Ghazal

"subh-e-nau koi dam mein jagmagaane vaali hai raat se na ghabraao raat jaane vaali hai baaghbaan ke tevar se jhaankte hain andeshe fasl-e-gul na jaane kyaa gul khilaane vaali hai kitne haadson ko ham kar chuke hain sharminda zindagi hamein kab tak aazmaane vaali hai zindagi ko nafrat kaa zahr kyon pilaate ho zindagi mohabbat ke giit gaane vaali hai un ki chashm-e-mast 'akhtar' tishnigaan-e-ulfat ko mast karne vaali hai ras pilaane vaali hai"

"hayaat aaj giraan ho gai sabhi ke liye taras rahaa hai har insaan zindagi ke liye nashaat-e-zist ki takmil ho nahin sakti tumhaaraa dard zaruri hai zindagi ke liye riyaa numud-o-numaaish kahaan ibaadat mein khulus-e-qalb zaruri hai bandagi ke liye agar hon qalb mein ehsaas ke diye raushan bahut se raaste milte hain shaaeri ke liye sukhanvaraan-e-dakan muttafiq hain sab 'akhtar' ‘safi' ghazal ke liye thaa ghazal ‘safi' ke liye"

"nahin milte jahaan mein zakhm-e-pinhaan dekhne vaale bahut mil jaaeinge chaak-e-garebaan dekhne vaale khudaa jaane ye kyaa taasir hai zulf-e-pareshaan mein pareshaan hain tiri zulf-e-pareshaan dekhne vaale nazar ke hosh uD jaate hain baaz-auqaat ujaale mein nazar rakkhein andhere mein charaaghaan dekhne vaale tumhein tufaan se kyaa nisbat tumhein saahil pe rahnaa hai salaamat hain abhi ham zor-e-tufaan dekhne vaale yahaan insaaniyat ki nabz hai bechain rukne ko khudaa jaane kahaan hain nabz-e-dauraan dekhne vaale dil-e-pur-dard mein kuchh daagh raushan ham bhi rakhte hain idhar aaein zaraa bazm-e-charaaghaan dekhne vaale tasavvur mein safar nazron kaa kis se tai huaa 'akhtar' kahaan hain un ko nazdik-e-rag-e-jaan dekhne vaale"

"majbur-e-shab ko subh kaa mukhtaar dekh kar hairaan hai aql vaqt ki raftaar dekh kar bimaar ko hai aap ke aane kaa intizaar sab ro rahe hain haalat-e-bimaar dekh kar ahbaab ki tasalliyaan khud zakhm ban gaiin ghabraa rahaa huun kasrat-e-gham-khvaar dekh kar anjaam-e-fasl-e-gul pe hai meri nigaah dost khuun ro rahaa huun rang-e-chaman-zaar dekh kar kis ne falak kaa chaand zamin par bichhaa diyaa aaya khayaal rahguzar-e-yaar dekh kar shabnam ho jaise daaman-e-nargis mein khanda-zan samjhaa main un ki chashm-e-guhar-baar dekh kar phir mere ghaur-o-fikr ki qismat jagaa bhi de muddat hui hai tujh ko ziyaa-baar dekh kar 'akhtar' sukun-e-dil ke sivaa thi har ek shai ham lauT aae raunaq-e-baazaar dekh kar"

"gham tabassum mein jo Dhal jaataa hai gham kaa mafhum badal jaataa hai ham ne dekhaa hai yahi har haasid apni hi aag mein jal jaataa hai koi maqsad ho ravaabit kaa agar rabt har rukh se badal jaataa hai aur ho jaataa hai ehsaas shadid naghma jab dard mein Dhal jaataa hai zindagi kyaa tire divaane ki daaman-e-gham mein bhi pal jaataa hai ab na farmaaiye taakhir-e-karam dekhiye vaqt nikal jaataa hai us taraqqi ko salaam ai 'akhtar' jis mein sab lutf-e-ghazal jaataa hai"

"kyaa kuchh milaa na ham ko mahrumi-e-nazar se kuchh daav mustanad se kuchh zakhm mo'atabar se chheDo na saaz dil kaa sahmi hui nazar se baDhti hai be-qaraari taskin-e-mukhtasar se kitni badal gai hain insaaniyat ki qadrein ham zindagi ke haathon khud zindagi ko tarse kitni buland himmat hain zindagi ki nazrein Takraa rahi hain baDh kar ab vaqt ki nazar se kaam aai apne 'akhtar' divaangi khud apni bach bach ke chal rahe hain har ek ki nazar se"

"manzar-e-shaam-e-alam bhi nahin dekhe jaate kyaa sitam hai ki sitam bhi nahin dekhe jaate ahl-e-gham apni tabiat se hain majbur bahut tere andaaz-e-karam bhi nahin dekhe jaate itni ujlat se jabin jhukti hai sajde ke liye aankh se naqsh-e-qadam bhi nahin dekhe jaate kam-nigaahi bhi musibat hai sharifon ke liye band muTThi ke bharam bhi nahin dekhe jaate tabsira karte hain kyon log miri haalat par jaane kyon un ke karam bhi nahin dekhe jaate un ki manzil ki taraf baDhte hain jis dam 'akhtar' raah mein dair-o-haram bhi nahin dekhe jaate"

"nigaahon hi nigaahon mein ishaare hote jaate hain vo ab aahista aahista hamaare hote jaate hain jo zaahir husn ke rangin nazaare hote jaate hain nigaah-e-shauq mein vo aur pyaare hote jaate hain khudaa rakkhe havaadis ko talaatum ko masaaib ko hamaari zindagaani ke sahaare hote jaate hain tumhaare gham ne aisaa ehtiraam-e-gham sikhaayaa hai ki duniyaa bhar ke gham saare hamaare hote jaate hain tasalli bhi baDi mushkil se milti hai tasavvur mein ghalat-fahmi salaamat vo hamaare hote jaate hain jahaan soz-e-gham-e-furqat fazaa-e-dil ko jhulsaa de vahaan khush-rang aansu bhi sharaare hote jaate hain tire jalvon ne aisi tarbiyat di hai nigaahon ko nazar mein jazb ab saare nazaare hote jaate hain gudaaz-e-qalb ki daulat ataa ki hai mohabbat ne bahut shaaista tere gham ke maare hote jaate hain koi shai jal rahi hai ghaaliban siine mein ai 'akhtar' ki mere shabnami aansu sharaare hote jaate hain"

"pahle andaaz-e-guftugu aae phir koi un ke ru-ba-ru aae teri yaad aai is tarah ai dost teri zulfon ki jaise bu aae mujh ko be-saakhta hansi aai haadse jab bhi ru-ba-ru aae jal rahe hain charaagh palkon par aise aalam mein kaash tu aae DhunDne tujh ko tere kuche mein kitne hi ahl-e-justuju aae paaki-e-zehn-o-dil hi sab kuchh hai vaise kitne hi baa-vazu aae be-gharaz tere dar pe kaun aaya sab asiraan-e-aarzu aae mil gai hai nigaah saaqi se daur mein saaghar-o-subu aae Duub kar teri yaad mein 'akhtar' har bulandi ko ham bhi chhu aae"