Ghazal

"khabar kuchh nahin mujh ko miraa anjaam kyaa hogaa vahi hogaa jo haathon ki lakiron mein likhaa hogaa tamaashaa jo dikhaanaa thaa vahi sab ko dikhaa aae nahin is se gharaz koi kisi ne kyaa kahaa hogaa ik aisaa vaqt bhi aaegaa is daur-e-ta'alluq mein hamaare aur us ke darmiyaan ik faasla hogaa abhi se dhuup ki shiddat se khaaif hain jahaan vaale savaa-neze pe jis din aa gayaa suraj to kyaa hogaa suno ab harf-giri kaa nahin hai faaeda kuchh bhi ki jo tum ne kahaa hogaa vahi ham ne sunaa hogaa"

"kaise ruk saktaa thaa jo kaar-e-ziyaan hone ko thaa yaani sab kuchh tai-shuda thaa jo yahaan hone ko thaa kuchh badan ke the taqaaze kuchh sharaarat dil ki thi aaj lekin ishq apnaa jaavedaan hone ko thaa haan vahi jo shakhs mujh se bughz rakhtaa hai bahut raat meri zaat par vo meherbaan hone ko thaa main ne hi alfaaz mein us ko muqayyad kar liyaa varna vo lamha to kal hi raaegaan hone ko thaa main ne kal ishkaal saare khatm us ke kar diye varna meri zaat se vo bad-gumaan hone ko thaa"

"dosto zindagi amaanat hai saans lenaa bhi ik ibaadat hai vo kahaan hain hamein nahin maalum jin ko insaan se mohabbat hai saaf kahne mein sharm kaisi hai aap ko ham se kyaa shikaayat hai subh taa shaam ek hangaama milne julne ki kis ko fursat hai haal ahvaal kyaa bataaein ham koi taklif hai na raahat hai"

"zindagi tujh se pyaar kyaa karte khvaab kaa e'tibaar kyaa karte tujh ko fursat nahin thi milne ki ham tiraa intizaar kyaa karte jo bhi apne the saath chhoD gae ghair kaa e'tibaar kyaa karte kis ko chaahat thi chaara-saazi ki zakhm apne shumaar kyaa karte raaz koi nahin thaa siine mein tujh pe ham aashkaar kyaa karte"

"kisi ke chhuT jaane kaa use kyon gham nahin hotaa tiraa dil hai ki patthar hai kabhi jo nam nahin hotaa parinde gungunaate hain tumhaare shahr mein lekin hamaare shahr kaa aisaa kabhi mausam nahin hotaa ba-zaahir jugnuon ki raushni se ghar to raushan hai magar phir bhi mire ghar kaa andheraa kam nahin hotaa khudaa se gar tujhe maangaa nahin hotaa du'aaon mein tujhe khone kaa phir ham ko zaraa bhi gham nahin hotaa nigaahon ne hamaari ek manzar vo bhi dekhaa hai jahaan apnon ke marne kaa koi maatam nahin hotaa"

"haqiqat mein mare hain kuchh kahaani mein mare hain magar sab khvaab ulfat ke javaani mein mare hain parinde sab nahin zindaan mein maare gae hain qafas mein kuchh to kuchh naql-e-makaani mein mare hain mili hai maut kuchh khaamosh rahne ke sabab bhi magar kuchh log to shoala-bayaani mein mare hain jahaan kuchh log meri bad-zabaani se pareshaan vahin kuchh log meri be-zabaani mein mare hain hamaari tum faqat aatish-bayaani se khafaa ho magar ham to tumhaari bad-gumaani mein mare hain"

"shanaasaa jis ko samjhe the vahi naa-aashnaa niklaa vo kaisaa yaar thaa jo yaar ban kar bevafaa niklaa bhaTaktaa chhoD aae the jise ham duur sahraa mein hazaaron qaafilon ke darmiyaan vo qaafila niklaa ulaT kar jab bhi dekhi hai kitaab-e-zindagi ham ne to har ik lafz ke pichhe koi ik haadisa niklaa bahut kuchh naaz thaa ham ko magar ab kyaa kahein yaaro hujum-e-dostaan mein vo akelaa bevafaa niklaa ki apne dukh-bhare naghme tumhein kaise sunaa paate hamaare haath jo bhi saaz aaya be-sadaa niklaa"

