Ghazal

"hamaare dast-e-sakhaa kaasa-e-gadaai hain jo rahnumaa the vo muhtaaj-e-rahnumaai hain jo mil bhi jaae to kaise uThaaeinge talvaar ye bad-nasib to TuuTi hui kalaai hain harif jo bhi hain vo sab ke sab muqaabil hain jo vaar karte hain pichhe se apne bhaai hain bas ek naam ki tasbih roz-o-shab paDhnaa mujhe ye lagtaa hai ye dhaDkanein paraai hain ye aap hi ki navaazish hai mehrbaani hai hamaari palkon pe jo shamein jagmagaai hain main muntazir thaa bahaaron ke lauTne kaa magar mire dukhon ki rutein phir se lauT aai hain kahin bichhaDne ki saaat qarib hi to nahin 'niyaaz' aankhein achaanak jo DabDabaai hain"

"gham-e-hayaat gham-e-dil nishaat-e-jaan guzraa tumhaare saath har ik lamha shaadmaan guzraa taDap ke dard se fariyaad ko jo lab khole sitam shiaar zamaane pe ye garaan guzraa badal de rukh jo miri zindagi ke dhaaron kaa vo haadisa mire dil par abhi kahaan guzraa javaab-e-tur-o-tajalli kaheinge ahl-e-nazar jo dil ki raah se vo husn-e-mehrbaan guzraa basaa ke dil mein tire gham tire sitam ai dost jahaan jahaan se bhi guzraa main naghma-khvaan guzraa"

"shaam aai dard kaa bistar khulaa ab rahegaa zakhm-e-dil shab-bhar khulaa qatl kaa ilzaam mujh par kis liye khuun us ki aastinon par khulaa paaon ke niche zamin dozakh hui aur sar par dhuup kaa khanjar khulaa amn kaa daftar bhi us ke ghar mein hai chhoD rakkhaa hai usi ne shar khulaa nafraton ke is kunein ko chhoDiye aaiye baahar ki hai baahar khulaa tul gae aadarsh sab daulat ke bhaav is sadi kaa kyaa ajab manzar khulaa munh se us ke phuul jhaDte hain 'niyaaz' haath mein rakhtaa hai vo nishtar khulaa"

"tajrabon ke mausam jab saazgaar aaeinge fikr ke darakhton mein barg-o-baar aaeinge juratein uDaanon ki paar le gaiin ham ko ghaat mein rahe jangal ab shikaar aaeinge TukDe TukDe ummidein joD lungaa main jis din hanste gaate mausam khud mere dvaar aaeinge ham ko dekhnaa ye hai bojh to nahin jivan marhale to dukh sukh ke baar baar aaeinge phuul bante jaaeinge zakhm zakhm talvon se meri raah mein jitne khaar-zaar aaeinge Duub jaa niyaaz ab to sath ki chamak mat dekh tujh ko gahre paani hi saazgaar aaeinge"

"hamein to jism se baahar khulaa saa lagtaa hai ye jism ruuh pe lipTi ridaa saa lagtaa hai har ek chehre pe kuchh rang hai kudurat kaa tamaam shahr kaa mausam khafaa saa lagtaa hai sukhan farebon ko rakhtaa hai vo aziiz magar miraa khulus use be-mazaa saa lagtaa hai vajud us kaa munavvar hai us ki sirat se vo aadmi hai magar aaina saa lagtaa hai tumhaari zaat pe kartaa hai jab koi tanqid khudaa hi jaane mujhe kyon buraa saa lagtaa hai amir-e-shahr kaa kirdaar hi nahin khultaa kabhi harif kabhi ham-navaa saa lagtaa hai 'niyaaz' fikr dikhaati hai jab kabhi eajaaz puraanaa lafz bhi bilkul nayaa saa lagtaa hai"

"barg piile kyaa hue shor-e-khizaan uThne lagaa be-sharar hi sina-e-gul se dhuaan uThne lagaa naam par ham ko tahaffuz ke mile itne fareb dhire dhire eatibaar-e-aasmaan uThne lagaa rahmatein shaayad ki ham se bhi gurezaan ho gaiin varna kyon is shahr se amn-o-amaan uThne lagaa kah ke divaana mujhe duniyaa ne rusvaa kar diyaa aankh se jab parda-e-vahm-o-gumaan uThne lagaa baT gai ik din jaziron mein hamaari zindagi aur kahaani se shuur-e-daastaan uThne lagaa kaash pahle jaagte to dhuup mein jalte na ham niind jab TuuTi ki sar se saaebaan uThne lagaa aag phir lagne lagi nafrat ki shahron mein 'niyaaz' dekhiye chaaron taraf phir se dhuaan uThne lagaa"

