ik tabassum se ashk-baari tak — Armaan Jodhpuri

aankhon ne aansuon kaa tabarruk luTaa diyaa
dil ke mazaar par tiri yaadon kaa ‘urs hai

saari duniyaa tiri honTon ki hansi mein gum hai
kaun dekhegaa miri aankh ke paani ki taraf

pahle pahle khuub mohabbat ki ham ne
phir ham donon ne ye rasta chhoD diyaa

kyon zulm karti hai duniyaa ham ishq vaalon par
ham ishq karte hain koi khataa nahin karte

vo jis se maut nikaalegi ek din aa kar
tumhein khabar hai usi zindagi ki qaid mein huun

laDkiyaan hain bas utni hi aazaad
machhliyaan jitni martabaanon mein

jab ki pahlu se yaar uThtaa hai
dard be-ikhtiyaar uThtaa hai

yak qadam raah-e-dost hai 'daaud'
lekin afsos paa-e-bakht hai lang

urdu mein baat kijiye urdu mein boliye
haq hai zabaan kaa pyaar kaa ras is mein gholiye

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun

ai adam ke musaafiro hoshiyaar
raah mein zindagi khaDi hogi

tamaam vahm o gumaan hai to ham bhi dhoka hain
isi khayaal se duniyaa ko main ne pyaar kiyaa