Ghazal

"guftugu ek pal ruki bhi nahin baat karni thi jo hui bhi nahin aise dekho to sab adhuraa hai vaise dekho to kuchh kami bhi nahin ham bujhaaeinge ham bujhaaeinge aag jo Thiik se lagi bhi nahin mujh se ik shikva hai zamaane ko chaal puchhi bhi aur chali bhi nahin rabt TuuTaa to TuuT jaane diyaa jism ke saath ruuh thi bhi nahin ham aur aap ik ghazal kaa charba hain vo ghazal jo abhi hui bhi nahin"

"dikhaai ek se deinge so karnaa sun ke alag vo apni dhun ke alag hain ham apni dhun ke alag ham aise log qabaaein hain baDhte bachchon ki ki jin ko rakh diyaa jaataa hai pahle bun ke alag isi liye to judaai bhi khush-gavaar rahi bahut se gham the hamaare alag aur un ke alag ye naasehon ko main ab faarsi mein samjhaaun 'azaab kun ke alag hote hain makun ke alag unhin ke saath main kartaa huun ab jugalbandi kuchh ek log jo hote hain apni dhun ke alag gulon ko raundne vaalo unhein bhi yaad karo jo log kar gae talvon se khaar chun ke alag dil ik parinda hai khuraak us ki ek si rakh vagarna baarhaa maangegaa daane dunke alag jo guzri daane pe daana hi jaantaa hai 'amit' bhunaa hai ho ke alag yaa huaa hai bhun ke alag"

"daraa daraa ke mire saare Dar nikaaltaa hai 'ajab ‘ilaaj miraa chaaraagar nikaaltaa hai adhure-pan ki mukammal dalil huun lekin kasar nikaalne vaalaa kasar nikaaltaa hai tiraa khudaa bhi ho tujh jaisaa aur de tujh ko darakht aisaa jo gin kar samar nikaaltaa hai saron pe haath zehaanat baDhaa nahin saktaa ye aur baat ki andar kaa Dar nikaaltaa hai kisi ki yaad bhi ab taa-sahar nahin rahti khayaal hai ki pahar-do-pahar nikaaltaa hai fazaa koi bhi ho fitrat badal nahin sakti qafas mein qaid parinda bhi par nikaaltaa hai vo ghair mausami barsaat yaad hai tum ko aur ek shakhs jo khiDki se sar nikaaltaa hai 'amit' vo kaar-e-siyaasat ke masale ye hujum jo hal nikaal na paae khabar nikaaltaa hai"

"jahaan raas mujhe aa gayaa jahaan ko main so moDtaa huun ab apni taraf kamaan ko main miri zamin ko jaise usi ne chhinaa ho kabhi kabhi to yuun taktaa huun aasmaan ko main yaqin kar ki tiri be-rukhi se pahle bhi kabhi bharaa nahin rakhtaa thaa phul-daan ko main zaraa si dhuup zaruri hai har kisi ke liye yahi bataa nahin paataa huun saaebaan ko main us ek lamhe mujhe yaad kyon nahin rahtaa adhuraa chhoD bhi saktaa huun imtihaan ko main khudaa kare koi kirdaar aisaa mil jaae ki daastaan mujhe khinche daastaan ko main 'amit-bajaaj’ ye fe’lun mafaa’ilun kyaa hai nahin samajhtaa hunar aisi khinch-taan ko main"

"phuul us kaa istiaaraa thaa kabhi rang-o-bu ko ik sahaaraa thaa kabhi baarishein kahti hain biitaa kal miraa ye samandar paara-paara thaa kabhi vaqt ne ki ahmiyat kam vaqt ki ye zaraa saa kitnaa saaraa thaa kabhi chaar din bharpur ji aur phir bataa kyaa guzaare par guzaaraa thaa kabhi ab jo aayaa hai main us se kyaa kahun main ne kis kis ko pukaaraa thaa kabhi aaj bhi jiitaa huun bas ye soch kar us ne sab kuchh mujh pe haaraa thaa kabhi chhuT gayaa sab kuchh par itnaa yaad hai kyaa nahin thaa kyaa hamaaraa thaa kabhi kam-nazar har daur mein kahte hain ye kyaa nazar thi kyaa nazaaraa thaa kabhi aasraa paataa rahaa jitnaa 'amit' kyaa tu itnaa be-sahaaraa thaa kabhi"

