Ghazal

"aaj aavaaza-e-haq kis ko sunaai degaa sach to bas vo hai jo andhon ko dikhaai degaa daur-e-haazir mein kahaan kis ki ragon mein surkhi kaun haathon ko tire rang-e-hinaai degaa ghair hain sab miri mayyit ko uThaane vaale main ne sochaa thaa ki kaandhaa miraa bhaai degaa ab kahaan khuun ke rishton kaa bharam hai baaqi kaun is daur mein rishton ki duhaai degaa hai zamaane mein buraai kaa chalan kuchh aisaa har buraa shakhs har achchhe ko buraai degaa teri yaadein tiri baatein tiri ghazlein 'naasir' baa'd tere bhi tiraa zikr sunaai degaa"

"tanhaaiyon mein shor-e-qayaamat bapaa hai khair kis ki kami hai yaad nahin aa rahaa hai khair laazim hai ham ko dekhnaa jo kuchh falak dikhaae ik bevafaa ke honTon pe lafz-e-vafaa hai khair tujh se bichhaD ke ziist kaa imkaan hi nahin tu chhoD jaan-e-jaan ye miraa masala hai khair khun-e-jigar ne surkh kiyaa dast-e-naaz ko un ko ye lag rahaa hai ki rang-e-hinaa hai khair vo aaine ko dekhte hain aaina unhein ik aaine ke saamne ik aaina hai khair tujh ko to khuub khuub hai mere dukhon kaa 'ilm tu to miri hayaat mein shaamil rahaa hai khair 'naasir' kamaal-e-sher mein daavaa nahin magar jo kuchh thaa mere dil mein vo sab kah diyaa hai khair"

"kisi ke hijr mein shab bhar udaas rahnaa hai so mujh ko subh talak mahv-e-yaas rahnaa hai ye haal hai ki tiri diid ko tarastaa huun main sochtaa thaa mujhe tere paas rahnaa hai tumhaare laakh dilaase bhi raaegaan honge us ek shakhs ko taa-umr udaas rahnaa hai ye ziist tere sitam ki rahin hai jaanaan tire firaaq ko is ki asaas rahnaa hai so bazm-e-yaar mein jaa kar ghazal sunaaeinge nigaah-e-naaz mein ham ko to khaas rahnaa hai ye aur baat ki dariyaa se dosti hai miri likhaa huaa miri qismat mein pyaas rahnaa hai junun-e-ishq mein bejaa hai fikr-e-uryaani khayaal-e-yaar ko meraa libaas rahnaa hai"

"badli hui dildaar nazar dekh rahe hain dekhi nahin jaati hai magar dekh rahe hain kuchh logon ki nazron mein miri aabla-paai kuchh log miraa azm-e-safar dekh rahe hain hai saamne un ke mere honTon pe tabassum lekin vo miraa dida-e-tar dekh rahe hain yuun dekhte rahne mein basaarat hi ganvaa di par ab bhi tiri raahguzar dekh rahe hain ik main ki faqat un ki taraf dekh rahaa huun ik vo hain ki rab jaane kidhar dekh rahe hain pahle to mire haath qalam kar diye aur ab hairat se miraa kaar-e-hunar dekh rahe hain 'naasir' tire shaanon pe tire chaahne vaale ye bhi to ghanimat hai ki sar dekh rahe hain"

"ye soch rakhaa hai koi shikva nahin karungaa main apni ghairat mazid rusvaa nahin karungaa miri vafaaein tire ravayye pe munhasir hain vafaa karungaa magar ye vaada nahin karungaa nahin sunaaungaa ab gulaabon ko teraa qissa main titliyon se bhi teraa charchaa nahin karungaa vo ik masihaa jo saari basti kaa chaaraagar hai vo mujh se kahtaa hai tujh ko achchhaa nahin karungaa tum ab ke mujh ko jo raaste mein kahin miloge to dekh lenaa koi ishaara nahin karungaa baDi ummidon se main ne puchhaa vafaa karoge baDe tafaakhur se mujh se bolaa nahin karungaa kisi ke Dar se main jaan-e-'naasir' ko dost kah duun muaaf kijegaa hargiz aisaa nahin karungaa"