"nazar ki vusaton mein kul jahaan thaa zamin se duur kitnaa aasmaan thaa miri kashti bhanvar mein Duub jaati havaa ki mad pe lekin baadbaan thaa main us ki harf-giri kar naa paayaa vo meri zindagi kaa raazdaan thaa tujhe paa kar tujhe khoyaa hai ham ne yahi to zindagi kaa imtihaan thaa vahi gum ho gayaa raste mein shaayad jo rahbar thaa jo mir-e-kaarvaan thaa"

"is qadar mashghul the ik ru-e-taabaan ki taraf ham ne dekhaa hi nahin is chaak-e-daamaan ki taraf jab muqaddar mein andheraa likh diyaa tu ne khudaa kaun dekhegaa bataa sham-e-farozaan ki taraf ham bhi teri hi mohabbat mein yahaan tak aae hain aur teri sab tavajjoh ek mehmaan ki taraf phir huaa yuun ham ne us se pher li nazrein tamaam kab talak ham dekhte us aafat-e-jaan ki taraf un ki har ik baat kaa aisaa asar mujh par huaa ruk gaiin nazrein miri shahr-e-nigaaraan ki taraf"

"ravayya kaafi kuchh badlaa huaa hai aasmaanon kaa magar naqsha vahi hai ab ke bhi khaali makaanon kaa vahi ik qissa ab tak dhyaan mein raushan nahin hotaa tasalsul jis se vaabasta hai pichhli daastaanon kaa udhar se bhi kisi aavaaz ki aamad nahin mumkin idhar bhi zaaviya badlaa huaa hai apne kaanon kaa bahut khush-rang thi parvaaz un khaamosh baanhon ki jahaan bhi hausla darkaar thaa unchi uDaanon kaa"

"hukumat ko giraa kar hukmraani karne vaale the yahaan kuchh log sab kuchh zaafraani karne vaale the ki baarish ne yaqinan rok di hijrat parindon ki vagarna sab ke sab naql-e-makaani karne vaale the ishaaron ki zabaan shaayad samajh un ko nahin aati ki jin se guftugu ham be-zabaani karne vaale the vahi rusvaai kaa meri sabab aakhir bane maulaa vahi jo log kal shaamein suhaani karne vaale the vo sab chehre kisi ke ghar ki zinat ban gae aakhir mire ashaar ki jo tarjumaani karne vaale the"

"miri aankhon kaa us se raabta hai jise dekhe hue 'arsa huaa hai sabab main jaantaa huun aansuon kaa tumhaari aankh mein tinkaa giraa hai hamaare saath kyon tum jaagte ho hamein to jaagne kaa aariza hai mire baare mein kuchh kahne se pahle bataa mujh ko tu kitnaa jaantaa hai musaafir hai yaqinan aadmi vo jo itni bhiiD mein tanhaa khaDaa hai"

"siyaasi masnadon ki paasbaani kyon nahin karte ki sachche log aakhir hukmraani kyon nahin karte isi ik baat ne mujh ko pareshaan kar ke rakkhaa hai mire ashaar meri tarjumaani kyon nahin karte tumhaari shaan mein vo lab-kushaai kartaa rahtaa hai palaT kar tum kabhi aatish-bayaani kyon nahin karte bashar ke hi muqaddar mein likhin kyaa hijratein saari farishto tum kabhi naql-e-makaani kyon nahin karte agar kuchh bhi kaho un se nikal aati hain talvaarein khudaa vo guftugu aakhir zabaani kyon nahin karte"

