Ghazal

"kisi bhi chaal mein nahin aaya main tire jaal mein nahin aaya bas vahi sab se khubsurat thaa misra jo taal mein nahin aaya tu muqaddar mein aa gayaa kaise tu kabhi faal mein nahin aaya mujh ko dil mein basaaiye ki main luuT ke maal mein nahin aaya us ko inaam se navaazaa gayaa jo ki pinDaal mein nahin aaya jis taghayyur ki thi umiid bahut vo nae saal mein nahin aaya ye bhi maalik kaa hai karam 'aabid' ki main janjaal mein nahin aaya"

"ghar kaa huliya badal diyaa us ne saaraa naqsha badal diyaa us ne main to aavaara ek panchhi thaa mujh ko kitnaa badal diyaa us ne jo thaa raaij yahaan pe sadiyon se saaraa qissa badal diyaa us ne ab ishaaron se chaal chalte hain khel saaraa badal diyaa us ne saanp main ne bhi ik banaanaa thaa aur saancha badal diyaa us ne jiit ke jab qarib thaa 'aabid' ek mohra badal diyaa us ne"

"dil kaa sahraa khaali hai aankh kaa dariyaa khaali hai ronaa-dhonaa bachchon kaa apnaa baTvaa khaali hai jis par ham tum laDte the ab vo jhulaa khaali hai teri yaad mein bhigaa huun varna chashma khaali hai nagri nagri kyaa bhaTkun ghar to meraa khaali hai sab chehron par ik chehra aur vo chehra khaali hai hanste hanste 'aabid' aa dil ki kuTiyaa khaali hai"

"chup kaa panchhi baiTh gayaa thaa peDon par kis ne meraa naam likhaa thaa peDon par kyaa jaane kyon panchhi sahme sahme the patton kaa jab raqs bapaa thaa peDon par kal tak viraan shaakhon par ik raunaq thi chiDiyon kaa ik Daar basaa thaa peDon par tez havaa ne tinkaa tinkaa kar Daalaa khvaabon kaa ik des basaa thaa peDon par ye bhi 'aabid' tez havaa ki saazish thi ghonsla koi TuuT gayaa thaa peDon par"

"rang us kaa badalne vaalaa hai nayaa suraj nikalne vaalaa hai maut ki oT mein na ho jaaun phir koi tiir chalne vaalaa hai bhuuk peTon mein sarsaraane lagi saanp insaan nigalne vaalaa hai saari khilqat hai aaj sahmi hui koi laavaa ubalne vaalaa hai kab ye mumkin hai sach na khul paae kab ye tufaan Talne vaalaa hai us ko apnon ki kyaa khabar hai ki jo dar pe ghairon ke palne vaalaa hai apne hi ghar ki fikr hai sab ko shahr to saaraa jalne vaalaa hai jis ke honTon pe jhuuT rahtaa thaa aakhirash sach ugalne vaalaa hai"

"meraa ilzaam puchh saktaa huun kyaa sar-e-aam puchh saktaa huun dhuup ke jism par koi saaya main tiraa kaam puchh saktaa huun be-zabaani mein ho zabaan rakhte aur iqdaam puchh saktaa huun aap se dosti ki khvaahish hai aap kaa naam puchh saktaa huun haakim-e-vaqt kyaa faraaghat mein apnaa anjaam puchh saktaa huun meri taazim gar zaruri hai raae dushnaam puchh saktaa huun tu ne 'aabid' se dosti kar li din-e-islaam puchh saktaa huun"

"haakim-e-vaqt ki beTi se mohabbat kar ke kyaa milaa tujh ko qabile se baghaavat kar ke raat-bhar aahaTein to khvaab-darichon pe rahin dekh phir bhaag gae khvaab sharaarat kar ke tu na aaegaa to ik paikar-e-naayaab tiraa meri aankhon mein utar aaegaa hijrat kar ke phuul ab zakhm ki tasvir nazar aati hai mere jazbon ki ridaaon se shikaayat kar ke main ne har rang mein jiine kaa hunar sikhaa hai jiinaa chaaho to jiyo mujh ko malaamat kar ke aur hain kitni lakirein main safar ki dekhun kitne anjaan se raston ki masaafat kar ke aaj phir sar ko jhukaae hue ghar par 'aabid' thak gayaa khud ko ghubaar-e-rah-e-vahshat kar ke"

"khud apni tasvirein mujh par bojh banin jaagirein mujh par sach kaa jab parchaar karun main lagti hain taazirein mujh par main bhi raanjhe jaisaa kab thaa marti phir kyon hirein mujh par be-qadron ki mahfil hi ab kholti hai tanvirein mujh par jab main 'aabid' mar jaaungaa aaeingi tahrirein mujh par"

