samundaron ko bahut hasraton se takte ho — Wasim Nadir

hami akele nahin zindagi se haare hue
bahut se log khaDe hain badan utaare hue

mohabbat bojh ban kar hi bhale rahti ho kaandhon par
magar ye bojh haTtaa hai to kandhe Tuut jaate hain

sab log jo hairat se tujhe dekh rahe hain
sar teraa bahut chhoTaa hai dastaar baDi hai

mohabbaton ko kahin se madad nahin milti
ye jang aisi hai jis mein rasad nahin milti

tire baghair bhi kahti hai mujh se jiine ko
ye zindagi bhi sahi mashvara nahin deti

ehsaan kar rahaa hai tiraa hijr in dinon
main in dinon khudaa ke ziyaada qarib huun

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

ye khud-e-farebi-e-ehsaas-e-aarzu to nahin
tiri talaash kahin apni justuju to nahin

guzar gai hai magar roz yaad aati hai
vo ek shaam jise bhulne ki hasrat hai

hansi mein Taal de phir se hamaari har khvaahish
phir ek baar thapak de hamaaraa gaal zaraa

kaisi taabir ki hasrat ki 'ziyaa' barson se
naa-muraad aankhon ne dekhaa hi nahin khvaab koi