zulm to be-zabaan hai lekin — Sheen Kaaf Nizam

vahshat to sang-o-khisht ki tartib le gai
ab fikr ye hai dasht ki vusat bhi le na jaae

nikle kabhi na ghar se magar is ke baavajud
apni tamaam umr safar mein guzar gai

darvaaza koi ghar se nikalne ke liye de
be-khauf koi raasta chalne ke liye de

chubhan ye piiTh mein kaisi hai muD ke dekh to le
kahin koi tujhe pichhe se dekhtaa hogaa

gali ke moD se ghar tak andheraa kyuun hai 'nizaam'
charaagh yaad kaa us ne bujhaa diyaa hogaa

udaasi akele mein Dar jaaegi
ghaDi-do-ghaDi ko khushi bhej de

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

aae kuchh abr kuchh sharaab aae
is ke baa'd aae jo azaab aae

vo the javaab ke saahil pe muntazir lekin
samay ki naav mein meraa savaal Duub gayaa

asar na puchhiye saaqi ki mast aankhon kaa
ye dekhiye ki koi hoshyaar baaqi hai

aankhon ke gulaabi Doron mein ik kaif saa paayaa jaataa hai
mai-khvaar-e-mohabbat hosh mein aa saaqi ki nazar hai jaam nahin