Ghazal

"ukhaDti saans ki antim pukaar ho jaaun zamin pe khuun na gire ungliyaan bhigo jaaun havaaein DhunD rahi hain kise chahaar taraf main kis dishaa mein chalun kis dayaar ko jaaun ye lamha lamha manaazir ki titliyaan uD kar chali na jaaein kahin yuun ki main bhi kho jaaun akele rah ke bhi qimat na lag saki us ki to ab ye buund samandar mein hi Dubo jaaun tu phuul hai na guhar kis tarah sajaaun tujhe har ek saans mein dhaDkan tiri piro jaaun bulaa rahi hai mujhe meri khaak apni taraf main apne aap se niklun tamaam ho jaaun bichhi hui hai zamin mere vaaste 'nashtar' yahin kahin isi miTTi kaa ang ho jaaun"

"phuul saa jism na raste mein jalaayaa kijiye main sanobar huun miri chhaanv mein aayaa kijiye aur kyaa chaahiye is daur ke insaanon ko sirf do chaar ghaDi saath bitaayaa kijiye aap saagar hain to sairaab karein pyaase ko aap baadal hain to mujh dasht pe saayaa kijiye aap se nuur ki khairaat talab karte hain ban ke khurshid na phulon ko jalaayaa kijiye kam se kam dekh sakun apni haqiqat kyaa hai meri aankhon se na aaina chhupaayaa kijiye"

"panchhiyon ke ru-ba-ru kyaa zikr-e-naadaari karun pankh TuuTe hi sahi uDne ki tayyaari karun chhoD jaaun apne pichhe 'aalam-e-hairat tamaam maut ke pahlu mein chhup kar shoabada-kaari karun naachti hai jumbish-e-angusht par vo faahisha zindagi kah kar jise khud se riyaa-kaari karun sabz paudon ki taraf baDhne lagi sarkash havaa us ke kapDe noch luun thoDi gunaah-gaari karun nannhi-munni konpalon ko rang-o-nikhat chaahiye kuchh havaa kaa khauf kuchh mausam ki dildaari karun gungunaate shokh panchhi lahlahaati khetiyaan nit-nae khvaabon se nam aankhon mein gul-kaari karun marsiya apnaa sunaaun shahr-e-naa-pursaan ke biich pattharon se aur kyaa ummid-e-gham-khvaari karun"

"vo shakhs jis ne khud apnaa lahu piyaa hogaa jiyaa to hogaa magar kas tarah jiyaa hogaa tumhaare shahr mein aane ki jis ko hasrat thi tumhaare shahr mein aa kar vo ro paDaa hogaa kisi ki yaad ki aahaT si hai dar-e-dil par kisi ne aaj miraa naam le liyaa hogaa vo ajnabi tiri baanhon mein jo rahaa shab bhar kise khabar ki vo din bhar kahaan rahaa hogaa tumhaare sehn-e-chaman mein khilaa huaa ghuncha kise khabar miri qismat pe hans rahaa hogaa"

"main teri chaah mein jhuTaa havas mein sachchaa huun buraa samajh le magar dusron se achchhaa huun main apne aap ko jachtaa huun be-hisaab magar na jaane teri nigaahon main kaisaa lagtaa hon bichhaa rahaa huun kai jaal ird-gard tire tujhe jakaDne ki khvaahish mein kab se baiThaa hon tu barf hai to pighal jaaegaa tamaazat se tu aag hai to main jhonkaa tujhe havaa kaa huun bikhar bhi jaae to mujh se na bach sakegaa kabhi tujhe sameT ke lafzon mein baandh saktaa hon main yuun bhi huun mujhe maalum hi na thaa 'nashtar' samajh rahaa thaa bahut nek huun farishta huun"

"vo so rahaa hai khudaa duur aasmaanon mein farishte loriyaan gaate hain us ke kaanon mein zamin pe girte hain kaT kaT ke sar farishton ke ajiib zalzala aayaa hai aasmaanon mein saDak pe aa gae sab log bilbilaate hue na jaane kaun makin aa gae makaanon mein phaTe puraane badan se kise kharid sakun saje hain kaanch ke paikar baDi dukaanon mein vahin pighal ke na rah jaae meraa sang-e-sadaa ki zard zahr kaa parda hai is ke kaanon mein nikal ke zard charaaghon se zahr kaa aaseb pahunch gayaa hai mire ghar miri dukaanon mein"