"mah-paaron ke maare sun kyaa kahte hain taare sun she'r nahin ye shikve hain sunne hain to saare sun 'ishq ki dastak ko pahchaan dhaDkan ke naqqaare sun ye jhankaar hai patthar ki o nadiyaa ke dhaare sun ik ik raushan mahfil mein gunjte hain andhiyaare sun 'amit' kisi kaa ho chaahe jab vo naam pukaare sun"

"kaisaa jaadu kaisaa fitna dhyaan mein rakkhaa gayaa dil mein kyaa aayaa ki dil insaan mein rakkhaa gayaa baavajud is ke ki kuchh le kar nahin jaaungaa main jaane kyaa kyaa kuchh mire saamaan mein rakhaa gayaa so saraabon kaa bharam rakhne ki khaatir yuun huaa ek nakhlistaan registaan mein rakkhaa gayaa raat-bhar jab royaa panchhi kaali chhat ko dekh kar ek niilaa aasmaan zindaan mein rakkhaa gayaa khaali kamre aur bhi chhoTe nazar aane lage jaise hi har chiiz ko daalaan mein rakkhaa gayaa jo nahin thaa kaam kaa vo ghar mein hi rakhnaa paDaa kaam ke saamaan ko dukaan mein rakkhaa gayaa naam sunte hi kisi kaa muskuraa detaa thaa vo zikr meraa bhi usi muskaan mein rakkhaa gayaa faaeda hote hi chal detaa main aisaa thaa nahin phir bhi jaane kyon mujhe nuqsaan mein rakkhaa gayaa us se thi ummid sochegaa mire baare mein bhi so usi ki sharton ko paimaan mein rakkhaa gayaa"

"kis kis ko nazr kartaa rahaa huun ye fan tamaam hotaa hai par sukhan ke liye hi sukhan tamaam kuchh log kam-nazar hain kuchh apnaa hunar bhi hai lau bhar dikhaai deti hai sab ko jalan tamaam 'aql-o-khirad ke bas mein nahin aa sakeinge ham divane-pan se hotaa hai divaana-pan tamaam ik khauf-e-mushtarak kaa hai ye jashn aur kyaa aamad kisi ki bhi ho chahaktaa hai ban tamaam ham band kar chuke hain faqat phuul bechnaa kaanTe kharid lijiye yaa phir chaman tamaam"

"lafzon mein aasaani rakh she'r magar ‘irfaani rakh itnaa dhoka chaltaa hai aankhon mein naadaani rakh pahle-pahal sab achchhaa thaa kuchh kuchh yaad puraani rakh dhyaan haTaa ab honTon se qadmon par peshaani rakh kuchh bhi nahin hai manzar mein aankhon mein hairaani rakh bhuuk aur pyaas na miTne paae itnaa daana paani rakh saa se kaam chalaa lungaa re gaa maa paa dhaa ni rakh halke halke qadam baDhaa sar par be-saamaani rakh har shai mein maujud hai jo us ki ek nishaani rakh 'amit' bulaae vo har baar itni aanaa-kaani rakh"

"kahaani ishq ki yaani yahi hai yahi hai aag aur paani yahi hai main kartaa aayaa huun bas tere man ki mujhe lagtaa thaa man maani yahi hai vo manzar khush hon jis se saare naazir badal jaataa hai hairaani yahi hai tire rukh se nahin haTte kisi taur nigaahon ki nigahbaani yahi hai bahut mushkil thaa us ko bhuul jaanaa main mushkil mein huun aasaani yahi hai"

"ye un ki aankhon mein aksar dikhaai detaa hai ki ham ko aap se behtar dikhaai detaa hai ajiib hain miri aankhein usi ko DhunDhti hain jo band aankhon se behtar dikhaai detaa hai jise nikaal ke laae the raushni mein ham ab us kaa saaya bhi ham par dikhaai detaa hai chhupegaa kyon koi apni banaai duniyaa se dikhaai detaa hai aksar dikhaai detaa hai kabhi kabhi main ye aankhein amal mein laataa huun ziyaada-tar mujhe chhu kar dikhaai detaa hai"

"be-intihaa ho qurb magar is qadar na ho ham jis pe mar rahe hain usi ko khabar na ho mauhum si sadaa ho magar gunjti rahe ik aam si du'aa ho magar be-asar na ho shaanon kaa zikr hote hi sar DhunDte hain log sar-garmi-e-jahaan ki itni khabar na ho shaa'ir hi khinch saktaa hai paani pe vo lakir aisi ki ek buund idhar se udhar na ho bas do hi suraton mein nigaahein hain mutmain un par nazar rahe yaa kisi par nazar na ho kis chaand ne kahaa thaa ki raaton ko jaagiye kab dhuup ne kahaa thaa ki sar par shajar na ho is gumrahi mein DhunD nai manzilein 'amit' aglaa qadam vahaan ho jahaan rah-guzar na ho"