"par zaraa TuuTe hue se miri taqdir ke hain hausle zinda magar aaj bhi taamir ke hain jab lahu aankh se Tapkegaa chamak jaaeinge rang phike abhi ehsaas ki tasvir ke hain khvaab jo tum ne dikhaae the vo sab dekh liye masale ab to yahaan khvaab ki taabir ke hain khuub pahchaantaa hai dil tire tiron kaa mizaaj zakhm jitne bhi lage hain vo tire tiir ke hain zindagi ek tasalsul gham-o-aalaam kaa hai aur ham log bhi qaidi usi zanjir ke hain nafratein phuuT paDin ban ke lahu kaa sailaab kitne zahrile ye jumle tiri taqrir ke hain saahib-e-lauh-o-qalam us ke sivaa koi nahin saare gul-buTe 'niyaaz' us ki hi tahrir ke hain"

"shuur-e-ishq haasil ho to jiine kaa shiaar aae hamaare baazuon mein aasmaan-e-be-hisaar aae bahut chaahaa milein peDon ke saae saath phulon kaa mire hisse mein lekin zindagi ke reg-zaar aae khulaa ham par ki eazaaz-e-shahaadat ham ko milnaa hai gharon ghar dastakein de diin gali kucha pukaar aae asaa himmat kaa apni har jagah rasta banaa degaa hamaare saamne naddi paDe yaa kohsaar aae agar ye tai nahin hai phuul ham ko mil hi jaaeinge to phir behtar yahi hai ham ko zakhmon kaa shumaar aae tahon mein so rahaa hai ik talaatum aarzuon kaa samundar chaand ko dekhe to maujon mein ubhaar aae 'niyaaz' ek kaam thaa sar de ke karne kaa so kar Daalaa fasil-e-shahr se baatil kaa parcham ham utaar aae"

"daaman ki fikr hai na garebaan ki fikr hai ahl-e-vatan ko fitna-e-dauraan ki fikr hai gulshan ki fikr hai na bayaabaan ki fikr hai ahl-e-junun ko fasl-e-bahaaraan ki fikr hai logon ko apni fikr hai lekin mujhe nadim bazm-e-hayaat-o-nazm-e-gulistaan ki fikr hai ham maqtal-e-hayaat mein hain sar-ba-kaf magar ahl-e-havas ko apne dil-o-jaan ki fikr hai saahil se duur rah ke hai manzil ki justuju maujon ki fikr ham ko na tufaan ki fikr hai ham ko nahin hai fikr kisi baat ki 'niyaaz' taarikiyon mein sham-e-farozaan ki fikr hai"

"bujhaa ho dil to bahaaron ko bhi khizaan kahiye har ek phuul ko tashbih-e-zakhm-e-jaan kahiye guzar rahe hain nazar se to anginat chehre savaal ye hai kise apnaa raazdaan kahiye hai jis kaa zikr sahifon mein ‘ahd-e-maazi ke kahaan hai sar pe mire ab vo aasmaan kahiye tahein shu'ur ki khulti raheingi taa-ba-hayaat abhi yaqin-e-ta’ayyun ko bhi gumaan kahiye 'niyaaz' zakhm-e-tamannaa hain mere siine mein mujhe nigaar-e-mohabbat kaa raaz-daan kahiye"

"tumhaare husn ko tasvir-e-baam kar deinge ghazal pe aae to matla mein kaam kar deinge mukhaalifin kaa sab intizaam kar deinge na maane log to vo qatl-e-aam kar deinge hamaare saamne mat kar ghamanD hukumat kaa abhi zaraa mein tujhe be-maqaam kar deinge baDhaao tez qadam manzilein bulaati hain ye raahbar hain ye raste mein shaam kar deinge ham aur kyaa nai piDhi ko dein viraasat mein jo dil mein zakhm hain bachchon ke naam kar deinge sharaab piite hi gham aur bhi ubhar aae chale the dard ko tahlil-e-jaam kar deinge 'niyaaz' likh ke ham us ki mukhaalifat mein ghazal qalam ko qaabil-e-sad-ehtiraam kar deinge"