"abhi to saath rahtaa hai miri parchhaaiyaan ban kar bichhaDne par rahegaa vo miri tanhaaiyaan ban kar badan par is-qadar baarish mire hoti hai boson ki ki jab baanhein tiri mujh par khuli hon Daaliyaan ban kar yaqin hai jis taraf se teri aamad kaa mujhe jaanaan vahin aankhein bichhaa rakkhi hain ghar ki khiDkiyaan ban kar tiri yaadon se vaabasta miraa kamra miraa bistar vahi yaadein ubharti hain miri angDaaiyaan ban kar ba-zaahir to kabhi nazdik vo aataa nahin mere magar vo saath rahtaa hai miri tanhaaiyaan ban kar abhi to ishq baaqi hai adhuri hai mohabbat bhi khanaknaa hai abhi haathon mein teri chuDiyaan ban kar mohazzab jin ko samjhaa thaa saliqa jin mein jaanaa thaa vahi alfaaz nikle hain zabaan se gaaliyaan ban kar bahut khaamosh rahtaa hai kabhi dil kuchh nahin kahtaa akele mein dhaDaktaa hai magar sargoshiyaan ban kar ki aatish mein mohabbat ki badan us kaa jale kaise gale lagtaa hai maachis ki vo giili tiliyaan ban kar mohabbat se kabhi tum ne hamein jo phuul bheje the kitaabon mein vo hain mahfuz bikhri pattiyaan ban kar guzarte vaqt ne un kaa badan bosida kar Daalaa vahi jo laDkiyaan uDti thiin yaaro titliyaan ban kar jinhein sukhaa samajh kar tum ne jin par khaak Daali thi unhi patton ki rut gunji hai ghar mein taaliyaan ban kar vahi sab parchiyaan jin par tumhaaraa naam likkhaa thaa vahi aankhon mein chubhti hain hamaare kirchiyaan ban kar dahak uTThaa badan us kaa hamaare shoala-e-lab se jalaa lekin badan apnaa bhi aatish-baaziyaan ban kar masaail zindagi mein jo miri darpesh the ab tak vo kal shab hal hue lekin miri rusvaaiyaan ban kar"

"badalte mausamon mein aab-o-daana bhi nahin hogaa ki peDon par parindon kaa Thikaana bhi nahin hogaa bahaa le jaaeingi maujein kitaab-e-zindagaani ko sunaane ke liye koi fasaana bhi nahin hogaa navaah-e-jaan mein ik din tum utar kar dekh bhi lenaa tumhaare paas yaadon kaa khazaana bhi nahin hogaa tasavvur ki hadon se duur jaa kar kaise dekheinge agar tum se taalluq ghaaebaana bhi nahin hogaa khulaa dar chhoD aae the ki hijrat kaa taqaaza thaa vahaan kyaa lauT kar jaaein Thikaana bhi nahin hogaa"

"bazm mein vo baiThtaa hai jab bhi aage saamne main laraz uThtaa huun us ki har adaa ke saamne tujh ko har dam maangtaa huun jaagtaa huun raat bhar aur kaise haath phailaaun khudaa ke saamne munharif hotaa gayaa har shakhs apni raah se koi Thahraa hi nahin us ki sadaa ke saamne mujh pe hi ilzaam rakh kar har taraf rusvaa kiyaa koi chaara hi nahin thaa be-vafaa ke saamne tez aandhi thi uDaa kar le gai mujh ko kahaan ek tinkaa thaa kahaan ruktaa havaa ke saamne"

"fasl-e-gul aisi na thi baad-e-sabaa aisi na thi aaj se pahle zamaane ki havaa aisi na thi ye libaas-e-gul ye nazm-e-gulsitaan aisaa na thaa surkhi-e-rang-e-shafaq bu-e-hinaa aisi na thi meherbaan jis par hue us ki bujhaa di tishnagi mere ghar par jo barasti vo ghaTaa aisi na thi tum ne daanista vafaa ke daaere kam kar diye varna pahle dilbari ki ye adaa aisi na thi aaj ham ne sach kahaa to sab mukhaalif ho gae varna ye duniyaa kabhi ham se khafaa aisi na thi"

"mere ghar se us ki yaadon ke makin jaate nahin chhoD kar jaise shajar apni zamin jaate nahin tere dar se hi milegaa jo bhi miltaa hai hamein ham tire dar ke alaava ab kahin jaate nahin tujh ko dekhe ik zamaana ho gayaa par kyaa kahin aaj bhi dil se tire naqsh-e-hasin jaate nahin gham diye hain zindagi ne gham se maayusi nahin chhoD kar ab zindagi ko ham kahin jaate nahin uDte phirte hain khalaaon mein sahaabon ki tarah ye vo naale hain ki jo zer-e-zamin jaate nahin"