Ghazal

"musalsal aankh mein yuun aanaa jaanaa aansuon kaa hai miraa chehra hai aur mehmaan-khaana aansuon kaa hai bahut mushkil bayaan hai chashm-o-dil ke khuun hone kaa bahut aasaan palkon se giraanaa aansuon kaa hai paDe rahte hain us ki diid ke kuchh aks konon mein vagarna aankh mein saaraa Thikaana aansuon kaa hai faqat tajdid-e-nau ki baat hai har ahd mein varna tumhaare hijr se rishta puraanaa aansuon kaa hai bahut aasaan sahi daaman pe girnaa chand qatron kaa bahut mushkil sar-e-mizhgaan uThaanaa aansuon kaa hai khayaal-o-khvaab ko 'afroz' koi aa ke samjhaa de bulaanaa us ki yaadon kaa bulaanaa aansuon kaa hai"

"vo mahaktaa hai jo khushbu ke havaalon ki tarah is ko rakkhaa hai kitaabon mein gulaabon ki tarah vo jo khvaabon ke jazire mein nazar aataa hai mere idraak mein rahtaa hai kinaaron ki tarah ban ke ehsaas jo dhaDkan se lipaT jaataa hai saath rahtaa hai mohabbat mein khayaalon ki tarah dekhnaa khvaab ki surat mein nazar aaegaa vo jo palkon pe chamaktaa hai sitaaron ki tarah main ne khushbu ke libaade mein jise chumaa thaa meri har saans mein shaamil hai vo phulon ki tarah vo mire sher kaa ik misra-e-tar ho jaise gungunaati huun use aaj main giton ki tarah itni achchhi thi mulaaqaat ki pahle din hi dil mein 'afroz' basaayaa use sochon ki tarah"

"ban ban ke bigaDti hai miri baat to dekho is kucha-e-dil mein miri auqaat to dekho jo jism tamannaa mein sulagtaa hai tumhaari us jism mein hasrat bhari ik raat to dekho jis aankh ne dekhe the kabhi khvaab tumhaare us aankh se hoti hui barsaat to dekho ai vaqt-shanaaso ye kaDaa vaqt hai kaisaa ai dast-shanaaso miraa tum haat to dekho jis aankh mein hai khun-e-tamannaa miraa 'afroz' us aankh mein surme ki karaamaat to dekho"

"jin ke raston se sadaa main ne haTaae patthar vo mire sar ke liye DhunD ke laae patthar main ne dekhaa ki mire shisha-e-jaan par ik din tere kuche mein har ik samt se aae patthar main jise dekh ke haathon mein duaaein pahnun vo mujhe dekh ke haathon mein uThaae patthar jo mujhe tere taalluq se mile main ne vahi kabhi chume kabhi aankhon se lagaae patthar main use zakhm-e-mohabbat pe sajaa kar rakkhun dasht-e-ulfat se jo mere liye aae patthar teri aankhon ke taghaaful se tire pahlu mein jab mire khvaab nahaae to nahaae patthar us ki khushbu ki talab mein jo main ghar se nikli us ne phulon ki tarah mujh pe luTaae patthar vo hain phulon ki tarah meri nazar mein 'afroz' jitne bhi mere lahu mein hain nahaae patthar"

"jab tumhaare ishq mein main ne jalaain ungliyaan mere paagal-pan pe tum ne bhi uThaain ungliyaan chaahaton ke daaere jab be-nishaan hone lage phir mire khun-e-tamannaa mein nahaain ungliyaan raat phir aisaa huaa ki peD ke saae tale yaad aae tum tumhaari yaad aaiin ungliyaan chaahaton ke silsile jab darmiyaan baDhne lage us ne baalon mein mire apni ghumaain ungliyaan zindagi meri bhi us dam jhumne gaane lagi fart-e-ulfat se miri us ne dabaain ungliyaan jab mili tahrik mujh ko qaafiya-paimaai ki harf ki hurmat liye sajde ko aaiin ungliyaan sar-nigun kar ke jo pahunchi rauza-e-aqdas pe main jab duaa ko haath uThaae kapkapaain ungliyaan chashm-o-dil dekhaa kiye ki haath mein 'afroz' ki ungliyon se mil ke us ki jagmagaain ungliyaan"

