rukhsat hui javaani naqsha badal rahaa hai — Bartar Madrasi

"hoti hai hasinon se jo jafaa 'ushshaaq gavaaraa karte hain ye shauq se qurbaan hote hain vo naaz se maaraa karte hain haathon mein nahin shamshir magar ye qatl-e-‘aalam kaisaa hai jaati hain hazaaron ki jaanein vo khud ko sanvaaraa karte hain sikhaa hai gulistaan mein ham ne kaanTon se sabaq khuddaari kaa phulon ki tarah shabnam ke liye daaman na pasaaraa karte hain daaraai mubaarak ho tum ko ham mast hain apni gudDi mein qatre pe qanaa'at karte hain dariyaa se kinaaraa karte hain jab un se ye puchhaa jaataa hai vahshat hai kise is mahfil mein vo ek adaa se meri taraf aankhon se ishaaraa karte hain is mein bhi khudaa ki hikmat hai duniyaa mein nahin jo ham-rangi kuchh log ba-sehhat jiite hain kuchh dukh mein guzaaraa karte hain daulat thi lagaav rakhte the hai tark-e-ta'alluq ghurbat mein jab dil mein biThaate the vo hamein ab dil se utaaraa karte hain ik daur vo thaa sab mil-jul kar dukh-dard baTaayaa karte the ik daur ye hai ham aapas mein parkhaash gavaaraa karte hain din-raat taDaptaa rahtaa huun hai meri khabar un ko 'bartar' karne ko vo parda karte hain chhup-chhup ke nazaaraa karte hain"

"khair guzri tiri nazar na hui meri duniyaa tah-o-zabar na hui raah takte tamaam 'umr kaTi shaam-e-gham ki abhi sahar na hui mujh ko taDpaa ke khud taDapte ho bekali meri be-asar na hui hanste hanste hi pi liye main ne aankh ashk-e-alam se tar na hui kaise saamaan-e-'aish jam' kiye maut sar par thi ye khabar na hui laakh chaahaa ki zarb-e-gham se bachun koi tadbir kaargar na hui mausam-e-gul to baarhaa aayaa shaakh-e-dil meri baarvar na hui khauf thaa qabr kaa qayaamat kaa dil ko taskin 'umr-bhar na hui lag gai 'umr-e-khizr kyaa us ko kyon shab-e-hijr mukhtasar na hui vo maze kyaa hain jo idhar na uDe vo khalish kyaa hai jo udhar na hui is qarine se de diyaa tu ne lene vaale ko kuchh khabar na hui hai khataa dil ko Thes pahunchaani ye khataa mujh se bhuul kar na hui main ne dekhe 'uyub auron ke haal-e-khud par miri nazar na hui aazmaaish qadam qadam par thi 'ishq ki raah be-khatar na hui khuub the she'r to sataaish ki mujh se naa-qadri-e-hunar na hui kyaa gae saath aaftaab gayaa vo na aae abhi sahar na hui jis tarah kaaTni thi ai 'bartar' us tarah zindagi basar na hui"

"makaan hai kisi kaa sukunat kisi ki miraa dil hai aur hai mohabbat kisi ki jo vaaqif nahin khud haqiqat se apni vo kyaa khaak jaane haqiqat kisi ki yahaan ek muhtaaj hai dusre kaa yahaan hai kisi ko zarurat kisi ki idhar ham pe zulm-o-sitam TuTte hain udhar hai kisi par 'inaayat kisi ki jo honi hai vo ho ke rahti hai ik din chali hai kahaan pesh-e-qismat kisi ki sabab kyaa hai vo mehr se dekhte hain samajhtaa huun aai hai shaamat kisi ki bure se buraa hai vo meri nazar mein jo insaan kartaa hai ghibat kisi ki khudaa ne hamein di hai aisi tabi'at ki dekhi na jaati hai aafat kisi ki zabaan apni qaabu mein rakkhi na jaae to jaati hai 'izzat ki 'izzat kisi ki hazaaron mein do ek aise bhi honge kisi ki si hogi shabaahat kisi ki na jab tak ho qaul-o-'amal mein tataabuq karegi asar kyaa nasihat kisi ki karo justuju apni manzil milegi na bekaar jaati hai mehnat kisi ki yahi hoti aai hai bazm-e-jahaan mein hai aamad kisi ki to rukhsat kisi ki nahin imtiyaaz-e-bad-o-nek mushkil Tapakti hai surat se sirat kisi ki na tan hai hamaaraa na jaan hai hamaari ye sab kuchh hai 'bartar' amaanat kisi ki"