"kis ko kis kaa saath nibhaanaa hotaa hai vaqt ki rau kaa sirf bahaanaa hotaa hai pahle ek tajassus bantaa hai ham ko phir haalaat kaa taanaa-baanaa hotaa hai main bachchon ki baatein ghaur se suntaa huun in baaton se zehn siyaanaa hotaa hai dhaDkan to bas siine kaa dil rakhti hai dil kaa koi aur Thikaanaa hotaa hai ek haqiqat ki bas ek jhalak ke liye kitne khvaabon ko Takraanaa hotaa hai ham jal kar atraaf ko raushan karte hain un ko bas khiDki tak aanaa hotaa hai"

"na khonaa aur na paanaa chaahiye thaa mujhe kuchh darmiyaana chaahiye thaa mire aage the duniyaa ke savaalaat tumhein hi aage aanaa chaahiye thaa mile bebaak jaise kuchh nahin ho zaraa saa hichkichaanaa chaahiye thaa ghazal main kah chukaa thaa jab tum aae tumhein matlea mein aanaa chaahiye thaa samay ke saath bhar jaataa hai har zakhm samay se bhaag jaanaa chaahiye thaa khaton kaa kyaa thaa bah jaate nadi mein tumhein to bas bahaana chaahiye thaa"

"yahi kaheinge sabhi ghar ko ghar samajhte hain ye jhuuT vo hai jise baam-o-dar samajhte hain basaa basaayaa koi is taraf to aataa nahin jo laa-makaan hain vahi dil ko ghar samajhte hain main aise dasht-navardon ko saath rakhtaa huun kitaab paDh ke jo apnaa safar samajhte hain ye aasmaan unhin sar-phiron se sar hogaa tasavvuraat ko jo baal-o-par samajhte hain jo naa-samajh hain uThaate hain zindagi ke maze samajhne vaale to bas 'umr-bhar samajhte hain shajar shajar se main letaa huun mashvara har gaam vo chal na paaein magar rah-guzar samajhte hain 'amit-bajaaj' koi Dar ko jiit paayaa kyaa vo kaamyaab hain jo apnaa Dar samajhte hain"

"vahi safar jo pas-e-kaarvaan nahin hotaa miraa safar hai kabhi raaegaan nahin hotaa main chaahtaa huun ki armaan dastaras mein rahein mujhe pataa hai ki baam aasmaan nahin hotaa hazaar chikhon mein suntaa huun us ki khaamoshi koi bhi zakhm kabhi be-zabaan nahin hotaa agar vo dariyaa tire shahr se guzartaa nahin ravaan to hotaa par itnaa ravaan nahin hotaa main aise jaltaa huun jaise ki bujh rahaa ho koi tu aisi aag hai jis kaa dhuaan nahin hotaa"

"baaghbaan itnaa to naadaan nahin ho saktaa koi ik phuul gulistaan nahin ho saktaa aur bhi logon ki ummidein hain mujh se so main kaam aa saktaa huun qurbaan nahin ho saktaa baarhaa aankhon ne dekhaa hai vahi sab hote jis kaa sunte the ki imkaan nahin ho saktaa koi qissa ho mire dost adhuraa na sunaa shahr ik din mein bayaabaan nahin ho saktaa sair-e-duniyaa se bharam hotaa hai aazaadi kaa jis mein vus'at ho vo zindaan nahin ho saktaa aisaa aasaan hadaf sab ki nazar ho jis par kuchh bhi ho saktaa hai aasaan nahin ho saktaa jise dekho vahi sahraa kaa talabgaar hai ab itnaa dilkash hai to viraan nahin ho saktaa"

"fitratan laazim hai ham par pahle paani DhunDhnaa pyaas bujh jaae to phir tishna-dahaani DhunDhnaa ek-tarfa 'ishq kyaa hai kyaa hai zauq-e-shaa’iri dusre ke lafzon mein apne ma'aani DhunDhnaa koshishein karte raho lekin ye mumkin to nahin saath chalnaa sab ke aur apni ravaani DhunDhnaa chain se rahtaa huun to bechain ho uThtaa hai dil kis ne sikhlaayaa hai dil ko sakht-jaani DhunDhnaa raat-din bas dekhte rahnaa kisi tasvir ko raat-din khaamoshiyon ki tarjumaani DhunDhnaa khud-gharaz kaise nahin huun aap hi farmaaiye sab kaa qissa sunnaa aur apni kahaani DhunDhnaa ye junun hai yaa himaaqat kaun batlaae 'amit' qaid ho jaanaa makaan mein laa-makaani DhunDhnaa"