"divaar ke hue to kabhi dar ke ho gae mere charaagh baad-e-sitamgar ke ho gae main is tarah se kucha-e-vahshat ki ho gai mallaah jis tarah se samundar ke ho gae us ke dil-o-nigaah kaa kis se karein gila us ke dil-o-nigaah to patthar ke ho gae jo mujh ko chaahte the kabhi sar se paanv tak dushman na jaane kyuun vo mire sar ke ho gae jo tere pairahan ki mahak le ke aai thi ham to usi havaa-e-moattar ke ho gae main teri khushbuon ki talabgaar jab hui tere chaman ke phuul bhi patthar ke ho gae ye kaisi gardishein hain ki arz-o-samaa pe aaj shams-o-qamar charaagh baraabar ke ho gae kheme jale charaagh bujhe aur is ke baad nezon pe sar-buland bahattar ke ho gae baarish ko baadalon ko samundar ko chhoD kar 'afroz' ham to saaqi-e-kausar ke ho gae"

"yuun sitam ki na intihaa kiije tauba kiije khudaa khudaa kiije pyaar mein kham hai ye sar-e-taslim aap ab jaaniye ki kyaa kiije qarz koi bhi ham nahin rakhte aap chaahat ki intihaa kiije toD kar shisha-e-yaqin meraa lutf-e-aazaar kuchh sivaa kiije khvaahishein dil mein jab sulagti hon kaise jiine kaa aasraa kiije jaan liije ki saath hai 'afroz' aap jab jab mujhe sadaa kiije"

"jitne hain rang-e-chaman rang-e-hinaa ho jaaeinge tum hamein dekhoge aur ham aaina ho jaaeinge khaak oDheinge phireinge ku-ba-ku aur us ke baa'd ham tiri furqat mein jaane kyaa se kyaa ho jaaeinge naqsh ban kar paaniyon mein Dubte hain jis tarah dekhnaa is tarah ik din ham fanaa ho jaaeinge maut ki aandhi chalegi aur phir mere charaagh dekhte hi dekhte nazr-e-havaa ho jaaeinge apni khushbuein utarne do hamaare jism mein phuul ki surat khileinge ham sabaa ho jaaeinge vasl ki shab jagmagaaegi dil-e-aflaak par chaand aur suraj tumhaare naqsh-e-paa ho jaaeinge dekh lenaa TuuT kar shaakh-e-shajar se ek din khushk patte aandhiyon ke ham-navaa ho jaaeinge ek din 'afroz' jitne bhi hain aahang-e-hayaat gumbad-e-jaan mein vo sab hi be-sadaa ho jaaeinge"

"yahi to meri vafaa kaa sila diyaa hai mujhe ki tum ne bhuul samajh kar bhulaa diyaa hai mujhe mire khayaal ki lau ko bujhaane vaalon ne charaagh-e-raah samajh kar jalaa diyaa hai mujhe kabhi to sar mein samaayaa junun ki surat kabhi ghubaar ki surat uDaa diyaa hai mujhe tumhaare qurb ki khvaahish ne daaman-e-shab par tumhaare vasl kaa muzhda sunaa diyaa hai mujhe main aaj dekh rahi huun ki tere kuche mein tiri talab ne fasaana banaa diyaa hai mujhe udaasiyon mein aTi shaam-e-gham ki chaukhaT par khayaal-e-yaar ne kitnaa rulaa diyaa hai mujhe jahaan bhi sham-e-mohabbat jalaai hai main ne havaa-e-gham ne vahin par bujhaa diyaa hai mujhe"

