Ghazal

"mat puchh ki ulfat mein jafaa kaun karegaa ye kaam bhi apnon ke sivaa kaun karegaa bakhshaa na gayaa tujh ko agar soz-e-mohabbat aaina-e-dil tujh pe jilaa kaun karegaa mahkaa na agar gul to phir ai bulbul-e-betaab gulshan mein tujhe naghma-saraa kaun karegaa taa'mir to ho sakte hain kuchh daar-o-rasan aur hasti ko mohabbat mein fanaa kaun karegaa sar le ke hatheli pe na ghumeinge kabhi ham par shart hai takmil-e-vafaa kaun karegaa us moD pe ham sab hain jahaan khud kaa nahin hosh khoi hui manzil kaa pata kaun karegaa ham hi na hue 'shauq' to khuun de ke jigar kaa phir tez tiraa rang-e-hinaa kaun karegaa"

"khinch kar khalvat-kade se daar tak laai mujhe ai junun mahngi paDi teri shanaasaai mujhe phir hansi aai mujhe lo phir hansi aai mujhe sozish-e-gham ne banaa Daalaa hai saudaai mujhe tum ne marham rakh diyaa aur zakhm saare khil uThe yaad to rakhni paDegi ye masihaai mujhe khush raho tum ko mubaarak ho tumhaari anjuman raas aane lag gai hai apni tanhaai mujhe dekhtaa huun main qafas mein 'shauq' apne zakhm ko yaad aati hai mire gulshan ki raa'naai mujhe"

"chaDh ke daar-o-rasan par ye kyaa de gayaa ek divaana dars-e-vafaa de gayaa us ko qaatil kahun yaa masihaa kahun zahr de kar jo mujh ko davaa de gayaa raah-e-ulfat mein jab gul khilaanaa paDaa kaam talvon kaa har aabla de gayaa ham ne maangaa thaa ulfat-bharaa ek dil koi TuuTaa huaa aaina de gayaa aansuon ke samandar nahaanaa paDaa koi hansne ki aisi sazaa de gayaa naz' ke vaqt ki de ke bechainiyaan mujh ko jiine ki zaalim du'aa de gayaa 'shauq' chhu luun to miTTi bhi sonaa bane 'ishq vo nuskha-e-kimiyaa de gayaa"

"laghzish-e-saaqi-e-mai-khaana khudaa khair kare phir na TuuTe koi paimaana khudaa khair kare har ghaDi jalva-e-jaanaana khudaa khair kare teraa dil hai ki sanam-khaana khudaa khair kare log kar Daalein na khud apne jigar ke TukDe be-naqaab un kaa chale aanaa khudaa khair kare dil ki baat un se abhi kah to gae ho lekin koi ban jaae na afsaana khudaa khair kare sham' bechain hai badnaam na ho jaaun kahin par jalaa baiThaa hai parvaana khudaa khair kare kaun guzregaa tire daar-o-rasan se hans kar gham hai jaane kahaan divaana khudaa khair kare paanv uThte hi nahin 'shauq' jabin hai betaab saamne hai dar-e-jaanaana khudaa khair kare"

"but yahaan milte nahin hain yaa khudaa miltaa nahin azm mustahkam to ho duniyaa mein kyaa miltaa nahin ham-safiraan-e-junun yuun ham se aage baDh gae qaafila kyaa hai ghubaar-e-qaafila miltaa nahin apni surat dekhnaa ho apne dil mein dekhiye dil saa duniyaa mein koi bhi aaina miltaa nahin de diyaa hai aap ko dil ab hifaazat kijiye har khazaane mein ye laal-e-be-bahaa miltaa nahin DhunDhtaa phirtaa hai mujh ko kyuun fareb-e-rang-o-bu main vahaan huun khud jahaan apnaa pata miltaa nahin"

"kahaan hai jeb aur daaman kahaan hai junun se puchh ab kyon mehrbaan hai yaqinan aap mujh se kuchh khafaa hain zamin dushman hai par ham aasmaan hain jhuki hai ye jabin meri jahaan par tumhaaraa hi vo sang-e-aastaan hai kashaakash hai falak mein aur zamin mein udhar bijli idhar ik aashiyaan hai paDin hain ashk ki bundein jo khat par paDhi jaae to paDh lo daastaan hai"

"harim-e-naaz kahaan jalva-gaah-e-yaar kahaan taDap rahi hai koi barq baar-baar kahaan haram-o-dair-o-kalisaa ki khaak chhaan aae chali hai le ke tu ab justuju-e-yaar kahaan hamaare dam se hai raunaq tumhaari mahfil ki hamin na honge to jashn-e-salib-o-daar kahaan kuchh aur taaza sitam ki bahaar aane do chaman hai dil kaa abhi 'shauq' laala-zaar kahaan"

"hain us ke saamne ai 'shauq' kis shumaar mein phuul khile hon jis ke kaf-e-paa se regzaar mein phuul main ek khaar huun lekin nasib dekho to liye hain chaaron taraf se mujhe hisaar mein phuul milaa bhi kaam to aaraaish-e-chaman kaa milaa tamaam umr rahe mere kaarobaar mein phuul kabhi jo main ne manaayaa junun mein jashn-e-bahaar piro liye hain garebaan ke taar taar mein phuul mire lahu se hai rang-e-bahaar maqtal mein luTaae jaate hain jashn-e-salib-o-daar mein phuul chaman ko de ke lahu 'shauq' main ne kyaa paayaa na ikhtiyaar mein kaanTe na ikhtiyaar mein phuul"