"khayaal-e-jaanaan utar rahaa hai dil-e-hazin par hai aasmaan kaa nuzul yaa'ni miri zamin par main laakh ruThun use manaane kaa Dhab pata hai bas ek bosa hasin labon kaa miri jabin par jahaan pe ham donon pichhli sardi mein mil chuke hain rakkhe hain ab bhi gulaab sukhe hue vahin par main us ki khaatir junun ki had se guzar gayaa huun khudaa ki bandi hai ab bhi qaaem nahin nahin par na jaane kitni hasin aankhein miri taraf hain magar ye aankhein Tiki hain us ek naaznin par hamaari ghazlon mein yuun to sab kuchh hi normal hai bas aansuon ke nishaan mileinge kahin kahin par na shohraton ki bulandiyon par gumaan karnaa palaT ke aanaa paDegaa ik din tumhein zamin par"

"zamin-e-dil pe tire nain naqsh ubhaareinge ki ghup andheron mein ham raushni utaareinge vo shakhs shisha-badan hai so ehtiyaatan ham use chhueinge nahin duur se nihaareinge ajiib hai na galaa baiThne ke baa'd aakhir ye tai kiyaa hai use ab nahin pukaareinge ham aansuon se tire pair dhoeinge aur phir charaagh-e-dil se tiri aarti utaareinge ise to qabr ki miTTi mein vasl honaa hai so ham badan ko nahin ruuh ko sanvaareinge main un ko khair ki jaanib bulaa rahaa huun magar ye shimr-zaade hain meraa hi sar utaareinge adaalaton mein jo raushan the munsifi ke charaagh kise khabar thi ki vo tirgi se haareinge"

"sahraa se na jangal ki kabhi khaak se uTThe ab ke vo bagule khas-o-khaashaak se uTThe barsegi vo aatish ki jhulas jaaeinge dariyaa ik abr agar dida-e-nam-naak se uTThe go tu ne har ik shakhs ko miTTi se banaayaa par sang ke paikar bhi tire chaak se uTThe hai jin ki bulandi pe khajil auj-e-surayyaa kuchh aise sitaare bhi miri khaak se uTThe ik habs-e-balaa-khez garaan thaa so bil-aakhir ham saada-sifat mahfil-e-chaalaak se uTThe tujh jism ko chhune kaa ye e'zaaz hai jaanaan khushbu tiri utri hui poshaak se uTThe thi jin se falak-bos pahaaDon ko giraani vo sadme bhi 'naasir' dil-e-ghamnaak se uTThe"

"ye alag baat ki rah rah ke sadaa aai hai main ne bhi ab ke na sunne ki qasam khaai hai ab vo ik naam pukaarun to zabaan chhil jaae haan vahi naam ki jo haasil-e-goyaai hai raat din yaar ki galiyon mein paDaa rahtaa huun ishq kaa ishq hai rusvaai ki rusvaai hai aisi tanhaai kaa aalam hai ki dil Duub gayaa aur is par ye ghazab hai teri yaad aai hai tum agar khuun bhi roo to bhalaa kyaa haasil ham na kahte the vo laDki baDi harjaai hai haae vo aankhein jo raushan hain tasavvur mein mire haae vo shakl jo ghazlon mein utar aai hai ab ye aalam hai ki ashaar mein khuun thuktaa huun aur vo kahte hain faqat qaafiya-paimaai hai ishq jaa niklaa thaa phir ku-e-malaamat ki taraf aql phir khinch ke divaane ko le aai hai haae vo aalam-e-sad-shauq use chuum liyaa teraa paighaam jo chupke se sabaa laai hai"

"mumkin jahaan nahin thi vahaan kaaT di gai kuchh din ki zindagi thi miyaan kaaT di gai muflis jo the vo pyaas ki shiddat se mar gae mahlon ki samt ju-e-ravaan kaaT di gai main ne buland ki thi sadaa ehtijaaj ki phir yuun huaa ki meri zabaan kaaT di gai teri zamin pe saans bhi lenaa muhaal thaa majbur ho ke ziist yahaan kaaT di gai meri sazaa-e-maut pe ik jashn thaa bapaa vo shor thaa ki meri fughaan kaaT di gai dast-e-hunar pe nok-e-sinaan par ghurur hai lekin jari jo nok-e-sinaan kaaT di gai pahle to baat baat pe Tokaa gayaa mujhe phir tang aa ke meri inaan kaaT di gai 'naasir' hai raah-e-shauq mein 'momin' kaa mo'taqid umr-e-ravaan dar ishq-e-butaan kaaT di gai"

