daftar-e-husn khole baiThe hain — Tauheed Zeb

dhokaa khaane pe ro paDaa hogaa
ye koi 'ishq mein nayaa hogaa

apni tasvir chuum li us ne
phuul par phuul khil gayaa jaise

ek hi din milaa mohabbat ko
saal bhar ki thakan utaari gai

kyaa huaa husn-e-jaavedaan ko tire
tu to mujh se bichhaD ke khush thi bahut

rumuz-e-vaqt ki pahli class mein bhi miraa
tamaam dhyaan thaa sarkaari naukri ki taraf

'umr guzri magar mohabbat mein
ek lamha bhi yaadgaar nahin

husn jalva dikhaa gayaa apnaa
ishq baiThaa rahaa udaas kahin

'ishq mein intihaa ki had na hui
'aashiqi teri mustanad na hui

niind ke ghar mein hain khvaab aane lage
'ishq hai naachtaa aankh ke sahn mein

ishq ki choT kaa kuchh dil pe asar ho to sahi
dard kam ho yaa ziyaada ho magar ho to sahi

biich dariyaa mein utar kar dekhiye
'ishq-dariyaa mein kinaare kuchh nahin

naqsh-e-qadam hain raah mein farhaad-o-qais ke
ai ishq khinch kar mujhe laayaa idhar kahaan