"ai junun ham ne kahaan sar rakh diyaa phir kisi ko but banaa kar rakh diyaa 'ishq ne mujh ko liTaayaa aag par aur phir siine pe patthar rakh diyaa likh diyaa tum ne qafas taqdir mein noch kar main ne bhi shahpar rakh diyaa main ne mai chhoDi thi jis ke naam par phir usi ne laa ke saaghar rakh diyaa mujh ko jis se zindagi ki aas thi us ne hi gardan pe khanjar rakh diyaa 'shauq' us ke ho gae ham sab yatim dast-e-shafqat jis ne sar par rakh diyaa"

"hosh rakhnaa baDe zaalim hain zamaane vaale aag paani mein lagaa deinge lagaane vaale chand daanon ke liye bhuul na karnaa hargiz kam nahin log yahaan jaal bichhaane vaale kis kaa shikva karein ham ghair to hote hi hain ghar ki angnaai mein divaar uThaane vaale ham mohabbat mein tasanno' ke nahin hain qaail shart hai dil bhi mile haath milaane vaale aaj tum ko jo anal-haq kaa sabaq dete hain kal yahi honge tumhein daar pe laane vaale"

"tu hi yusuf ki tarah bikne ko tayyaar nahin varna duniyaa mein kahaan misr kaa baazaar nahin DhunDhtaa kyon hai hisaaron mein muqayyad ho kar main vahaan huun jahaan koi dar-o-divaar nahin aaj kis samt se aavaaz-e-anal-haq aai koi mansur-sifat bhi to sar-e-daar nahin sar kaTaa saktaa huun main sar ko jhukaaun kaise miri talvaar giri hai miraa me'yaar nahin 'shauq' jaaoge kahaan le ke shikasta dil ko koi TuuTe hue saaghar kaa talab-gaar nahin"

"kaaba hai kabhi to kabhi but-khaana banaa hai ye dil bhi ajab chiiz hai kyaa kyaa na banaa hai jis roz se dil aap kaa divaana banaa hai ek lafz bhi niklaa hai to afsaana banaa hai ye aaj kaa din hashr kaa din to nahin yaarab apnaa thaa jo kal tak vahi begaana banaa hai tinkon kaa to bas naam hai sachchaai yahi hai ik jehd-e-musalsal hai jo kaashaana banaa hai takhrib ke parde mein hi taamir hai saaqi shisha koi pighlaa hai to paimaana banaa hai takmil-e-vafaa hosh mein mumkin hi nahin thaa divaana samajh buujh ke divaana banaa hai duniyaa mein koi mol na thaa 'shauq' kaa lekin qismat hai jo sang-e-dar-e-jaanaana banaa hai"

"ruThe hain ham se dost hamaare kahaan kahaan TuuTe hain zindagi ke sahaare kahaan kahaan duniyaa ki baazgasht mein apni hi hai sadaa aise mein koi tujh ko pukaare kahaan kahaan kaabe mein thaa sakun na kalisaa mein chain thaa tujh se bichhaD ke din ye guzaare kahaan kahaan tu thaa rag-e-gulu se ziyaada qarib-tar DhunDh aae tujh ko diid ke maare kahaan kahaan taare kahin hain phuul kahin hain guhar kahin bikhre hue hain ashk hamaare kahaan kahaan shama bhi muztarib hai patangaa bhi muztarib pahunche hain soz-e-gham ke sharaare kahaan kahaan fursat mile kabhi to shab-e-gham se ponchhnaa TuuTe hain chashm-e-'shauq' se taare kahaan kahaan"

"dil diyaa vahshat liyaa aur khud ko rusvaa kar liyaa mukhtasar si zindagi mein main ne kyaa kyaa kar liyaa dil ki khaatir kufr bhi us ne gavaaraa kar liyaa ek patthar khud taraashaa khud hi sajda kar liyaa aap ki chaahat kaa milnaa jaan lungaa muft hai jaan de kar bhi agar main ne ye saudaa kar liyaa baal-o-par apne salaamat Dar andheron kaa nahin chaar tinke jab bhi phunke hain ujaalaa kar liyaa dard bakhshaa chain chhinaa dil ke TukDe kar diye haae kis zaalim pe main ne bhi bharosa kar liyaa 'shauq' jab tak saans hai tab tak hai ummid-e-hayaat kyuun abhi se aap ne dil apnaa chhoTaa kar liyaa"

"kis imtihaan-gaah mein laayaa gayaa mujhe daar-o-salib sab se guzaaraa gayaa mujhe aare chale aur aag mein Daalaa gayaa mujhe sau sau jatan se dost sanvaaraa gayaa mujhe jis mein balaa kaa soz ho main hi vo saaz thaa aayaa hai jo bhi chheD ke taDpaa gayaa mujhe us din falak pe 'iid rahi hogi dosto jis roz dard 'ishq kaa bakhshaa gayaa mujhe mujh ko mili hai dosto sachchaai ki sazaa main aaina thaa is liye toDaa gayaa mujhe"