"kyaa koi samjhe mire haalaat jab kahtaa huun main ik musalsal raushni ke saae mein rahtaa huun main jab havaa chalti hai uDtaa huun mukhaalif samt mein aur jab tham jaae tab apni taraf bahtaa huun main tere mere lahje kaa ye farq kitnaa saaf hai tu mujhe kahti hai tu aur main tujhe kahtaa huun main aap se main khush huun to ye aap par ehsaan hai ik aziyyat hai khushi bhi hans ke jo sahtaa huun main shaam ke Dhalne se pahle main kabhi piitaa nahin ye bhi sach hai dopahar se tishna-lab rahtaa huun main kuza-gar ye sochtaa hai ye usi kaa kaam hai is saliqe se kabhi bantaa kabhi Dhahtaa huun main"

"ik khvaab musalsal thaa ki khultaa hi nahin thaa kyaa peD thaa jis kaa koi saaya hi nahin thaa vo dard uThaa aaj ki dil baiTh rahaa hai kashti hui tayyaar to dariyaa hi nahin thaa maathe pe shikan koi na ehsaas-e-nadaamat vo kaTte saron ko kabhi gintaa hi nahin thaa ab jaan pe ban aai to ehsaas huaa hai jo dekh rahe the vo tamaashaa hi nahin thaa sadiyon ki vafaaon pe musallat rahaa har dam ik lamha-e-inkaar jo guzraa hi nahin thaa"

"na zamin thi hamaari na hi aasmaan hamaaraa mile aap jab huaa hai ye jahaan jahaan hamaaraa baDe haq se mere dil pe vo hatheli rakh ke bole ki jahaan jahaan se dhaDkaa ye vahaan vahaan hamaaraa use shak thaa har pal us ko ye jahaan parakh rahaa hai isi kashmakash mein letaa rahaa imtihaan hamaaraa jo zabaan khule to rishton ki lagaam chhuTti hai jise kah diyaa ho apnaa vo rahaa kahaan hamaaraa sabhi saath chalne vaalon ki alag alag thi manzil vahaan rukte hain jahaan se chalaa kaarvaan hamaaraa"

"ham pyaas ke maaron kaa is tarah guzaaraa hai aankhon mein nadi lekin haathon mein kinaara hai do chaar qadam chal kar do chaar ghaDi ruknaa manzil bhi tumhaari hai rasta bhi tumhaaraa hai palkon ke nasheman se honTon ke gulistaan tak kuchh husn tumhaaraa hai kuchh ishq hamaaraa hai phulon ke mahakne kaa koi to sabab hogaa yaa zulf pareshaan hai yaa lab kaa ishaara hai barfaab si duniyaa mein bas ishq ko thaamein rakh ye aag kaa dariyaa hi tinke kaa sahaaraa hai ai pir-e-mughaan tere maikhaane mein to ham ne ik mai hi nahin pi hai jivan bhi guzaaraa hai ye shai jo shab-e-hijraan jalti hai na bujhti hai ab aa ke tumhin dekho jugnu hai ki taaraa hai"

"shikasta-dil sajaayaa jaa rahaa hai lahu se gul banaayaa jaa rahaa hai hai siili miTTi ki khushbu fazaa mein hamaaraa dil jalaayaa jaa rahaa hai nahin rahnaa mujhe apnon ke dil mein baDaa bhaari kiraaya jaa rahaa hai mohabbat ko ham apnaa farz samjhe hamein farzi bataayaa jaa rahaa hai khudaa-e-ishq kaa meaar alag thaa so khud ko phir banaayaa jaa rahaa hai mile the chand jiine ke bahaane bahaanon ko nibhaayaa jaa rahaa hai"

"liye jaa bas apni nazar jaane vaale na kar raahbar raahbar jaane vaale qayaamat kaa hogaa vo manzar jahaan tak pahunchte hain sab be-nazar jaane vaale ye kyaa mujh mein aisaa nazar aa gayaa hai kidhar aa rahe hain kidhar jaane vaale Thahar kar chaleinge sunaa hai yahaan se guzarte nahin sab guzar jaane vaale rahi ham-safar ik sadaa-e-musalsal Thahar jaane vaale Thahar jaane vaale mohabbat kaa aaghaaz hai choT khaa le mileinge abhi zakhm bhar jaane vaale 'amit' aise dar se guzarnaa hai behtar jahaan dar-guzar hon Thahar jaane vaale"