zindagi se baDi sazaa hi nahin — Krishn Bihari Noor

main to ghazal sunaa ke akelaa khaDaa rahaa
sab apne apne chaahne vaalon mein kho gae

aaina ye to bataataa hai ki main kyaa huun magar
aaina is pe hai khaamosh ki kyaa hai mujh mein

yahi milne kaa samay bhi hai bichhaDne kaa bhi
mujh ko lagtaa hai bahut apne se Dar shaam ke baad

kaisi ajiib shart hai didaar ke liye
aankhein jo band hon to vo jalva dikhaai de

chaahe sone ke frame mein jaD do
aaina jhuuT boltaa hi nahin

main jis ke haath mein ik phuul de ke aayaa thaa
usi ke haath kaa patthar miri talaash mein hai

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

ai shahr-e-sitam-zaad tiri umr baDi ho
kuchh aur bataa naql-e-makaani ke alaava

umr bhar tujh ko dekhne par bhi
zauq-e-nazzaara kam nahin hotaa

bahut aziiz thi ye zindagi magar ham log
kabhi kabhi to kisi aarzu mein mar bhi gae