"jo tire shahr mein aaya huaa hai ajab ik lahr mein aaya huaa hai hamaare shahr par bhi rahm maulaa balaa ke qahr mein aaya huaa hai nai ik subh kaa hai pesh-khema andheraa dahr mein aaya huaa hai ye kaisaa ishq-o-masti kaa hai chakkar jo pichhle pahr mein aaya huaa hai to jo kuchh maangnaa hai maang liije qalandar lahr mein aaya huaa hai hamaari zindagi kaa kul asaasa tire haq-mehr mein aaya huaa hai"

"khatm tab kulfaton kaa jaam huaa jab mohabbat kaa ikhtitaam huaa meri teri badal gaiin raahein ishq kaa qissa yuun tamaam huaa qatl ke sab gavaah maare gae aur tamaashaa-e-adl aam huaa chaaplusi kaa fan hai tere paas shahr kaa shahr tere naam huaa ishq ham par bhi ho gayaa vaajib har koi ishq kaa ghulaam huaa jis ne allah se lau lagaai hai bas vahi ishq kaa imaam huaa raat us ne sukun ki paai din mashaqqat kaa mere naam huaa"

"akelaa kis ko dene shah gayaa hai samundar ke jo zer-e-tah gayaa hai siyaasat ki paDi hai ab bhi tujh ko miraa ghar paaniyon mein bah gayaa hai amir-e-shahr ko kyaa fikr is ki gharib-e-shahr kaa ghar Dhah gayaa hai baDaa thaa hausla us shakhs kaa jo mohabbat ke ghamon ko sah gayaa hai zabaani yaad hain jo chand ghazlein asaasa ab yahi kuchh rah gayaa hai kai bachche abhi tak ro rahe hain koi jaane unhein kyaa kah gayaa hai"

"sar-e-sahraa shajar nikal aaein kuchh to ahl-e-hunar nikal aaein vo kahaan ghonslon mein rahte hain jin parindon ke par nikal aaein khuun boyaa gayaa zaminon mein ain mumkin hai sar nikal aaein kitni saffaak hongi divaarein soch gar in mein dar nikal aaein vo bhaTakte raheinge jivan bhar ghar se jo bhuul kar nikal aaein vaqt hai raushni banaane kaa ab to ahl-e-hunar nikal aaein shahr se zulmatein miTaani hain shahr ke ahl-e-zar nikal aaein vaaiz-e-shahr ne kahaa 'aabid' aao phailaa ke shar nikal aaein"

"phuul juuDe mein jab sajaanaa hai pahle tum ne mujhe bataanaa hai mere ajdaad ne bhi maanaa hai ishq dhanda bahut puraanaa hai dars maan baap ne diyaa hai mujhe girte har shakhs ko uThaanaa hai mil ke dushman se saazishein kar lo main ne aakhir ko jiit jaanaa hai rukh havaaon ki samt karte hue ik diyaa main ne phir jalaanaa hai shor hotaa hai yuun pas-e-divaar pas-e-divaar ik zamaana hai phuul bikhre paDe hain raste mein aaj shaayad kisi ne aanaa hai kyaa bigaaDeinge gham bhalaa us kaa jis ki qismat mein muskuraanaa hai laakh duniyaa lagaae taazirein amn kaa giit main ne gaanaa hai kaam se fursatein nahin 'aabid' abhi bachchon ko bhi paDhaanaa hai"

"jin ke ghar mein buDhe baabe hote hain un ke ghar mein kam hi jhagDe hote hain ab to yaaron ki mahfil mein bhi aksar mere hi sheron ke charche hote hain ab gaanv ki galiyon mein viraani hai ab kab in mein khel-tamaashe hote hain miTTi us basti ki pyaari lagti hai jis mein rahne vaale apne hote hain pahle ghar mein ek hi kamraa hotaa thaa ab to apne apne kamre hote hain Dar lagtaa hai 'aabid' aise logon se chehron par jo chehre pahne hote hain"

"tumhein jab bhi milun achchhaa lagegaa tumhein meraa junun achchhaa lagegaa tumhaare jism mein meraa lahu ho tumhein gar khuun duun achchhaa lagegaa mohabbat se jo uktaae hue hain unhein apnaa sukun achchhaa lagegaa tumhaari har adaa hai khubsurat tumhein dil de hi duun achchhaa lagegaa use main pyaar kar baiThaa huun 'aabid' use kaise kahun achchhaa lagegaa"

"kis qadar talkh ye haqiqat hai sab ki qad se baDi zarurat hai khud se milne ki bhi nahin fursat aur bachchon ko bhi shikaayat hai haakim-e-vaqt sach nahin sunte ulTaa kahte hain ye baghaavat hai ham pe fatve hain aur taazirein sach jo kahne ki ham ko aadat hai jis mein targhib ho mohabbat ki aisaa ik sher bhi ibaadat hai apni galiyon mein khauf hai 'aabid' ek ik ghar mein aaj mayyat hai"