"dasht-e-afkaar mein sukhe hue phulon se mile kal tiri yaad ke maa'tub rasulon se mile apni hi zaat ke sahraa mein sulagte hue log apni parchhaain se Takraae hayyulon se mile gaanv ki samt chali dhuup doshaalaa oDhe taaki baaghon mein ThiThurte hoe phulon se mile kaun uDte hoe rangon ko giraftaar kare kaun aankhon mein utarti hui dhulon se mile is bhare shahr mein 'nashtar' koi aisaa bhi kahaan roz jo shaam mein ham jaise fuzulon se mile"

"havaa ke haath mein patthar dabaa kar bhej detaa hai miraa inaam vo mujh ko baraabar bhej detaa hai nazar aataa hai meraa haath har takhrib mein us ko koi tohmat kahin uTThe mire sar bhej detaa hai mujhe bhi ab kisi taamir kaa saudaa nahin hotaa use bhi zid hai barbaadi ke manzar bhej detaa hai khilaunon se bahal jaataa huun ye maalum hai us ko tabhi to vo nai uftaad aksar bhej detaa hai"

"be-rozgaar hi sahi khuddaar main bhi huun apni rah-e-hayaat mein divaar main bhi huun do chaar saal aur hai naa-qadri-e-sukhan murda-parast shahr kaa fankaar main bhi huun tashkik dil mein sar mein junun lab pe gaaliyaan kyaa ruh-e-asr ki tarah bimaar main bhi huun shahr-e-munaafiqat mein basar kar rahaa huun main lagtaa hai apne 'ahd kaa autaar main bhi huun"

"mujh se kahte hain ki main zulm sahun kuchh na kahun harf-e-haq sirf kitaabon mein paDhun kuchh na kahun haan vahi haath mire jaison kaa qaatil hai magar main usi haath ko mazbut karun kuchh na kahun dusraa kaun jise pesh karun sar apnaa dushman-e-jaan hi sahi qadr karun kuchh na kahun"

"ghair-aabaad ilaaqe ki fazaa kaisi hai dil se uThti hai jo rah rah ke sadaa kaisi hai mere pairon se lipaTti hi rahi mauj-e-ravaan ret se kar na saki mujh ko judaa kaisi hai TuuT kar aai hai lahraai hai chaaron jaanib ye barasti hi nahin kaali ghaTaa kaisi hai pattiyaan dhuup mein kumhlaa gaiin phike hue rang chhaanv utri hi nahin aab-o-havaa kaisi hai baasi phulon ko na jhulsaae to suraj kaisaa taaza kaliyaan na khilaae to sabaa kaisi hai kyuun nahin girte saron pe ye havaa ke neze gharq karti hi nahin mauj-e-fanaa kaisi hai zard alfaaz kaa zahrilaa bhayaanak aaseb mere ghar chhoD gai meri sadaa kaisi hai shahr-e-afsun mujhe aavaaz de patthar kar de main ise dekh to luun meri khataa kaisi hai"

"phir ik nae safar pe chalaa huun makaan se koi pukaartaa hai mujhe aasmaan se aavaaz de rahaa hai akelaa khudaa mujhe main us ko sun rahaa huun havaaon ke kaan se kuchh din to be-ghari kaa tamaasha bhi dekh luun yuun bhi hai ji uchaaT puraane makaan se donon hi ham-safar the havaaon ke dosh par par main huun chuur chuur safar ki takaan se pairon tale dabi hai vahi ret ki chaTaan mujh ko havaa ne pheink diyaa aasmaan se vo zad pe aa gayaa thaa nihattaa bhi thaa magar main ne hi koi tiir na chhoDaa kamaan se mere labon pe khel rahi hai vahi hansi har-chand ret ret huaa huun chaTaan se"

"jo nikli makaan se saDak par gai havaa mujh ko chaaron taraf kar gai rahaa ik chhanaakaa saa kaanon mein shab hui subh to vo sadaa mar gai ye barsaat lagte hi sukhi nadi zaraa mein kinaaron talak bhar gai uThi ek vaarafta mauj-e-havas magar zor-e-tufaan se Dar gai havaaon kaa naghma divaaron ke kaan mire ghar mein ye kaisi shai bhar gai"