"apne vahm-o-gumaan se niklaa main andhere makaan se niklaa be-rukhi dekh ab zamaane ki muddaaa kyuun zabaan se niklaa samt kaa gham na thaa safine ko ye alam baadbaan se niklaa dhuup barsaa rahi thiin talvaarein phir bhi main saaebaan se niklaa vaqt mohlat na degaa phir tum ko tiir jis dam kamaan se niklaa aa gayaa lijiye saahil-e-hasti main baDe imtihaan se niklaa zindagi kaa nayaa mizaaj 'niyaaz' dard ke khaandaan se niklaa"

"main shab-e-hijr kyaa karun tanhaa yaad mein teri gum rahun tanhaa hain idhar gardishein zamaane ki hai muqaabil udhar junun tanhaa kitne be-nur hain ye hangaame main bhare shahr mein bhi huun tanhaa aadmi ghir gayaa masaail mein rah gai ziist be-sukun tanhaa vo to is daur ke nahin insaan mil gayaa hai jinhein sukun tanhaa ham-safar jab 'niyaaz' andhere hain shama ghabraa rahi hai kyuun tanhaa"

"maa'mul se jiite ho to jiine kaa hunar kyaa samton ki taraf dauDte saayon kaa safar kyaa uljhe hue dhaage nahin uljhi hui saansein kaam aae yahaan naakhun-e-tadbir-o-hunar kyaa tum aao na aao magar insaaf se kah do khaali dar-o-divaar huaa karte hain ghar kyaa mujh tak to koi harf-e-hidaayat nahin pahunchaa gumraahi kaa ilzaam rakhoge mire sar kyaa aatish gham-e-duniyaa ki ye ghar phunk chuki hai ab dil ko jalaaeinge tamannaa ke sharar kyaa"

"sabz raaton kaa na chamkile dinon kaa rang hai saamne aankhon ke bujhtaa raakh jaisaa rang hai rang ki buniyaad par tafriq hai gahraa fareb jism ke andar to sab mein ek jaisaa rang hai tursh ehsaasaat mein ab ghulti jaati hai miThaas tum jo aae ho to har shai par sunahraa rang hai main tumhein tasvir kah duun to buraa mat maannaa kitne dil-kash khaal-o-khat hain kitnaa achchhaa rang hai jism ki dharti pe har jazba khulaa hai phuul saa lazzaton ki aankh mein har rang hanstaa rang hai dhund ke is paar ham hain aur siyaahi vaqt ki dhund ke us paar suraj hai sunahraa rang hai jab vafaa ki dhuup chamkegi to khud uD jaaegaa pyaar ke rangin libaason par jo kachchaa rang hai"

"intishaar-o-khauf har ik sar mein hai aafiyat se kaun apne ghar mein hai zindagi par sab haqiqat khul chuki tu abhi tak khvaab ke paikar mein hai mutmain insaan kahin par bhi nahin ek si haalat zamaane bhar mein hai raat ki chaTTaan se subhein taraash khvaab ki taabir isi patthar mein hai jhuuT ki ban aai hai chaaron taraf sach agar hai bhi to pas-manzar mein hai barf ehsaasaat ki pighlaa sake vo sharar maazi ki khaakistar mein hai TuuT jaane tak uDeinge ham 'niyaaz' hausla itnaa to baal-o-par mein hai"

"khudaa kaa shukr shahaadat ke daaere mein huun main qaatilon ki hifaazat ke daaere mein huun har ek pal mein hai yaum-e-hisaab ki aahaT abhi se jaise qayaamat ke daaere mein huun siyaasaton ne miri keinchuli nahin badli khushaa ki ab bhi sharaafat ke daaere mein huun khushi sukun mayassar nahin yahaan bhi mujhe tumhein ye rashk ki daulat ke daaere mein huun milaa huaa hai rivaayat kaa silsila mujh se jadid ho ke qadaamat ke daaere mein huun"

"nigaah thi mujhe haasil to vo nazaaraa thaa har ek shai mein nayaa ek istiaara thaa mire safine ko dariyaa ne kab diyaa rasta vahin bhanvar bhi thaa yaaro jahaan kinaaraa thaa usi ne aaj unhein be-sahaaraa chhoD diyaa vo ek beTaa jo maan-baap kaa sahaaraa thaa tumhaare gham ne murattab kiyaa mohabbat se vagarna ye varaq-e-dil to paara-paara thaa hamaari himmatein dekho kiyaa vahi saudaa vafaa kaa saudaa jo sab se baDaa khasaara thaa use haraa diyaa patton ki bevafaai ne vo ek peD havaaon se jo na haaraa thaa Daraa diyaa hai 'niyaaz' aansuon ne zulmat ko na meri palkon pe jugnu thaa nai sitaaraa thaa"

