ashaar thaa har dar isi ghar mein hoti thi harifaana bhi har baat pe ik baat rahti thi raqibaana bhi aksar isi ghar mein sharminda huaa thaa yahin pindaar-e-imaarat chamkaa thaa faqiron kaa muqaddar isi ghar mein vo jin ke dar-e-naaz pe jhuktaa thaa zamaana aate the baDi duur se chal kar isi ghar mein"

"kaf-e-momin se na darvaaza-e-dauraan se milaa rishta-e-dard usi dushman-e-imaan se milaa is kaa ronaa hai ki paimaan-shikani ke baa-vasf vo sitamgar usi peshaani-e-khandaan se milaa taalib-e-dast-e-havas aur kai daaman the ham se miltaa jo na yusuf ke garebaan se milaa koi baaqi nahin ab tark-e-taalluq ke liye vo bhi jaa kar saf-e-ahbaab-e-gurezaan se milaa kyaa kahein is ko jo mahfil mein shanaasaa bhi na thaa kabhi khalvat mein dar aayaa to dil-o-jaan se milaa main usi koh-sifat khuun ki ik buund huun jo reg-zaar-e-najaf o khaak-e-khuraasaan se milaa"

"nagar nagar mele ko gae kaun sunegaa teri pukaar ai dil ai divaane dil! divaaron se sar de maar ruuh ke is viraane mein teri yaad hi sab kuchh thi aaj to vo bhi yuun guzri jaise gharibon kaa tyauhaar us ke vaar pe shaayad aaj tujh ko yaad aae hon vo din ai naadaan khulus ki jab vo ghaafil thaa ham hushyaar pal pal sadiyaan biit gaiin jaane kis din badlegi ek tiri aahista-ravi ek zamaane ki raftaar pichhli fasl mein jitne bhi ahl-e-junun the kaam aae kaun sajaaegaa teri mashq kaa saamaan ab ki baar? subh ke nikle divaane ab kyaa lauT ke aaeinge Duub chalaa hai shahr mein din phail chalaa hai saaya-e-daar"

"koi rafiq baham hi na ho to kyaa kiije kabhi kabhi tiraa gham hi na ho to kyaa kiije hamaari raah judaa hai ki aisi raahon par rivaaj-e-naqsh-e-qadam hi na ho to kyaa kiije hamein bhi baada-gusaari se aar thi lekin sharaab zarf se kam hi na ho to kyaa kiije tabaah hone kaa armaan sahi mohabbat mein kisi ko khu-e-sitam hi na ho to kyaa kiije hamaare sher mein roTi kaa zikr bhi hogaa kisi kisi ke shikam hi na ho to kyaa kiije"

"''zabaan-e-ghair se kyaa sharh-e-aarzu karte'' vo khud agar kahin miltaa to guftugu karte vo zakhm jis ko kiyaa nok-e-aaftaab se chaak usi ko sozan-e-mahtaab se rafu karte savaad-e-dil mein lahu kaa suraagh bhi na milaa kise imaam banaate kahaan vazu karte vo ik tilism thaa qurbat mein us ke umr kaTi gale lagaa ke use us ki aarzu karte halaf uThaae hain majburiyon ne jis ke liye use bhi log kisi roz qibla-ru karte junun ke saath bhi rasmein khirad ke saath bhi qaid kise rafiq banaate kise adu karte hijaab uThaa diye khud hi nigaar-khaanon ne hamein dimaagh kahaan thaa ki aarzu karte"

"har taraf imbisaat hai ai dil aur tire ghar mein raat hai ai dil ishq in zaalimon ki duniyaa mein kitni mazlum zaat hai ai dil meri haalat kaa puchhnaa hi kyaa sab tiraa iltifaat hai ai dil aur bedaar chal ki ye duniyaa shaatiron ki bisaat hai ai dil sirf us ne nahin diyaa mujhe soz is mein teraa bhi haat hai ai dil mundamil ho na jaae zakhm-e-darun ye miri kaaenaat hai ai dil husn kaa ek vaar sah na sakaa Duub marne ki baat hai ai dil"