zindagi mahv-e-khud-aaraai thi — Ravish Siddiqi

jo raah ahl-e-khirad ke liye hai laa-mahdud
junun-e-ishq mein vo chand gaam hoti hai

koh sangin haqaaeq thaa jahaan
husn kaa khvaab taraashaa ham ne

hazaar husn dil-aaraa-e-do-jahaan hotaa
nasib ishq na hotaa to raaegaan hotaa

hazaar rukh tire milne ke hain na milne mein
kise firaaq kahun aur kise visaal kahun

vo shakhs apni jagah hai muraqqa-e-tahzib
ye aur baat hai ki qaatil usi kaa naam bhi hai

naqaab-e-shab mein chhup kar kis ki yaad aai samajhte hain
ishaare ham tire ai sham-e-tanhaai samajhte hain

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

ik umr ho gai hai use chaahte hue
ik umr se ye baar-e-garaan Dho rahe hain ham

zindagi kitni hasin kitni baDi neamat hai
aah main huun ki use paa ke bhi sharminda huun

main aisi raah pe niklaa ki meri khush-bakhti
tamaam umr miri khoj mein bhaTakti rahi