"vaqaar apne buzurgon kaa zaraa bhi kam nahin karte kabhi ham zaalimon ke saamne sar kham nahin karte tavaazo ke liye kaanTon ki in ko paal rakhaa hai safar mein ham musaafir aablon kaa gham nahin karte ham ahl-e-zarf khushiyon mein bhi qaabu khud pe rakhte hain dukhi ho kar bhi dukh se aastinein nam nahin karte hamaare lafz zakhmon ke liye bante to hain marham magar phir bhi masihaai kaa daavaa ham nahin karte nazar rakhte hain mustaqbil ki jaanib ham nazar vaale kabhi guzre zamaanon ke liye maatam nahin karte falak vaalon ki jaanib un ki saari mehrbaani hai gharibon par tavajjoh qibla-e-aalam nahin karte kitaabon se bhare baston ne kuchh aisaa dabaayaa hai 'niyaaz' is daur ke bachche bahut udham nahin karte"

"dushmani hai use mujh se to nibhaane aae phuul dene na sahi zakhm lagaane aae apni galiyon mein hamein apnaa makaan mil na sakaa aaj ham lauT ke jab apne Thikaane aae daavedaaron se use thi bahut ummid magar qarya-e-gham mein hamein khaak uDaane aae aish ke rang kisi ko bhi mile hon lekin mere hisse mein to khushiyon ke fasaane aae ham ne dil khol ke haq baat kahi jab bhi kahi uzr aaya na siyaasat ke bahaane aae ek be-naam udaasi hai dil-o-jaan pe muhit aisaa lagtaa hai ki phir gham ke zamaane aae khauf-e-jaan chhoD diyaa us se ye kah diije 'niyaaz' apni tahzib-o-zabaan jo bhi miTaane aae"

"hijr mein guzri hai us raat ki baatein na karo aap tajdid-e-mulaaqaat ki baatein na karo dil ne har daur mein duniyaa se baghaavat ki hai dil se tum rasm-o-rivaayaat ki baatein na karo himmatein qaafile vaalon ki na hon past kahin rahrav-e-gardish-e-haalaat ki baatein na karo chaahiye josh-e-talab mere shikasta-dil ko aise haalaat mein sadmaat ki baatein na karo zindagi aur bhi tashrih-talab hai yaaro gham ke tapte hue lamhaat ki baatein na karo kitne hi zakhm hare hain mire siine mein 'niyaaz' aap ab mujh se inaayaat ki baatein na karo"

"ham-nafas khvaab-e-junun ki koi taabir na dekh raqs karnaa hai to phir paanv ki zanjir na dekh tu kisi husn-e-jahaan-soz ki tasvir na dekh apne guzre hue haalaat ki tafsir na dekh husn-e-tadbir se taqdir badal de apni jo hai haalaat se mansub vo taqdir na dekh tu parastaar-e-amal hai to amal ki khaatir khvaab-e-rangin ki qasam khvaab ki taabir na dekh razm-e-hasti se guzarnaa hai agar tujh ko 'niyaaz' zulmat-e-shab ko samajh subh ki tanvir na dekh"

"kaise rakheinge sar pe kisi kaa udhaar ham qarz-e-vafaa mein karte hain sar kaa shumaar ham afsos isi chaman mein hue be-viqaar ham jis ko ki chaahte rahe divaana-vaar ham alfaaz madah-khvaan the qalam the bike hue kaise taraash lete koi shaah-kaar ham milnaa hamaaraa khaak mein zaaea na jaaegaa de jaaeinge chaman ko shuur-e-bahaar ham koi sipar bachaa na sakegi huzur ko talvaar se sukhan ki kareinge jo vaar ham ai zindagi na ham se chhupaa raaz-e-zindagi har saans mein hain tere hi aaina-daar ham Daalein ab ek aur rivaayat ki daagh-bel dushman pe ai 'niyaaz' karein e'tibaar ham"

"khoj mein ham jin ki be-ghar ho gae gum nigaahon se vo manzar ho gae haadse bhi ab to chaunkaate nahin jiine vaale jaise patthar ho gae le gaiin nindein miri aagaahiyaan khvaab saare ghar se be-ghar ho gae ghar ki qismat ban gaiin tanhaaiyaan jab se vo aur main baraabar ho gae ab ujaDte hain na baste hain 'niyaaz' ham to jaise be-muqaddar ho gae"