miTTi ko chuum lene ki hasrat hi rah gai — Arshad Abdul Hamid

kuchh sitaare miri palkon pe chamakte hain abhi
kuchh sitaare mire siine mein samaae hue hain

sar-bulandi miri tanhaai tak aa pahunchi hai
main vahaan huun ki jahaan koi nahin mere sivaa

sukhan ke chaak mein pinhaan tumhaari chaahat hai
vagarna kuza-gari ki kise zarurat hai

ye kis ko yaad kiyaa ruuh ki zarurat ne
ye kis ke naam se mere lahu mein phuul khile

unhein ye zom ki be-sud hai sadaa-e-sukhan
hamein ye zid ki isi haao-hu mein phuul khile

ye intizaar nahin shama hai rifaaqat ki
is intizaar se tanhaai khub-surat hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

tujh ko hai ham se judaai aarzu
mere dil mein shauq hai didaar kaa

hamaari hi tamannaa kyuun karo tum
tumhaari hi tamannaa kyuun karein ham

sainkaDon dilkash bahaarein thiin hamaari muntazir
ham tiri khvaahish mein lekin Thokarein khaate rahe

Dubtaa huun to mujhe haath kai milte hain
kitni hasrat se kinaaron ki taraf dekhtaa huun

yahi Thahri jo shart-e-vasl-e-lailaa
to istifaa miraa baa-hasrat-o-yaas