"ye khvaab jis ne dikhaae the ik safar ke mujhe vo ashk de gayaa aankhon mein umr bhar ke mujhe hai fan mein yaktaa vo sayyaad ho ki ho dilbar uDaan bharne ko kahtaa hai par katar ke mujhe kaThin thaa raasta dushvaar thi har ik manzil koi dikhaae usi raah se guzar ke mujhe main us ki khaas nazar se taDap taDap uTThun vo itne pyaar se dekhe Thahar Thahar ke mujhe zaraa si der Thaharne de ai gham-e-duniyaa zaraa saa dekh le vo bhi to aankh bhar ke mujhe mire khayaal ki uljhan kahaan sudharti hai gul-e-bahaar ne dekhaa hai phir sanvar ke mujhe sulag rahi huun main saanson ki tez bhaTTi mein pilaa rahaa hai vo ulfat ke jaam bhar ke mujhe vo shahd ghol rahaa hai samaaaton mein miri bulaa rahaa hai koi baam se utar ke mujhe dhaDak rahaa hai mohabbat mein dil miraa 'afroz' guzar rahi hain havaaein bhi pyaar kar ke mujhe"

"saahil se uThaa hai na samundar se uThaa hai jo shor miri zaat ke andar se uThaa hai dariyaa-e-mohabbat ke kinaare kabhi koi Duubaa hai jo ik baar muqaddar se uThaa hai vo aae to is khvaab ko taabir milegi jo khvaab-e-jazira mire saagar se uThaa hai main apne rag-o-pai mein use DhunD rahi huun jo shakhs abhi mere baraabar se uThaa hai raqsaan hai miri aankh mein ehsaas ki maanind manzar jo tiri aankh ke manzar se uThaa hai phulon ko tire rang ne bakhshi hai kahaani khushbu kaa fasaana tire paikar se uThaa hai is shahr-e-mohabbat mein vo ruktaa hi nahin hai jo shor tire pyaar ke mehvar se uThaa hai ye us kaa ravayya ye anaa ye lab-o-lahja in sab ke sabab amn-o-sukun ghar se uThaa hai mehr-o-mah-o-anjum mein use DhunDne vaalo ye saaraa jahaan khaak ke paikar se uThaa hai rahtaa hai miri aankh mein kaajal ki tarah se jo duur tamannaaon ke tevar se uThaa hai main dar se tire uTh ke isi soch mein gum huun kyaa koi khushi se bhi tire dar se uThaa hai jo us ki nazar se kabhi 'afroz' uThaa thaa is baar vo mahshar mire andar se uThaa hai"

"sar-e-divaar chunvaai gai huun kabhi hiron mein tulvaai gai huun main aurat thi sharik-e-takht kab thi so malika kah ke bulvaai gai huun mire paikar kaa thaa paiham taqaaza main har ik gaam bahkaai gai huun muqaddas hain sabhi rishte jo mere to kyuun baazaar mein laai gai huun miri har soch par pahre lage hain kahaan zi-aql kahlaai gai huun banaa kar aaina 'afroz' 'rizvi' hadaf patthar kaa Thahraai gai huun"

"tujh se taalluqaat ki tajdid ke liye main ne charaagh haath mein ummid ke liye phaili hai mere dil mein tire dil ki raushni lamhaat-e-fikriya hain ye khurshid ke liye ik sher tujh pe is tarah likkhun ki jis tarah momin kaa sher ghairat-e-naahid ke liye chheDaa hai ek naghma-e-shirin bhi ku-ba-ku dil ne hilaal-e-id ki taaid ke liye su-e-falak nazar jo uThi to vuzu kiyaa meri zabaan ne kalma-e-tauhid ke liye mere labon ne aaj qaside bahut paDhe apne khudaa-e-paak ki tamjid ke liye uTheinge aaj meri taraf jab tire qadam koi khabar na aaegi tardid ke liye dekhun tujhe to daaman-e-tausif kah uThe ik harf bhi mile nahin tanqid ke liye main sochti huun dasht-e-tamannaa mein aaj shab aankhein taras na jaaein tiri diid ke liye lekin mujhe yaqin hai tire aasmaan par utregi chaand raat miri iid ke liye"

