aankh jhapki thi bas ik lamhe ko aur is ke baad — Iftikhar Mughal

gher leti hai koi zulf, koi bu-e-badan
jaan kar koi giraftaar nahin hotaa yaar

mohabbat aur ibaadat mein farq to hai naan
so chhin li hai tiri dosti mohabbat ne

khudaa! sila de duaa kaa, mohabbaton ke khudaa
khudaa! kisi ne kisi ke liye duaa ki thi

main tum ko khud se judaa kar ke kis tarah dekhun
ki main bhi ''tum'' huun, koi dusraa nahin huun main

kai dinon se mire saath saath chalti hai
koi udaas si ThanDi si koi parchhaain

ham ne us chehre ko baandhaa nahin mahtaab-misaal
ham ne mahtaab ko us rukh ke mumaasil baandhaa

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

ai shahr-e-sitam-zaad tiri umr baDi ho
kuchh aur bataa naql-e-makaani ke alaava

umr bhar tujh ko dekhne par bhi
zauq-e-nazzaara kam nahin hotaa

bahut aziiz thi ye zindagi magar ham log
kabhi kabhi to kisi aarzu mein mar bhi gae