"udaasi jaan le legi hamaari jaan le legi ye pankhaa jaan kaa dushman hai ye rassi jaan le legi o mere aasmaan vaale ye dharti jaan le legi khudaa ke vaaste bolo khamoshi jaan le legi main aadi huun asiri kaa rihaai jaan le legi"

"vo jo shaairi kaa sabab huaa miri zindagi kaa sabab huaa jise dekh dekh sukun milaa vahi be-kali kaa sabab huaa kabhi vajh thaa vo gumaan ki kabhi aagahi kaa sabab huaa shab-e-hijr teraa khayaal bhi baDi raushni kaa sabab huaa mire dil kaa TuTnaa phuTnaa teri dil-lagi kaa sabab huaa jise shaairi se shaghaf na thaa vahi shaairi kaa sabab huaa"

"sochaa thaa tum ne dirham-o-dinaar deinge log sar kaaT deinge phir tumhein dastaar deinge log iflaas-o-tang-dasti kaa eajaaz ye bhi hai maangoge gar qalam tumhein hathiyaar deinge log pahle-pahal to vasl ki lazzat milegi aur phir umr bhar ko hijr kaa aazaar deinge log mujrim rihaa hue hain to maasum qaid hain kis ko khabar thi aisi bhi sarkaar deinge log sach bolnaa hai jurm ye taslim hai magar ik jurm ki sazaa mujhe sau baar deinge log bolun agar main jhuuT to mar jaaegaa zamir kah duun agar main sach to mujhe maar deinge log main hi karungaa shahr ki miTTi ko surakh-ru mere hi khuun se chhaap ke akhbaar deinge log"

"gham ki tauqir baDhaa di ham ne apne hi dil ko sazaa di ham ne aakhirash raah ko takte takte ziist ki sham' bujhaa di ham ne saari duniyaa se chhupaayaa thaa jise tujh ko vo baat bataa di ham ne tu ne muD kar bhi na dekhaa ham ko tujh ko rah rah ke sadaa di ham ne tu bhi har baat bhulaa de jaanaan aa ki har baat bhulaa di ham ne zindagi jabr hai shaayad 'naasir' phir bhi ro-dho ke bitaa di ham ne"

"kaam ik ye tire aashiq ne baDaa khuub kiyaa khuun se likh ke ravaana tujhe maktub kiyaa ye bhi kyaa kam hai tiri bazm ke har saamea ne mere sheron ko tiri zaat se mansub kiyaa ik mire qatl pe vaavailaa munaasib to nahin shar-pasandon ne to iisaa ko bhi maslub kiyaa jism phulon saa thaa siine mein rakhaa thaa patthar hausla dekhiye main ne use mahbub kiyaa kitne divaanon ko farzaana kiyaa hai tu ne kitne farzaanon ko tujh ishq ne majzub kiyaa"

"banti bigaDti taqdiron se rishta hai mere khvaab kaa taabiron se rishta hai mere sar ko nisbat hai divaaron se aur pairon kaa zanjiron se rishta hai is raste par ghaas nahin aaegi ab is raste kaa rahgiron se rishta hai dil mein aks hai jaane kitne chehron kaa is album kaa tasviron se rishta hai hiir ke dil kaa rishta hai bas raanjhe se par raanjhe kaa kai hiron se rishta hai"

"shab-e-visaal jo pahnaa tire badan kaa libaas tamaam umr na bhaayaa kisi bhi tan kaa libaas ajiib sang taraashaa hai dast-e-qudrat ne tire badan pe qayaamat hai baankpan kaa libaas hamein hai shauq tiraa makhmalin badan pahnein khafaa hai ham se yuun nargis kaa nastaran kaa libaas main sher kahte hue bhi usi ko sochtaa huun basaa hai us ki hi khushbu mein fikr-o-fan kaa libaas main us ke jism ke har zaaviye ko bhaanp gayaa pahan ke aayaa thaa zaalim ajab chalan kaa libaas vo surkh-posh zaraa der ko chaman mein gayaa to ek lamhe mein phikaa paDaa chaman kaa libaas tiri hi zaat to mehvar hai shaairi kaa miri tire khayaal ko detaa huun main sukhan kaa libaas"

"meri balaa se saari duniyaa ujDe yaa aabaad rahe teri khushbu jis mein basi hai vo kamra aabaad rahe aashiq aur maashuq kaa rishta aur ziyaada pukhta ho tere zulm-o-jaur salaamat dil meraa aabaad rahe mere ghar ki divaaron par barbaadi kaa qabza hai teri gali ko jaane vaalaa har rasta aabaad rahe subh savere khvaab mein dekhaa mujh se koi ye kahtaa thaa ik tu hi barbaad rahe aur jag saaraa aabaad rahe ilm-o-hunar kaa markaz hai aur shahr hai 'jaun'-o-'naasir' kaa jab tak chaand sitaare chamkein amroha aabaad rahe"