"kitni sunsaan ye haveli hai is mein rahti bhi vo akeli hai ishq khairaat maangtaa huun magar khaali ab tak miri hatheli hai jaane kis khub-ru ne chuum liyaa aaj mahki hui chanbeli hai vo kabhi mujh se pyaar karti thi gham-zada aaj vo saheli hai dukh hamaaraa vo jaan paaegaa karb ki raat jis ne jheli hai koi 'aabid' samajh nahin paayaa zindagi aaj bhi paheli hai"

"qasmein vaade uThaa ke laaiye naan vaaste kuchh khudaa ke laaiye naan ham to un ke hi intizaar mein hain aap un ko bulaa ke laaiye naan aaj kuchh baat-chit karni hai aaj chaae banaa ke laaiye naan ab mujhe niind aa rahi hai bahut koi lori uThaa ke laaiye naan un ko mahsus karnaa chaahtaa huun jhonke baad-e-sabaa ke laaiye naan jin gulon se hai pyaar 'aabid' ko un ki khushbu churaa ke laaiye naan"

"ufuq par ik sitaaraa hai na jaane kyaa ishaara hai mohabbat mein munaafa kyaa khasaaraa hi khasaaraa hai dilon ki dhaDkanon par bhi tumhaaraa hi ijaara hai miraa kyaa jurm hai maulaa zamin par kyon utaaraa hai hami ne khuun de de kar chaman apnaa nikhaaraa hai mohabbat kar ke dekho to nasha kitnaa karaaraa hai miri tum maan lo 'aabid' tumhaaraa thaa tumhaaraa hai"

"aks teraa banaate rahte hain bas tamaasha banaate rahte hain ghar to mumkin nahin banaa paaein ghar kaa naqsha banaate rahte hain jin kaa koi nahin zamaane mein sab ko apnaa banaate rahte hain kyaa bataaein ki kyaa mashaaghil hain un kaa huliya banaate rahte hain justuju hai hamein bhi manzil ki apnaa rastaa banaate rahte hain ek chhoTi si baat par aksar log jhagDaa banaate rahte hain kitne be-dard hain mire aansu aankh dariyaa banaate rahte hain ishq mein niind aa bhi jaae agar khvaab chehraa banaate rahte hain log 'aabid' samajh ke basti ke mujh se naata banaate rahte hain"

"sabhi ko khvaab dikhlaae gae hain yahaan sab log bahkaae gae hain baDi mushkil se banvaae gae hain tujhe zevar jo pahnaae gae hain viraasat mein mile the jo asaase vo girvi aaj rakhvaae gae hain to kyaa un kaa khudaa koi nahin thaa kafan ke bin jo dafnaae gae hain unhein ab yaad kartaa hai zamaana jo divaaron mein chunvaae gae hain jo mere paas hain sheri asaase ye 'aabid' mujh se likhvaae gae hain"

"tujh se karni hai baat raste mein chal guzaarein ye raat raste mein kyaa kahaa us amir-zaade ki luT gai hai baraat raste mein ek jugnu bhi saath kar liije ho bhi sakti hai raat raste mein aaj us khub-ru ne aanaa hai ham lagaaeinge ghaat raste mein tab se tanhaa safar nahin karte jab se khaai hai maat raste mein vaqt kis saanahe pe le aaya aa gayaa hai furaat raste mein dars detaa rahaa sabaat kaa jo khud phire be-sabaat raste mein tum ne maktub mein likhaa 'aabid' takhti-e-dil davaat raste mein"

"jo tere shahr mein aaya huaa hai ajab ik lahr mein aaya huaa hai hamaare shahr par bhi rahm maulaa balaa ke qahr mein aaya huaa hai nai ik subh kaa hai pesh-khema andheraa dahr mein aaya huaa hai ye kaisaa ishq-o-masti kaa hai chakkar jo pichhle pahr mein aaya huaa hai to jo jo maangnaa hai maang liije qalandar lahr mein aaya huaa hai hamaari zindagi kaa kul asaasa tire haq-mehr mein aaya huaa hai"

"sabhi sapne adhure hain jahaan vaale adhure hain mohabbat ki kahaani ke sabhi hisse adhure hain na tere saath ho aisaa ki ham jitne adhure hain sune jo tere baare mein vo sab qisse adhure hain kahaani naa-mukammal hai kai fiqre adhure hain abhi tak gum-shuda hai vo abhi tak ham adhure hain binaa maan-baap ke jag mein sabhi bachche adhure hain tiri baatein adhuri thiin mire jumle adhure hain tiri tamsil ke 'aabid' kai nuqte adhure hain"