kyaa huaa husn-e-jaavedaan ko tire — Tauheed Zeb

dhokaa khaane pe ro paDaa hogaa
ye koi 'ishq mein nayaa hogaa

apni tasvir chuum li us ne
phuul par phuul khil gayaa jaise

ek hi din milaa mohabbat ko
saal bhar ki thakan utaari gai

daftar-e-husn khole baiThe hain
'aashiqi rozgaar hai un kaa

rumuz-e-vaqt ki pahli class mein bhi miraa
tamaam dhyaan thaa sarkaari naukri ki taraf

'umr guzri magar mohabbat mein
ek lamha bhi yaadgaar nahin

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

aisi khushiyaan to kitaabon mein mileingi shaayad
khatm ab ghar kaa tasavvur hai makaan baaqi hai

tu kahaan rahti hai puchhaa thaa kisi ne ek din
main ghamon ke saath rahti huun khushi kahne lagi

ye do-dili mein rahaa ghar na ghaaT kaa 'anjum'
buton ko kar na sakaa khush khudaa ko paa na sakaa

rang ho raushni ho yaa khushbu
sab mein partav usi hasin ke hain