Ghazal

"jo khvaab mere nahin the main un ko dekhtaa thaa isi liye aankh khul gai thi isi liye dil dukhaa huaa thaa udaasiyon se bhari hui iltijaa suni thi kisi nagar mein koi kisi ko pukaartaa thaa vo ik sadaa thi ki haft-aalam mein gunjti thi na-jaane kaise koi kisi se bichhaD gayaa thaa ajiib hairat bikherte the vo daastaan-go ki shab ne jaane se saaf inkaar kar diyaa thaa guzishtagaan ko bhi ye gila thaa sunaa hai main ne sunaa hai un ko bhi ism-e-aazam nahin milaa thaa fazaa sunahri thi rang phailaa thaa chaar jaanib ki chaand se vo zamin pe jaise utar rahaa thaa safar ke aakhir pe shamein raushan si ho gai thiin koi masarrat ki sab hadon se guzar gayaa thaa"

"vo dhuup vo galiyaan vahi uljhan nazar aae is shahr se us shahr kaa aangan nazar aae is gham ke ujaale mein jo ik shakhs khaDaa hai vo duur se mujh ko miraa saajan nazar aae ik hijr ke shoale mein kai baar jale ham is aas mein shaayad ki nayaa-pan nazar aae ye raat gae kaun hai is peD ke niche ik diip saa har shaakh pe raushan nazar aae vo baat kaho jis ko tarasti rahe duniyaa vo harf likho jis mein koi fan nazar aae"

"raah mein shahr-e-tarab yaad aayaa jo bhulaayaa thaa vo sab yaad aayaa jaane ab subh kaa aalam kyaa ho aaj vo aakhir-e-shab yaad aayaa ham pe guzraa hai vo lamha ik din kuchh nahin yaad thaa rab yaad aayaa jab nahin umr to vo phuul khilaa kab kaa bachhDaa huaa kab yaad aayaa raqs karne lagi taaron bhari shab tu bhi is raat ajab yaad aayaa kitnaa iqraar chhupaa thaa is mein tere inkaar kaa Dhab yaad aayaa hosh uDne lage 'naasir' ki tarah aaj vo yaar ghazab yaad aayaa"

"palkon par nam kyaa phail gayaa har samt dhuaan saa phail gayaa miri rekhaa-posh hatheli par ik shaam kaa saayaa phail gayaa jo harf chhupaayaa logon se vo chehra-ba-chehra phail gayaa tiraa naam liyaa to sahraa mein ik saaya utraa phail gayaa ab mere aur khudaa ke biich ik hijr kaa lamha phail gayaa jab nae safar par niklaa main raston par sadma phail gayaa shaamon ki surkhi simaT gai raaton kaa qissa phail gayaa main pyaas bujhaane pahunchaa to dariyaa mein sahraa phail gayaa is arz o samaa ki vusat mein dukh teraa meraa phail gayaa"

"asir-e-shaam hain Dhalte dikhaai dete hain ye log niind mein chalte dikhaai dete hain vo ik makaan ki us mein koi nahin rahtaa magar charaagh se jalte dikhaai dete hain ye kaisaa rang nazar aayaa us ki aankhon mein ki saare rang badalte dikhaai dete hain vo kaun log hain jo tishnagi ki shiddat se kanaar-e-aab pighalte dikhaai dete hain andheri raat mein bhi shahr ke darichon se hamein to chaand nikalte dikhaai dete hain"

"mire dhyaan mein hai ik mahal kahin chaubaaron kaa vahaan jaaun kaise rasta hai angaaron kaa vahaan hariyaali ke kunj mein ek baseraa hai vahaan dariyaa bahtaa rahtaa hai mahkaaron kaa tum dil kaa daricha khol ke baahar dekho to amboh guzarne vaalaa hai dil-daaron kaa miri khalvat ko ye insaanon kaa jangal hai miri vahshat ko ye sahraa hai divaaron kaa ik piile rang ki dhund jami hai chehron par koi aa ke dekhe haal tire bimaaron kaa ham qarya qarya mulkon mulkon phirte hain duniyaa mein koi des nahin banjaaron kaa khvaab ki daulat chain se sone vaalon ki taare ginnaa kaam hai ham bedaaron kaa"