"hazaar bach ke nikalte kahaan Thikaanaa thaa hamein lahu ke samundar mein Duub jaanaa thaa tabuk aaj bhi aavaaz de rahaa hai hamein urus-e-maut ko baDh kar gale lagaanaa thaa ThiThak ke aab-e-ravaan raaste banaa detaa the shahsavaar hamein lauT ke na aanaa thaa vo jis ne jast lagaai thi gahre paani mein usi ke haath tah-e-aab kaa khazaana thaa faraaz-e-koh se shaahin ne uDaan bhari paron mein aasmaan minqaar mein zamaana thaa uDaa rahe the abhi ham adu ke par purze khuli jo aankh to sab khvaab thaa fasaana thaa"

"ham se thiin raunaqein bazm-aaraaiyaan ab sajaate raho apni tanhaaiyaan koi khushbu nahin koi naghma nahin roz chalne ko chalti hain purvaaiyaan meri jaan main tujhe kis tarah jaantaa is qadar vusatein itni gahraaiyaan dekh liije kahin aap hi to nahin meri aankhon mein hain chand parchhaaiyaan kaisaa afsos maatam ho kis baat kaa phir vahi pastiyaan aur paspaaiyaan haisiyat kyaa hai tahzib-o-aqdaar ki kore kaaghaz pe hain khaama-farsaaiyaan"

"TuuT kar der talak pyaar kiyaa hai mujh ko aaj to is ne hi sarshaar kiyaa hai mujh ko vo mahaktaa huaa jhonkaa thaa ki neze ki ani chhu ke guzraa hai to khun-baar kiyaa hai mujh ko main bhi taalaab kaa Thahraa huaa paani thaa kabhi ek patthar ne ravaan dhaar kiyaa hai mujh ko mujh se ab us kaa taDapnaa nahin dekhaa jaataa jis ne chalti hui talvaar kiyaa hai mujh ko main bulandi se use dekh rahaa huun 'nashtar' jis ne pasti kaa gunahgaar kiyaa hai mujh ko"

"chaTTaan ke saaye mein khaDaa soch rahaa huun main aab-e-ravaan kis ke liye Thahr gayaa huun paani mein chamaktaa hai koi mehrbaan saaya shaffaaf samundar hon use chuum rahaa huun patthar ne pukaaraa thaa main aavaaz ki dhun mein maujon ki tarah chaaron taraf phail gayaa huun ik siip to le aayaa thaa paani mein utar kar maanaa ki use ret pe ab pheink chukaa huun sahraa-e-havas apni taraf khinch rahaa hai main andhe samundar ki taraf dekh rahaa huun"

"in kaali saDkon pa aksar dhyaan aayaa mere man kaa mail kahaan tak phail gayaa dekh rahaa thaa jaate jaate hasrat se soch rahaa hogaa main us ko rokungaa us ne chalte chalte lafzon kaa zahraab mere jazbon ki pyaali mein Daal diyaa us ghar ki divaarein mujh se ruuTh gaiin jis ke andar kaa har saaya meraa thaa paan ke Thele hotel logon kaa jamghaT apne tanhaa hone kaa ehsaas bhi kyaa"

"safed-posh darindon ne gul khilaae the zamin surkh hui sabz karne aae the samajh liyaa thaa jinhein main ne raushni kaa safir vo aastin mein khanjar chhupaa ke laae the musaafiron ko ghani chhaanv le ke baiTh gai darakht raah ke donon taraf lagaae the mujhe bhi chaaron taraf tishnagi ne dauDaayaa miri nigaah pe aab-e-ravaan ke saae the mujhe ghurur hai main doston ki neki huun unhein khushi hai ki dariyaa mein Daal aae the mire aziiz the vo qabr khod ke rakh di mujhe jo de gae miTTi vo sab paraae the havaa to apnaa qarina badal nahin sakti charaagh aap ne kis zoam mein jalaae the"

"agar ho khauf-zada taaqat-e-bayaan kaisi navaa-e-haq na sunaae to phir ziyaan kaisi uThaao harf-e-sadaaqat lahu ko garm karo jo tiir pheink nahin sakti vo kamaan kaisi unhein ye fikr ki meri sadaa ko qaid karein mujhe ye ranj ki itni khamoshiyaan kaisi havaa ke rukh pe liye baiThaa huun charaagh apnaa mire khudaa ne mujhe bakhsh di amaan kaisi havaa chale to use kaun rok saktaa hai uThaa rakhi hai ye divaar darmiyaan kaisi agar ye mausam-e-gul hai to zard-ru kyuun hai dil-o-nazar pe ye kaifiyyat-e-khizaan kaisi na taar taar qabaa hai na daagh daagh badan mujaahidon ke saron se gai azaan kaisi"