"ik umr se dil mein hai nihaan chaah kisi ki vo dekhte baiThe hain abhi raah kisi ki auron ko sataane se tire haath uThaa le Dar hai ki na lag jaae tujhe aah kisi ki rakkhaa na karo daulat-e-duniyaa pe bharosa ye gaah tumhaari hai to hai gaah kisi ki girdaab-e-havaadis se ubharnaa nahin mushkil le Dubti hai himmat-e-kotaah kisi ki hai qahr-e-ilaahi kaa sabab kibr kisi kaa hai vajh-e-tabaahi havas-e-jaah kisi ki ai maah-e-munavvar rukh-e-raushan hai kisi kaa ai kaahkashaan tu hai guzargaah kisi ki maangaa hai saliqe se bhi 'bartar' kabhi tum ne kahte ho ki suntaa nahin allaah kisi ki"

"is mohabbat mein kuchh mazaa bhi nahin jis mein ranjish nahin balaa bhi nahin chal diye kyaa jahaan se ahl-e-vafaa aaj un kaa kahin pataa bhi nahin aisaa insaan bhi ghanimat hai jo bhalaa bhi nahin buraa bhi nahin mujh se mil kar vo chal diye chup-chaap kuchh kahaa bhi nahin sunaa bhi nahin ai gulo muskuraae jaate ho tum ko khauf-e-khizaan zaraa bhi nahin jis ne duniyaa mein dauD-dhup na ki us ko duniyaa se kuchh milaa bhi nahin apni apni lagi hai sab ko yahaan ek ko ek puchhtaa bhi nahin"

"kaTne ko 'umr kaT gai puchho na kyaa milaa apni khabar na mujh ko na apnaa pataa milaa gandum ki fasl ho nahin sakti javaar se mujh ko bure 'amal kaa natija buraa milaa sho'la ho yaa hubaab ho yaa ho gul-e-chaman koi na is jahaan mein hamein der-paa milaa ik ham hain jin ko zindagi-e-mukhtasar mili ik khizr-e-paak hain jinhein aab-e-baqaa milaa achchhaa samajh rahaa huun har ik aadmi ko main haalaanki jo milaa vo bure se buraa milaa gham mein giraa na aankh se ashkon ki qadr kar miTTi mein tu na aise dur-e-be-bahaa milaa mujh par khulaa jo man-‘arafa-nafsahu paDhaa pahchaanaa jis ne aap ko us ko khudaa milaa tauba hui qubul ba-vaqt-e-akhir bhi baab-e-karam khudaa kaa hamesha khulaa milaa jis ko vafaa kaa paas ho jis mein khulus ho aisaa na koi aadmi is daur kaa milaa de saaghar-e-tahi bhi to kuchh gham nahin mujhe aankhein uThaa nazar se nazar saaqiyaa milaa ab aarzu rahi na kisi aur chiiz ki sad-shukr hai ki mujh ko dar-e-mustafaa milaa kyaa kyaa milaa na baab-e-rasul-e-karim se 'izzat mili farogh milaa mudda'aa milaa khaaqaan-e-chin-o-qaisar-o-kisraa ki kyaa bisaat in se sivaa rasul ke dar kaa gadaa milaa rif’at mein martabe mein buzurgi mein yaa-nabi baa’d-e-khudaa na ham ko koi aap saa milaa mahshar mein aaftaab ki hiddat se bach gayaa daamaan-e-mustafaa kaa mujhe aasraa milaa duniyaa mein apni apni paDi hai har ek ko 'bartar' na koi banda-e-be-mudda’aa milaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"jab tak mizaaj-e-dost mein kuchh barhami rahi goyaa bujhi bujhi si miri zindagi rahi jis par nigaah-e-lutf-e-karam aap ki rahi hairat se har nigaah use dekhti rahi go main rahaa kashaakash-e-dauraan se ham-kanaar lekin mire labon pe hansi khelti rahi laayaa hai ishq ne mujhe aise maqaam par khud-aagahi rahi na khudaa-aagahi rahi josh-e-junun ne manzil-e-maqsud paa liyaa aql-e-salim dekhti hi dekhti rahi sab kuchh mujhe 'khayaal' ki duniyaa mein mil gayaa lekin tumhaare husn-e-nazar ki kami rahi"

"aaina toD de rihaa kar de bevafaa ik yahi vafaa kar de rishta-e-dard toD de dil se rang ko phuul se judaa kar de zindagi-bhar tujhi ko chaahaa hai qarz kuchh to miraa adaa kar de de rahaa hai zakaat-e-husn agar mire haq se zaraa baDhaa kar de muddatein ho gaiin tujhe dekhe ab to milne kaa silsila kar de phir koi gul khile sar-e-mizhgaan phir dar-e-khvaab koi vaa kar de ik sitaare ko bakhsh kar mire khvaab phir use meraa aaina kar de baiThtaa jaa rahaa hai jaan kaa ghubaar ab use mujh se maavaraa kar de ai faqir-e-dayaar-e-laili-jaan mire haq mein bhi kuchh duaa kar de"