"tumhaare jaane kaa gham manaaungaa dekh lenaa main hijr-e-sahraa mein khaak uDaaungaa dekh lenaa miraa ye daavaa hai muddaton tak main ban ke aansu tumhaari aankhon mein jhilmilaaungaa dekh lenaa vo saari ghazlein jo bas tumhaare liye likhi thiin vo ab main har shakhs ko sunaaungaa dekh lenaa ye tum jo mujh se zaraa si baaton pe ruThte ho main saari duniyaa se ruuTh jaaungaa dekh lenaa tumhaari sohbat mein itnaa khush huun ki hans rahaa huun tumhaari furqat mein khuun bahaaungaa dekh lenaa vo ik samundar udaasiyon kaa jo ruuh mein hai main us samundar mein Duub jaaungaa dekh lenaa tumhaari chaukhaT pe jaan de kar amar rahungaa tumhaari nabzon mein thartharaaungaa dekh lenaa vo khat tumhaare jo jaan se bhi aziz-tar hain main ek ik kar ke sab jalaaungaa dekh lenaa ik us kaa gham hi miraa muqaddar koi hai 'naasir' abhi to main kitne gham uThaaungaa dekh lenaa"

"husn-e-jaanaan ki qayaamat hai uThaae rakkhe shahr ke shahr ko divaana banaae rakkhe ek vo shakhs yahaan thaa to baDi raunaq thi kaun is shahr mein ab sham'ein jalaae rakkhe dil pareshaan thaa magar jaan tumhaari khaatir chehra shaadaab rakhaa baal banaae rakkhe hijr mein haal se behaal hue hain khud hi kis mein himmat hai ki kamre ko sajaae rakkhe dil-e-naadaan ko 'ajab kaam diyaa qudrat ne khaana-e-jaan mein sadaa shor machaae rakkhe vo jo ojhal hai nigaahon se magar dil mein hai gar vo chaahe to miri baat banaae rakkhe sheva-e-husn to inkaar hi Thahraa 'naasir' 'ishq ko chaahiye ummid lagaae rakkhe"

"tumhaare siine mein dil ke jaisaa jo ek patthar dhaDak rahaa hai vo ek patthar na jaane kitne dilon kaa markaz banaa huaa hai ye chaand se bhi hasin-tar hai jo chaand jaisaa chamak rahaa hai firaaq ki shab mein aasmaan par tumhaaraa chehraa Tangaa huaa hai dil-e-shikasta ke hauslon ne har ek manzil ko sar kiyaa hai tumhaare dar tak bhi aan pahunche par is se aage bhi raasta hai saDak pe baiThe hue qalandar ke sar paDe hain savaal kitne zamaana us se jo puchhtaa hai vo us ne mujh ko bataa diyaa hai tumhaari mahfil mein aane vaale unhi mohabbat ke dushmanon ne tumhaaraa meraa jo vaaqia thaa use fasaana banaa rakhaa hai khulus-e-yaaraan ki qadr lekin khulus-e-yaaraan kaa faaeda kyaa main in dilaason kaa kyaa karungaa ki dard meraa bahut baDaa hai tumhaari yaadon ke chaDhte dariyaa ko khushk-saali se kyaa taalluq tumhaari yaadon kaa chaDhtaa dariyaa har ek mausam mein bah rahaa hai"

"ik daricha zehn ke andar khulaa aaj ham par ramz-e-khair-o-shar khulaa shaikh par 'uqda sar-e-mahshar khulaa jab mire aa'maal kaa daftar khulaa bhuul kar hi koi aa nikle idhar raat bhar rahtaa hai aksar dar khulaa kis mein hai taab-e-nazaara dekh le paaon nange zulf bikhri sar khulaa 'ishq kaa iqraar barson mein huaa kitni mushkil se lab-e-dil-bar khulaa baat us ke dil ki main ne jaan li mujh se tanhaai mein vo aksar khulaa maslahat ne raaz ko rakkhaa hai raaz soch liije munh hamaaraa gar khulaa vo bhi 'naasir' subh tak jaagaa kiyaa ham bhi soe jab dar-e-khaavar khulaa"