hijr ke gham ne mujhe maar diyaa thaa to kyaa — Amit Sharma Meet

hijr ke baa'd ye socho ki kahaan jaaoge
ham to mar jaaeinge vaise bhi hamaaraa kyaa hai

ik taraf pyaar hai rishta hai vafaadaari hai
aur in sab mein hi us gham ki taraf-daari hai

ghalat-fahmiyaan 'mit' rakkho na dil mein
vahi sach nahin jitnaa tum ne sunaa hai

lagaayaa hai dil bhi to patthar se main ne
miri zindagi ki yahi ik khataa hai

khvaab mein us se roz milaa kartaa thaa 'mit'
lekin sach mein nahin milaa so zinda huun

kai din se sharaarat hi nahin ki
mire andar kaa bachcha laapata hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

mire mah o saal ki kahaani ki dusri qist is tarah hai
junun ne rusvaaiyaan likhi thiin khirad ne tanhaaiyaan likhi hain

baDi mushkil se aa ke baiThaa huun
dard uThte hain mat uThaaein mujhe

ham ne avval to kabhi us ko pukaaraa hi nahin
aur pukaaraa to pukaaraa bhi sadaaon ke baghair