"us jangal se jab guzroge to ek shivaala aaegaa vahaan ruk jaanaa vahaan rah jaanaa vahaan sukh kaa ujaalaa aaegaa ye soch ke uThnaa har din tum is dil kaa phuul khilegaa zarur is aas pe sonaa ab ki shab koi khvaab niraalaa aaegaa jab us ke haath nayaa maazi is safha-e-arz pe likkheinge jab sahar o shaam raqam honge tab meraa havaala aaegaa is be-andesha sahraa mein is unghne vaali ummat par kab jaagne vaalaa utregaa kab sochne vaalaa aaegaa phir ruhein zakhmi zakhmi hain phir koDh se dukhne aae badan yuun lagtaa hai ki shafaaat ko phir koi gvaalaa aaegaa ai raah-e-sukhan ke raah-ravo dil-shaad raho is raah mein bhi khushbu ki savaari Thahregi rangon kaa piyaala aaegaa"

"ye mahr o mah be-charaagh aaise ki raakh ban kar bikhar rahe hain ham apni jaan kaa diyaa bujhaae kisi gali se guzar rahe hain ye dukh jo matlub kaa milaa hai fishaar apni hi zaat kaa hai ki ham khud apni talaash mein hain aur apne sadmon se mar rahe hain vajud kyuun hai shuhud kyuun hai sabaat kyaa hai najaat kyaa hai inhi savaalon ki aag le kar ham apnaa isbaat kar rahe hain ai vaqt ke be-qayaas dhaare kidhar hain vo ham-nasab hamaare jo ek zinda khabar ki khaatir khud aap se be-khabar rahe hain aziyyaton kaa nuzul mauquf khaak uDaane hi par nahin hai azaab un ko bhi to mile hain jo log apne hi ghar rahe hain nazar mein itni shabaahatein hain ki us ki pahchaan kho gai hai samaaaton mein hai shor itnaa ki har sadaa se mukar rahe hain hamaare andar kaa khauf 'saabir' shikast dene lagaa hai ham ko lahu ki rut ab guzar gai hai dilon mein sahraa utar rahe hain"

"vo phuul thaa jaadu-nagri mein jis phuul ki khushbu bhaai thi use laanaa jaan ganvaanaa thaa aur apni jaan paraai thi vo raat kaa tul-tavil safar kyaa kahiye kaise aai sahar kuchh main ne qissa chheDaa thaa kuchh us ne aas bandhaai thi khvaabon se udhar ki masaafat mein jo guzri hai kyaa puchhte ho ik vahshat chaar-pahar ki thi ik jalti hui tanhaai thi vo raat ki jis ke kinaaron par ham milte aur bichhaDte the ik baar mujhe tanhaa paa kar us ki bhi aankh bhar aai thi har shaam ufuq ki duuri par koi sahmaa sahmaa phirtaa thaa tasvir jo us ki banaai to khud apni shakl banaai thi"

"dekho aisaa ajab musaafir phir kab lauT ke aataa hai dariyaa us ko rasta de kar aaj talak pachhtaataa hai jangal jangal ghumne vaalaa apne dhyaan ki dastak se koson duur ik ghar mein kisi ko saari raat jagaataa hai jaane kis ki aas lagi hai jaane kis ko aanaa hai koi rail ki siiTi sun kar sote se uTh jaataa hai meri gali ke saamne vaale ghar ki andheri khiDki mein us laDki se baatein kar ke koi mujhe dohraataa hai kaisaa jhuTaa sahaaraa hai ye dukh se aankh churaane kaa koi kisi kaa haal sunaa kar apnaa-aap chhupaataa hai kachchi munDeron vaale ghar mein shaam ke Dhalte hi har roz apne dupaTTe ke pallu se koi charaagh jalaataa hai"

"logo ye ajiib saaneha hai mujh mein koi qatl ho rahaa hai kis ki hai talaash kyaa bataaein apnaa hi vajud kho gayaa hai soeinge azal mein jaa ke ham sab duniyaa to aziim rat-jagaa hai sach ko hai davaam is jahaan mein mujh se to yahi kahaa gayaa hai marnaa hai yahaan bahut ghanimat jiinaa to muhaal ho chukaa hai degaa vo zarur sang mujh ko jis ne tujhe aaina kiyaa hai aai hai tavil hijr ki shab ye dil sar-e-shaam jal gayaa hai"

"ye umr bhar kaa safar hai isi sahaare par ki vo khaDaa hai abhi dusre kinaare par andheraa hijr ki vahshat kaa raqs kartaa hai tamaam raat miri aankh ke sitaare par havaa-e-shaam tire saath ham bhi jhumte hain kisi khayaal kisi rang ke ishaare par kisi ki yaad sataae to jaa ke rakh aanaa mahakte phuul kisi aabju ke dhaare par ufuq ke paar azal se ik aag raushan hai ye saaraa khel hai us aag ke sharaare par"