"nigaah se bhi gae arz-e-haal se bhi gae vo barhami hai ki ham bol-chaal se bhi gae vo lafz jo main tiri aarzu mein likhti thi vo naqsh to miri lauh-e-khayaal se bhi gae misaal deti thi duniyaa bhi jis rifaaqat ki vo faasle hain ki ab is misaal se bhi gae vo taairaan-e-mohabbat jinhein falak na milaa uDaan bhar na sake aur Daal se bhi gae vo harf-e-marham-e-har-zakhm yaad the 'afroz' ab un ke baad to ham indimaal se bhi gae"

"aaine se tumhaari nazar der se mili mujh ko naved-e-shaam-o-sahar der se mili dariyaa-e-be-khudi ko bhanvar der se milaa paani ko saahilon ki khabar der se mili shaayad isi liye mujhe manzil na mil saki mujh ko tumhaari raahguzar der se mili be-khvaab raaston mein ye taabir-e-dard-e-dil mil to gai hai mujh ko magar der se mili un ko na mil saki tire ujle badan ki dhuup jin ko ziyaa-e-shams-o-qamar der se mili"

"tire khayaal ko mauj-e-ravaan banaate hue main paaniyon pe chali kashtiyaan banaate hue mire vajud ke saahil pe khvaab bunte hain tumhaare haath shab-e-mehrbaan banaate hue tumhaare saath rifaaqat ke khvaab bunti huun main taaeron ke liye aashiyaan banaate hue zamin se itni mohabbat hai mujh ko main har pal zamin banaati rahi aasmaan banaate hue rah-e-vafaa mein tiri bevafaai ki had tak main dhuup dhuup hui saaebaan banaate hue"

"azal se le ke abad tak charaagh-e-faani huun havaa ke dosh pe likkhi hui kahaani huun tu jaantaa hai miri be-ghari ke qisse ko main laa-makaan se makaan tak tiri kahaani huun main raushni huun main khushbu huun mujh ko dekho to kahin charaagh kahin raat ki main raani huun main baadalon mein chhupi rahmat-e-khudaavandi kahin ghaTaa to kahin baarishon kaa paani huun vo jis ne mujh ko paDhaa hai varaq varaq 'afroz' usi ki zaat mein main gum-shuda kahaani huun"

"saari bazm-e-talab tumhaari hai din tumhaaraa hai shab tumhaari hai shaakh-e-jaan pe ye pyaar ki shabnam pahle meri thi ab tumhaari hai meri saanson mein vasl ki khushbu jitni hai sab ki sab tumhaari hai ye jo ik be-khudi kaa dariyaa hai is mein mauj-e-tarab tumhaari hai sochti huun ki ye badan ki mahak kab nahin aur kab tumhaari hai nashsha-e-chashm-o-lab tumhaaraa hai shaakh-e-bint-e-inab tumhaari hai raushni mahtaab se baDh kar dil mein shaah-e-arab tumhaari hai tum ne sochaa hai ye kabhi 'afroz' zindagi be-sabab tumhaari hai"

"dekhne mein jo lage shaam-o-sahar ke saathi vo to saathi the faqat raahguzar ke saathi ab kahaan hain vo mire ashk pirone vaale ab kahaan hain vo mire dida-e-tar ke saathi tum ko dekhaa to mire dil ne kahaa tum hi to ho zakhm-e-dil zakhm-e-jigar zakhm-e-nazar ke saathi is mein kyaa shak zaman-afroz rahaa hai ye kalaam ham bhi rahte hain mudaam ahl-e-nazar ke saathi main akeli hi chali jaanib-e-manzil 'afroz' ham-safar Thahre mire sirf safar ke saathi"